Gálatas 2 - Biblia Mixe de Quetzaltepec

Ko ijxpëjkpëtëjk tkupëktë ja Pablo

¹ Kommajmajkts jëmëjt ojts nnëjkxyës jatëkok jam Jerusalén mëët ja Bernabé ets nwoowës yë Tito.

² Paatyës ojts jam nnëjkxy jä'ä ko tëëjës ënäty ja Tiosën xytyuk'ixyës etsës jam nëjkxtë. Jamës ojts ntuk'ëwaanëtë ja naax kajpn ja oy aaw oy ayuk mëti'ipës nkajpxwä'kxypyën ma ja ja'ayëtyën ka'apë jyutiis ja'ay'atën. Ets ojts näjyëtu'un ntukmëmëtya'aktës ëpëky ja kutuunktëjkëty ets ja mëjja'aytyëjkëty jampë yajpaatën ets nijawëtëty yajxon ko ja ntuunkës mëti'ipës ntuunk'ajtypyën ka'ap nëkoo nyatëkë'aty.

³ Yë'ëpaat ja Tito, oy griego ja'ayëty, mëti'ipës ënäty jam mmëëtën, ka'ap ojts yajtuk'atsip'aty ets yajnatsujk'ëwtitëty ja ye'etyëjkajtën.

⁴ E jam ja ja'ayëty ënäty jënaakën mëti'ipë nätyijëtëpën ko myëpëktë, jä'ä ënäty të tyëkëtë ayu'utsy ma ëëtsëtyën ets t'ixa'antë wi'ix tii yajtunyën ko nyajpatëmë ëwaatsëtum ma ja Kristë yajmëpëkyën; yë'ë tsyojktëp ets atsip ëëts npatuntëty jatëkok ja Moisés ja y'ënä'ämën.

⁵ Niwi'ix'äämpy ëëts ya'atë ijxpëjkën ojts nkakupëktë, jä'ä ko jä'äs ntsojktëp ets ja mëtëypyë aaw ayuk wyë'ëmëty ma miitsëtyën.

⁶ Ka'ap ojts tii jempyë ijxpëjkën xymyo'otës mëti'ipë ja kutujkën myëët'ajtypyën; oyës ënäty ka'ap yë'ëjëty nijawëja'any tii tyuunk'ajtëp, jä'ä ko Tios ka'ap yë'ë tmëjpëjktä'äky wi'ix pën y'ixëtyën.

⁷ Ni'ikyë ojts t'oy'ixtë ko ja Tios ënäty të xytyuknipëkyës ja tuunk etsës nkajpxwa'kxëty ja oy aaw oy ayuk ma ja ja'ayëtyën ka'apë jyutiis'atën jëtu'un ijxtëm ja Pedro ojts yajtuknipëkyën ets ja oy aaw oy ayuk tkajpxwa'kxëty ma ja jutiistëjkëtyën.

⁸ Jëtu'un ijxtëm ja Tios ojts ja Pedro kyexyën tuunpë ma ja jutiis ja'ayëtyën, nän jëtu'unës ëjts ja Tios të xykyexy tuunpë ma ja ja'ayëtyën ka'apë jyutiis'atën.

⁹ Paaty ja Santiagë, Pedro ets ja Juan, mëti'ipë ijty yajtijtëpën ko jam tnikopk'atë ja mëpëjkpëtëjk, yë'ë ojts tnijawëtë ko Tios ënäty të tuny ja mëyajtën etsës xykyupëktëty, ëjts ets ja Bernabé. Jä'äkyëjxm ets yaj'ix yajnijawëty koos ënäty të xykyupëktë ijxtëm ja myëku'ukëtyën ënät ojts tkäjpxy'atë etsës nëjkx ntuntë ma ja ja'ayëtyën ka'apë jyutiis'atën ets yë'ëjëty ojts wyë'ëmtë tuunpë ma ja jutiis ja'ayëtyën.

¹⁰ Je'eyëp ko yë'ëjës ojts xytyuknipëktë etsës xëmë nja'amyätstëty ja ëyoopëja'ayëty; mëti'ipë oykyëwent'aty xëmë të nmëmay të nmëtajyënës.

Ko ja Pablo t'ojy ja Pedro jam Antioquía

¹¹ Ko ja Pedro ojts nyijkx jam Antioquía, ojtsës nwinkukajpxë wiinxë jëjpxë, jä'ä ko tëkatsy ënäty winë të tuny.

¹² Më''ëka'any kääpy ukp ijty mëët ja ja'ay ka'apë jyutiisëty, ko myiintë ja Santiagë ja jyä'äyëty; tääts ojts tpuwa'ktu'uty ja mëti'ipë ka'ap jyutiis'atën ets ka'ap mëët y'ëk'kaay y'ëk'uknë, jä'ä ko tsyë'këp ja ja'ayëty mëti'ipë ënantëpën ko kopkpëky ko yajnatsujk'ëwëtitëty ja ye'etyëjkajtën.

¹³ Ja wiinkëtypë ja jutiis mëpëjkpëtëjkëty ka'ap oy t'ijxtë ko jëtu'un ja Pedro y'ëti'itsy, yë'ëpaat ja Bernabé ojts jëtu'un y'ëtëtstä'äky.

¹⁴ Paaty koos jëtu'un n'ijxy ko ka'ap tuny ijxtëm ja oy aaw oy ayuk ni'ënä'ämën ënät ojts n'ënëëmës ja Pedro mëpëjkpëtëjk wyintuuy: Mijts, mjajutiis ja'ay, jëtu'un mjuuky'äty ijxtëm jeexyë ka'ap mjutiisëty; ¿tii ko yë ja'ay xy'atsip'aty mëti'ipë ka'ap jyutiisëty ets xytyukpaatuna'any ja jutiis ja'ay ja wyinma'any?

Jutiis ets mëti'ipë ka'ap jyutiisëty paat'ajtëtëp ja nitsokën ko myëpëktë

¹⁵ Jutiiyë ja'ay ëëts'ajtëmë, jëtu'un të nmëxu'unk'ajtëmë, ka'ap nyajtijëm pokyjyä'äy ijxtëm ja mëti'ipë ka'ap jyutiisëty.

¹⁶ Nnija'awëm ëëtsajtëm ko ka'ap pën oy wyi'im ma ja Tiosën Moisés y'ënä'ämënkyëjxm; jä'äkyëjxm ja ja'ay oy wyi'im mëët ja Tios ko ja Kristë tmëpëky. Paaty näjyëtu'un ja Kristë të nmëpëjkëmë ets oy nwë'ëmëty mëët ja Tios, ka'ap yë'ëkyëjxmëty ko npatu'unëm ja Moisés ja y'ënä'ämën, jä'ä ko ka'ap pën oy wyi'im mëët ja Tiosën ko ja Moisés ja y'ënä'ämën yajpatuny.

¹⁷ Ko n'ixtä'ämyëty ets oy nwë'ëmëty mëët ja Tios ma Kristë yajmëpëkyën, jëtu'un nyikëxë'ëky ko pokyjyä'äy ëëts'ajtëmë. ¿Ëkë wä'än jëtu'un yajja'akyukë ko Kristë ni'ikyë xyajpokytyëjkëmë? Niwi'ix'äämpy.

¹⁸ Pën tëë tii tyajkutëkoy ets ok jatëkok tkoj'oyë, ëjts nän pokymyëëtës nwë'ëmy.

¹⁹ Jä'ä ko mëët ja ënä'ämën ëjts ookyës nyajpaaty etsës ja Tios yë'ë xyajjuuky'atëty. Tëës ja Kristë mëët nkruutspety,

²⁰ ka'ap y'ëjtsëty n'ëkjuuky'ajnë, Kristë juuky'ajnëp maas ja njot nwinma'anyën. Ja juukyajtën mëti'ipës ja nnini'kx tyuk'oy'äjtypyën, paaty jyuuky'äty jä'äs ko nmëpëky ja Tios ja y'U'unk, mëti'ipës të xytsyokyën etsës të xykyu'oo'kë.

²¹ Ka'apës n'ixtija'any ja Tios ja y'oyjyot y'oywyinma'any; ko jeexyë oy n'ëkwë'ëwëm mëët ja Tios ko ja Moisés ja y'ënä'ämën yajpatuny, natëkë jeexyë të y'ooky ja Kristë.