Ezequiel 4 - Biblia Mixe de Quetzaltepec

Ma ja Ezequiel t'akäjpxyën ko ja Jerusalén yajnitëkëja'any

¹ E mijts, ye'etyëjk, koonë'ëk tu'uk yë muutsy ets xykyoonta'akëty mijts mwintuuy, jam xyajnikojtu'utëty yë Jerusalén kajpn.

² Tukyajnatuk yë tsiptuunpëtëjk ets kanaak xypyëjkta'akëty yë pujxn mëti'ipë ja'ay myëtsiptuunpyën, na'ëwtity xyajkojëty yë potsy ets xywyinwëëtëty jëtu'un yaj'ixëty tëë yowë nyatuky.

³ Tääts xykyiiyë'ëkëty tu'uk yë pujxn jam xynyajtskëyëty itkujky ma mijtsën ets ma ja kajpnën, jëtu'un tä jeexyë jää y'apojtstukyëtyën ets mwa'ak'oyëty ma ja kajpnën wintuuytsyow tä jeexyë xynyipëtë'ëkyën. Yë'ë ijxpäjn wë'ëmëp ma ja Israel ja'ayëtyën.

⁴ Ënät mnäkyo'okëtëty anajnytsyow ets mnätyuknipëkëtëty ja nyëë pyokyëty ja Israel ja'ayëty. Jam jëtu'un mko'knëty ets xytsyëëm'itëty ja nyëë pyoky ja naax kajpn.

⁵ Tëkëëk mëko'px ja majkta'px majk xëëw, tu'kxëëwatypë jä'ä kyajpxëty tu'kjëmëjt, jëtu'un xytsyëëm'itëty yë Israel ja'ay yë nyëë pyoky.

⁶ Ko ënäty të xyajkä'pxy, tääts mnäkyo'okëtëty a'oytsyow ets mnätyuknipëjkta'ajëtëty ja Judá ja'ay ja nyëë pyoky, wëxtyikxy xyëëw jëtu'un m'itëty. Tu'kxëëwjatypë jä'ä nyaxëty tu'kjëmëjtpë të pyokytyuntën.

⁷ Tääts jatëkok mwinpitëty jam Jerusalén, natuky mëët ja mëtsiptëjk; mjëjpxa'atswinpitëp yë mkë'ë wit ets ëyo'on mnikapx mnimëtya'akëp ëjts nxëëwkyëjxmës ma yë'ëjëtyën.

⁸ Ëk'ix, tyam yë tejpxy ntuktsuumuka'any, këtiipë mki'tmin mki'txëpëty koonëm xyajka'pxëty ja xëëw jënu'un m'ëyowa'anyën.

⁹ Ets xy'oytyunëty yë mkääky mjë'kxy, yë'ë mëët xy'oytyunëty yë tsajpmok, cebadë, mijë, avenë, mëj xëjk ets mutsk xëjk; tu'ukyë xy'apëjkmujkta'ajëty ets xyaj'oyëty yë mkääky mjë'kxy. Yë'ë mjë'kxëp tëkëëk mëko'px ja majkta'px majk xëëw ma jam myajpaata'anyën ko'knë anajnytsyow.

¹⁰ Mja'amyätsëp tii xëëw mkayën, taxkpëky xyajwa'kxëty ja tu'ktsimpë ets tu'kpëkyäty xyjyë'kxëty tu'kxëëwpë;

¹¹ näjyëtu'un ko mnëë'uukëty a'ijxën'äämpy mnëë uukëty, kujkmtsimjaty je'eyë tu'kxëëwpë.

¹² Tu'uk je'eyë ja cebadë ma'atsy xykyäyëty tu'kxëëwpë, jap xyjyëëntajëty ma ja'aytyi'iny nyitoyën ets jam xyaj'oyëty ma ja'ay t'ixëtyën.

¹³ Tä ja Tios ojts jyaak'ëna'any: Yë'ë jëtu'unpë ja jë'kxy pëky ëxëëkpë jyë'kxantëp ja Israel ja'ayëty, wiink naax wiink kajpn ma ënäty tsum matsy nkäxtënës.

¹⁴ Ënätës n'ëtsooy: Wintsën ëjts ka'apës nijëna'a jëtu'unpë ëxëëkpë një'kxy; ëjts ka'apës nijëna'a ntsu'uty yë jëyujk tok mëti'ipë kë'ëm o'kpën, ëkë mëti'ipë jëyujk yaj'o'këpën ets ka'apës nijëna'a ntsu'uty yë jëyujk ka'apë tsyu'utsyëtyën.

¹⁵ Ënätës xy'ënëmaay: Oy yë'ë xyjyä'äxy'atëty yë tsajpkaatë'ëny ets mcebadë ma'atsy xytyukyajkë'ëwëty.

¹⁶ Ënätës näjyëtu'un xy'ënëmaay ok: Ëjts nyaj'akëxëjäämpyës yë jë'kxy pëky jam Jerusalén. Wäänjaty nëjkx yë ja'ay kyäytyë y'uuktë mëët yë monyëtukyë ets kijpxtä'äky ja nëë t'uuktëty mëët ja tsë'ëkë.

¹⁷ Nëjkxëp jyi'kxykyukëxëtë ets nyëëkukëxëtë, xim yam nëjkx nyäwyintë'kxëtë mëët ja tsë'ëkë ets jëtu'unyë nëjkx pyutsta'atë mëët ja nyëë pyokyëty.