Deuteronomio 13 - Biblia Mixe de Quetzaltepec

¹ Ko tu'uk yë käjpxynyajxpë, ëkë mëti'ipë yajniwijpyën yë kuma'ay ets tii mëj'ajtën tyakëty, ëkë tnikajpxëty tii ijxpäjtën.

² Ets jyänty y'atëwëty mëti'ipë ënäty të tnikäjpxyën ets y'ëna'anëty: Mintë, tsojk n'ëwtajtëm yë wiinkpë tios, mëti'ipë miits ka'ap xy'ixy'atën, tsojk nmëjja'aw njaantyjya'awëmë yë'ë.

³ Këtii nëkoo xymyëpëktëty, jä'ä ko yë Wintsën mëti'ipë mTiosajtëpën je'eyë nëkoo mwinma'any'ixëtë ets t'ëkjanty'ixa'any pën mjantytsyojk mjantyjya'awëtëp winë aaw winëjot.

⁴ Yi'iyë yë Wintsën mëti'ipë mTiosajtëpën tim panëjkxtëkëtë; tuntë ijxtëm ja y'ënä'ämën myinyën ets yi'iyë ja y'aaw y'ayuk mëtoow'ijtëtë. Yë'ë mka'ëxmatstëp ets jam xëmë mjot mwinma'any xypyëjkta'aktëty ma yë'ëjën.

⁵ Tääpë käjpxynyajxpë, ëkë mëti'ipë yajniwijpyën yë kuma'ay, nëjkxëp yë y'ooky, mëëtkyëjxm ko ënäty tëë mnajts'ëw mnaskajpxëtë ets xykyäjpxy kumëtoownaxtëty ja Wintsën mëti'ipë mTyios'ajtëpën, mëti'ipë myaj'ëwaatsëpëtsëëmëtën jap Egiptë ma ënäty mëtun m'ëyowtën ets ka'ap myajmëjuytyë. Jëtu'un ënäty ka'ap xy'ijxta'aktë ja ëxëëkajtën ma miitsëtyën.

⁶ Pën yë mëkä'äx, ëkë m'u'unk, ëkë mnëëx, ëkë mto'oxytyëjk mëti'ipë oy mtsojkpy mja'apën, ëkë mjëëky mëku'uk, ni'ikyë mjanty'ënë'ëmxëty ets wiinkpë wintsën xy'ëwtatëty, mëti'ipë miitsëty ets m'ap m'ok ka'ap t'ixy'atën,

⁷ tä yë Wintsëntëjkëty yë nyaax kyajpnëtyën mëti'ipë mëwinkon'ajtëpën, ëkë mëti'ipë jëkämën ets mëti'ipë yajpatpën wiink naax wiink kajpn,

⁸ mijts këtiimës xykyupëkëty, tä jya'ëna'anyën. Këtii xymyëjpëjkta'akëty ja wyinma'any ko ënäty tii ëyo'on tiijotmay tpatnë, ninu'un xykyapa'ëyowëty ets këtii xynyimon xynyitukëty, ni xykyakuyu'utsëty, ko ënäty pën y'ixjëtijt pyajëtijtënë.

⁹ Ti tëy mtunëp ni'ikyëmës jaakyaj'ook. Mijts ëka'any mxajjë'ëkëp ets ok ja naax kajpn xyajjë'ëktëty.

¹⁰ Kuka'ats, mëët ko ënäty të mjatukjëjpwoowtu'uta'anyë ja mWintsën ja nyëë'aaw tyu'u'aaw, mëti'ipë jap myajpëtsëëmën Egiptë ma ënäty mëk myajtëytyunyën.

¹¹ Jëtu'un'äämpy ja Israel ja'ayëty nijawëtëty ets ja tsë'ëkë tmëët'atëty, këtiipë ja ëxëëkpë t'ëktuuntëkooynyëtëty.

¹² Ko muum xynyijawë'atëty ma naax kajpnën mëti'ipë ja Wintsën ënäty të mo'ojëtën, ja'ay pyëtsëmtëty ëkë yajnijawëtëty,

¹³ ka'apë yë Wintsën tmëmëtowtën. Je'eyë nëkoo oypyënëty twin'ëën twinxajtë ets tukjëjpye'eytyu'uta'antë yë mWintsën Tiosëty yë nyëë'aaw tyu'u'aaw, ma tuk'ëwtata'antën ka'apë wyintsënëtyën.

¹⁴ Ko jëtu'un xymyëtoy'atëty, yajxon nëjkx xynyipaye'eytyë. E pën janty tëy ko tam jëtu'unpë ja'ayëty jyëtitë, mëti'ipë je'eyë nëkoo ja jot winma'any yajtëkoyäämpyën ets wa'ats yajnijawë, ko yë Wintsën y'ëxëëk'ijxyp yë jëtu'unpë.

¹⁵ Nëjkxëp xykyupujxta'atë, mëti'ipë ënäty jëtu'unpë ja winma'any pyanëjkxtëjkëtyëpën, tu'kë'ëyë mëët yë jyëyujk tsyajpkaajëty ets tëkokyë mëti'ipë myëët'ajtëpën ma ja nyaax kyajpnëtyën, wa'ats xyajkutëkooytyääyëtëty.

¹⁶ Tëkokyë ja wyitëty myeenyëty kajpn itkujky nëjkx xynyipëjkpäjtaayëtë. Ets xyjyëën'ixkonëtëty tu'ukyë mëët ja naax kajpn ets tëkokyë jënu'un jam winë yajpaatyën. Ets pën tëë ënäty ja mmëtsiptëjkëty winë xypyëjkëtë, yajnitooytya'atë ets jëtu'un jam nyaxëty Wintsën wyintum tä jeexyë winë yë'ë yajtukwino'oky yajtukwinxämyën. Tääpë naax kajpn jëtu'un nëjkx wyi'imy xëmëkyëjxm ajit tukjitë ets ni pën nëjkx tka'ëkkoj'o'oyënë.

¹⁷ Nitii xykyamëwë'ëmtëty, mëti'ipë ënäty yë Wintsën të tuknipëjktaakën kyutëkoyëty ets jëtu'un nëjkx ka'ap mtukjoot'anpëkëtë. Ni'ikyë nëjkx mpa'ëyow mnajts'ëyowëtë ets nëjkxëp myajmëj myajmayëtë jëtu'un tä ojts tukwinwanën ja m'ap m'okëty.

¹⁸ Ënät jëtu'un tyunëtëty jyatëtëty pën miitsëty mëmëtoowtëp ja Wintsën ets pën mpatuuntëp ja y'ënä'ämën tyiyajtën mëti'ipë tyam të nmo'otën ets pën oy winë xytyuntë, tä yë'ë t'oyjyawën.