2 Pedro 2 - Biblia Mixe de Quetzaltepec

Ja ijxpëjkën mëti'ipë ka'ap myëtëyëtyën

¹ Ijtë näjyëtu'un ja ja'ayëty tëëyëp mëti'ipë nätyijëtën ko ja Tios kyäjpxynyajxpë'atëtë ma ja Israel ja'ayëtyën, tää tyam yaa jëtu'unpë ja'ayëty ma miitsëtyën. Yë'ë ja'ay tyuk'ijxpëkantëp ja jot winma'any mëti'ipë yajtëkoopyën, ets t'ixtijtëty ja Wintsën mëti'ipë të yajtso'okëtën; ko jëtu'un y'ëtë'ëtstë, ënätyë ëyo'on tpaata'antë.

² May ja ja'ay tpanëjkxa'antë mëët ja y'ëxëëk juukyajtënëty ets yë'ëkyëjxm ja Tios tyiyajtën ëxëëk yajnikajpxa'any yajnimëtya'aka'any.

³ Ji'iyë ja meeny tyätsyojktëp ets miits xymyëjuytyëty ko ënäty mtukmëmëtya'akëtë ja kyë'ëm ayuk kyë'ëm winma'any. E tëë ja Tios y'ënä'äny ko ka'ap ja nitsokën tääpë ja'ay tmëët'ata'antë; jä'ä ko yë'ëjëty tëëyëp ja Tios tyuknipëjktaakëtë ets ja mëj ëyo'on tpaatëty.

⁴ Tios ka'ap ojts tnime'kxy ja anklëstëjk mëti'ipë ka'ap myëmëtoowën, jap ojts tpëjktä'äky ëyoowtaknjoty, kupi'its kukoots ets kuwëëny kuxotsy jap tuk'ëwxity ja tëytyu'unën.

⁵ Ets nän ka'ap ja Tios ojts tnime'kxy ja ja'ayëty mëti'ipë tëëyëp juukyajtën, kyäjx ja komtuu ma ja ja'ayën mëti'ipë ojts kyawintsë'ëkëtyën, yi'iyë ojts tsyo'oktë ja Noé, mëti'ipë kyajpxwa'kxën ja tëyajtën, mëët ja niwëxtujkpë ja ja'ay.

⁶ Näyjyëtu'un ja Tios tyajkutëkooy jëënmëët ja Sodomë kajpn ets ja Gomorra kajpn, koonëm tyaj'awinpijtaay kuyjaam ets jä'ä t'ijxpajn'atëty ja ëxëëkja'aytyëjkëty mëti'ipë ënäty juuky'atantëpnëm.

⁷ Tios yaj'ëwaatspëtsëëm ja Lot, mëti'ipë oyjyä'äyën ets ka'ap akujk jotkujk y'ijty mëët ja ëxëëk ja'ay ja jyuuky'ajtënëty.

⁸ Ja Lot winjëpom kyumay kyutajë ko t'ixy tmëtoy ja ëxëëkajtën mëti'ipë ja ja'ay tyuuntëpën.

⁹ Yë Tios nyija'ap wi'ix tyajpëtsëmëtyën ëyo'ontum mëti'ipë yë'ë ets nän nyija'ap wi'ix ja ëxëëkja'aytyëjk tuk'ëwxityën ja ëyo'on jotmay.

¹⁰ Tios tyiytyunäämpy ja mëti'ipë ja ëxëëk winma'any y'atsojkpyën ets mëti'ipë ka'ap tkupëkyën ja Tios ja kyutujkën. Winma'anytyuk yë'ëjëty ets tyuuntëp tii tyimtunantëpën; ka'ap tsyë'ëkëtë ko t'ojtë ja kutujkëntëjk mëj'äämpyë.

¹¹ Oy ja anklëstëjk wäänëni'ik tjamëët'atë ja mëjaaw ets ja mëk'ajtën, ka'ap ëxëëkjaty tijtë ja kutujkëntëjk mëët ja Wintsën ja myëk'ajtën.

¹² Yë jëtu'unpë ja'ayëty Tios yajwintsë'këntëkooytyëp ko ka'ap tii tja'akyyukëtë. Jëtu'un nyäpyëjkta'akëtë jëyujkën, nitii ja'aykyujkën tkamëët'atë ets näjyëtu'un y'ooka'antë jëyujkën mëti'ipë të t'amin t'akä'äxëtën ja o'kën tëko'oyën.

¹³ Tukupätëtëp ja Tios ijxtëm ja myëku'uktëjk tmëtëkoytyën, akujk jotkujk nyätyijëtë ko ja y'ëxëëk winma'any tyajnikëxë'ëktë. Je'eyë yajtsëtyuntë ko jam yajpaatë ma miits mxëëtuntën ets y'ëtë'ëtstë y'ëna'antë wiinkjaty.

¹⁴ Yi'iyë y'ijxtëp tyuuntëp wi'ix ja to'oxytyëjk t'ëkmëpokytyuntën, ka'ap ja pokytyu'unën tsyipëtë. Jëtu'un twin'ëën twinxajtë mëti'ipë ka'anëm ja myëpëjkën oy tmëët'atynyëm; je'eyë tii tjanty atsoktë; ëxëëk ja'ay yë'ëjëty.

¹⁵ Tëkoy y'ijnëtëp yë'ëjëty, jä'ä ko ja oypyë ja në'ë tu'u të t'ëxmatstë ets ja Balaam wyinma'any të tpanëjkxtë, ja Beor myaank mëti'ipë meeny jyajëpëkanën mëët ja ëxëëk winma'any.

¹⁶ E Tios yajkajpx ja Balaam ja kyërukts to'oxy ijxtëm tu'uk ja ja'ayën, ënät ojts y'oyë ko jëtu'un y'ëti'itsy.

¹⁷ Yë jëtu'unpë yaj'ijxpëjkpëtëjkëty, jëtu'un yë'ëjëty ijxtëm tu'uk ja nëëjutën mëti'ipë ka'ap tii nëë tmëëtëtyën, ijxtëm ja yoots wyimpapojyën ko ka'ap tyu'uja'any. Paaty ja Tios pyëjkta'aka'anëtë akootstuuy.

¹⁸ Amëj akëjxm tii tkajpxtë mëti'ipë ka'ap tyunyën, wyin'ë'ëntëp ja ja'ay ko y'ëna'antë ko ka'ap pyokyëty ko ja'ay kyë'ëm winma'any tyajtuny. Jëtu'un ja ja'ay tyajpokytyuntë tyam ënäty jemnyëm t'ëxmatstë ja ëxëëk juukyajtën.

¹⁹ Tukwinwa'anëtëp ja oypyë juukyajtën tyamts pokyjotm kë'ëm y'itë, jä'ä ko ëne'emy pawopy tyaj'itë mëti'ipë të tmëmëta'aktën.

²⁰ Mëti'ipë të tnijawëtën ja Wintsën Jesukristë Yajnitsokpë ets të tsyo'oktë ma ja ëxëëkpën, pën jam jatëkok nyäyajka'ajëtë pokyjotm, wäänë o'ktëy nëjkx jyatë këtiinëm ijxtëm ënäty të y'itën.

²¹ Nikë oy ko jeexyë ka'ap të timnyijawëtë ja në'ë tu'u oypyë, jä'ä ko tëë tjanijawëtë ets ok të t'ëxmatstë ja Tios ja y'ënä'ämën mëti'ipë të jyayajmo'otën.

²² Yë'ë jëtu'un nyiwä'kpy ja tëyajtën ko y'ënä'äny: Ja uk nyiwinpijtyp jatëkok ja y'iitsy ets tjë'kxmuky. Jëtu'un ja wiinkpë y'ënä'äny: Ja ëtsëm ko tsyiiwta'ay, tääts jatëkok kyuyätsë mo'ontsjoty.