1 Samuel 31 - Biblia Mixe de Quetzaltepec

Ma ja Saúl y'o'ktën mëët ja y'u'unk y'ëna'k

¹ Ënät ja filistejë ja'ayëty ojts tyëkëtë tsiptuunpë mëët ja Israel ja'ayëty, ja Israel ja'ayëty ka'ap ojts myëta'aktë mëët ja filistejë ja'ayëty, ojts ja kyäknëtë, jä'ä ko may ënäty ja jyä'äyëty të nya'o'knëtë jam kopkëjxm ma txëëwatyën Guilboa.

² Tä ja Saúl mëët ja myaank ojts jyakäknëtë, je'eyëp ko ënätyë ojts yajnajtspaatëtë, tääts ja filistejë ja'ayëty tyaj'o'ktë ja Jonatán, ja Abinadab ets ja Malquisúa.

³ Ja Saúl atu'kpajk ojts wyi'imy ets yajnatujktaayëtë ja filistejë ja'ayëty mëti'ipë ti'pxn mëëtëtyën, mëj këjää ja tsë'ëkë ojts tyuktëkëty.

⁴ Paaty t'ënëmaay ja tyuunpë: Juut yë mpujxn ets yaj'o'kës, këtiipë yë'ë mmëtsip xyaj'ookëtyës ets ënät je'eyë xytyukxi'ik xytyuk'ëwë'ëktëtyës. Ja tyuunpë ka'ap yaj'okanë, jä'ä ko nän tsë'këp ënäty näjyëtu'un. Paatykyëjxm yë Saúl ojts kë'ëm tyimnäyaj'ookyë mëët ja kyë'ëmpujxn

⁵ Ko t'ijxy ja tyuunpë ko tëë ja Saúl y'ooky, ënät näjyëtu'un nyäyaj'o'kë.

⁶ Jëtu'un ojts y'o'knëtë jä'ä xëëw ja Saúl mëët nitëkëëk ja myaank ets tu'uk ja tyuunpë, ets tëkokyë ja jyä'äy.

⁷ Ko jëtu'un t'ijxtë ja Israel ja'ayëty mëti'ipë ënäty jam tsënaaytyëpën awinmtsow ma ja joyjyot yajtuknajxtaaynyën, ënät ojts kyäkpëtsëëmta'atë jam kyajpnjotmëty, jä'ä ko ja Saúl tëë ënäty nya'o'knë mëët ja myaank. Tääts ojts myiinëtë ja filistejë ja'ayëty jam tsyënaaytyaknpëjknëtë.

⁸ Komjëpom ko ja filistejë ja'ayëty ojts nyëjkxtë ets twijtsmuka'antë ja y'o'kpëty, tääts tukye'eypyäjtë ja Saúl mëët nitëkëëk ja myaank, ooky jam jyëpijpnëtë tunkëjxm ma txëëwatyën Guilboa.

⁹ Ënät ja kyëpajk ojts nëtsujkëtë ets ja pyujxn tpëjkëtyääytyë mëti'ipë myëtsiptuuntëpën ets ojts ja käjpxy ayuk tkäjxwa'kxta'atë maajaty yajpaatën ja filistejë ja'ayëty ets yajtuk'ëwa'anëtya'atëty ja ja'ay jap tsajptëkoty ma ja tios tyaj'itën.

¹⁰ Ja Saúl ja pyujxn mëti'ipë ijty myëtsiptuunpyën jap ojts yajpëjktä'äky ma ja Astarté ja tsajptëkotën, e ja nyini'kx jam ojts yajkutëy ma ja potsykutukën ma txëëwatyën Bet-sán.

¹¹ Ja ja'ayëty mëti'ipë jam tsënaaytyëpën Jabés mëti'ipë Galaad nyitënääpyën, ko tnija'awëtyë wi'ix ja filistejë ja'ayëty ënäty të tuntën ja Saúl.

¹² Ënät ojts nyäkyajpxëtë aak jotmëktëjkëty, tu'ktsu'um ojts ye'eytyë tääts jam tpatë ja mëjpotsy ma ënäty ja Saúl ja nyini'kx të yajkëxtëyën mëët nitëkëëk ja myaank ets tyajjënajktë; tääts ojts ënätyë wyimpijtkojnëtë jam Jabés ets jam ja o'kpë tyajnitooytyë.

¹³ Ja kuyjaam mëti'ipë ojts wyintooykyëtä'äkyën jam ojts tyajnaaxtëkëtë Jabés, ma tu'uk yë kepypya'tkën. Wëxtujk xëëw y'ayuu'ajtë, tmëkjawëtë ko ënäty ja o'kën tëko'oyën të y'ity ma ja Saulën mëët nitëkëëk ja myaank.