1 Samuel 14 - Biblia Mixe de Quetzaltepec

Ja jyotmëk'ajtën ja Jonatán

¹ Tu'kxëëw tu'kjëmëjt yë Jonatán mëti'ipë myaank'ajtypyën yë Saúl, ojts t'ënëëmë yë tyuunpë: Pamiinkës, tsojk ntuknajxëmë yë mëjnëë, wä'än ntsiptu'unëmë mëët yë filistejë ja'ayëty jampë yajpaatën awinmtsow. E ja Jonatán ka'ap tuk'ëwa'anëy ja tyeety.

² Yë tyeety jam ënäty yajpaaty tunkëjxm ma tu'uk yë mëj kepypya'tkën, ma ënäty yë ja'ay të tyajpajk'atën yë tsajpmok. Jam ënäty näjyëtu'un yajpaatë yë tsiptuunputëjk nitëtujk mëko'px.

³ Ja ja'ay mëti'ipë teety'ajtpën jä'ä jëmëjt jä'ä txëëwaty Ahías, yë'ë myaank yë Ahitub ets tsyojkmaank yë Icabod. Yë Icabod yë'ë tyeety'äjtyp yë Finees, yë y'ok'u'unk yë Eli, ja Wintsën ja tyuunpë, jampë tyunyën Siló. Ja ja'ayëty ka'ap ojts nija'awëtë ko ja Jonatán tsyo'ony.

⁴ E yë'ë tam ënäty jya'tanë ma yajpaatën ja filistejë ja'ayëty. Ja tu'u mëti'ipë jam nëjkxpën itkujky ënäty nyäxy ma ja tsaatun tu'uk txëëwatyën Bosés ets tu'uk Sene.

⁵ E yë filistejë ja'ayëty jä'ä ënäty të nyäyyajwa'kxëtë mäjtskpëky: Tu'kpëky anëkëjxmtsow ma txëëwatyën Micmás ets tu'kpëky ëpa'tkë'ëmtsow ma mëët yë Guibeá nyäwyinku'ixëtyën.

⁶ Ets ja Jonatán t'ënëmaay ja tyuunpë: Jotëkoy ja'amtë jamtsow awinm ma yajpaatën tääpë ja'ayëty ka'apë tnijawëtën pën y'ëwtatëpën. Kooxyëp yë Wintsën xynyaputëjkëmëty. Jä'äxë ko mëët yë'ë ka'ap jyatsipëty ko xyajmëta'aka'amëty oy yë ja'ay nyimayëty ëkë nyiwäänëty.

⁷ Tääts y'ëtsooy ja tyuunpë: Tun tii mmääpy mtäjpyën, ëjts tyaajës nyajpaaty ets nputëkëja'any.

⁸ Ënät ja Jonatán y'ënäny: Ëk'ix tsojk ximtsow awinm najxëmë ma tääpë ja'ayëty jam yajpaatën ets yajxon nätyuk'ijxëmëty.

⁹ Pën xy'ënëma'ayën ets n'ëwxijtmëty jam kë'ëm xynyikëtakmëty, jamts njantywyë'ëmëty ets ka'ap ninëjkxmëty.

¹⁰ E pën xy'ënëma'ayëm ets mpa'tëjkëmëty jëtu'un njantyu'unmëty, jä'ä ko yë'ë ënäty ja Wintsën nyikäjpxyp ko nmëta'aka'anëm.

¹¹ Jëtu'un ojts tjantytyuntë ojts nimäjtsk nyätyuk'ixëtë ja filistejë ja'ay. E ko yë filistejë ja'ayëty jëtu'un t'ijxtë tääts y'ënantë: Ix tamts ja ënät pyëtsëëmta'atë ja hebreo ja'ayëty ma yu'utsy të yajpaatën

¹² Tääts ja Jonatán mëët ja tyuunpë yajyaxëtyë: Yam ku'të, tyam tu'uk yë ayuk nmo'oja'antë. Tä ja Jonatán t'ënëmaay ja tyuunpë: Pamiinkës jä'ä ko yë Wintsën tëë kyë'ëyakëtë ma Israel ja'ayëtyën.

¹³ Yë Jonatán matsyë jaaxyë ojts jam pya'tëkë kopkkëjxm mëët ja tyuunpë. Jënu'un ja Jonatán ja myëtsip tkutijnaxyën, ja tyuunpë jä'ä yaj'o'kpy.

¹⁴ Ma ja Jonatán mëët yë tyuunpë tnipëtë'kyën ja filistejë ja'ayëty, jä'ä ojts tyaj'ooktë ja myëtsipëty, i'px.

¹⁵ Tëkokyë ja filistejë ja'ayëty mëti'ipë ënäty jam yajpatëpën ma ja y'ijtaknëtyën ets mëti'ipë ka'apën ojts ja tsë'ëkë tyuktëjkëtya'ajëtë. Jëtu'un ja tsiptuunpëtëjkëty mëti'ipë këwent'ajtëpën ets mëti'ipë je'eyë tsiptuuntëpën ojts tsyë'ëkëtëjkëtya'atë. Jää ojts näjyëtu'un yë naaxwiinyëtë yu'kxy mëk ets ja ja'ayëty ni'ikyë tsyë'ëkëtëjkëtyääytyë.

¹⁶ Ko jëtu'un t'ijxtë yë Saúl yë kyëwent'ajtpë jampë ënäty yajpaatën Guibeá ma Benjamín tnitänën. Ko yë filistejë ja'ayëty jëtu'un y'ëknäynyipëyë'k y'ëknäkyupëyë'kënëtë xii yaa.

¹⁷ Ënät ja Saúl t'ënëmaay ja tsyiptuunpëtëjk mëti'ipë ënäty jämyëët'ajtëpën: Mëtyoowta'atë yë tsiptuunpëtëjk ets yajnijawëty pën jam pën tyëkoy'äty. Ko ojts tmëtyoowta'atë ënät ojts tnijawëtë ko kajtëm ënäty jam pën ja Jonatán mëët ja tyuunpë.

¹⁸ E jä'ä xëëw tam ënäty tmëët'ajtëpë ja Tios ja kyejky yä'äp mëti'ipë mëët winë tuknijawëtën. Paatykyëjxm ja Saúl t'ënëmaay ja Ahías: Yajmin yë kejky yä'äp mëti'ipë yë Tios jyä'ä'ajtypyën.

¹⁹ E ma ënäty jam jëtu'un kyäjpxy myëtyä'äkyën yë Saúl mëët ja teety, ja filistejë ja'ayëty ni'ikyë ojts kyujo'pta'atë. Tä ja Saúl jatëkok t'ënëmaay ja teety: Këtii xynyëmiinëpë yë kejky yä'äp.

²⁰ Tä ja Saúl mëët ja tsyiptuunpëtëjk tnipëtë'ktë ja filistejë ja'ayëty, tyamts ja filistejë ja'ayëty ni'ikyë nyäy'ijxmajts'taayënëtë ets aakyë'ë nyäyaj'o'kënëtë.

²¹ Näyjyëtu'un ja hebreo ja'ayëty mëti'ipë ënäty jeky mëët të y'ijtmuktën ja filistejë ja'ayëty, ojts ja filistejë ja'ayëty tpuwa'ktu'utë ets ojts tpuye'eyëtë ja Israel ja'ayëty mëti'ipë mëët jyëtitën ja Saúl ets Jonatán.

²² E ko ja Israel ja'ayëty tnija'awëtyë mëti'ipë ënäty jam të kyäktso'oktën kopkjotm ma ja mëti'ipë ja Efraín nyitënääpyën. Ko ja filistejë ja'ayëty nëkooyë kyäknëtë, ënät tnipëtsëëmtë ets tpajëtijtëjknëtyë, koonëm tnajtspatëtyääytyë.

²³ Jampaat ojts jya'ajnëtë tsiptuunpë ma txëëwatyën Bet-avén, jëtu'un'äämpyë ojts yë Wintsën tyajtso'oky yë Israel ja'ayëty jä'ä xëëw.

Ma yë Saúl yë waantakën tunyën

²⁴ E yë'ë tëy yë Israel ja'ayëty yajxon ënäty të y'ënu'kxëtyääynyëtë, jä'ä ko ka'ap ënäty ni pën të kyäy, jä'äkyëjxm ko ënäty yë Saúl të y'ënä'äny: Poky yë ja'ay wyë'ëmëty mëti'ipë kääpyën ma ka'anëm yë xëëw kyëtä'äkynyëmën, maas ënäty ka'ap të n'ijxnajxta'aynyën yë nmëtsipës.

²⁵ Ënät yë tsiptuunpëtëjk jyajtë yukjotm ma jyätyën yë uuxpa'ak naaxkëjxy.

²⁶ Ko t'ijxpatë ko janty jëtu'un kyiiynyääynyë ja uuxpa'ak tä yë nëëjën, ni pën ojts tkajë'kxy jä'ä ko yë'ë tsyë'këtyëp ijxtëm ënäty të tkäjpxy'atën.

²⁷ E yë Jonatán mëët ko ënäty ka'ap të tmëtoy wi'ix ja tyeety të t'ënëëmën ja tsiptuunpëtëjk, ojts ja tjë'kxy ja uuxpa'ak ets jëtu'un'äämpy jatëkok myëjaawpëjky.

²⁸ Tääts tu'uk ja tsiptuunpë y'ënëmaayë mëti'ipë ijxën: Tëë mteety y'aaw y'ayuk tkäjpxy Tios xyëëwkëjxm ets të y'ënä'äny: Ko pën tii jyi'kxyp tyam, poky nëjkx wyi'imy. Ijxtëm xy'ixyën paatykyëjxm yë ja'ay tëë y'ënu'kxëtyääynyëtë.

²⁹ Tä ja Jonatán y'ëtsooy: Yë nteetyës ka'ap të wyinma'anypyääty, paaty jëtu'un të y'ënä'äny, ix ëjts janty jotkujkës tyam näjyawëty koos wäänë të një'kxy ya'atë uuxpa'ak

³⁰ ets ni'ik ko jeexyë ja ja'ay të tjë'kxtë mëti'ipë ja mëtsip të tyajtukni'o'ktu'utën. Ets wä'än jeexyë ni'ik ëxëëk të ntu'unëm yë filistejë ja'ayëty.

³¹ Jä'ä xëëw yë Israel ja'ayëty ka'ap ojts tyajmëta'aktë yë filistejë ja'ayëty. Jampaat tsyiptuuntë ma txëëwatyën Micmás ets Aialón. E ja Israel ja'ayëty tëë ënäty y'ënu'kxëtyääynyëtë,

³² paatykyëjxm ojts ka'ap t'ëkmëmëtaknëtë ja yuu ets tniwa'këtyë amëjaawtony ja mëti'ipë ënäty ja myëtsip të tukyajni'o'ktu'utën, ojts tyaj'ooktë ja tsajpkaa kupixyny ets jëtu'unyë tsu'tstë tsuxk mëët ja nyine'pny

³³ E kajts ojts tyëkoy'äty ja ja'ay mëti'ipë ojts tnikäjpxyën ma ja Saulën. Tam ja ja'ay pyokytyuntë jä'ä ko tam ja tsu'utsy tsu'tsnëtë mëët ja nyine'pny. Paaty yë Saúl y'ënäny: Miitsëty ninu'un ja oypyë xykyatsoktë. Paaty, yajmëjkëpiptë yaa tu'uk yë mëjtsaa.

³⁴ Ets xy'ënëmaaytya'atëty yë ja'ayëty wä'än këëktu'uk tmëmintë yë jyëyujk tsyajpkaajëty, tsyajpaxëty, kyupixynyëty ets tyaj'ooktëty ets tsu'utstëty. Këtiipë yë Wintsën xymyëtëkoytyëty ets miits xytsyu'tstëpëty yë tsu'utsy mëët yë ne'pny. Jä'ä tsu'um yë ja'ayëty këëktu'uk ojts tmënëjkxtë yë tsyajpkaajëty ets tyaj'o'ktë.

³⁵ Ënät yë Saúl ojts tu'uk tyajpëtë'ëky yë wintsë'këntyakn ets jam ja Wintsën ja wyintsë'kën tmooy.

³⁶ Tä ja Saúl ok t'ënëmaaytyääy ja ja'ay ko kyääytyääy y'uktaaytyë: Tyam tsojk nitëjkëmë yë filistejë ja'ayëty ya'atë tsu'um ets mpëjkëtyä'äymyëty mëti'ipë myëët'ajtëpën, koonëm xyiinyëty ets ni pën nkayajwë'ëmëty juuky. Ets y'ëtsootaaytyë ja ja'ayëty: Tun mëti'ipë oy mmääpy mtäjpyën. E ja teety tyaa y'ëtsooy: Je'eyëp tëy ko tsojk jëyëjp ja Tios n'ëkyajtë'ëwëmë.

³⁷ Ënät ja Saúl tyajtëëy ja Tios: ¿Oy'atëp koos nitëkëty yë filistejë ja'ayëtyë? ¿Mkë'ëyakëp ma Israel ja'ayëtyënë? E ja Wintsën ka'ap ojts y'ëtsoy jä'ä xëëw.

³⁸ Paaty yë Saúl y'ënäny: Mëjwa'aktë yaa miitsëty ninu'un xynyiwintsën'atën yë tsiptuunpëtëjkëty ets xypyaye'eytyëty pën të pyokytyuny.

³⁹ Tyamës yajxon nikäjpxy mëët yë Tios yë xyëëwkyëjxn, mëti'ipë xëmë yajtsokpyën yë Israel ja'ayëty. Ko oy tyimyë'ë'atëty ja nmaankës Jonatán, pën yë'ë të pyokytyuny, kwanë ko y'ookëty. Ma ja tsiptuunpëtëjkën nitu'uk ojts kya'ëtsowtë.

⁴⁰ Tä ja Saúl t'ënëmaaytyääy ja Israel ja'ayëty: Miitsëty yaamës mnäwyääpëtëty, e ëëtsëty xiitsowës yam näjyëtu'un näpyëjkta'aka'anëtë, ëjts mëët yë nmaankës. Tun mëti'ipë m'a'ijxëpën oy, jëtu'un y'ëtsoowtë ja tsiptuunpëtëjkëty.

⁴¹ Ënät ja Saúl ojts tyëkë waantsoow pëjktsoowpë ets y'ënäny: Wintsën Tios, mëti'ipë yajpatpën ma Israel ja'ayëtyën, ¿Wi'ix ko tyam ka'ap xy'ëtsoy yë mtuunpë? Pën ëjts pokymyëët ëkë yë'ë nmaankës Jonatán, ko ënät yaj'ixy ja xyëëw pyo'o Urim ënät ka'ajëp; e pën yë'ëts yë naax kajpn yë poky myëët'ajtyp, ko ënät yë xyëëw pyo'o yaj'ixëty yë'ë ënät ka'ajëp yë Tumin. E ko ja xyëëw pyo'o yaj'ijxpëtsëëmy yë'ë ojts tyuka'ayë ja Jonatán ets Saúl ets ja naax kajpn ojts ëwaatsëtuuy wyi'imy.

⁴² Tä ja Saúl jatëkok y'ënäny. Ijxpëtsëmtë jatëkok yë xëëw po'o ma ëjtsën ets ma nmaankës Jonatán. Ko yaj'ijxpëtsëëmy yë'ë ojts tyuka'ayë ja Jonatán.

⁴³ Tä yë Saúl tyajtëëy yë Jonatán: Tuk'ëwa'anëkës tii të xytyuuntëkoy. Tä ja Jonatán ojts tnikäjpxy: Pën yë'ë mnijawëjäämpy, tyam n'ëwaanëty, tëëjës wäänë një'kxy yë uuxpa'ak mëëtës yë ntajkjëjp. E kajts wyi'ixëty tyaajës nyajpaaty oyës n'ookëty.

⁴⁴ Tä ja Saúl mëk yujk'ënany: Yë Tios yë'ëjës xytyiytyunëp pën mijts ka'ap m'ooky, Jonatán.

⁴⁵ Ënät ja naax kajpn ojts t'ëtsoy ja Saúl: Wi'ix ko y'ëk'o'kpëty yë Jonatán, pën mëët yë'ëkyëjxm yë Israel ja'ayëty tyam të myëta'aktë, tääpë winma'any ka'ap tyunëty. Jëtu'un tä yë Tios jyuukyëtyën, yë Jonatán nitu'uk yë kyuwaay kyanëëka'ajëty. Jä'ä ko mëti'ipë tyam të tunyën yë'ë Wintsën të pyutëkëty. Jëtu'un'äämpy ja naax kajpn ojts tnikajpxtu'uty ja Jonatán ets ka'ap y'o'ky.

⁴⁶ Ja Saúl ka'ap ojts t'ëknitso'onë ja filistejë ja'ayëty. Ojts wyimpijtaaynyëtë ma ja nyaax kyajpnëtyën.

⁴⁷ Jëtu'un'äämpy ja Saúl jatëkok tpaty ja kyutujktakn ma ja Israel kajpnën ets janaam jatsojk ojts tsyippaaty mëët ja myëtsiptëjk: ja Moab ja'ayëty, ja Amón ja'ayëty, ja Edom ja'ayëty, ja mëjkutujkpë mëti'ipë jam ënä'ämpën Sobá ets ja filistejë ja'ayëty. Oy ma tyimtsippaty xëmë ijty myëtä'äky.

⁴⁸ Ënät tyajmujky nimay yë tsiptuunpëtëjk, ets tsyiptuuny mëët yë Amalec ja'ayëty, ka'ap tyajmëtäky. Jëtu'un'äämpy ojts tyajtso'oky yë Israel kajpn ma ënäty ëxëëk tyunëtën yë toonpë mä'tspë.

⁴⁹ Yë y'u'unk y'ëna'k yë Saúl jä'ä xyëëwajtë: Jonatán, Isví ets Malquisúa. Ëpëky nimäjtsk ja nyëëx mëti'ipë xyëëwajtëpën: Merab ja mëjpë ets ja mutskpë mëti'ipë yajtijpën Mical.

⁵⁰ Yë Saúl yë tyo'oxytyëjk jä'ä ijty txëëwajtyp Ahinóam, yë nyëëx yë Ahimaas. Ja tsyiptuunpë wintsën jä'ä yajtijy Abner, yë'ë myaank yë Ner, yë jyämy yë Saúl.

⁵¹ Yë Quis, yë tyeety yë Saúl ets Ner, yë tyeety yë Abner, jä'ä tyeety xyëëwajtë Abiel.

⁵² Mëjjëty këjääjëty ojts yë tsip tyunyë mëët yë filistejë ja'ayëty, mapaat jyuuky'äjtyën yë Saúl; paatykyëjxm yë Saúl aakyë'ë ojts twin'ijxy yë ja'ay mëti'ipë mëkëtyën ets jotmëkëtyën.