Santiago 4 - Biblia Dc en Mixe de Quetzaltepec

Ka'ap n'atsojkmëty ja ëxëëkajtën mëti'ipë yaa naaxwiinyëtën

¹ ¿Ma jëtää ja tsip tsyoony mëti'ipë miits mtuuntëpën? Jap tsyoony ma ja mjot mwinma'anyëtyën ko winë xytyätytsyojkën'atë.

² M'atsojktëp mëti'ipë ja mmëku'uk myëët'ajtëpën ets ko xykyapaatë ënät ja tsip pyëti'iky ets myajja'ay ooktë. Ka'ap akujk jotkujk m'itë jä'äkyëjxm ko Dios xykya''amëtowtë mëti'ipë mtsojktëpën.

³ Ets ko xy'amëtowtë, ka'ap myajmo'otë, jä'ä ko ka'ap oy xy'amëtowtë ets jä'ä ko jam xyajtuna'antë ma ka'ap pyaat'atyën.

⁴ Miitsëty, mëti'ipë ja Dios të y'ëxmatstën, ¿tii këtii xynyijawëtë ko ja Dios ka'ap tsoky ets ja naaxwiinyëtë winma'any n'atsojkmëtyë? Oy tyimpënëty mëti'ipë ja naaxwiinyëtë winma'any y'atsojkpyën, ja Dios myëtsipëjkpy.

⁵ Tam tii ko ja Dios ja y'aaw y'ayuk këxja'aypyë y'ënä'änyën: Xytsyojkni'ikëm ëëtsajtëm ja Kënu'kxymyëkajtën mëti'ipë Dios të tpëjktä'äkyën ma ja njoot'ajt nwinma'any'ajtëmën, ets ka'ap tsoky ets wiinkpë xyjyä'ä'ajtmëty.

⁶ Ets ka'ap yi'iyëty ya'atë, wäänëni'ik ja Dios ja mëyajtën tuny ma ëëtsajtëmën ets xypyutëjkëmë, paaty ja Dios ja y'aaw y'ayuk këxja'aypyë y'ënä'äny: Dios tyukjoot'anpëjkpy ja ja'ay mëti'ipë mëj këjxm nnäyjya'awëyëpën ets pyutëjkëp mëti'ipë yujy tëtä'äky ja'ay'ajtpën.

⁷ Näkyë'ëyakëtë ëmuumtu'ukjot ma Tiosën. Ka'ap xykyupëktëty ja mëjku'u, ënät mkukä'äkëtëty.

⁸ Mëwinkontë ja Dios ets näjyëtu'un mmëwinkonëtëty. Pokytyuunpë ja'ayëty, ëxmatstë ja mka'oy juukyajtënëty; ets miitsëty mëti'ipë mäjtsk aaw mäjtsk jot ja Dios mtsojktëpën, nänyajwa'atsëtë.

⁹ Maytyë tajtë, mëjë'ë mëya'axtë ja mpokyëty, wä'än yë mxikënëty t'awinpity yä'äxy ets m'ijtën mxo'onënëty, ma'ayën tajën.

¹⁰ Näypyëjkta'akëtë yujy tëtä'äky ma Tiosën ets yë'ë mëj mpëjkta'akëtëty.

Ka'ap ja'ay pyoky ntukwinmëto'owmëty

¹¹ Mëku'uktëjkëty, këtii mnanyi'ojëtëty nixim niyam. Pën ja myëku'uk nyi'ojëp ets pyoky'ijxyp ja Dios ja y'ënä'ämën ënety kyamëj'ijxëp; ko pën tkamëj'ixy ja ënä'ämën, tëytyuunpë ets paye'epyë ënety nyäpyëjktä'äkyë ets ni yë'ë tkapatuny ja ënä'ämën.

¹² Tu'uk je'eyë mëti'ipë ja ënä'ämën yajkën ets ja ja'ay tpaye'eyëty; nän yë'ë yajnitso'okaanp ets yajwintëkoyaanp. E mijts, ¿Mpënmës ko ja mmëku'uk ja pyoky xytyukwinmëtoy?

Ka'ap yajnijawë mëti'ipë miimp wiinkoonpën

¹³ Mëtoow'itë ya'atë, miitsëty ko m'ëna'antë: Tyam ëkë jëpom nja'amëty wiink kajpn ets jam tu'kjëmëjtën n'aju'uy n'ato'kmëty ets meeny npatmëty.

¹⁴ Nijënu'un xykyanijawëtë mëti'ipë jëpom tunan jatanëpën. Jëtu'un miitsëty ijxtëm ja maanikën, wäänë y'ity ets tyëkoy.

¹⁵ Nikë jëtu'un n'ëna'anmëty: Pën ënaanp ja Dios, ënät njuuky'ajtmëty, ënät winë ntu'unmëty.

¹⁶ Miitsëty, amëj akëjxm tii xykyajpxtë ets ya'atë jëtu'unpë amëj'ajt akëjxmajtën, ka'ap y'oyëty.

¹⁷ Pën nyija'ap tunëty mëti'ipë oyën ets ka'ap tuny, pokytyuunp ënety.