Salmos 84 - Biblia Dc en Mixe de Quetzaltepec

Salmo 84 Wi'ix y'oyëtyën ko nyajpatmëty ma Tios yë jyëën tyëjkën.

¹ Wi'ixpëm y'oyëty yë mtsajptëjk, Wintsën mëti'ipë maaytyääyëpën winë.

² Janty itaanpës ets janty nëjkxaanpës ma mtsajptëjkën, winë aaw winëjot nkuuy'iy nkuuyä'äxyës mëti'ipë juukyajtën yäjkpyën.

³ Näyjyëtu'un yë joon jëyujkëty pyatëp yë y'ijtakn jap ma mijts mwintsë'këntyaknën, ets japts yë y'u'unk y'ëna'k yë pyä'än t'oytyuunë, mijts Wintsën mëti'ipë maaytyääyëpën winë, mijts nkutujkpë'ajtyp ets mijts nTios'ajtyp.

⁴ Janty jotkujk yë ja'ay yajpaatë mëti'ipë ijtëpën ma mtsajptëjkën ets jap xëmë mkuuy'iy mkuuyä'äxyë.

⁵ Janty jotkujk yë ja'ayëty yajpaatë mëti'ipë putëjkën jam pyatëpën ma mijtsën, mëti'ipë nëjkxantëpën ye'epyë jampaat ma ja mtun mkopkën.

⁶ Ko nyaxtëty jam ma it naaxwiinyëtën ma jyam'atyën ja jë'ëyën yaxën, jëtu'un tyaj'awinpitëty tä tu'uk yë it naaxwiinyëtën ma ka'ap y'ëmaaytyä'äkyën yë nëë, ets näjyëtu'un yë'ëpaat yë nëë tuu nëjkxëp yë kënu'kxën tyajkëtä'äky;

⁷ yë jyot myëjaawëty ni'ikyë kyëjääjëja'any, e jam ma Sión kopkën, jam nëjkx t'ixtë ja Dios mëjpë.

⁸ Wintsën, mëti'ipë maaytyääyëpën winë, mëti'ipë Tyiosajtën yë Jacob, mëtoow'ijtëkës yë ntsajpkäjpxy.

⁹ Mijts Dios, ni''ijxkëta'ak mëti'ipës xy'akëëytyujk xy'axajtujktëpën, mëti'ipë mijts kë'ëm mwin'ijxën ets yajkutukëty.

¹⁰ Tsoowpatp ni'ik ja tu'kxëëwpë nyajpaatyës tsajptëkoty, këtiinëm koos jeexyë jëmëjt'am nyajpaaty tëja'p. Ëjts jotkujkës näjyawëtëty oy jeexyë je'eyë ntimy tyëjkëwent'ajtpës ma ja tsajptëjk yajnitëkën, ets këtii koos ënety ëxëëktum nyajpaaty.

¹¹ Jä'ä ko yë Dios mëti'ipë yajwintsën'ajtpën, yë'ë xykyutë'kx xykyujajëm ets xykyuwa'anëm; yë Wintsën tsyojkpy jya'ap ets yajmëj'ajtyp yë ja'ay mëti'ipë juuky'ajtëpën wa'ats, ka'ap nitii tukwintuk'ooky.

¹² Wintsën mëti'ipë maaytyääyëpën winë, janty jotkujk yë ja'ay yajpaaty mëti'ipë mijts mtuk'ijxpäjtëpën.