Salmos 78 - Biblia Dc en Mixe de Quetzaltepec

Salmo 78 Tios yë tyu'unën kyajpxën mëti'ipë tyukputëjkëpën yë nyaax kyajpn

¹ Naax kajpn mëti'ipës njä'ä'ajtypyën, mëtoow'it yë n'ijxpëjkënës; tuk'akonëtë yë mkopk mtatskëty mëti'ipës yam nikajpxäämpyën.

² Yë'ëjës yam nkajpxäämpy nmëtya'akäämpy yë winma'any tsipë etsës yam nikajpxa'any tëkokyë mëti'ipë yu'utsy'ijtpën, mëti'ipë ka'ap pën të tnijawën tëëyëp ets tyampaat.

³ Mëti'ipës të nmëtowtën ets të nijawëtën, mëti'ipës ja nteety n'ap të xytyukmëmëtya'aktën.

⁴ Ka'ap ntukwinkuyu'utsa'anëm ja n'u'unk'ajt n'ok'ajtëm. Mëët ja pi'k ëna'këty mëti'ipë juuky'atantëpnëm, yë'ë mëët ntukxoontakmëty ja Wintsën ets nikajpx nnimëtyakmëty ja kyutujkën ets myëj'ajtën.

⁵ Dios ojts tu'uk tpëjktä'äky yë ënä'ämën mëti'ipë tyukmëwë'ëmën yë Jacob, ojts tu'uk yë ënä'ämën tpëjktä'äky mëti'ipë yë Israel kajpn pyatunëpën, ets ojts tuk'ëne'emy ja n'ap'ajt n'ok'ajtëm ets tuk'ëwaanëtëty tukni''ixëtëty ja y'u'unk y'okëty,

⁶ jëtu'unts nijawëtëty ja mëti'ipë juuky'atantëpnëm, ja u'unk ëna'k mëti'ipë minantëp ja'tantëpnëm naaxwiiny, ets näjyëtu'un yë'ëjëty tukni''ixëtëty ja y'u'unk y'ëna'këty;

⁷ ets jëtu'un yë'ëjëty tukjotkujk'atëty ja Dios ets ka'ap tja'atyëkoytyëty mëti'ipë yë'ë të tuny të tkäjpxyën, ets näjyëtu'un tmëmëtowtëty ja y'ënä'ämën tyiyajtën,

⁸ ka'ap jëtu'un jyä'äy'atëty tä ja y'ap y'okëty y'ëtëtstën, je'eyë kyäjpxykyumëtoownajxtë ka'ap ojts tëy tëtä'äky ja jyot wyinma'any tmëët'atë, ets ka'ap ja Dios oy tmëtuuntë.

⁹ Yë Efraín yë nyaax kyajpn ojts kyäkta'atë jam tsipjotm mëët ja mëktsë'ëkë, oy ënety yajpaatë jëjp'ixy mëët ja ti'pxn ets ja ku'umën.

¹⁰ Ka'ap ojts twinkutsë'ëkëtë ja Dios ja kyäjpxytyu'unën, ets ka'ap tmëmëtoowtë mëti'ipë ënety ja Dios të jyatukni''ixëtën.

¹¹ Ojts tja'atyëkooynyëtë wi'ix ënety winë të tjanajtstunën, ijxtëm ja mëj'ajtënën mëti'ipë tyuunën ma yë'ëjëtyën.

¹² Dios ojts yë myëj'ajtën tyaj'ixyë ma ja tyeety y'apetyën mëti'ipë ënety jam tsënaaytyëpën Zoan, ma ja Egiptë y'itjotmën.

¹³ Ojts tyajnäywyä'kxyë mäjtskpëky yë mejy, ets yajmejynyajxëtë, myajts'ijt ja mëjmejy ijxtëm jeexyë y'apojtsë'ëkyëtyën.

¹⁴ Ko xyiiny'äjty yoots ojts mëët tyu'uwinwowëtë, e ko kyoots'ajty jëënmëët tyu'uwinwoowëtë.

¹⁵ Jam të'ëts'itjotm mäjtskpëky ojts tyajkë'ëtswä'kxy tu'uk yë mëjtsaa, ets tyajnëë'uky yë mayjyä'äy.

¹⁶ Dios ojts tyajpëtsëmy yë nëë tsaajoty ets tyaj'awinpijty komnëë.

¹⁷ E yë'ëjëty ni'ikyë ojts tmëpokytyuntë yë Dios, ojts tnipëtë'ëktë Ni'ik Këjxmëpë jam të'ëts'itjotm.

¹⁸ Ojts ja Dios tjawinma'any'ixa'antë ko ja jyi'kxy pyiky tsoktë jëtu'un tä ja tyimjot tyimwinma'anyëtyën.

¹⁹ Tä ojts tnikäjpxy tnimëtya'aktë tëkatsyjyäty ets y'ënantë: ¿Wä'än jëtää Dios tu'uk yë kaaypyäjn tkëëytyëwëty yaa të'ëts itjotyë ets ënät xyajka'ay xyaj'ukmëtyë?

²⁰ Tëyajtën ko yë Dios ojts tjantyyajkë'ëtswä'kxy tu'uk yë tsaakopk; ets jap yë nëë tyajpëtsëëmy tä tu'uk yë mëjnëëjën, ets tyajtsa'amëy ja naax; ¿jyëkyejpy jëtää näjyëtu'un tyakëty ka'ayën ukënë? ¿jyëkyejpy jëtää tmo'ojëty yë tsu'utsy yë nyaax kyajpnë?

²¹ Ko yë Wintsën jëtu'un tmëtooy tä ojts jyoot'anpëky, toopyëm no'kpëm yajxon jyoot'anpëjky, yë'ë tyukjoot'anpëjk yë Jacob yë nyaax kyajpn.

²² Jä'ä ko ka'ap ojts ja Dios tuk'ijxpätë ets ka'ap tmëpëjktë ja pyutëjk pyupäjtën.

²³ E yë Dios ojts t'ëne'emy yë yoots nëma'a ets tyaj'ëwatsy jam tsajpjotm ja najxtakn,

²⁴ ojts ja tsajpkääky janty mayëty tkupëjknaxy yaa naaxkëjxy mëti'ipë xyëëwajtypyën maná, jä'ä jëtu'un ja tsajpmok mëti'ipë tso'onpën jam tsajpjotm ets jä'ä tkaytyëty t'uuktëty.

²⁵ Yë'ë ojts ja naaxwiinyëtë ja'ay tkaytyë ja tsajpkääky mëti'ipë kyääytyëpën Dios kyukäjpxy, ojts ja Dios myo'ojëtë kyäxëtë mëjwiin këjää ja jë'kxy pëky.

²⁶ Ja poj mëti'ipë ëpa'tkë'ëytsyow ku'ujtpën ets mëti'ipë anëkëjxytsyow tso'onpën ojts jam pyojtë tsajpkëjxm; Dios ojts tyajminy mëët yë myëk'ajtën.

²⁷ Ojts näjyëtu'un tyajkëtä'äky tä tuujën yë tsu'utsy ma nyaax kyajpnën; jëtu'un ojts yë maymyuuxy nyaaxkëtä'äky tä yë nëë ajinën.

²⁸ Itkujky ojts yë Dios tyajkëtä'äky ma ënety jam të tsyënaaytyaknpëktën ets aakyë'ë yaj'ijxnë na'ëwtity.

²⁹ Ojts tjë'kxtë tpëktë koonëm tsyijpëtë, e jëtu'un ojts ja Dios kyuuytyu'unxëtë ijxtëm ënety yë'ë timtsyoktën,

³⁰ E oy jyajëtu'unëty, kä'äpyëm ojts tyimku'uxëtë, tamnëm ënety tka'ku''uknajxta'atë ja jyi'kxyëty,

³¹ ko ojts ja Dios tnajtsmatsë ja tsyip y'äkë ma yë'ëjëtyën, ets ojts tyaj'ooky ja ja'ay aakjä'ä mëti'ipë mëkëtyën, ojts tyaj'ooky ja ja'ayëty mëti'ipë ënety mëj'äämpy yajëkyäjptëpën ma ja Israel kajpnën.

³² E oy jëtu'un ja Dios ënety winë të tjatuny, yë'ëjëty je'eyëm ojts ja poky tuun'ëtë'ëtstë, kä'äpyëm tmëpëjktë ko ja Dios ja myëj'ajtën tjayaj'ijxë.

³³ Paaty yë Dios ojts tpëjktä'äky yë o'kën tëko'oyën ma yë'ëjëtyën, ets juukyajtën jëtu'un kyëxëty nyaxëty tä yë ja'ay myëkxejyën ëtsë'ëkë ituuy.

³⁴ Koonëm ijty ja Dios yaj'ookëtë täänëm ja pyutëjkën t'ixtaayëtë; ënätnëm ijty jyootwinpitë ets ka'ap pyo'kxtë ko t'ixta'atë;

³⁵ jäänëm ënät ja Dios Ni'ik Këjxmëpë tja'amyätstë ets kyuwa'anëtëty.

³⁶ E nëkoopë ja tyajmëtowëtë, jä'ä ko aak antaktëp ënety je'eyë,

³⁷ jä'ä ko ka'ap ojts yajxon wa'ats tmëmëtowtë ets tkuuytyuuntë ijxtëm ënety ja Dios mëët ja käjpxytyu'unën të tjatuntën.

³⁸ E yë Dios mëj këjää yë pa'ëyo'owën najts'ëyo'owën tmëët'aty, nyimä'kxëp ja pyoky ets ka'ap tyajkutëkooynyëpë; kanaak ok jëtu'unyë tyajninajxy ja tsyip y'äkë, ets ka'ap ojts nëkooyë tunyë këwentë ko jya'ëwa'antäky.

³⁹ Dios ojts twinjawë ko yë'ëjëty atón amatsë yajpaatë; ets ko poj'am nyaxtë, ko nyëjkxtë ka'ap y'ëkwinpijnëtë.

⁴⁰ Kanaak ok ojts tkäjpxykyumëtoownaxtë yë Dios yë y'ënä'ämën ets ojts mëj këjää tyajmon tyajtuktë jam të'ëts'itjotm.

⁴¹ E ka'ap wyinjekyëty ijty ja Dios tyajjotkëxtë, ets jëtu'un tyajmon tyajtuktë ja Wa'atspë jampë yajpaatyën Israel.

⁴² Ka'ap tja'amyäjtstë ja xëëw jëmëjt ma Dios mëët ja myëk'ajtën ojts yajtso'okëtën, ma ënety ja myëtsiptëjk ëxëëk mëët nyätyunëtën.

⁴³ Ko ja myëj'ajtën tyaj'ijxë mëj këjää jam ma Zoan itjotmën, jap Egiptë;

⁴⁴ ko tyaj'awinpijty ja nëë ne'pynyën, ets ka'ap tjëkyejpy t'uuktëty ja Egiptë ja'ayëty.

⁴⁵ Ojts tnajtskäxë ma yë'ëjëtyën yë may tsyukts ets nooty mëti'ipë winë yajkutëkooytyën;

⁴⁶ ja maymyu'u ojts tkukä'pta'atë ja pëjktä'äky mëti'ipë ënety të tnitunëtën.

⁴⁷ Mëët ja tip ets ja tëtsn tuu jëtu'unyë nyaxkuputsëtyääy nyaxkumo'onëtyääy ja tsatsymkyam ets ja higo kam.

⁴⁸ Yë jyëyujk tsyajpkaajëty ets tsyajppax kyupixynyëty, ojts y'o'kta'atë ko ojts yë ënääw wëtsuk y'ëtë'ëtstë y'ëna'antë ets nëkooyë tyëtsntuunë.

⁴⁹ Dios ojts jëtu'un yë tsyip y'äkë tnajtsmatsë; yë joot'an, tëytyu'unën ets monyëtukyë, mëti'ipë ojts tnikajpxtën ko ënety ëyo'on y'ita'any.

⁵⁰ Ojts tnajtsmatsë ja y'ëwa'an'ajtën. Ka'ap ojts tnimä'kxë ja jyuuky'ajtënëty; jam tkë'ëyäjky ma ja o'ktaknën;

⁵¹ Ojts yë'ëpaat tyaj'ooky jap Egiptë kajpnjoty ja yajkutujkpë ja kyä'äxkopk ets jënu'un ja Egiptë ja'ayëty ja y'u'unk y'ëna'k tmëët'atën mëti'ipë kä'äxkopkën.

⁵² Jëtu'un ojts twoowpëtsëmy ja Israel kajpn tä yë ja'ay twoowtsoonyën yë kyupixyny; jamtsow ojts twoownëjkxy ja nyaax kyajpn të'ëts'itjotm.

⁵³ Mëët ojts tyajnëjkxy ja akujkajtën jotkujk'ajtën, këtiipë ja tsë'ëkë tmëët'atëty, e ja myëtsiptëjkëty, nëëjoty ojts kyu'o'këtya'atë ko ja komnëë nyijä'tstëkooyëtë.

⁵⁴ Jam ja Dios twoowmiiny ja nyaax kyajpn ma ja it naaxwiinyëtën mëti'ipë wa'atsën, ma ja tun kopkën mëti'ipë yë'ë kë'ëm nyitsiptuunën ets tjä'ä'ajty.

⁵⁵ Ja ja'ayëty mëti'ipë ënety y'ëwtajtëpën wiink tios, ojts tjëpëky tjëtuny ma ja Israel kajpnën; ets nän yë'ë ojts kë'ëm tyajwä'kxy ja it naaxwiinyëtë ma tu'uktu'uk ja Israel ja'ayëtyën, ets ojts tmo'oy ja tsyënaaytyakn nitu'ukjaty ma jyuuky'atëtyën.

⁵⁶ E yë'ëjëty je'eyë ojts yë Dios Ni'ik Këjxmëpë tnëxi'ik tukxi'iktë, ets ni'ikyë tkäjpxykyumëtoownajxtë ets ka'ap tpatuuntë ijxtëm ënety ja y'ënä'ämën tyiyajtën jya'ëna'anyën.

⁵⁷ Tä näjyëtu'un y'ëtëtstë tä ja tyeety y'apetyën, ojts t'ëxmajtsnëtë ets ka'ap ojts oy t'ëkmëmëtoownëtë, je'eyë ojts yë jyot nyini'kx twiitë tä yë kepyën ka'apë oy yaj'uuyën.

⁵⁸ Ojts tyajjoot'anpëktë mëët ja wintsë'këntyakn, ma ja wiink tios t'ëwtatën,

⁵⁹ Dios ojts jyoot'anpëky ko jëtu'un t'ijxy, ets ojts jëtu'unyë tnajts'ixë ja Israel,

⁶⁰ ojts t'ëxmatsy ja tsyajptëjk mëti'ipë jamën Siló, mëti'ipë ënety tyëjk'ajtypyën ma ja naaxwiinyëtë ja'ayëtyën.

⁶¹ Ojts t'ëwatsë ja nyë'ë tyu'u ja myëtsiptëjk ets yë'ë tjä'äniwa'antëty ma ënety y'ityën ja myëj'ajt y'oyajtën.

⁶² Yajxon ojts tukjoot'anpëky ja nyaax kyajpn, ets tkë'ëyäjky ma ja myëtsiptëjkëtyën ets kyupujxtaayëtë.

⁶³ Ja ëna'ktëjkëty jëënjoty ojts y'o'kta'atë; ja pëjkpëty ukpëty ka'ap ojts y'ëkyajwin'ëëwnëtë.

⁶⁴ Ja teetytyëjkëty kupuxy näjyëtu'un y'o'ktaaytyë, ets ja kyu'ookytyo'oxyëty ka'ap ojts y'ëkniyaxënëtë.

⁶⁵ E yë Wintsën ënät ojts pyëti'iky tä yë ja'ay myä'äypyëti'ikyën, tä tu'uk yë ja'ay mëti'ipë tsip'ixyën ets y'ëmu'ukyë wijy,

⁶⁶ ets ojts ëxëëk tyajjaty tyajkëpety ja myëtsip, ets tyajkeky tyajpujty; jëtu'un'äämpy ojts xëmëkyëjxm tyajwë'ëmnë tsëtyu'unmëët.

⁶⁷ Ka'ap ojts tmëjpëjktakë ja José ja y'u'unk y'ëna'k, nijä'ä ojts tkawin'ixy ja Efraín ja jyä'äy;

⁶⁸ pën tëy ojts twin'ixy, ja Judá ja y'u'unk y'ëna'k ets ja Sión kopk mëti'ipë oy tsyojkpy jya'apën.

⁶⁹ Ojts tu'uk yë tsajptëjk tkojy, jëtu'un kyëjxmëty tä tsajpën, jëtu'un tyaj'ita'any xëmëkyëjxm tä yë naaxwiinyëtë y'ijtëyën.

⁷⁰ Ojts näjyëtu'un twin'ixy yë tyuunpë David, mëti'ipë ënety yë'ë tyuunk'ajtypyën yë kupixyny këwent'ajtk.

⁷¹ Ojts jam tjëwoy ma kyupixyny kyëwent'atyën, ets ojts jä'ä tuknipëky ja nyaax kyajpn tkëwent'atëty, jëtu'unts yë'ë tniwintsën'atëty ets twoow'it twijts'itëty ja Israel kajpn.

⁷² E ja David ojts tjanty kyëwent'aty ja Dios ja nyaax kyajpn; ojts tkëwent'aty ets twinwooy twinwijtsy mëët ja kë'ë aaw mëkpë, ets mëët tu'uk ja jot winma'any wa'atspë ets mëtëypyë.