Salmos 70 - Biblia Dc en Mixe de Quetzaltepec

Salmo 70 Min tsojkyë putëjkëkës

¹ Dios, mëti'ipës nTios'ajtypyën, minës yajtsok. Wintsën, minës tsojkyë putëjkëk.

² Wä'än jëtu'unyë tkumay tkutajëtë mëti'ipës xyaj'ookantëpën, wä'än wintsëtyu'un jëjptsëtyu'un tkä'äktë mëti'ipës ëxaty xyjyatunantëpën.

³ Wä'än tkä'äktë wintsëtyu'un jëjptsëtyu'un mëti'ipës xynyëxik xytyukxiktëpën.

⁴ E tëkokyë mëti'ipë mijts m'ixtaayëpën, wä'än tyajpaatë janty jotkujk ets janty xoontä'äky; tëkokyë mëti'ipë tsyojkën'ajtëpën mijts yë mnitsokën wä'än xëmë t'ëna'antë: Yë Dios mëj yë'ë.

⁵ E ëjts maas n'ëyoy njotëkoyën ets jë'ë ya'ax nyajpaatyën, Dios minës poj'am putëjkëk. Mijtsës xypyutëjkëp ets xyajnitso'okëtyës; këtii mpoox'ëtë'ëtsy Wintsën.