Salmos 68 - Biblia Dc en Mixe de Quetzaltepec

Salmo 68 Wi'ix yë Israel myëjtu'unaxyën ko myëtä'äky

¹ Ko yë Dios tyëkë tsiptuunpë, yë myëtsiptëjk jëtu'unyë kyääkwa'kxta'atë; mëti'ipë ëxëëk'ijxëpën pojën kyukäkta'ayë;

² jëtu'un pyojwa'kxta'atë tä jok pyojwä'kxyën tsajpkëjxm, ets jëtu'un yaj'ixtë jëtu'unyë yowë jyiiywya'kxnëtë tä onën jëënjoty, jam ma Tiosën yë ëxëëkja'aytyëjk ijxtëkoy ja'atyëkoy y'itë.

³ E ja'ayëty mëti'ipë oy yë jyot wyinma'anyëtyën, akujk jotkujk nyäyjyawëtë; xoontakp jam yajpaatë Dios wintum, ets y'ätstë xyoonta'aktë mëët ja jotkujk'ajtën.

⁴ Win'ëwtë miitsëty yë Dios, ëwtë yë ëy yä'äxy oyëtypë ets jëtu'un yë xyëëw mëjjawëtë, tukxoonta'aktë mëti'ipë jam tsajpjotm ijtpën tsënääpyën. Xoonta'aktë jam ma Wintsënën. Xoontä'äky yajpaatë ma yë'ëjën.

⁵ Dios, mëti'ipë ijtpën ma tsyajptëjkën, yë'ë nyiteety'äjtyp yë ku'ooky u'unk ets yë'ë näjyëtu'un pyutëjk pyupejtyp yë ku'ookytyo'oxy.

⁶ Dios yë'ë myoopy yë jyëën tyëjk mëti'ipë atu'uk yajpatpën ets mëti'ipë winwa'atstuuy juukyajtpën, yajpëtsëëmpy yë tsumjyä'äy pujxn tëkoty ets tyajjotkujkë ma jyuuky'ajtënën; Ja ja'ayëty mëti'ipë käjpxykyumëmëtoownajxtëpën jam nëjkx tsyëënëtë ma ka'ap tii y'ity wyintëyën.

⁷ Mijts Dios, ko ojts xywyoowtsoony ja mnaax mkajpn ets ojts xywyoownëjkxy të'ëts'itjotm,

⁸ ojts yë naaxwiinyëtë yu'kxy ets ojts yë mëk komtuu kyëtä'äky naaxkëjxy mëti'ipë tsajpwinm tso'onpën, yë Sinaí kopk näjyëtu'un jyänty yu'kxtäky Dios wyintuuy, ma ja Israel ja'ay Tyiosëtyën.

⁹ Mijts Dios, tëë xyajtu'uy xyajpojy mëj këjää, ets të xyajxooky ja naaxwiinyëtë ma ënety tsyë'ëtsëtyën ets jëtu'un jatëkok y'ajämë.

¹⁰ Jam ojts yë mnaax mkajpn tsyëënaaytyaknpëky, e mijts Dios, mëët ko xymyëët'aty yë oyjyot oywyinma'any, tëë xyajkay xyaj'uuky ja ëyoopëja'ay.

¹¹ Ojts yë Dios tu'uk yë ayuk tkäjpxy, ets kanaak ojts yë to'oxytyëjktëjk y'itë mëti'ipë kyajpxnajxtën:

¹² Tam kyä'äktë ja yajkutujkpëtëjk mëët ja tsyiptuunpëtëjkëty. Jam tëjkwintum, yë to'oxytyëjkëty yë'ë jam pyëjkwa'kxtëp mëti'ipë ja mëtsiptëjk të yajtukniwojptu'utën,

¹³ e mijts ojts myajyu'utsy. Jëtu'un ojts mkëxë'ëky tä tu'uk yë pakën mëti'ipë kyäkn këxë'kpën poop pujxn nikoypyën. Ets ja jyëmk yaj'ixy pu'ts pujxn nikuutsypyën.

¹⁴ Ko ja mëti'ipë maaytyääyëpën winë tyajkäktaay ja yajkutujkpëtëjk, tëë ënety tip yajxon kyä'äy ma Salmón kopkën.

¹⁵ Këjxmëty yë kopk kyëxë'ëktë jam Basán itjotm, këjxmëty yajxon ma jam kyëpetyën.

¹⁶ Miitsëty jënu'un jam mnaxtën mtëkëtën tunkëjxm kopkëjxm, ¿wi'ix ko ëxëëk xy'ixtë ja kopk ma ja Dios tsyëënëja'anyën? Yë Wintsën xëmëkyëjxm jam y'ita'any.

¹⁷ Yë Dios may yë kepy wintëkäämpë tmëëtëty mëti'ipë myëtsiptuunpyën; ko jam Sinaí tsyo'ony kepy wintëkäämpë akujky ojts myiny ma tsyajptëjkën.

¹⁸ Mijts Dios, janty këjxm ojts mpety ets xyajnëjkxy ja mtsumjyä'äy; ojts ja'ay winë mmo'oyë, yë'ëpaat ja'ay mëti'ipë käjpxy kumëtoownajxtëpën ojts mwinkoxtänëty, Wintsën.

¹⁹ Mëjjaw kënu'kxyjyawë y'ity yë Wintsën, mëti'ipë nTios'ajtëmën, mëti'ipë xyajnitsokëmën, mëti'ipë winjëpom myënëjkxypyën yë ntsëmy'ajt nkë'ëy'ajtëmë.

²⁰ Yë Dios, mëti'ipë nTios'ajtëmën yajnitsokp yë'ë, ets yë'ë mëti'ipë xyjyu'tmëpën o'këntuuy.

²¹ Dios jëtu'unyë tkë'tswa'kxa'any yë kyëpajk yë myëtsip, ja kyëpajk mëti'ipë ni'ikyë pokytyuun'ëtëtstëpën.

²² Jëtu'un yë Wintsën të y'ënä'äny: Nyajtsoonäämpy jam Basán; njuutäämpy jam ma ëxëëk mjaty mkëpetyën,

²³ ets xy'atään xytyuktäänëty yë mmëtsip yë nye'pyny, ets m'uk twe'eymyukëty.

²⁴ Dios, mëti'ipës nTios'ajtypyën, ets mëti'ipës nkutujkpë'ajtypyën, ma mtsajptëjkën xëmë tajnax y'ity ko mijts myajmëjjawë.

²⁵ Mëti'ipë ëëwtëpën jëyëjp nyëjkxtë, e mëti'ipë xuxtëpën koowtëpën ix'am ye'eytyë, itkujky yë'ë nëjkxtëp yë to'oxy'ëna'këty mëti'ipë yaj'ënantëpën yë xijtn.

²⁶ Tëkokyë miitsëty mëjjawëtë yë Dios, mëti'ipë Wintsën'ajtpën. Tëkokyë miitsëty Israel ja'ayëty jënu'un të mniye'eypyätën.

²⁷ Wintuuytsyow yë'ë nëjkxp yë Benjamín, ja tim mutskpë, ja kutëëm mëët kanaak ja yajkutujkpëtëjk mëti'ipë Judá ja'ayën, ma Zabulón ja'ayën, ets ma Neftalí ja'ayën.

²⁸ Dios, mëti'ipës nTios'ajtypyën yaj'ixëty yë mëj'ajtën; kajpxkëxë'ëk jatëkok mëti'ipë të xytyunyën ma ëëtsëtyën.

²⁹ Jam këjxm tsyo'ontä'äky ma ja mtsajptëjkën jam Jerusalén, ma ja yajkutujkpëtëjk tyajmintën ja mnänyamo'ojë,

³⁰ oj yë Egiptë ja'ayëty, mëti'ipë ja'ay'ajtëpën tä mëj jëyujkën aayjoty ujtsjotypë, tä tsajpkaa yä'äyën inpë, mëti'ipë näjya'awëyëpën tsajpkaa ëna'kën, mëti'ipë yi'iyë myëmääpy myëtäjpyën wi'ix ja wit meeny may'äämpy tpaatëty oy ja naax kajpn ëxëëk tyajjatëty; oy ja naax kajpn tsyiptun tsyippaatëty.

³¹ Jap Egiptë tsyoona'antë yë ja'ayëty mëti'ipë këjxmëty yë kuttujkën myëët'ajtëpën; yë Etiopíë ja'ayëty nëjkxëp t'ëwtatë yë Dios.

³² Kuuy'ëwtë yë Dios tëkokyë miitsëty jënu'un m'ënä'ämtën myajkutuktën naaxwiiny naaxkëjxy, ëwtë ya'axtë yë y'iy yä'äxy yë Wintsën,

³³ mëti'ipë jam ënyääpyën tsajpjotm mëti'ipë kë'ëyxyëëw kë'ëyjyëmëjt ijtpën. Mëtoow'itë wi'ix yë y'aaw y'ayuk yajmëtoyën, yë y'aaw y'ayuk mëti'ipë mëj'ajtën mëëtën.

³⁴ Mëjpëjkta'aktë yë Dios yë myëk'ajtën; yë myëj'ajtën yë'ë yajwintujktääpy tëkokyë yë Israel kajpn, ets myëk'ajtën pyätyp yë tsuxk tsajp.

³⁵ Janty oytyukxootaknë yë Dios jap yajpaaty ma tsyajptëjkën; yë Dios mëti'ipë Israel Tyios'ajtypyën, yë nyaax kyajpn yë'ë myëkmoopy myëjaawmoopy. Paaty yë Dios kënu'kxy mëjjawë mëpaat y'ity.