Salmos 58 - Biblia Dc en Mixe de Quetzaltepec

Salmo 58 Ma yajpëjktsoyën ets winë oy yajnipaye'eyëty

¹ Miitsëty jënu'un mëj'äämpy m'itën, ¿jaanty mëtëy ja nëë poky xynyipaye'eytyë ets yë'ë mëtëypyë mtuuntëp ko ja naaxwiinyëtë ja'ay ja nyëë pyoky xytyukwinmëtowtë?

² Aak tëkatsy miitsëty winë xytyuntë, jëën tsip je'eyë m'ixkujkëtyëp ma ja naax kajpnën.

³ Yë ëxëëkja'aytyëjk jëtu'un tmëmëxu'unk'atëtë ëxëëk jot ëxëëk winma'any, yë antakpëtëjk ka'anëm myintë naaxwiiny ko yajpaatë jëkäm mëët ja tëyajtën.

⁴ Jëtu'un jyä'äy'atë tä tsa'anyën mëti'ipë ëwa'anën, jëtu'un tä xoxën mëti'ipë nat näpyëjktakëpën ujts mëët yë xyëwät, yajxon yë tyatsk t'apääntujkta'ay,

⁵ ets ka'ap tmëtowtëty oy jya'ëy ja wijyjyä'äy mëti'ipë yaj'yujypyën yë tsa'any, mëti'ipë nyija'apën wi'ix jëtu'unyë tyajmëkëtyën.

⁶ Dios mëti'ipës nTios'ajtypyën, pu'ujë tyëts, Wintsën, yajënajkë y'akaap tääpë kaa.

⁷ Wä'än tëkooytya'atë tä nëëjën mëti'ipë pëyë'kpën; ets wä'än jëtu'un tëtstëkooytya'atë tä aay ujtsën mëti'ipë në'ë'aay tu'u'aayën;

⁸ wä'än jëtu'unyë tëtstëkoytyë, tä yë nu'pyky yë y'anëë tyëtstëkoyën, ets jëtu'un jyatëty kyëpätëty tä mëxu'unk ooky jyä'tyën naaxwiiny, ets ka'ap jajën të'kxën t'ixy nijëna'a.

⁹ Wä'än tnitoytyë tä äpnyën ma ka'anëm tii tnijawëtën, wä'än mëët yë joot'an tyajnujkë'ëktë tä tsuxk ujts yajnujkë'ëkyën.

¹⁰ Jotkujk nyäjyawëja'anyë ja wa'ats ja'ay ko ënety të yajnipaye'ey ma ëxëëk të jyäty të kyëpetyën; jëtu'unyë nëjkx t'ateeny tukteeny ja jyot nye'pyny ja myëtsip ëxëëkpë jyä'äy'ätyën.

¹¹ Ënet ja käjpxy y'ëna'ana'any: Nik oy'ajtp ko oy winë ntu'unmëty. Jä'ä ko tää tu'uk yë Dios mëti'ipë winë nyipaye'epyën.