Salmos 54 - Biblia Dc en Mixe de Quetzaltepec

Salmo 54 Tsajpkäjpxy ma Tios näypyutëkë yaj'amëtoyën

¹ Dios, yajnitsokës, mijts nTios'ajtyp, mëti'ipë myëët'ajtypyën yë mëj'ajtën. Niwaantutkës ets kuwaankës mëët yë mmëkajtën.

² Mëtoow'ijtkës yë ntsajpkäjpxy, mijts Dios, mijts nTios'ajtyp, ets tuk'akon yë mtatsk yë n'aaw n'ayukës;

³ yë ja'ayëty mëti'ipë je'eyë tsiptunantëpën ets ëxëëkpë jyä'äy'atën, ëxëëkës xyjyänty'ixtë ets xytyimyaj'ookantëpës; ka'ap yë Dios tja'amyätstë.

⁴ E ëjts, ka'apës njëtu'unyëty; Dios yë'ëjës xypyutëjk xypyupäjtp, ets yë'ëjës xyaj'ijtp juuky.

^5-6 Yë'ë yajkutukëp etsës yë nmëtsiptëjk kë'ëm yë y'ëxëëk'ajtën tyiytyunëtëty. Yajkutëkooytya'a mijts Wintsën tääpë ja'ayëty, jä'ä ko mijts aak'oy winë xytyuny. Ëjts mijts nmo'ojëp yë mwintsë'kën ijxtëmës yë njot nwinma'any npëjktä'äkyën, etsës nkuuy'ëwa'any nkuuyya'axa'any yë mxëëw, jä'ä ko mijts janty'oy janty tsuj mTios'aty.

⁷ Jä'ä ko mijtsës të xyjyuuty maas ënety mon tuk nyajpaatyën ets tëës kë'ëm ntim'ixy koos yë nmëtsiptëjk ka'ap të myëta'aktë.