Salmos 50 - Biblia Dc en Mixe de Quetzaltepec

Salmo 50 Tios mëti'ipë mëtëy yajkutujkpën

¹ Yë Wintsën mëti'ipë Tios'ajtpën ma wiinkëtypë tiosën, tëë kyäjpxy; tëë tmëkäjpxy tëkokyë ja'ayëty jënu'un tsyëënëtën naaxwiiny naaxkëjxy anajnytsyowpë, a'oytsyowpë.

² Dios yë'ë jam të'kxp jajp ma Sión kajpnën, ma ja kajpnën janty'oy janty tsujpë.

³ Yë nTios'ajtëm tää myiny wyinkony, ka'ap Amón api'its myiny: jëënmëët myiny mëti'ipë winë yajtooytyëkoopyën, ets wyintuuy pyë'aay mëk tuu mëkpoj mëët ye'ey.

⁴ Jam këjxm yë Dios tmëkäjpxy yë tsajp ets naaxwiinyëtë, ets tniminy yë nyaax kyajpn tääts tukwinmëtowa'any tëkokyë tiijaty të tuntën.

⁵ Niye'eypyätë miitsëty ninu'un winë oy xytyuntën, mëti'ipë yë käjpxytyu'unën të tyajwintu'upëktën mëët ëjts, ets tyaktë xëmë ja wintsë'kën ma ëjtsën.

⁶ E yë tsajp yë'ë nyikäjpxyp ko yë Dios mëtëy nyipaye'ey.

⁷ Mëtoow'itë, miitsëty Israel ja'ayëty, mëti'ipës nnaax'ajtyp nkajpn'ajtypyën, tyam mijts yajxon nmëkajpxa'any. Ëjts jëtu'un Dios, ëjts mijts xyTyios'ajtp.

⁸ Ka'ap yë'ëjëty ntukwiink'ixy koos mijts xytyukwintsë'ëkë yë tsajpkaa ooky, tsajppax ooky, tsa'aypyë no'okpyë.

⁹ Ka'ap n'amëtoy yë mtsajpkaa ayääkë ëkë mtsajppax ayääkë mëti'ipë jam mkemjyotmën.

¹⁰ Jä'ä ko tëkokyë jëyujk aak'ëjts yë njä'ä, yë jëyujk mëti'ipë tunkëjxm kopkëjxm jëtijtëpën;

¹¹ ëjts yë njä'ä yë joon jëyujk mëti'ipë tunkëjxm kopkëjxm tsënaaytyëpën, ets tëkokyë mëti'ipë aayjoty ujtsjotyën.

¹² Kooxyëpës jeexyë n'ëkyuu'ookyë, kajxyëp yam mijts ntukmëmëtyä'äky, jä'ä ko yë naaxwiinyëtë ëjts yë njä'ä ets tëkokyë jënu'un jää winë yajpaatyën.

¹³ ¿Yë'ëmës jëtää nnätyuk'ijx nnätyukmëyajtëp yë tsajpkaatsu'utsyë ëkë n'uukyës një'kxyës yë tsajppax ne'pynyë?

¹⁴ Wä'än yë Dios yë'ë tyajtukwintsë'ëkë yë kukkajpxën ja'awëkyëtakkën; kuuytyun mëti'ipë të xytyukwinwanën ja Ni'ik Këjxmëpë.

¹⁵ Mëkajpxkës ko ënety mijts mon tuk myajpaaty; ëjts mijts nyajnitso'okëp ets jëtu'unës mijts xy'oyjawëty.

¹⁶ E yë ëxëëk ja'ay tyaa yë Dios y'ënë'ëmxëty: ¿Tii mpatëpën mijts ets xynyikajpx xynyimëtya'akëty ëjts yë n'ënä'ämën ntëyajtën ëkë nkäjpxytyu'unënës mëti'ipës të nyajwë'ëmyënë?

¹⁷ Mijts ka'ap xy'oyjawë ko tii ntuk'ënëëmë, ets ka'ap xytyunyë këwentë yë n'ayukës.

¹⁸ Ja'ay mëti'ipë toonp mä'tspën, janty'oy xytsyoky xyjyawë, jëtu'un xy'oyjawë mëkä'äx'ajtyp yowë; janty'oy mëët mye'eymyuky mnajxmuky yë ja'ay ka'apë y'u'unk tyo'oxytyëjk twinkutsë'ëkën.

¹⁹ Ko yë ëxëëkpë xytyuna'any xykyajpxa'any ets ko xymyäy xytyäjy wi'ix mwin'ëën m'anta'akëtyën, janty këtii tsyipëty yë mwiin m'aaw xyajwä'kxy.

²⁰ Tëkatsyëty yë mjëëky mmëku'uk xynyi'ëy xynyikäpxy, ets myajjotma'typ yë mmëkä'äx ko tsaatsyëty ma'atëty xymyëkäjpxy.

²¹ Ya'atë të xytyuny të xykyäjpxy, e ëjts tëës jëtu'unyë ntimy'amoonkëtä'äky; jëtu'un jëtää të mmay të mtajy koos näjyëtu'unës nja'ay'äty tä mijtsën. E tyam ja npoky ntukwinmëtowa'any wiinxë jëjpxë, tyam ja npoky n'ixtaaytyä'ämyëty.

²² Ja'aykyukëtë yajxon ya'atë, miitsëty jënu'un yë Dios ijxtëkoy ja'atyëkoy xyaj'itën, këtiipë ajotkumonë n'awots ntukwotsëtëty ëkë ëxëëk ntuntëty ma ka'ap pën myajtso'oka'anëtën.

²³ Pën tii kyukajpxëpën, ëjts xyajmëjnajxp, nyajnitsokpyës yë ja'ay mëti'ipë juukyajtpën mëtëy.