Salmos 38 - Biblia Dc en Mixe de Quetzaltepec

Salmo 38 Tsajpkäjpxy ma Tios näypyutëkë yaj'amëtoyën

¹ Wintsën këtiis xy'ojëty koos xytyukjoot'anpëkëty, ets këtiis xytyiytyunëty mëët yë mtsip m'äkë.

² Jëtu'unës näjyawëty tëës yowë mku'umën xytyukjë'pnaxy; ets këjääjës njawë të xyaj'ëyo'onpaaty.

³ Mëët ko tëë mjoot'anpëky koos të mpokytyuny, tëkokyë yë njot nini'kxës pëjkp atoonpës njawë; ni tu'ukës yë npajk nkajawë y'oyëty.

⁴ Kë'ëmës winë ëxëëk n'ëktuny ets kë'ëmës ka'ap n'ëkmëmëta'akanë;

⁵ Mëëtkyëjxm koos yë ntsuuwinma'any nyajtuny, nipu'uts kupu'utsës ets xu'kp jojkpës näjyawëty.

⁶ Mon tukës nxëënaxy ets winta'ak naaxkow.

⁷ Yë njëxkës je'eyë pya'amnë wyi'tsnë mëët yë jëënpa'am; tëkokyë yë njot nnini'kxës aak pëjkp aak atoonëp.

⁸ Tyam jëtu'unës nnäyjyawëty amä'ä tukmä'äjë ets ka'apës tii nmëjaawnë; koos n'ëjy ntu'uky yë'ë jootjotypë tsyoonyën.

⁹ Wintsën, mijts wa'ats xynyijawë mëti'ipës ntsojkën'ajtypyën. Koos nmëkxejy mijts wa'ats xynyijawë tii ko jyëtu'unëty.

¹⁰ Yë njuukyjotës pe'tympe'tym jyänty pyuty, ka'apës tii nmëjaawnë ets ka'apës oy n'ëk'ijxnë.

¹¹ Yë ja'ayëty mëti'ipës ënety oy mëët nnäjyawëtyën ets yë njëëky nmëku'ukës jëkäm yajpaatë, jä'ä koos npu'utsy.

¹² Mëti'ipës xyaj'ookantëpën, tëë n'o'ktaknës tpëjkta'aktë yu'utsypë; mëti'ipës xyaj'ëyo'onpaatantëpën, ëxëëkëm xynyikajpx xynyimëtya'aktës, jëtu'un ijxtëm mëpaat yë nwinma'anyës myä'ätyën; janaam jatsojk yi'iyë myääytyëp tyajtëp wi'ixës ëxëëk njatëty nkëpätëty.

¹³ Natës je'eyë nnäpyëjktä'äkyë tääjës jeexyë ka'ap nmëtoyën; tääjës jeexyë n'uumëtyën, ka'apës n'aaw nyajwä'kxy.

¹⁴ Jëtu'unës ëjts tääjës jeexyë ka'ap nmëtoyën, ets ka'ap tjëkyepy wi'ixës nnänyikajpxtu'utëtëty.

¹⁵ Mijts ënät tyam ntuk'ijxpejtyp, Wintsën, mijts mëti'ipës nTios'ajtypyën, mijts mpatëp wi'ixës xy'ëtsowa'any.

¹⁶ Yi'iyës n'amëtoopy këtiipës xynyëxi'ik xytyukxi'iktëty ets ka'ap xyoonta'aktëty koos ënety tii xyjäty xykyëpety.

¹⁷ Tëyës n'ëna'any ko mëpaatëpës n'o'knë; yë pëjkën ijxën ka'apës xynyiwa'atsy.

¹⁸ Minës yë npoky n'ëkmaaywyätsy, ka'apës njotkujk'aty koos nkanikäjpxy.

¹⁹ Yë nmëtsipës ni'ikyës n'ijxnë nyimayënëtë, nimay oynyë mëti'ipës xymyëtsip'ajtëpën.

²⁰ Mëti'ipës oy të njatunyën, ëxëëk të tuunwinpitë, ëjts njatsojkpyës winë oy ntunëty, e yë'ëjëty ni'ikyës xytyukjoot'anpëktë.

²¹ Wintsën, këtiis atu'uk xy'ëxmatsëty. Dios, mëti'ipës nTios'ajtypyën, këtiis xymyëjëkämkä'äkëty.

²² Dios, mëti'ipës xyajnitsokpën, nimiinkës pojën ets putëjkëkës.