Salmos 149 - Biblia Dc en Mixe de Quetzaltepec

Salmo 149 Tios mëti'ipë yajkojën winë ets mëti'ipë ënä'ämpën

¹ Tukxoontä'äky mëjjawë Dios yë xyëëw nyaxëty. Tukwin'ëwtë yë Wintsën yë ëy yä'äxy jemyëtypë, mmëjpëjkta'aktë ma tsyëënëtën yë wa'ats ja'aytyëjkëty.

² Xoonta'aktë miitsëty Israel ja'ayëty, miitsëty naax kajpn jampë myajpaatën Sión, jä'ä ko Dios yë'ë yajkojpë ets yë'ë yajkutujkpë ma miitsëtyën.

³ Mmëjpëjkta'aktë yë xyëëw mëët yë ety tëki'ixy, ëwtë ya'axtë yë ëy, tukpa'ëna'antë yë xijn ets kow,

⁴ jä'ä ko Dios tyukxoontäkpy yë nyaax kyajpn; yajmëtäkpy yë ja'ay yu'unk naxymyëpë jyuuky'atën.

⁵ Xoonta'aktë miitsëty wa'ats ja'aytyëjkëty ko të mmëta'aktë, ko mma'atëty mpo'kxtëty akujk jotkujk myajpaata'antë.

⁶ Mmëjpëjkta'aktë yë Dios mëët ja aaw ayuk, kajpë'ëktë yë mtëypyujxnëty mëti'ipë jëjpën mäjtskpa'a

⁷ ets ja naax kajpn xyajkutëkoytyëty mëti'ipë ëxëëk të mtunëtën, jëtu'un xytyukkumëtowtëty ja nyëë pyokyëty

⁸ ets xykyë'ëtsum xytyekytsyumtëty ja yajkutujkpëtëjk ets ja ja'ayëty mëj'äämpyë y'itën mëët ja pujxntä'äky je'emtyëtypë

⁹ ets y'atëwëty jëtu'un ijxtëm ënety të yaj'awitsyën ja pyokyëty tä myinyën këxja'ay. Jëtu'un nëjkx ja ja'ay mëj'äämpy nyaxtë mëti'ipë oy juuky'ajtëpën. Tukxoontä'äky mëjjawë Dios yë xyëëw nyaxëty.