Salmos 147 - Biblia Dc en Mixe de Quetzaltepec

Salmo 147 Ka'ap ojts ni'ëmukë ja naax kajpn tsojkta'ay

¹ Tukxoontä'äky mëjjawë Dios yë xyëëw nyaxëty. Wi'ixpëm jyänty'oyëty ko yë Dios nwin'ë'ëw nwinyaxmëty. Yë'ë paatë'ajtëp ets yajmëjpëjkta'akëty.

² Yë Wintsën yë'ë kyoj'o'oyëp yë Jerusalén kajpn ets yë'ë yajtu'ukmujkpy yë Israel ja'ayëty oy muum xit ko'ow yajpaatë.

³ Yë'ë yajtsokpy mëti'ipë jya'apën yë y'aaw jyot amo'ots tukmo'otsë ets tnipijt tnimojtsë ja tsyëtyut.

⁴ Yë'ë nyija'ap jënu'un yë mëtsa'a yajpaatyën jam tsajpkëjxm, aakyë'ë xyëëw tyukmëkäjpxyp nitu'ukjaty.

⁵ Mëj yë nTios'ajtëm ets näjyëtu'un yë myëk'ajtën; tsip yë wyij'ajt kyujk'ajtën nnija'awëmëty mapaat jyëjpkëxyën.

⁶ Yë'ë yajjotkujktäkpy yë ja'ay mëti'ipë yu'unk naxym juuky'ajtëpën, e yë ëxëëkja'aytyëjk yu'unk naxym tpëjktä'äky.

⁷ Win'ëw winya'axtë yë Wintsën mëët yë kukkajpxën ja'awëkyëtakkën, tukwin'ëwtë yë nTios'ajtëm yë ëy yä'äxy mëët yë kow.

⁸ Ko jam tsajpjotm yë yoots kyëxë'ëky, yë'ë jam yajkëxë'kpy ets tyajtu'uy yaa naaxwiiny naaxkëjxy, yë'ë näjyëtu'un yë mëëy u'unk yajpëtsëëmpy jam tunkëjxm kopkëjxm,

⁹ yë'ë yajë'kxyp yajpëjkpy yë jëyujk tsajpkaa, näjyëtu'un ko wëëky yë y'u'unk tyajpi'k'aty ets ko ya'axtë nyä'ämtë.

¹⁰ Yë Wintsën ka'ap yë'ëkyëjxmëty jotkujk nyäjyawëty ko yë kwaay kyumëjaawëty ëkë ko yë naaxwiinyëtë ja'ay jyotmëkëty;

¹¹ mëti'ipë tyukjotkëtäkpyën yë'ë ko pën wyintsë'ëkëty ets myëmëtoyë, ets mëti'ipë tyuk'ijxpäjtëpën ja tsyojkën jya'awën.

¹² Miitsëty Jerusalén ja'ayëty mëjpëjkta'aktë yë Wintsën; miitsëty Sión ja'ayëty, tukxoonta'aktë yë mTios.

¹³ Yë'ë ojts tpëjktä'äky yë pujxn ma mtëjk'aawën ets tkënu'kxta'ay yë m'u'unk m'ëna'k ma naax kajpnën.

¹⁴ Yë'ë mtukpat mtuk'ijxëp yë jotkujk'ajtën, ets myaj'ityë ku'uxyë jotkëtä'äky mëët yë jë'kxy pëky oyjyätyëtypë.

¹⁵ Yë'ë kyejxyp yë y'aaw y'ayuk naaxwiiny naaxkëjxy ets y'aaw y'ayuk janty pojën ye'eywyä'kxy.

¹⁶ Yë'ë yajkëtäkpy yë tip jëtu'un tä pixynyën ets tyajpojwä'kxy tä naaxwayën.

¹⁷ Yë'ë yajkëtäkpy yë tip tä tëtsnën mëjatyëtypë ets tyajtëtykyë ka'ap myëmëtaknëty.

¹⁸ E ko yë y'ayuk tkexy, tääts jëtu'unyë jyiiywya'kxta'ay; e ko ënät tyajpojy, tääts yë nëë tyajpëyi'iky.

¹⁹ Yë Jacob, mëti'ipë näjyëtu'un yajtijpën Israel, ojts yajtuknijawë yë y'aaw y'ayuk ets y'ënä'ämën tyiyajtën.

²⁰ Ka'ap ojts maa wiink naax wiink kajpn jëtu'unpë tuny, ja ja'ayëty ja wiink naax wiink kajpnëpë ka'ap ojts ma tnijawë'atë ja y'ënä'ämën tyiyajtën. Tukxoontä'äky mëjjawë Dios yë xyëëw nyaxëty.