Salmos 116 - Biblia Dc en Mixe de Quetzaltepec

Salmo 116 Tsajpkäjpxy ko tii yajkukajpxë

¹ Ntsojkpy nja'apës yë Wintsën, jä'ä ko tëë tmëtoow'ity mëti'ipës të n'amëtoy të npëjktsoyën,

² tëë tmëtoow'ity mëti'ipës të nkäjpxyën. Paatyës yë'ë xëmë nmëkajpxa'any mapaatës njuuky'äty.

³ Ja o'kën jëtu'unës të xytyukja'ty tä ja'ay yajtsumy yajxotyën mëët yë tejpxy, tëës ja monyëtukyë xytyukja'ty mëti'ipë jap tso'onpën o'kpëjutjoty tä jeexyë tsumy matsy nyajpaatyënës jëtu'unës të näjyawëty mëët ja tsë'ëkë ets ja pëjkën ijxën.

⁴ Ënätës ojts ja Wintsën ja xyëëw npa'tmëkäjpxy etsës ojts nmënu'kxtä'äky tääts tyajtso'okëty ja njuukyajtënës.

⁵ Yë Wintsën, wa'ats yë'ë ets pa'ëyoop najts'ëyo'owëp, yë Dios janty'oy yë jot winma'any tmëëtëty.

⁶ Yë Wintsën Kyëwent'ajtyp yë ja'ay mëti'ipë yu'unk naxym ja'ay'ajtpën. Koos ënety ëjts tëë nmëjaawkëjxnë, yë'ëjës ojts xyajtso'oky.

⁷ Tyam, jyëkyejpy jotkujk nnäjyawëtëtyës, jä'ä ko yë Wintsën janty'oy yë jyot wyinma'any të tyajnikëxë'ëky maas ëjtsën,

⁸ tëës xyajpëtsëmy jam o'këntum, etsës të xymyo'oy ja jotkujk'ajtën maas ënety një'ëyën nyä'äxyën ets maas ënety këtaw këpip nyajpaatyën.

⁹ Ëjts nmëmëtoowäämpyës yë Wintsën yaa naaxwiiny ma ja'ayëty tsyëënëtën jyuuky'atën.

¹⁰ Ëjts je'eyëmës ënety nmëëtëty ja mëpëjkën, oyës n'ëna'any ko mëj këjää ja n'amay njotmayës.

¹¹ Janty nitiijës ënety nka'ëkjëjp'ijxnë koos njaak'ënany, ko tëkokyë yë naaxwiinyëtë ja'ay aak antaktëp.

¹² ¿Wi'ixës yë Wintsën n'ëkkëjuuytyääyëty tëkokyë mëti'ipës të xymyo'oy të xykyexyën?

¹³ Ntukxoonta'akäämpyës yë Dios koos të xyajnitso'oky, etsës npa'tmëkajpxa'any ja xyëëw.

¹⁴ Nkuuytyunäämpyës ja waantakën ma ja Wintsënën mëti'ipës të ntukwinwanën, ets y'ixtëp tëkokyë ja naax kajpn mëti'ipë yë'ë kyajpn'ajtypyën.

¹⁵ Yë Wintsën mëk tjawë ko t'ixy y'ooktë yë ja'ay mëti'ipë tsojkëpën.

¹⁶ Wintsën, ëjts mijts xytyuunpë'ajtp. Ëjts xy'u'unk'ajtp ja to'oxytyëjk mëti'ipë mmëtuunëpën. Mijts të xypyojtuky ja tejpxy mëti'ipës të nyajtuktsumyën.

¹⁷ Nmo'ojäämpy yë wintsë'kën ets jëtu'un nyajnaxa'anyës yë kukkajpxën ja'awëkyëtakkën, etsës n'ëwtata'any yë mxëëw, Wintsën.

¹⁸ Nkuuytyunäämpyës ja waantakën ma ja Wintsënën mëti'ipës të ntukwinwanën, ets y'ixtëp tëkokyë ja naax kajpn mëti'ipë yë'ë kyajpn'ajtypyën.

¹⁹ Jap ma ja Wintsën ja jyëën tyëjkën, itkujky ma mijtsën, Jerusalén. Tukxoontä'äky mëjjawë Dios yë xyëëw nyaxëty.