Salmos 107 - Biblia Dc en Mixe de Quetzaltepec

LIBRO V Salmo 107 Wi'ix yë Wintsën yë tsyojkën jya'awën winë xëëw winë jëmëjt yajpaatyën

¹ Kukajpxëtë yë Wintsën, jä'ä ko yë'ë janty'oy Tyios'aty, ets yë'ë winë xëëw winë jëmëjt xytsyojkëm.

² Ënëëmëtë jënu'un të yajtso'okëtën yë Wintsën, mëti'ipë ojts tyajtso'okyën ma ja myëtsiptëjkën,

³ ets mëti'ipë ojts tyajtu'ukmukyën ma ënety yajpaatën xit ko'ow wiink naax wiink kajpn, anëkëjxytsyow, ëpa'tkë'ëytsyow, a'oytsyow ets anajnytsyow,

⁴ mëti'ipë ojts ye'eytyëkoytyën të'ëts'itjotm, jinjotm ets ni ma ja në'ë tu'u tka'ëkpatnëtë mëti'ipë nëjkxpën kajpntum ets jeexyë jam tsyënaaytyaknpëktë;

⁵ yuu'o'këtyëp ets tëtsëtyëp ënety oynyë, oo'kanëtëp ënätynyë.

⁶ E jam ma ënety jëtu'un mon tuk yajpaatën, jam ojts yë Wintsën tmëkajpxtë, tä ojts yajpëtsëmëtë jotmayjoty,

⁷ ets ojts yajnëjkxëtë ma ja naax kajpnën ma jotkujk jyuuky'atëtyën.

⁸ Kukajpxëtë yë Dios mëëtkyëjxm ko oy winë tuny ets naaxwiinyëtë ja'ay jotkujk jyuuky'atëty.

⁹ Yë'ë yajmoonëp yë ja'ay yë tyëëtsë mëti'ipë tëtsëpën, ets yajkääpy yaj'ukpy may yë ja'ay mëti'ipë yu'o'këpën.

¹⁰ Jä'ä ënety yajpaatë kupi'its kukoots, ets tsumy matsy ma ja monyë tukyën,

¹¹ mëët ko tkäjpxykyumëtoownajxtë ja Wintsën ja y'ënä'ämën tyiyajtën ets ko ka'ap tuuntë këwentë mëti'ipë ojts tjatuknipëjktaakën ja Ni'ik Këjxmëpë.

¹² Dios ojts myo'ojëtë ja tuunk mëkpë ets jä'ä tuunk'atëty; oy jyakëtaaw jyakëpijptë, ka'ap pën pyutëjkëyëtë.

¹³ E jam ma ënety jëtu'un mon tuk yajpaatën, jam ojts yë Wintsën tmëkajpxtë, tä ojts yajpëtsëmëtë jotmayjoty;

¹⁴ ojts yajpëtsëmëtë ma ënety yajpaatën akootstuuy ets ojts yaj'ëwaatsëpëtsëmëtë ma ënety yajpaatën tsum matsy mëët ja pujxntä'äky.

¹⁵ Kukajpxëtë yë Dios mëëtkyëjxm ko oy winë tuny ets naaxwiinyëtë ja'ay jotkujk jyuuky'atëty.

¹⁶ Ojts tuktëjëtyä'äy ja pujxn akaj. Ojts tuktëjëtyä'äy ja pujxn kemy.

¹⁷ Ojts ja yuu pa'am pyaatëtë mëët ko ënety ëxëëk winë tuntë ets ko pyokymyëët'atë,

¹⁸ nitii jë'kxy ënety tka'ëkmëmëtaknëtë; tim ookanëtëp yaj'ijxnëtë.

¹⁹ E jam ma ënety jëtu'un mon tuk yajpaatën, jam ojts yë Wintsën tmëkajpxtë, tä ojts yajpëtsëmëtë jotmayjoty.

²⁰ Kyäjx yë y'aaw y'ayuk ets tyajtsoky; ka'ap t'ëwatsy ets nyëjkxtëty o'kpëjutjoty.

²¹ Kukajpxëtë yë Dios mëëtkyëjxm ko oy winë tuny ets naaxwiinyëtë ja'ay jotkujk jyuuky'atëty.

²² Tukmëyoxtë ets tukwintsë'ëkëtë yë kukkajpxën ja'awëkyëtakkën, ets nimëtya'aktë mëët yë xoontakën ko janty'oy winë tuny tkäjpxy.

²³ Jam nëëwiinkëjxy ojts jam yajpaatë ajuuy ato'kpë, ojts nyaxtë tyëkëtë nëëwinkëjxy kepy nyëëwinyo'opyëjoty, jëtu'un yaj'ijxy tä jeexyë ja nëë tpëjkwa'kxtën,

²⁴ jam nëëwiinkëjxy, ojts jam t'ixtë wi'ix yë Wintsën janty'oy janty tsuj winë të tyajkojy të tpëjktä'äkyën.

²⁵ E ko ja Wintsën ojts kyäjpxy, ënät myiiny yë mëkpoj ets pyëtë'ktë nëkooyë yë nëë'o'pyky;

²⁶ jam yajyujkjëpijptë tsajpjotm, ets jap mejyjoty kyujëpijpëtyë, jëtu'un ja jotmëk'ajtën tyajtëkooytyë mëj jotmayjoty.

²⁷ Jëtu'un kyunëjkx kyukëta'awëtyë tä ëmu'ukyë ja'ayën; ka'ap nimaa tyuuny oy winë tjajajt tjanija'awëtë.

²⁸ E jam ma ënety jëtu'un mon tuk yajpaatën, jam ojts yë Wintsën tmëkajpxtë, tä ojts yajpëtsëmëtë jotmayjoty;

²⁹ tuuyëm ojts tyaj'awinpity ja mëktuupoj, ets ja mëknëë'o'pyky ojts yu'kxmoonta'atë.

³⁰ Ko t'ijxtë ko tëë ja mëjmejy jyä'tsmony, ënät xyoontaktë ets ja Dios ojts yajnëjkxëtë ma twinmaytyë nyëjkxa'antën.

³¹ Kukajpxëtë yë Dios mëëtkyëjxm ko oy winë tuny ets naaxwiinyëtë ja'ay jotkujk jyuuky'atëty.

³² Tukxoonta'aktë ko ja naax kajpn myuktë. Mëjpëjkta'aktë ko yë mëjja'aytyëjk tyu'ukmuktë.

³³ Yë Wintsën yaj'awinpijtyp yë nëë wok ets mëjnëë, të'ëts'itjot ets të'ëts it të'ëtsnaax;

³⁴ yaj'awinpijtyp yë naax kaanmëxëpinëpë ma ënety winë të y'ity të wyintëyën, ko ja naaxwiinyëtë ja'ay ka'ap tukjaty wi'ix jyä'äy'atëtyën;

³⁵ yaj'awinpijtyp yë të'ëts'itjot, nëëmejy; ets të'ëtsnaax, nëëjot;

³⁶ jam tyajtsënaaytyaknpëky mëti'ipë yuu'o'këpën, ets ja nyaax kyajpn tyajkojtëty.

³⁷ Ets tyuntëty yye'eytyëty, tkojtëty tpäntëty mëti'ipë tyukjuuky'atëpën ets mëjwiin këjää pyëjktä'äky tyajpëtë'ëktëty.

³⁸ Yë'ë kyënu'kxyp ets yë'ë kë'ëm tyuknipëjktakëp ets myëjwiin kyëjääjëty yë jyëyujk tsyajpkaajëty.

³⁹ Ko y'ooktë ets nyiwäänëtë ko ëxëëk yajtun yaj'ënëëmëtë, ëkë ko jyotmaypyaatë ets pyëkëtë y'ixëtë.

⁴⁰ Dios ëxëëk t'ixy yë ja'ay mëti'ipë jyiiky myëku'uk tyiytyuunpyën, ets jëtu'unyë tyajkunëjkx tyajkuye'eyë të'ëts'itjotm.

⁴¹ Yë'ë yajpëtsëëmpy yë ëyoopëja'ay ma myony tyukyën; ets tyajnimayë ja y'u'unk y'ok tä kupixyny ets tsajppaxën.

⁴² Ko jëtu'un t'ixtë yë oyjyä'äytyëjk, tääts tukxoonta'aktë, e yë ëxëëkja'aytyëjk ëxëëk nyäyjyawëtë ets amë'pxy wyë'ëmtë.

⁴³ Mëti'ipë ja'ay wijyën jyä'äkyujkëp yë jëtu'unpë ets wyinja'ap wi'ix yë Wintsën yë tsyojkën jya'awën myëjëtyën.