Salmos 106 - Biblia Dc en Mixe de Quetzaltepec

Salmo 106 Wi'ix ja Israel ja'ayëty xëmë kyäjpxykyumëtoownaxtën

¹ Tukxoontä'äky yë Dios yë xyëëw nyaxëty. Kukajpxëtë yë Wintsën, jä'ä ko oy yë'ë, jä'ä ko yë tsyojkën jya'awën xëmëkyëjxm y'ity.

² ¿Pën ëkmayëtëp tnimëtya'akëty wi'ix yë Wintsën të myëtä'äkyën, ¿Pën ëkmayëtëp tmëjpëjkta'akëty ijxtëm pyaat'atyën?

³ Jotkujk yë ja'ay yajpaaty mëti'ipë mëtëy tii nyipaye'epyën ets aakyë'ë tyuunpy oypyë wa'atspë.

⁴ Wintsën, xyjyä'ämyätsëpës ko ënety jatëkok ja mnaax mkajpn xyaj'oyë; jap xyjyot'atëtyës ko ënety ja mnaax mkajpn xyaj'ëwaatsëpëtsëmy,

⁵ etsës n'ixëty wi'ix ënety jyuuky'atën ja mja'ay mëti'ipë të xywyin'ixyën, etsës jotkujk nnäjyawëtëty ets ntukxoonta'akëtyës ja naax kajpn mëti'ipë mijts mjä'ä'ajtypyën.

⁶ Tëës näjyëtu'un npoky tyuntë tääjës ja nteety n'apëtyës; tëës ja njot nwinma'any kyëxtëkoytyë, ets ja ëxëëkpë të ntuntës.

⁷ Yë nteety n'apëtyës ka'ap ojts jap Egiptë tmëj'ix tmëjpëjkta'aktë ja mmëjajtën, ojts tja'atyëkooynyëtë ja mëjpë këjääpë ja mtsojkën mja'awën, ets ojts kyäjpxykyumëtoownaxtë winkon ma Tsaptsmejyën.

⁸ E yë Dios ojts yajtso'okëtë, tyaj'ixyë jëtu'un yë myëk'ajtën ets tyajmëjnajxy yë xyëëw.

⁹ Ojts tmëkmëkäjpxy yë Tsaptsmejy ets tyajtëtsy. Tääts tyajnajxy mejyjoty ijxtëm jeexyë të'ëts'itjotm nyaxtën.

¹⁰ Jëtu'un ojts tyajtso'oky ma ja myëtsiptëjkëtyën ma ja ja'ayëty mëti'ipë ënety ëxëëk'ijxëtëpën.

¹¹ Yë nëë yë'ë ojts nyikoompatëtë ja myëtsiptëjk ets nitu'uk ojts kyawë'ëmtë juukyajtën mëët.

¹² Ënätnëm ojts tmëpëktë ja Dios ja wyaantakën ets tkuuy'ëëw tkuuyyaxtë.

¹³ E ka'ap nëkooyë pyoxy tääts ets jatëkok tja'atyëkooytyë mëti'ipë ja Dios ënety të tjakäjpxyën, ka'ap ojts t'ëwxitë ets jeexyë tnijawëtë mëti'ipë ënety ja Dios tyuknipëjktakëpën.

¹⁴ Jam apaktum, të'ëts'itjotm, je'eyë ojts yë Dios twinma'any'ixtë, ets tuknä'ämtë tunëty mëti'ipë ënety tsyojkën'ajtëpën.

¹⁵ Yë Dios ojts jyänty myo'ojëtë mëti'ipë ënety y'amëtoowtëpën, e kajts jëtu'unyë nyanajxy, yë Dios ojts tyuknikäxëtë pa'am ëyo'on mëti'ipë yaj'o'kp yajtëkoopyën.

¹⁶ Jam ma ënety të tsyënaaytyaknpëktën ojts tmëtsiptsoontë yë Moisés, ets Aarón, mëti'ipë ënety yë Dios të kyënu'kxyën ets të wyin'ixyën.

¹⁷ Paaty ojts yë naaxwiinyëtë y'ëwa'atsy ets ojts jap kyuka'anaxy yë Datán, ets ja jyä'äy ja Abiram.

¹⁸ Jëën ojts nyo'kta'ajëtë, e yë jëënyä'änk ojts tëkokyë yë ëxëëkja'aytyëjk tyajtëkooytyä'äy.

¹⁹ Jam ma ja Horeb kopkën, jam ojts tu'uk yë awinax t'oytyuntë mëti'ipë këxë'kpën tä tsajpkaajën, yë'ë mëët y'oytyunyëty yë pu'ts pujxn ets t'ëwtajtë;

²⁰ ojts tjënaxtë yë Dios, ets ojts tyajtëkatstë yë myëj'ajtën ets xyoontakën mëët tu'uk yë awinax mëti'ipë këxë'kpën tä tsajpkaajën, mëti'ipë aay ujts y'ojkypyën.

²¹ Ojts tja'atyëkooynyëtë ja Dios, mëti'ipë ënety të yaj'ëwaatsëpëtsëmëtën, ets mëti'ipë ënety jap Egiptë winë të tuny të tkäjpxyën,

²² mëti'ipë ënety të tyaj'ixyën ja myëj'ajtën ma ja Cam y'itjotmën ets ma ja Tsaptsmejyën.

²³ Ojts yë Dios tjanikäjpxy ko ënety yajkutëkoya'anëtë, e yë Moisés mëti'ipë wyin'ijxën, yë'ë ojts tuktëkë ets ja Dios ja jyoot'an xye'emy, jëtu'un ojts ka'ap kyutëkooynyëtëpë.

²⁴ Wäänë y'ijty, tääts tu'uk yë naax kajpn janty'oy janty tsujpë ojts t'ixtijtë, ka'ap tmëpëjktë mëti'ipë ënety ja Dios të tyukwinwanëtën,

²⁵ jap ma ënety y'itën tsyëënëtën ëxëëkjaty ja Dios jap tnikäjpxy tnimëtyaktë ets ka'ap tmëmëtoowtë mëti'ipë jayajtuk'ënä'ämtën.

²⁶ Ënet jyoot'anpëjky ets ojts tnikäjpxy ko yaj'ooka'an yajtëkoya'anëtë jam të'ëts'itjotm,

²⁷ ko nëjkxëp tyaj'ooky tyajtëkoy ja y'u'unkëty y'okëty ets jëtu'unyë xit ko'ow tyajjata'any ma ja wiinkëtypë, ja naax kajpnën ma ja'ayëty ka'ap ja Dios t'ëwtatën.

²⁸ Tä ojts tmëtuntë ja wiink tios mëti'ipë tyijtëpën Baal-peor, ets tkaaynyëtë tjë'kxnëtë ja ka'ayën ukën mëti'ipë të yajtukwintsë'ëkën ja tios ka'apë jyuukyëtyën.

²⁹ Mëët ja y'ëxëëktu'un y'ëxëëk kajpxënëty yë'ë ojts mëët ja Dios tyajjoot'anpëktë, paatykyëjxm ojts tu'uk yë mëj ëyo'on kyëtä'äky ma yë'ëjëtyën.

³⁰ Ënet yë Finees txajë'ky yë kyë'ë ets tyaj'o'ky ja mëti'ipë ënety të pyokytyunyën. Täänëm ojts ja ëyo'on jotmay kyixy nyäxy.

³¹ Yë Dios oy ojts tjawë ja jëtu'unpë ja tu'unën kajpxën, jëtu'un y'ënäny ko xëmë yaja'amyätsëty ni'u'unk ni'ëna'k, niteety ni'ap.

³² Ojts näjyëtu'un yë Dios tyajjoot'anpëktë jam ma ja Meribá mëjmejyën, Moisés ëxëëk ojts tkujatë jëtu'unpë ja ëxëëk jot ëxëëk winma'any,

³³ ojts tyajkumon tyajkutukëtë ets y'ëëwnë kyajpxnë tëkatsy, ka'ap t'ëkmëmaay t'ëkmëtajnë tii kyäjpxyp.

³⁴ Ka'ap ojts tyajkutëkoytyë ja kajpn mëti'ipë ënety ja Dios të tyuk'ënä'ämëtën tyajkutëkoytyëty.

³⁵ Ni'ikyë ojts mëët nyäxyëpiinënëtë ja ja'ayëty ka'apë ja Dios t'ëwtatën, ets ojts tyukjajtënëtë ja y'ëxëëktu'un y'ëxëëk kajpxënëty;

³⁶ ojts t'ëwtajnëtë wiink tios mëti'ipë ok ëxëëk myëjajt myëkëpäjtën,

³⁷ jä'ä ko ojts ja y'u'unk y'ëna'këty, ye'etyëjkpë, to'oxytyëjkpë tukwintsë'kënëtë ja ku'oypyë.

³⁸ Ojts nanëkoo tyaj'o'knëtë mëti'ipë ënety ka'ap tii poky tmëëtëtyën, ja jyot nye'pynyëty ja nyëëxëty ets ja myaankëty, ojts tukwintsë'kënëtë ja ka'apë tiosëtyën, jampë Canaán yajpaatyën. Jëtu'un'äämpy ja naaxwiinyëtë ojts tyaj'ëxëëkëtë mëët ja jot ne'pny.

³⁹ Yë'ëjëty ojts nyäyaj'ëxëëkëtë, mëët ja y'ëxëëktu'un y'ëxëëk kajpxën.

⁴⁰ Yajxon yë Wintsën ojts ja kyajpn tukjoot'anpëky, paaty ojts ka'ap tmo'oy mëti'ipë ënety ja patëtëpën,

⁴¹ ojts jam t'ëxmatsy ma ja ja'ayëty ka'apë ja Dios t'ëwtatën, ets ojts ja myëtsiptëjk myëmëtakënëtë,

⁴² ëxëëk ja myëtsip tyuunëtë, jëtu'unyë ojts y'atään tyuktäänëtë, mëët ja mëk'ajtën kuttujkën.

⁴³ Dios ojts jyayajtso'okëtë kanaak ok, e yë'ëjëty ka'ap ojts tkupëktë mëti'ipë ënety ja Dios të tjatuknipëjktaakën. Tä ojts kë'ëm ëxëëktum nyäyajwë'ëmëtë mëët ja y'ëxëëktu'un y'ëxëëk kajpxënëty,

⁴⁴ e ko ja Dios t'ijxy ko o'ktëy jyajnëtë ets jyiiynyëtë yaxnëtë,

⁴⁵ ënety ojts tja'amyetsy ja käjpxytyu'unën mëti'ipë ënety mëët të tunyën, tää tyajtëkajtsy ja jyot wyinma'any, jä'ä ko yë tsyojkën jya'awën ni'ik myëj kyëjääjëty.

⁴⁶ Ojts tyajkutuky ets ja naax kajpn mëti'ipë ënety të myëmëta'akëtën, oy jyëkyäpëtëty ets myëët'atëtëty.

⁴⁷ Yajtsoktëkës ëëtsëty, Wintsën, mijts mëti'ipës nTios'ajtëpën. Yajmujktëk ëëtsëty jënu'un nyajpaatënës naaxjoty kajpnjoty, ets ja mxëëw wa'atspë nwin'ëw nwinya'axtëtyës ets mëët yë xoontakën myajmëjpëjkta'akëty.

⁴⁸ Kënu'kxy yë Wintsën yë xyëëw y'itëty, mëti'ipë yë Israel ja'ay Tyios'ajtëpën xëmëkyëjxm. Wä'än ni'ëmukë t'ënaanta'atë: Oy'atëp jëtu'un. Tukxoontä'äky mëjjawë Dios yë xyëëw nyaxëty.