Romanos 8 - Biblia Dc en Mixe de Quetzaltepec

Ja Kënu'kxymyëkajtën mëti'ipë yajjuuky'ajtpën

¹ Paaty tyam ka'ap pën poky y'ëk'ijnë, mëti'ipë ja Kristë Jesús mëët tu'ukyë yajpaatyën,

² jä'ä ko ja Kënu'kxymyëkajtën ja y'ënä'ämën mëti'ipë ja Kristë Jesús yajjuuky'äjtypyën, tëë ja myajpëtsëmyë ma ja pokyën mëti'ipë yaj'o'kpën.

³ Tëë ja Dios tuny mëti'ipë ja ënä'ämën ka'ap myääyën tunëty, jä'ä ko ënety ja myëk'ajtën kyujënäkyëty ets ko ja ja'ay ëmaay paki'ix yajpaatë. Paaty ja Dios ja y'u'unk të tkexy ets yaj'ijxy ijxtëm ja pokyjyä'äyën ets wyintsë'kën'atëty, tkunaxëty ja ja'ay ja pyoky, jëtu'un tyajkutëkoy ja poky ma ëëtsajtëmën.

⁴ Paaty jëtu'un të tuny ets ja ënä'ämën ni'ëmukë yajpatunëty, ka'ap ntu'unmëty mëti'ipë ni'kx'ajt nkopk'ajtëm tsyojkpyën, Kënu'kxymyëkajtën ëëts jyä'ä ntu'unmëp.

⁵ Mëti'ipë juuky'ajtëpën ijxtëm ja nyi'kx kyopk tsoktën, aakjä'ä myääytyëp tyajtëp mëti'ipë ja nyi'kx kyopk tsyojktëpën; ets pën juuky'ajtëpën ijxtëm ja Kënu'kxymyëkajtën tsokyën, aakjä'ä myääytyëp tyajtëp mëti'ipë ja Kënu'kxymyëkajtën tsyojkpyën.

⁶ Ko ja ja'ay tmay ttajy mëti'ipë ja ni'kx kopk tsyojkpyën, tukpatëp ja o'kën; e ko ja ja'ay twinmay mëti'ipë ja Kënu'kxymyëkajtën tsyojkpyën, tukpatëp ja juukyajtën ets ja jotkujk'ajtën.

⁷ Pën myääytyëp tyajtëp mëti'ipë ja ni'kx kopk tsyojkpyën, myëtsip'ajtëp ja Dios, jä'ä ko ka'ap ja Dios ja y'ënä'ämën tsojkëtë ets ka'ap tpatuunëtë.

⁸ Mëti'ipë tyuuntëpën mëti'ipë ja ni'kx kopk tsyojkpyën, ka'ap tmëmëta'aktë tuntëty mëti'ipë ja Dios tyukjotkëtäkpyën.

⁹ E miitsëty, ka'ap jëtu'un m'ëk juuky'ajnëtë ijxtëm ja ni'kx kopk tsokyën, jëtu'un miits mjuuky'atë ijxtëm ja Dios ja Kyënu'kxymyëk'ajtën tsokyën, pën tëy ko miits ja Dios Kyënu'kxymyëk'ajtën xymyëët'ajtëtë. Pën ka'ap tmëëtëty ja Kristë ja Kyënu'kxymyëk'ajtën, ka'ap ja Kristë jyä'ä'atyë.

¹⁰ Pën yajpatp ja Kristë ma miitsëtyën, tam xymyëët'atë ja juukpyë ja kënu'kxymyëk'ajtën, jä'äkyëjxm ko m'itë jotkujk mëët ja Dios, oy ja jot nini'kx të jyayajpëjktä'äky o'kp mëët ko jyääjëty ja poky.

¹¹ Ets pën ijtp ja Dios ja Kyënu'kxymyëk'ajtën ma miitsëtyën, mëti'ipë ja Jesús ojts yajjuukpyikyën, yë'ë myo'ojäämpy ja juukyajtën ja mni'kx mkopkëty mëti'ipë o'kpën mëët ja Dios ja Myëjaaw myëk'ajtën, mëti'ipë juukyajtpën ma miitsëtyën.

¹² Jëtu'un mëku'uktëjkëty, ëëtsajtëm nmëët'ajtëm ja tuunk, ka'ap jyëtu'unëty ijxtëm ja ni'kx kopk tsokyën.

¹³ Pën mjuuky'ajtëp miits ijxtëm ja ni'kx kopk tsokyën, m'ookantëp yë'ë; e pën Kënu'kxymyëkajtën mëët miits xyaj'ooktë mëti'ipë ja mni'kx mkopk tsyojkpyën, xëmëkyëjxm miits mjuuky'ata'antë.

¹⁴ Tëkokyë ja ja'ayëty mëti'ipë në'ëmooy tu'umooyëpën ja Dios ja Kyënu'kxymyëk'ajtën, Dios ja u'unk'atanëtëp.

¹⁵ Miitsëty ka'ap yë'ëjëty të myajmo'otë ja Kënu'kxymyëkajtën mëti'ipë tëytyuunpën ets yajtsë'këpën, yë'ë të myajmo'otë mëti'ipë myajnaxëtëpën Dios u'unk. Mëët ya'atë ja Kënu'kxymyëkajtën ëëts n'ëna'anëmë: Tatë, Teety.

¹⁶ Ets nän yë'ë ya'atë Kënu'kxymyëkajtën mëët tu'ukyë yajpaaty mëët ëëts'ajtëmë ets nyajtijmëty Dios y'u'unk.

¹⁷ Ets ko yë'ë xy'u'unk'ajtëmë, näjyëtu'un ja Kristë mëët xypyaat'ajtëmë ja kuma'ayën mëti'ipë ja Dios të xytyukwinwa'anëmën, jä'ä ko tu'ukyë ja Kristë mëët nyajpatëmë ja myëj'ajt jyääntyajtën, jä'ä ko tu'ukyë mëët n'ëyo'owëmë ets jam nyajpatmëty ma myëj'ajt y'oyajtënën.

Mëjajtën jaanty'ajtën mëti'ipë miinpën

¹⁸ Ja ëyo'on mëti'ipë tyam nmënajx nyajnajxëmën yi'inëm yë'ë, ko mëët n'ijxkijpxmëty ja mëj'ajtën jaanty'ajtën mëti'ipë ok npaata'anëmën.

¹⁹ Tu'kë'ëyë mëti'ipë ja Dios të tyajkojyën jyëjp'ijxtëp ja xëëw ma ja Dios tyajnikëxë'ëkanyën mëti'ipë y'u'unk'ajtypyën.

²⁰ Tu'kë'ëyë mëti'ipë Dios y'oytyuunën, kajpxpoky ojts wyë'ëmtë. Ka'ap yë'ëty kë'ëm jëtu'un tsojkën'ajtë, yë'ë tsyojk mëti'ipë tyuknipëjktakëyën; je'eyëp ko xëmë ojts tjëjp'ixtë ja oyajtën

²¹ ets ja mëj'ajtën jaanty'ajtën ëwa'atstum pyëjkta'akëtëty ets ja Dios ja y'u'unk y'ëna'k tpata'antë ja myëj'ajt y'oyajtën.

²² Nnija'awëm ko tu'kë'ëyë mëti'ipë ja Dios y'oytyuunën, ëyoow jotëkooytyëp jä'äjëty tyam ijxtëm tu'uk ja to'oxytyëjkën mëti'ipë u'unkpaataanpën.

²³ Ka'ap yi'iyëty y'ëyowtë, näjyëtu'un ëëtsajtëm n'ëyo'owëm nijënaak ja Dios të xymyo'oyëmën ja Kënu'kxymyëkajtën, ijxtëm jeexyë ëka'any të xymyo'oyëmën mëti'ipë xymyo'oja'anëmën. Mëk nku'ëyo'owëmë ko n'a'ijx njëjp'ijxëmë ets ja Dios xykyupëjkmëty ijxtëm ja y'u'unk y'ëna'kën, mëti'ipë nëjkx ni'kx'ajt nkopk'ajtëm tyaj'ëwaatsëpëtsëmyën.

²⁴ Paaty ja nitsokën npatëmë ko njëjp'ijxëmë. Je'eyëp tëy ko pën tëë yaj'ijxnë ja mëti'ipë ënety yajjëjp'ijxpën, ka'ap nëkooyë y'ëktsoowpatnë ja ëwxijtën. Jä'ä ko ¿Pën y'ëwxijtyp mëti'ipë tëë t'ixyën?

²⁵ E mëti'ipë njëjp'ijxëmën ets ka'ap tii n'ijxëmë mëët ja nwiin'ajtëmë, ëyo'owmëp ko jeky n'ëwxijtëmë.

²⁶ Jëtu'un ja Kënu'kxymyëkajtën xypyutëjkëmë ma tii ntsipja'awëmën. Jä'äkyëjxm ko nkajajtëm wi'ix ja Dios nja'amyäjtsmëtyën ijxtëm pyaat'atyën, yë Kënu'kxymyëkajtën ëëts xykyunu'kxtakëm ma ja Tiosën, jä'ä ko ka'ap ja aaw ayuk yajpaaty wi'ix yajkajpxpëtsëmëtyën.

²⁷ Ets ja Dios, mëti'ipë tyuk'ijxnajxypyën ëëts ja n'aaw'ajt njot'ajtëmë, nyija'ap mëti'ipë winma'any ja Kënu'kxymyëkajtën myëët'ajtypyën, jä'ä ko ja Kënu'kxymyëkajtën nyinu'kxtäkpy ja jyä'äy ijxtëm ja Dios tsokyën.

Ja Tios ja tyuunk mëti'ipë yajnitsokpën

²⁸ Nnija'awëm ëëtsajtëm ko ja Dios yë'ë të tpëjktä'äky winë ets tuk'oy'atëty ja ja'ay mëti'ipë tsojkëpën, mëti'ipë të twoowtsoyën ijxtëm të tuknipëjktaakën.

²⁹ Mëti'ipë tëëyëp ja Dios y'ixy'äjtypyën ets ojts tuknipëjktaakë ko t'u'unk'ata'any; jëtu'un ja y'u'unk mëj y'itëty ma nimay ja myëkä'äxtëjkën.

³⁰ Mëti'ipë ja Dios tëëyëp wyin'ijxën tëë ja tmëkäjpxy; mëti'ipë ojts tmëkäjpxyën ojts wa'ats tyajnaxy ets mëti'ipë wa'ats yajnajxën ojts mëj'äämpy tpëjktä'äky.

³¹ ¿Tii ënät njaaktimkyajpxmëp? Pën Dios mëët ëëtsajtëm, ni pën xykyamëmëtakmëty.

³² Jä'ä ko ka'ap ja Dios të tukwintuk'ooky ja kyë'ëm U'unk, tëë ni'ëmukë xykyu'o'këmë, ¿Wi'ix ko ënät xykyamo'omyëty mëët yë'ë tu'kë'ëyë winë?

³³ ¿Pën jëtää y'ëkni'ëënëp mëti'ipë ja Dios të twin'ixyën? Dios tëë kë'ëm tyajnaxy wa'ats.

³⁴ ¿Pën xy'ëkyajnitujkëmëp? Kristë Jesús mëti'ipë ojts y'ookyën ets mëti'ipë ojts jyuukpyikyën ets tam yajpaaty Dios y'aka'anytsyow ma xynyinu'kxtakëmën.

³⁵ ¿Pën jëtää xy'ëkpëjkëmëp ja Kristë ja tsyojkën? ¿Wä'än jëtää yë'ëty tsipë, ëyo'on, ko nyaj'ëxwojpmëtyë ëkë ko yuu xëëw nyajnajxmëtyë, ëkë ko nwit'ajt nxox'ajtëm kya'itëtyë, ëkë ko kutsë'ëkëtuuy nyajpatmëtyë, ëkë ko yë ja'ay xyaj'o'kmëtyë?

³⁶ Jëtu'un ijxtëm ja Dios ja y'aaw y'ayuk y'ënä'änyën: Jä'äkyëjxm ko mijts myajmëpëky, xëmë ëëts ja ja'ay xyaj'ooka'antë, jëtu'un ëëtsëty naxtë ijxtëm ja kupixyny yajmënejkxyën ma ja y'o'ktaknën.

³⁷ Ko tii xyjyajtëm xykyëpäjtëm, nmëmëtakëm, jä'äkyëjxm ko ja Kristë xypyutëjkëmë, mëti'ipë ni'ik xytsojkëmën.

³⁸ Nnija'apës ko ka'ap pën xypyëjkëmëty ja Dios ja tsyojkën: ni o'kën, ni juukyajtën, ni tsajpjotmëtë kukäjpxy, ni ku'oypyë, ni tyampë, ni miinpë wiinkoonpë,

³⁹ ni këkpë, nitii wiinkëtypë mëti'ipë Dios y'oytyuunën. Ka'ap tii xytyuk'ëxmajtsmëty ja Dios ja tsyojkën mëti'ipë nmëët'ajtëmën Wintsën Jesukristë mëët.