Romanos 2 - Biblia Dc en Mixe de Quetzaltepec

Jëtu'un ja Tios tyiytyuny ets pyaye'ey ijxtëm pyaat'atyën

¹ Paaty mijts ka'ap xymyëët'aty ja pokymyä'kxën, oy mijts mpënëty. Ko ja wiink ja'ay xypyaye'eyë ja nyëë pyoky kë'ëm mnäyajnitukëty; jä'ä ko mijts näjyëtu'un m'ëtë'ëtsy ijxtëm yë'ë y'ëtë'ëtstën.

² Yajnija'ap ko Dios pyaye'ey ijxtëm pyaat'atyën, ko tyiytyuunpy mëti'ipë jëtu'un ja'ay'ajtëpën.

³ Ijxtëm mijtsën, ko ja mmëku'uk ja pyoky xypyaye'eyë ets näjyëtu'un mpokytyuny ijxtëm yë'ëjëtyën, këtii m'ënaanpëty ko ka'ap ja mpoky xykyumëtowa'any.

⁴ Mijts m'ixtijpy ja Dios ja y'oyajtën, ja mä'kxtujkën ets ja y'oywyinma'any, ets ka'ap xyjyawë ko yë'ëkyëjxm jëtu'un m'awinpity tä yë'ëjën

⁵ E mijts nëkooyë mkujuun'ajnë, ka'ap xytsyoky mwinpitëty ma ja Tiosën, ja m'ëyo'on kë'ëm myajnipejtyp ets xykëpätëty ma ënety ja Dios tyajnikëxe'eka'anyën ja jyoot'an ko ja paye'eyën tunëty,

⁶ ets ja ja'ay tkumëtoowta'atëty tiijaty ënety të tuntën.

⁷ Myo'ojäämpy ja juukyajtën xëmëkyëjxmëpë mëti'ipë y'ijxtaaytyëpën ja mëj'ajt oyajtën, xoontakën ets ka'apë kyixy nyäxyën, ets të tuntë xëmë ja oypyë;

⁸ e tyiytyunäämpy mëët ja joot'an mëti'ipë të kyäjpxykyumëtoownaxtën, mëti'ipë myëtsip'ajtëpën ja tëyajtën ets y'oyja'awëtëp ja ëxëëkpë.

⁹ Tääts y'ita'any ja ëyo'on ets ja tëytyu'unën ma ja ja'ayëtyën mëti'ipë tyuuntëpën ja ëxëëkpë, jëwyiin ja jutiis ja'ayëty ets ok ja ka'apë jyutiisëty.

¹⁰ E mëti'ipë tyuuntëpën ja oypyë, mo'ojanëtëp ja Dios ja mëj'ajt oyajtën, ja xoontakën, ja jotkujk'ajtën; jëyëjp ja jutiis ja'ayëty ets ok ja ka'apë jyutiisëty.

¹¹ Jä'ä ko Dios, ko pyaye'ey ni pën tka'apupety;

¹² mëti'ipë pokytyuuntëpën ets ka'ap nijawëtë ja Dios ja y'ënä'ämën, nëjkxëp kyutëkoytyë ko tkanijawëtë ja ënä'ämën, e mëti'ipë nyija'awëtyëpën ja Dios ja y'ënä'ämën ets pyokytyuntë, nän ja ënä'ämën nëjkx yajtukpaye'eytyë.

¹³ Jä'ä ko ka'ap yë'ëkyëjxmëty ja'ay wyë'ëmtë wa'ats ma Tiosën ko tmëët'atë ja ënä'ämën, ënät wa'ats wyë'ëmtë ko tpatuntë.

¹⁴ Jä'ä ko ka'apë jyutiisëty ets nän ka'apë nijawëtën ja Dios ja y'ënä'ämën ets jëtu'un winë tuntë ijxtëm ja ënä'ämën y'ënä'änyën, yë'ë kë'ëm ja ënä'ämën myëët'ajtëp,

¹⁵ jëtu'un tyajnikëxë'ëktë ko t'aaw'at tjot'atë ja ënä'ämën. Kyë'ëm winma'any yajnikëxë'këtëp ets kyë'ëm winma'any yajpokykya'ajëtëp ëkë kuwanëtëp,

¹⁶ ko ënety ja xëëw tpaaty ma ja Dios tnipaye'eyä'änyën tëkokyë mëti'ipë yu'utsy'ijtpën mëët ja Jesukristë ja xyëëw, jëtu'un ijxtëmës ja oy aaw oy ayuk të nimëtyä'äkyën.

Ja Jutiis ja'ayëty ets ja Tios ja y'ënä'ämën

¹⁷ Mijts m'ënaanp ko mjutiisëty, mëët ja Dios ja y'ënä'ämën mnäjyawëty oyjyä'äy ets yë'ë mnätyukmëjja'awëyëp yë mTios.

¹⁸ Mnija'ap mëti'ipë ja Dios tsyojkpyën, ja ënä'ämën mtuk'ëwa'anëyëp ets xywin'ixëty ja oypyë.

¹⁹ Mnija'ap ko jyëkyejpy xytyuk'ëwaanëty mëti'ipë kyanija'awëtëpën ja Dios ja y'aaw y'ayuk ets tpaatëty ja tëyajtën,

²⁰ jyëkyejpy xytyu'uwinwowëty ja tsuuja'ay ets xykyajpxwijëty mëti'ipë tii kyanija'apën; jä'ä ko mmëët'ajtyp ja ënä'ämën paaty winët xynyijawë ets paaty xymyëët'aty ja tëyajtën.

²¹ E oy, pën mnija'ap wi'ix xyaj'ijxpëkëtyën ja wiinkpë, ¿wi'ix ko kë'ëm mkanäyaj'ijxpëkyë? Pën mnimëtyäkpy ko ka'ap y'oyëty ko nmä'tsmëty ¿tii ko mmeetsy?

²² Pën mnija'ap ko ka'ap y'oyëty ko ja'ay ëpëky wiinkpë ye'etyëjk ëkë to'oxytyëjk tmëët'aty, ¿mijts tii ko jëtu'un m'ëtë'ëtsy? Pën m'ëxëëk'ijxyp ja awinax ¿tii ko yë'ë xytyukmeenypyääty?

²³ Je'eyë nëkoo mnätyukyajmëjnaxyë ja ënä'ämën, ets xynyëxi'iky xytyukxi'iky ja Dios ko ka'ap xymyëmëtoy.

²⁴ Paaty mëtëyën ijxtëm ja Dios ja y'aaw y'ayuk kyëxja'ayëtyën: Miits ja poky mmëët'ajtëp ko ja'ay tyajjoot'anpëktë yë Dios mëti'ipë ka'ap jyutiis'atën.

²⁵ Mëtëy yë'ë, mëti'ipë pyaatuumpyën ja Moisés ja y'ënä'ämën, ko yajnatsujk'ëwtity ja ye'etyëjkajtën tu'unxëyëp wäänjaty; ko tkapatuny ja Moisés ja y'ënä'ämën, nëkoo nyaatëkë'aty oy tëë ja ye'etyëjkajtën jyayajnatsujk'ëwtity.

²⁶ Pën ka'ap yajnatsujktu'utyën ja ye'etyëjkajtën ets tpatuny ja Dios ja y'ënä'ämën, jëtu'un yajpëjktä'äky ijxtëm jeexyë tsyukyëtyën.

²⁷ Pën pyatuumpyën ja Dios ja y'ënä'ämën, oy ënety kyatsukyëty, yë'ë nëjkx tyajnikëxë'ëky ko ja ja'ay pyaat'atyë ja ëyo'on, jä'äkyëjxm ko ka'ap tpatuny ja Dios ja y'ënä'ämën.

²⁸ Ka'ap nyëkëjxyëty ja ja'ay jyutiis'aty, ko yajnatsujk'ëwtity ja ye'etyëjkajtën ets ja ijxwë'ëmën wyi'imy ma nyi'kx kyopkën.

²⁹ Yë'ëkyëjxm ja ja'ay mëtëy jyutiis'aty ko oy ja y'aaw jyot, pën ja ijxwë'ëmën myëët'ajtyp mëti'ipë ja Kënu'kxymyëkajtën mooyëpën, ka'ap yë'ëkyëjxmëty ko ja ënä'ämën jyää'aty. Pën myëët'ajtypyën ja oyjyot oywyinma'any, yë'ë ja Dios oyjya'awëyëp, ka'ap jyä'äyëty.