Romanos 14 - Biblia Dc en Mixe de Quetzaltepec

Ka'ap mmëku'uk xypyoky'ixëty

¹ Oyjyawëtë ja ja'ay mëti'ipë wäänë ja mëpëjkën myëët'ajtypyën ets këtii nëkoo mnäy'oj mnäya'axëtëty mëët.

² Tää jënaakën ja ja'ay mëti'ipë ënantëpën ko jyëkyejpy oytyiijëty tjë'kxtëty ets tää jënaakën mëti'ipë wäänë ja myëpëjkënëtyën, yi'iyë na''aay na'ujts jyë'kxtëp.

³ Pën jyi'kxyp oytyiijëty, ka'ap tpäxëty mëti'ipë ka'ap oytyiijëty tjë'kxyën; ets pën ka'ap oytyiijëty tjë'kxyën, ka'ap tpäxëty pën jyi'kxyp oytyiijëty, jä'ä ko tëë ja Dios kyupëkyë.

⁴ ¿Mpën mijts ko xypyoky'ixy ja ja'ay mëti'ipë Dios myëtuumpyën? Pën oy ëkë ëxëëk winë tuny, yë'ë kë'ëm nyija'ap. E yë'ë oy wyë'ëma'any, jä'ä ko yë Wintsën myëët'ajtyp yë mëk'ajtën ets oy yajwë'ëmëtëty.

⁵ Jatu'kpëky, tää ja'ay jënaakën mëti'ipë tu'ukpë xëëw mëj'äämpy yajnajxypyën ets tää mëti'ipë ënantëpën ko aak'oy yë xëëw oyjyëna'ajëty. Nitu'ukjaty ja ja'ay kë'ëm tmëmay tmëtajëty ja oypyë mëti'ipë myëpëkäämpyën.

⁶ Pën tu'uk ja xëëw y'ëmaay'äjtyp, Dios wyintsë'këp ko t'ëmaay'äty; pën tii jyi'kxyp, Dios wyintsë'këp ko tii tjë'kxy ets yë'ë kyukajpxëp; e pën ka'ap tii tjë'kxyën nän Dios wyintsë'këp ko ka'ap tii tjë'kxy, ets nän kyukajpxëp ma Tiosën.

⁷ Ka'ap kë'ëmwinma'any njuuky'ajtëm ets ka'ap kë'ëmwinma'any n'o'këm.

⁸ Pën juuky'ajtëm, Dios xyajjuuky'ajtëm; e pën o'këm, Dios ënety jatëkok xy'ëxajëmë. Oy njuuky'ajtmëty ëkë n'o'kmëty, Dios ëëts xyjyä'ä'ajtëmë.

⁹ Paaty ja Kristë y'o'ky ets jyuukpyijky jatëkok, jëtu'unts tniwintsën'atëty mëti'ipë juukyëtyën ets mëti'ipë ookyëtyën.

¹⁰ ¿E tii ko mijts ja mmëku'uk xynyi'ojë? ¿Ëkë tii ko xywiink'ixy? Ni'ëmukë ëëts nëjkx nwa'këxë'këmë Dios wyintum ets yë'ë nëjkx xypyaye'eyëmë.

¹¹ Jä'ä ko jëtu'un ja Dios ja y'aaw y'ayuk kyëxja'ayëty: Jëtu'un ja Wintsën y'ënä'äny: Ijxtëm tyiyëtyën koos njuuky'äty, ni'ëmukë ja naaxwiinyëtë ja'ay xywyinkoxtänëtyës, ni'ëmukë ja ja'ay y'ëna'antëty koos nTiosëty.

¹² Paaty, ni'ëmukë ëëtsajtëm nëjkx nwinkuwa'këmë ja Dios ets ntuk'ëwa'anëmëty tii ënety të ntu'unëmën.

Ka'ap ja nmëku'uk'ajtëm npoky'ijxmëty

¹³ Paaty ka'ap mnäpyoky'ixëtëty nixim niyam. Yë'ë tuntë mëti'ipë ka'ap yajwiink'ixëtyën ets mëti'ipë ja mmëku'uk ka'ap ja myëpëjkën yajma'txëtëty.

¹⁴ Ëjts njanija'apës ko aak'oy aak wa'ats winë; ets yë'ëkyëjxmës jëtu'un n'ëna'anyës koos ja Jesús nmëpëky. E pën winmääpy ko tää ja jë'kxy pëky mëti'ipë ka'ap y'oyëtyën, jëtu'un ja myäy tyäjy ko ka'ap y'oyëty.

¹⁵ E näjyëtu'un ënät, pën yë mmëku'uk wyiink'ijxyp ko tii xyjyi'kxy, ma jëtu'un winë xytyunyën ka'ap ënety y'ëknätsyokë'ajnë. Ka'ap mëpaat yë'ë tyajtëkoy ja mmëku'uk ja myëpëjkën ma ja Kristën ko tii xyjyë'kxëty xypyëkëty.

¹⁶ Ka'ap yë'ë xytyunëty mëti'ipë ja wiinkëtypë wyiink'ijxtëpën oy mijts xyjyanijawë ko ka'ap pyokyëty mëti'ipë mtuunpyën.

¹⁷ Ka'ap yë'ëkyëjxmëty jam m'itë ma Dios ja kyutujktaknën ko tii xykyäytyë xy'uuktë, jä'äkyëjxm jam m'itë ko xytyuntë xykyajpxtë mëti'ipë paat'ajtëpën, wi'ix xymyëët'attëty ja jotkujk'ajtën ets ja xoontakën mëët ja Kënukxymyëkajtën.

¹⁸ Mëti'ipë ja Kristë myëtuumpyën, jä'ä ja Dios tukjotkëtakëp ets näjyëtu'un ja ja'ayëty.

¹⁹ Wä'än yë'ë n'ixta'ayëmë wi'ix npatmëtyën ja jotkujk'ajtën ets nnäpyutëjkëmëty nixim niyam wi'ix nwinpäjtmëtyën ma ja mëpëjkën.

²⁰ Ka'ap mëpaat ja Dios ja tyuunk kyutëkoy ko tii yajjë'kxy yajpëky. Tëy ko aak wa'ats yë kääky uuky. Yë'ë tëy ka'ap y'oyëty ko jä'ä një'kxmëty mëti'ipë ja nmëku'uk'ajtëm ja myëpëjkën tukyajtëkooyëtëpën.

²¹ Nikë oy ko tsu'utsy nkatsu'tsmëty, ni ja tsatsym nyëë nka'ukmëty, ëkë oytyiijëty ka'ap mëpaat yë'ë ntu'unëm mëti'ipë ja nmëku'uk'ajtëm yajpokykya'ajëtëpën.

²² Ja mëpëjkën mëti'ipë mijts mmëët'ajtypyën, mëët'at mijts kë'ëm Dios wyintum. Jotkujk ja ja'ay yajpaaty ko ka'ap tuny mëti'ipë yajkuma'ay yajkutajëpën.

²³ Ja ja'ay mëti'ipë ka'ap oy yajxon tnijawën pën mëpaat tjë'kxy tkajë'kxy winë, ko tjë'kxy kë'ëm tpokyjyawë ok, jä'ä ko ka'ap të tjë'kxy akujk jotkujk mëët ja mëpëjkën; tu'kë'ëyë mëti'ipë ka'ap tii ëmuumtu'ukjot yajtunyën, poky yë'ë.