Romanos 10 - Biblia Dc en Mixe de Quetzaltepec

¹ Mëku'uktëjkëty, ëjts xëmës ja Dios ntuknija'amyätsëtë yë Israel ja'ayëty ets ja'ënaanpës jeexyë ja nitsokën tpaatë.

² Ënaanpës ko yë'ëjëty jyatsojktëp tjamëtuna'antë ja Dios, je'eyëp ko mëti'ipë jyatsojktëpën ka'ap kyäjpxyëty ijxtëm ja mëtëypyë ja nija'awën.

³ Jä'ä ko ka'ap tja'akyyukëtë ko Dios yë'ë ja'ay yajnajxyp wa'ats, e yë'ëjëty kë'ëm tyäty nyäyajnaxa'anëtë wa'ats, ets jëtu'un ka'ap ja Dios tmëmëtowa'antë.

⁴ Jä'ä ko ja ënä'ämën tëë kyixy nyäxy, ko ja Kristë myiiny ets ja Dios kyupëkëtëty mëti'ipë mëpëjktëpën.

⁵ Jëtu'un ja Moisés ja y'ënä'ämën y'ënä'äny, këxja'aypyë myinyën: Pën ja ënä'ämën pyatuumpy, yë'ë yajjuuky'atëtëp.

⁶ E ja nipaye'eyën mëti'ipë mëët ja mëpëjkën yajpaatyën, jëtu'un yajnimëtyä'äky: Këtii mmayëty mtajëty: ¿Pën pa'tëkëjaanp tsajpjotm? jëtu'un yajja'akyukë yë'ë yowë yajtsojkp ets ja Kristë jyënäkëty. Näy ka'ap m'ëna'antëty;

⁷ ëkë ¿Pën jap jëjpta'akaanp o'kpëjutjoty? Jëtu'un yajja'akyukë yë'ë yowë yajtsojkp ets ja Kristë pyëtsëmëty o'kpëjutjoty.

⁸ ¿Pën ënaanp?: Ja aaw ayuk wiinko ja yajpaaty ma m'aaw mjotmën. Yë'ë jëtu'un ya'atë ja aaw ayuk mëti'ipës ja'ay n'ëwa'anëtëpën.

⁹ Pën m'aawjoty pyëtsimy ets m'ëna'any ko Jesús yë'ë Wintsën ets pën mmëpëjkpy m'aawjoty mjootjoty ko Dios të yajjuukpyikyë, mpatäämpy ja nitsokën,

¹⁰ jä'ä ko aawjoty jootjoty tsyoony ets nmëpëjkmëty ko npata'anëm ja mëtëypyë ja nipaye'eyën, ets mëët ja aaw ayuk yajnikäjpxy ko Jesukristë yë'ë mëët yajpaata'any ja nitsokën.

¹¹ Jëtu'un këxja'ay myiny: Pën yë'ë tyuk'ijxpejtyp, ka'ap tsyëtyu'unpaata'any.

¹² Jesús ni'ëmukë ja'ay tnitënaaytyä'äy, wä'än tjutiis tkajutiisëty, ets tmooytyä'äy ja kënu'kxën mëti'ipë mëkajpxëpën.

¹³ Jä'ä ko jëtu'un ja Dios ja y'aaw y'ayuk y'ënä'äny: Ni'ëmukë mëti'ipë y'amëtoowtëpën ja Wintsën ets nyitso'oktëty, yë'ë pyaatëp ja nitsokën.

¹⁴ ¿E wi'ix t'amëtowtëty pën ka'ap tmëpëktë? ¿Ets wi'ix tmëpëktëty pën ka'ap tmëtowtë ko jyääjëty? ¿Ets wi'ix tmëtowtëty pën ka'ap pën tyuk'ëwa'anxëtë?

¹⁵ ¿E wi'ix tkajpxwa'kxtëty pën ka'ap pën kyäxëtë? Ijxtëm ja kuja'ay myinyën: Janty'oy yaj'ixy ko jya'të mëti'ipë yajmiintëpën ja oy aaw oy ayuk.

¹⁶ E ka'ap ja ja'ay ni'ëmukë të tkupëktë ja oy aaw oy ayuk. Jëtu'un ijxtëm ja Jeséas y'ënä'änyën: Wintsën, ¿pën jëtää të tmëpëktë ja ayuk mëti'ipë ja ja'ay të yajtuk'ëwaanëtën?

¹⁷ Jëtu'unkyëjxm, ja mëpëjkën ënät yajmëët'aty ko yajmëtoow'ity, ets ja aaw ayuk jam ja tsyoony ma ja Kristë të tnimëtyä'äkyën.

¹⁸ E nyajtëëpyës yam: ¿Wä'än jëtää ka'ap ja ja'ay të tmëtowtë ja Dios ja y'aaw y'ayukë? Myëtoowtë jä'ä. Jä'ä ko jëtu'un kuja'ay myiny: Tëë yajmëtoy ja y'ayuk mapaat yë naaxwiinyëtën yajpaatyën ets të yajnijawë mapaat yë naaxwiinyëtë jyëjpkukëxën.

¹⁹ Nyajtëëpyës yam jatëkok: ¿Wä'än jëtää ja jutiis ja'ay ka'ap tja'akyyukëtë? Mëjëyëjp, jëtu'un ja Moisés ojts tnikäjpxy: Ëjts miits ntukmë'äkë'atantëp ja kajpn ka'apë kyajpnëtyën; ets xytyukjoot'anpëktëty ja kajpn ka'apë jyä'äkyukën.

²⁰ Näyjyëtu'un ja Jeséas tkajpxnajxy: Ja ja'ay mëti'ipës ijty ka'ap xy'ixta'atën, tëëjës ja xypyaatë, ets tëëjës nätyuk'ixyë mëti'ipës ijty ka'ap xyajnitëwëtën.

²¹ Ko ja Jeséas ja jutiis ja'ay tnimëtyäky, jëtu'un tkajpxnajxy: Xëmës të nyäm të nwoptë mëti'ipës ka'ap xykyäpxymyëtowtën ets mëti'ipë käjpxy kyumëtoownajxtëpën.