Romanos 1 - Biblia Dc en Mixe de Quetzaltepec

¹ Ëjts Pablo, Kristë Jesús myëtuunpë. Tiosës të xywoowtsoy etsës nmëtunëty, të xytyuknipëkyës ets nkajpxwa'kxëtyës ja y'aaw y'ayuk oypyë.

² Tëëyëp ja Dios tnikäjpxy mëët ja kyäjpxynyajxpë, ko ojts tkëxja'atë ma ja nokyën kënu'kxypyë.

³ Ma tnimëtyä'äkyën ja Dios ja y'u'unk, Wintsën Jesukristë, mëti'ipë mëxu'unk'ajtën jëtu'un tä oy pën ja'ayën; yë'ë ja David ja y'u'unk y'ok;

⁴ je'eyëp ko jyuukpyijky o'kpë akujky jää ojts y'awinpity Dios u'unk, mëët ja kuttujkën, ets mëët ja mëk'ajtën mëti'ipë yajwatspën.

⁵ Jesukristë mëyajtën të tuny etsës të xyajnaxy oy ayukkajpxwa'kxpë, jëtu'unts oymyaatsowëty ja ja'ay tmëpëktëty ja Jesukristë ets tmëmëtowtëty.

^6-7 Ma yë'ëjëtyën miits näjyëtu'un myajpaatë mëti'ipë jam Roma tsënaaytyëpën. Mtsojkëtëp yë Dios ets të mwootsowëtë ets mjuuky'atëty wa'ats. Wä'än ja Dios Teety ets ja Wintsën Jesukristë mmo'ojëtë ja kënu'kxën ets ja jotkujk'ajtën.

Ko ja Pablo nyëjkxa'any Roma

⁸ Tim jëwyiin tim jëyëjp, nyajnaxyës ja kukkajpxën ja'awëkyëtakkën ma Tiosën mëët ja Wintsën Jesukristë ja xyëëw, ko miitsëty oy myanimëtya'aktë oymyaajëty ko të mëpëktë.

⁹ Dios, mëti'ipës ëmuumtu'ukjot nmëtuumpyën ets nnikäjpxy nnimëtyä'äkyës ja y'u'unk, yë'ë y'ijxyp nyija'ap ko miits xëmë nja'amyätstë koos ja Dios nmëkäjpxy.

¹⁰ Xëmës ja Dios n'amëtoy npëjktsoy ets yë'ë tyajkutukëty ets miits nëjkx nku'ixëtë.

¹¹ Jä'ä ko ntsojkpyës ets npaata'an n'ixa'antë ets nputëkëtëty mëët ja Kënu'kxymyëkajtën ets amëk jotmëk myajpaatëty.

¹² Yë'ëjës ntijpy ets näjyotmëkwinkajpxëmëty nixim niyam mëët ya'atë mëpëjkën mëti'ipë nmëët'ajtëmën.

¹³ Tyam ntuknijawëtë mëku'uktëjkëty, ko tëëjës kanaak ok njatuknipëjktaakë ets të njaninëjkxa'antë ets nni''ixa'antë, je'eyëp ko xëmës ja ëtujkpë të npaaty. Yë'ës njatsojkpy ets ja Dios tyajkutukëty etsës n'ixa'any wi'ix ja Dios tyunyën ma miitsëtyën jëtu'un tääjës të n'ixyën wiinktsow muum ma ka'ap jyutiis kajpnëtyën.

¹⁴ Nu'kxyjoty n'ityës ma miitsëtyën, ma wijyjyä'äyën ma tsuuja'ayën, ma këpetyjyä'äyën ets ma tëtä'äkyjyä'äyën;

¹⁵ paatyës ni'ik ntsoky ets ja oy aaw oy ayuk ntuk'ëwaanëja'antë, miitsëty mëti'ipë tsënaaytyëpën jam Roma.

Ja ijxpëjkën

¹⁶ Ka'apës ntuktsëtyuny ja oy aaw oy ayuk, jä'ä ko ja Dios ja myëk'ajtën ets tpaatëty ja nyitsokën ni'ëmukë ja ja'ayëty mëti'ipë mëpëjktëpën, jëyëjp yë jutiis ja'ayëty ets näjyëtu'un ja ka'apë jyutiisëty.

¹⁷ Ya'atë aaw ayuk oypyë yë'ë xytyukni''ijxëmë wi'ix ja Dios ja npoky'ajtëm xytyukniwatsmëtyën: mëët ja mëpëjkën tsyo'ontä'äky ets jëtu'un jyëjpkëxy. Jëtu'un ijxtëm ja Dios ja y'aaw y'ayuk këxja'ay myinyën: Ja wa'ats ja'ay mëpëjkën mëët jyuuky'ata'any.

Ja Naaxwiinyëtë ja'ay ka'apë ja Kristë tmëpëkyën

¹⁸ Dios yajnikëxë'kpy ja tsyip y'äkë ko tyajtsoony jam tsajpjotm ja ëyo'on ets tëytyuny ja ëxëëkja'aytyëjk ko ka'ap oy tii tnipaye'eytyë, mëti'ipë tsumy matsy yaj'ijtëpën ja oyajtën ets ja tëyajtën ets këtiipë ja ja'ay tnijawëtëty.

¹⁹ Wa'ats yë'ëjëty tjanijawëtë ja Dios ja tyiyajtën, jä'ä ko tëë kë'ëm jyatuk'ixëtë,

²⁰ jä'ä ko ja Dios ja jyä'ä mëti'ipë ka'ap yaj'ixyën, pën yajmëmääpy yajmëtajp mëti'ipë yë'ë të tunyën. E mëtëy jëtu'un, jä'ä ko maju'unëm ja naaxwiinyëtë kyojyën, yë'ë të yajtuk'ijxy ko yë'ë Tyiosëty ets ko ja myëk'ajtën ka'ap kyukëxë. Paaty ka'ap ja ëxëëkja'aytyëjkëty yajpokymyä'kxantë.

²¹ Oy ja Dios të tja'ixtë, ka'ap të tmëjjaw të tjaantyjyawëtë ijxtëm ja Dios mëpaat yajmëjpëjktä'äkyën, ni të tkamo'otë ja kukajpxën. Ni'ikyë jëëmpit winë të tuntë, aakjä'ä të tmëmay të tmëtajtë ka'apë tyuunëtyën, jëtu'un ja tsyuuwinma'any të yajwë'ëmëtë ijxtëm ja ja'ay kupi'its kukoots y'ityën.

²² Jëtu'un ijty y'ëna'antë ko wyijy'at kyejy'atë, je'eyëp ko tsuu yë'ë të y'awinpitë,

²³ jä'ä ko tëë tyajtëkajtsëtë ja myëj'ajt y'oyajtën ja Dios mëët ja awinax mëti'ipë ja ja'ay yajkojtëpën, mëti'ipë o'ktëpën; yë'ëpaat të tyajnikojtu'utë ja joon jëyujk mëti'ipë kääkjëtijtëpën, jëyujk mëti'ipë taxk yë kyë'ë tyekyën ets tsa'any.

²⁴ Paaty ja Dios të y'ëxmatsëtë ets jam tyimyajpaatëty ma ja ëxëëkpën mëti'ipë yë'ë tsyojkën'ajtëpën, aakyë'ë të ttun të tkajpxtë mëti'ipë yajtsëtyuunpën.

²⁵ Ka'ap ja Dios ja tyiyajtën të tmëjpëjktakëtë, ni'ikyë ja ënëëmëtyä'äky të tyajmëjtëkëtë ets të twintsë'ëkëtë, të t'ëwtatë mëti'ipë ja Dios të tyajkojyën; ka'ap ja Dios të twintsë'ëkëtë, mëti'ipë ja paat'ajtëpën ets jeexyë tmëjjaw tjaantyjyawëtë.

²⁶ Paaty ja Dios të y'ëxmajtsënëtë ma ja ëxëëk tuunkën mëti'ipë je'eyë yajtsëtyuunpën. To'oxytyëjk paat tuunëtë mëti'ipë ka'ap y'oyëtyën, ka'ap ye'etyëjk tmëët'itë ets të tyajtëkatstë wi'ix tyo'oxytyëjk'atëtyën.

²⁷ Näyjyëtu'un ja ye'etyëjkëty ka'ap t'ëkmëët'ijnëtë ja to'oxytyëjk, aak ye'etyëjk ja tsojkën ja'awën tmëët'ajnëtë. Aak ye'etyëjk ëxëëkjaty y'ëtë'ëtsnëtë y'ënanëtë, ets ënät kë'ëm nyätyuktëytyunëtë ko tii wiinkjaty tuntë tkajpxtë.

²⁸ E jä'ä ko ka'ap nijawëjantë ja Dios, paaty ja Dios të tyukmë'ixëtë ets tmëët'atëty ja ëxëëk winma'any ets tuntëty mëti'ipë ka'ap pyaat'atyën.

²⁹ Ujts ja jyot wyinma'anyëty mëët ja ëxëëkpë, ijxtëm ja ëxëëk'ijxën, atsojkën, mëtsip'ajtën, tuku''oy'ijxën, yaja'ay'o'ktëp, tsiptuuntëp, win'ë'ëntëp, aak jëëmpit tii t'ixtë ets pi'tskajpxtëp.

³⁰ Nyikajpx nyimëtyaktëp ëxëëkjaty ja myëku'ukëty, myëtsip'ajtëp ja Dios, ëxëëk kajpxtëp, mëjjëtëp patëtëp, amëj akëjxm, myëwinma'anypyaat'ëtëtstëp ja ëxëëkpë, ka'ap ja tyaak tyeety tmëmëtowtë,

³¹ ka'ap jyä'äkyukëja'antë, ka'ap ja y'ayuk tpatuntë, ka'ap pën t'oyjyawëtë, ka'ap nyimyä'kxtë, ka'ap ja pa'ëyo'owën tmëët'atë.

³² Nyija'awëtëp ko Dios të tuknipëjktaakë ko paat'ajtëtëp ja o'kën mëti'ipë jëtu'un ëtëtstëpën ets ka'ap yi'iyëty ko jëtu'un tuun'ëtë'ëtstë, tyukxoontaktëp yë'ëpaat ko ja wiinkëtypë jëtu'un y'ëtë'ëtstë y'ëna'antë.