Oseas 9 - Biblia Dc en Mixe de Quetzaltepec

Ma Oseas tnikäjpxyën ko yë Israel kajpn yajtukumëtowa'any yë pyoky

¹ Israel, këtii mxoontä'äky; këtii mnëputy myujkputy tä wiinkëtypë kajpnëtyën, jä'ä ko mijts jëtu'un të m'ëtë'ëtsy tä tu'uk yë to'oxytyëjkën mëti'ipë yë jyot nyini'kx tyo'kpy yäjkpyën ko të xy'ëxmatsy ja mTios. Ma pyajk'atyën yë tsajpmok jää xyjyëjp'ixy myajmëjuyëty ko xytyooky xyäky yë mjot mnini'kx.

² Yë Israel kajpn ka'ap tmëët'ata'any yë tsyajpmok ets y'uvë nëë tëëpë nyimaanaxyën; yë jyemy tsatym nyëë ka'ap myëta'akëty.

³ Wimpitäämpy yë Efraín jatëkok jap Egiptë ets jam Asiria jyë'kxäämpy yë ëxëëkpë jë'kxy pëky. Ka'ap y'ëktsëënëjanë jam ma Wintsën yë kyajpnën,

⁴ ka'ap t'ëk uukanë yë tsatym nyëë tëpë nyimaanaxyën mëti'ipë Wintsën yajtukmëjja'apën ets nän ka'ap t'ëktukwintsë'ëkëjanë jam yë wintsë'kën. Ja tsajpkääky mëti'ipë kyäyäämpyën jëtu'un tkayä'äny tä ja'ay y'o'kpë nikayën ets pën ënety kyääytyëpën ëxëëk wyë'ëma'antë, yë'ë nëjkx tkaytyë tääpë tsajpkääky ets ka'ap nëjkx tjëkyepy tmënëjkxtë ma Wintsën tsyajptëjkën.

⁵ ¿Tii mtunantëp xëëwjoty, ma ënety ja Wintsën ja myëjxëëw yajtunyën?

⁶ Yë'ëjëty tëë tkukakta'atë ja kutëko'oyën; Egiptë ja'ay nëjkx yajmukëtë ets nëjkx yajnaaxtëkëyëtë jam Menfis. Nëjkxëp yë pyoop pujxnmeeny nyi'ëëxyoonta'ay ets ma ënety jam yë myëtsip tna'ityën äpny nëjkx jam yoontäkta'ay.

⁷ Tëë tpaaty ja xëëw po'o ma ja tëytyu'unën y'ita'anyën. Tëë tpaaty ja xëëw po'o ma tkëpäta'antën ja ja'ay ja y'ëxëëktu'un y'ëxëëk kajpxënëty. Israel nyijawëp ënät ko tpaatëty ja xëëw po'o. Miitsëty jëtu'un m'ëna'antë: Yë Dios yë kyäpxynyajxpë winma'anytyuk yë'ë ets tsuujajtp lokëjajtp. Yë'ëjëty paaty jëtu'un y'ëna'antë jä'ä ko ëxëëk nyäyjyawëtë, jä'ä ko mëj këjää yë pyokyëty.

⁸ Dios jëtu'un yë kyäjpxynyajxpëtëjk të tpëjktä'äky tä këwent'ajtpën jam ma Efraín kyajpnën, e miitsëty je'eyë xy'ix ix xypya'ixtë ma y'ëkkä'äy; yë'ëpaat xytyuk'ëxëëk'ixtë ko jap tyuny ma ja Dios ja tsyajptëjkën.

⁹ Ko ëxajë mjëtitë mëët yë wit meeny jä'ä të mnätyuk'ëxëëktunëtë, tä ojts jyäty kyëpetyën jam Guibeá. E yë Wintsën jyä'ämyätsäämpy yë m'ëxëëktu'un m'ëxëëk kajpxënëty ets mtuktëytyunanëtëp yë mnëë mpokyëty.

Israel kyu'ëyowëjäämpy yë nyëë pyoky

¹⁰ Jëtu'un yë Wintsën y'ënä'äny: Koos mpaty yë Israel, jëtu'unës jotkujk näjya'awëy tä ja'ay tpaatyën yë tsatsym jam të'ëts'itjotm. Yë m'ap m'okëty jëtu'unës n'ijxy tä yë higos tsojk tsyaamë'ëkyën. E ko jam jyajtë Baal-peor wiink tios ojts nyätyukmëkënu'kxëtë ets ojts tuntë winë ëxëëk tä y'ëxëkëtyën yë y'awinaxëty mëti'ipë ënety tsyojkën'ajtëpën.

¹¹ Jëtu'un kyääkë'ëka'any yë Efraín yë myëj'ajtën tä joon kyääkë'ëkyën. Ka'ap yë pi'k ëna'k y'ëkmëxu'unk'atanëtë, ka'ap yë to'oxytyëjk y'ëk'u'unk paatanëtë ets ka'ap y'ëk'u'unk ixanëtë.

¹² Oy ënety jya'u'unk ijxtëpë, mpëjkëjantëpës yë'ëjëty këtiipë nitu'uk tmëwë'ëmtëty. Mon tuk tääpë ja'ay yajpaata'antë koos ënety n'ëxmatstë.

¹³ Jëtu'unës n'ixy yë Efraín yë y'u'unk y'ëna'k tmëët'aty tä jeexyë tuknipëtsëmyën mëti'ipë yaj'ookëtëpën.

¹⁴ Wintsën, tukumëtow ijxtëm pyaat'atëtën. Yë'ë mo'o to'oxytyëjk mëti'ipë ka'ap y'u'unkpaatëtyën ets mëti'ipë ka'ap tyi'tsk komyën.

Ma Wintsën tukjoot'anpëkyën yë Efraín

¹⁵ Jëtu'un yë Wintsën y'ënä'äny: Jam Guilgal ëxëëk jam y'ëtëtstë y'ënantë, jam ojts kyëjääjë ka'ap n'ëktsojknëtës. Mëët ko ëxëëk winë të tuntë n'ixkäxäämpyës yam maas njëën ntëjkën; ëjts ka'apës n'ëktsokanëtë, jä'ä ko yë kyopktëjkëty je'eyës të xykyäjpxy kumëtoownaxtë.

¹⁶ Tëë yë Efraín tsyëtyuty, tä tu'uk yë kepyën mëti'ipë të tyi'itsyën yë tyikts ets ka'ap y'ëktëëmpäjnë. Oy tjamëët'atë y'u'unk, nyaj'ookanëpës yë y'u'unk myääy.

¹⁷ Ya'atë naax kajpn ka'ap yë Dios ninu'un tmëj'ixy; paatykyëjxm yë nTiosës y'ëxmatsa'anëtë ets jëtu'unyë kyuye'ey kyunaxëtëty maajaty ja naax kajpnën.