Oseas 3 - Biblia Dc en Mixe de QuetzaltepecYë Oseas mëët yë to'oxytyëjk mëti'ipë ka'ap nyiye'etyëjk twinkutsë'ëkën 1 Ënet yë Wintsën jatëkok xy'ënëmaayës: Nëjkx mëët'at tu'uk yë to'oxytyëjk mëti'ipë mëët tsyëënën yë naaxwiinyëtë ja'ay oypyë mëët nyämyäyën ets mëti'ipë tyo'kpy yäjkpyën yë jyot nyini'kx. Jëtu'un yë Wintsën tsoky tjawë yë Israel ja'ayëty ko wiink tios të tpanëjkxtëkëtë. 2 Ënet ojts tu'uk yë to'oxytyëjk njuyës, majkmokx yë poop pujxn meeny nmooyës ets tëkëëk mëko'px tsim yë cebadë. 3 Etsës n'ënëmaay: Jeky mijts nto'oxytyëjk'ata'any; këtii mjot mnini'kx xytyookëty ets këtii pën wiink naaxwiinyëtë ja'ay xymyëët'atëty, etsës mijts nwinkutsë'ëkëty. 4 Jä'ä ko yë Israel ja'ayëty jeky ka'ap tmëët'ata'antë yë kyutujkpëty ets mëti'ipë nikopk'atëtëp, ka'ap tyaka'antë wintsë'kën ets ka'ap t'ëwtata'antë ja tsaanipiy kënu'kxypyë, ka'ap tmëët'ata'antë yë teety wit ets awinax mëti'ipë tu'kjëën tu'ktëjk myëët'ajtëpën. 5 Ok jatëkok yë Israel ja'ayëty tniwinpita'antë yë Dios ets t'ixta'aja'antë, mëti'ipë Wyintsën'ajtëpën ets ja David mëti'ipë kyutujkpë'ajtëpën. Ko ënety tpaaty ja xëëw jëmëjt winta'ak naaxkow nëjkx tnimintë yë Wintsën ets tkukajpxëja'antë ko ënety jotkujk yajjuuky'atëtë. |
Biblia Dc en Mixe de Quetzaltepec, Oaxaca México © Sociedad Bíblica de México, A.C.
Bible Society of Mexico