Nehemías 7 - Biblia Dc en Mixe de Quetzaltepec

Ma ja Nehemías tnikajpxpetyën ja mëti'ipë kutuunk'atëpën

¹ Ko ja mëjpotsy ojts yajkoj'o'oyëtyä'äy ets ja nyitëjk'aaw tyëkëtyääy ënät ja ja'ay yajnikajpxpäjtë mëti'ipë kyëwent'atëpën ja tëjk'aaw, mëti'ipë ëwtëp ya'axtëpën ets ja Leví ja'ayëty.

² Yë'ëjës ntuknipëjk yë nmëkä'äxës Hananí ets kyutuunk'atëty jam Jerusalén ets Hananías yë'ë kyutuunk'atëty jam ma ja mëj kajpnën mëti'ipë këwent'aty, ijtpën jä'ä ko yë'ë oy ënety jyä'äy'äty ets mëk ijty ni'ik twinkutsë'ëkë ja Wintsën. Tnikutuunk'atëty ja naax kajpn jam Jerusalén.

³ Ets n'ënëmaaytyë ko këtii tëjk'aaw tyaj'ëwa'atstëty tëë ënety yajxon xyiiynyë täänëm tyaj'ëwa'atstëty, näjyëtu'un ko tyaj'ëtuktëty jää ko ënety jyam'atënëm ja ijx'ijt këwent'ajtpëty. Ojts näjyëtu'un ntuknipëktës ja'ayëty mëti'ipë ja Jerusalén kajpn kyëwent'atëpën ets mëti'ipë y'ijx'it kyëwent'atëpën ja jyëën tyëjkëty.

⁴ Mëj naax mëj kajpn ënety tääpë Jerusalén kajpn, je'eyëp ko niwäänë ënety jap ja'ay jä'ä ko may ënety ja tëjk ka'ap yajkoj'oyënëm.

Mëti'ipë ojts jatëkok wyimpitën Jerusalén

⁵ Ënätës ja Dios xy'ënëmaay etsës nyajtu'ukmujkta'ajëty ja ja'ay mëti'ipë ijtëpën ma ja nyaax kyajpnëtyën, ja kutuunktëjkëty ets ja naax kajpn ets tu'uk kyojëty ja noky ma yajjaaypyajta'atëty ja ja'ayëty, japts ma nokyën ojts yajpaaty ja ja'ayxyëëwëty mëti'ipë ënety tëëyëp të jya'tën. Ets jap myiinta'ay ja ja'ayxyëëw:

^6-7 Yaa jëtu'un ja Israel ja'ayxyëëw myintë mëti'ipë ojts myëxu'unk'atën jam Judá ets ojts yajmënëjkxtë Babilonyë tsumy matsy, Nabucodonosor ojts yajnëjkxëtë, mëti'ipë jatëkok winpijtën jam Jerusalén ets Judá ko y'ëwaatsëpëtsëëmtë, aakjä'ä nyinëjktaaytyë ja nyaax kyajpnëty ma tsyo'ontën. Zorobabel, Josué, Nehemías, Aarías, Raamías, Nahamaní, Mardoqueo, Bilsán, Mispéret, Bigvai, Nehúm ets Baaná ojts nyikopk'atëtë:

⁸ ja Parós ja y'u'unk y'ok jä'ä nyiwinë'ajtë mäjtsk mil ja tëkë'px majkmäjtsk;

⁹ ja Sefatías ja y'u'unk y'ok jä'ä nyiwinë'ajtë tëkëëk mëko'px ja tëkë'px majkmäjtsk;

¹⁰ ja y'u'unk y'ok ja Ará, jä'ä nyiwinë'ajtë wëxtyikxy majkmäjtsk;

¹¹ ja Pahat-moab mëti'ipë y'u'unk'ajtyp y'ok'ajtypyën yë Josué ets Joab, jä'ä nyiwinë'ajtë mäjtsk mil ja tuktujk mëko'px ja majkmokx tëkëëk;

¹² ja Elám ja y'u'unk y'ok, tu'uk mil ja mäjtsk mëko'px ja wëxtyikxy majkmäjtsk;

¹³ ja Zatú ja y'u'unk y'ok jä'ä nyiwinë'ajtë, tuktujk mëko'px ja wëxtyikxy mëkoxk;

¹⁴ ja Zacai ja y'u'unk y'ok jä'ä nyiwinë'ajtë wëxtujk mëko'px ja tëkë'px;

¹⁵ ja y'u'unk y'ok ja Binuy jä'ä nyiwinë'ajtë tëtujk mëko'px ja wëxtyikxy tuktujk;

¹⁶ ja Bebai ja y'u'unk y'ok jä'ä nyiwinë'ajtë tëtujk mëko'px ja i'pxtuktujk;

¹⁷ ja Azgad ja y'u'unk y'ok jä'ä nyiwinë'ajtë mäjtsk mil ja tëkëëk mëko'px ja i'px mäjtsk;

¹⁸ ja Adonicam ja y'u'unk y'ok jä'ä nyiwinë'ajtë tëtujk mëko'px ja tëkë'px wëxtujk;

¹⁹ ja Bigvai ja y'u'unk y'ok jä'ä nyiwinë'ajtë mäjtsk mil ja tëkë'px wëxtujk;

²⁰ ja Adín ja y'u'unk y'ok jä'ä nyiwinë'ajtë tëtujk mëko'px ja wëxtyikxy majkmokx;

²¹ ja Ater ja'ayëty, yë y'u'unk y'ok yë Ezequías, jä'ä nyiwinë'ajtë majkta'px majkmokx tëkëëk;

²² ja Hasum ja y'u'unk y'ok jä'ä nyiwinë'ajtë tëkëëk mëko'px ja i'pxtuktujk;

²³ ja Besai ja y'u'unk y'okëty jä'ä nyiwinë'ajtë tëkëëk mëko'px ja i'px majktaxk;

²⁴ ja Harif ja y'u'unk y'ok jä'ä nyiwinë'ajtë mëko'px ja majkmäjtsk;

²⁵ ja Gabaón ja y'u'unk y'ok jä'ä nyiwinë'ajtë majkta'px majktëkëëk;

²⁶ ja Belén ja'ayëty ets ja Netofá ja'ayëty jä'ä nyiwinë'ajtë mëko'px ja majkta'px tuktujk;

²⁷ ja Anatot ja'ayëty jä'ä nyiwinë'ajtë mëko'px ja i'pxtuktujk;

²⁸ ja Bet-azmávet ja y'u'unk y'okëty jä'ä nyiwinë'ajtë wëxtyikxy mäjtsk;

²⁹ ja Quiriat-jearim ja y'u'unk y'okëty ets ja Quefirá ets ja Beerot ja y'u'unk y'okëty jä'ä nyiwinë'ajtë wëxtujk mëko'px ja wëxtyikxy tëkëëk;

³⁰ ja Ramá ets ja Gueba y'u'unk y'okëty jä'ä nyiwinë'ajtë tëtujk mëko'px ja I'px tu'uk;

³¹ ja Micmás ja y'u'unk y'ok jä'ä nyiwinë'ajtë mëko'px ja i'px tëkëëk;

³² ja Betel ets ja Aí ja y'u'unk y'okëty jä'ä nyiwinë'ajtë mëko'px ja i'px tëkëëk;

³³ ja Nebo ja y'u'unk yok jä'ä nyiwinë'ajtë wëxtyikxy majkmäjtsk;

³⁴ ja wiink Elám ja y'u'unk y'ok jä'ä nyiwinë'ajtë mil ja mäjtsk mëko'px ja wëxtyikxy myajkmäjtsk;

³⁵ ja Harim ja y'u'unk y'ok jä'ä nyiwinë'ajtë tëkëëk mëko'px ja i'px;

³⁶ ja Jericó ja y'u'unk y'ok jä'ä nyiwinë'ajtë tëkëëk mëko'px ja wëxtyikxy mëkoxk;

³⁷ ja Lot, ja Hadid ets ja Onó, jä'ä y'u'unk y'okëty nyiwinë'ajtë wëxtujk mëko'px ja I'px tu'uk;

³⁸ ja Senaá y'u'unk y'okëty jä'ä nyiwinë'ajtë tëkëëk mil ja taxtujk mëko'px ja i'px majk.

³⁹ Ja teetytyëjkëty mëti'ipë y'u'unk'ajt y'ok'ajtën ja Jedaías, mëti'ipë Josué jyiiky'ajt myëku'uk'ajtën, jä'ä nyiwinë'ajtë taxtujk mëko'px ja tëkë'px majktëkëëk;

⁴⁰ ja Imer ja y'u'unk y'ok jä'ä nyiwinë'ajtë tu'uk mil ja wëxtyikxy majkmäjtsk;

⁴¹ ja Pashur ja y'u'unk y'ok jä'ä nyiwinë'ajtë tu'uk mil ja mäjtsk mëko'px ja wëxtyikxy wyëxtujk;

⁴² ja Harim ja y'u'unk y'ok jä'ä nyiwinë'ajtë mil ja majkmokx mäjtsk.

⁴³ Ja Leví ja'ayëty, Josué ja y'u'unk y'ok ets Cadmiel, Hodavías y'u'unk y'ok, jä'ä nyiwinë'ajtë tëkë'px majkmajkts.

⁴⁴ Ja ëëpëtëjk Asaf y'u'unk y'ok jä'ä nyiwinë'ajtë mëko'px ja wëxtyikxy tuktujk.

⁴⁵ Yë'ë ijty tëjk'aaw kyëwent'ajtëp ja Salum y'u'unk y'ok, Ater y'u'unk y'ok, Talum y'u'unk y'ok, Acub y'u'unk y'ok, Hadidá y'u'unk y'ok ets Sobai y'u'unk y'ok. Jä'ä nyiwinë'ajtë mëko'px ja majkmokx tëkëëk.

⁴⁶ Ja ja'ayëty mëti'ipë ijty jap tsajptëkoty tim tuuntëpën, jap pyä'ätë jyaaxtë, jä'ä y'u'unk y'okëty ja Sihá, ja Hasufá, ja Tabaot,

⁴⁷ ja Querós, ja Siaha, ja Patón,

⁴⁸ ja Lebaná, ja Hagabá, ja Salmai,

⁴⁹ ja Hanán, ja Guidel, ja Hahar,

⁵⁰ ja Reaia, ja Rezin, ja Necodá,

⁵¹ ja Gazam, ja Uza, ja Paséah,

⁵² ja Besai, ja Meunim, ja Nefusim,

⁵³ ja Bacbuc, ja Hacufá, ja Harhur,

⁵⁴ ja Baslut, ja Mehídë, ja Harsá,

⁵⁵ ja Barcos, ja Sísara, ja Temá,

⁵⁶ ja Nezías ets ja Hatifá.

⁵⁷ Ja ja'ayëty mëti'ipë jam tuuntën ma ja Salomón ja jyëën tyëjkën, jämyëpë ojts pyä'ätën jyaaxtën, jä'ä ja y'u'unk y'okëty ja Sotai, ja Soféret, ja Perutá,

⁵⁸ ja Jaalá, ja Darcón, ja Guidel,

⁵⁹ ja Sefatías, ja Hatil, ja Poquéret-hasebaím ets ja Amón.

⁶⁰ Ja ja'ayëty mëti'ipë timtuuntëëwtën jap ma tsajptëjkën ets mëti'ipë näjyëtu'un timtuuntëëwtën jam ma Salomón ja tyëjkën jä'ä nyiwinë'ajtë tëkëëk mëko'px ja majkta'px majkmäjtsk.

⁶¹ Ja ja'ayëty mëti'ipë tso'ontën Tel-mélah, Tel-harsá, Querub, Adón ets Imer ka'apë oy yajnijawëtën pën Israel ja'ay jëtu'unëty, jä'ä ko ka'ap maa ja xyëëw y'akëxë'ëkëtë nokyjoty, jä'ä ko ka'ap tii ja nyokyëty, yë'ë ya'atë ja'ayëty:

⁶² ja y'u'unk y'ok ja Delaías, Tobías ets Necodá, jä'ä nyiwinë'ajtë tëtujk mëko'px ja wëxtyikxy mäjtsk.

⁶³ E ja jyiikytyëjk myëku'uktëjk ja teetytyëjkëty yë'ë ya'atë ijtë: ja y'u'unk y'ok ja Hobaías, Cos ets yu Barzilai, mëti'ipë mëët pyijkyën tu'uk ja nyëëx ja Barzilai mëti'ipë jam kukajpn'ajtpën Galaad ets näjyëtu'un ja xyëëw ojts tpëjkë.

⁶⁴ Ya'atë ja'ayëty ojts xyëëw jyayaj'ixta'atë, je'eyëp ko ka'ap maa yajpaty, paaty tyim yajjo'tstë ma ja teety'ätyën.

⁶⁵ Yë'ëpaat ja yajkutujkpë ojts tni'ënä'ämë ets ka'ap ni pën kyäy y'uukëty ets ni pën tkajë'kxëty ja jë'kxy pëky mëti'ipë kënu'kxyën, koonëm yajxon yajnijawëty jënu'un wiinkëtä'äkyën mëët ja tsaa mëti'ipë ijty winë mëët t'ijxpëtsëmtën, mëti'ipë tyijtëpën Urim ets Tumim.

⁶⁶ Ma ja naax kajpnën jä'ä ja ja'ay ënety nyimayëty niwinë wëxtyikxy mäjtsk mil ja tëkëëk mëko'px,

⁶⁷ ëpëky ja tyuunpë kyupëjkpëty ye'etyëjkpë to'oxytyëjkpë, jä'ä nyiwinë'ajtë aak yë'ëjëty wëxtujk mil ja tëkëëk mëko'px ja i'px majktu'uk. Ets ja ëëpë yaxpëty mäjtsk mëko'px ja wëxtyikxy mëkoxk tam ja ye'etyëjkpë ets tam ja to'oxytyëjkpë.

⁶⁸ Tam ijty kwaay tmëët'atë, ja nyiwinë'atë tëtujk mëko'px ja i'px majkmokx tu'uk ets mäjtsk mëko'px ja wëxtyikxy mëkoxk ja mëkjëyujk to'oxy,

⁶⁹ taxk mëko'px ja i'px majkmokx yë jëyujk jëku'ux ets tëtujk mil ja wëxtujk mëko'px ja i'px ja krukts.

⁷⁰ Ojts mëti'ipë ja'ay tyaktë yë wit meeny kë'ëmwinma'any mëti'ipë tuunën ko ja tsajptëjk ja nyapotsy yajkoj'o'oyëy, ojts näjyëtu'un yajkutujkpë tnayäky meeny, pu'tsmeeny, jä'ä jye'emtyëty tuktujk mil aak pu'ts pujxn, ëpëky wëxtyikxy majk a'ukën, aakyë'ë pu'ts pujxnëpë ets ëpëky mëkoxk mëko'px teety wit oyëtypë.

⁷¹ Ja ja'ayëty nitu'ukjaty ma tu'kjëën tu'ktëjkpën jä'ä meeny tyajktë ko myujktaay ets ja potsy yajtukoj'oyëty, mëko'px ja tëkë'px kilë aakyë'ë pu'ts pujxn ets mil ja mäjtsk mëko'px yë poop pujxn;

⁷² e ja naax kajpn ja jyä'ä jä'ä wyinmujky mëko'px ja tëkë'px kilë aak pu'ts pujxn, tu'uk mil ja mëko'px ja poop pujxn ets wëxtujk ja teety wyit oyëtypë.

⁷³ Ja teetytyëjkëty, ja Leví ja'ayëty, ja tëjkëwent'ajtpëty, ja ëëpë yaxpëty, ja kunaax kukajpnëty, ja ja'ayëty mëti'ipë tuuntëpën ma ja tsajptëjkën ets tëkokyë ja Israel ja'ayëty, aakjä'ä ojts tpata'atë ja nyaax kyajpnëty.