Mateo 4 - Biblia Dc en Mixe de Quetzaltepec

Ko Ja ku'oypyë twinma'any'ixy je'eyë ja Jesús

¹ Tääts ja Jesús ja Kënu'kxymyëkajtën ojts yajnëjkxyë të'ëts'itjotm ets ja mëjku'u wyinma'any'ixa'anyë.

² Wëxytyikxyëëw wëxtyikxy tsyu'um ojts y'ity ayuu, ok ojts ya yuu pyäätyë.

³ Ënet ja mëjku'u nyimiinë ets wyinma'any ixa'anyë, ets y'ënëmaayë: Pën Dios mijts mU'unk'ajtëp, t'ënëëmë ya'atë tsaa ets y'awinpitëty tsajpkääky.

⁴ Tääts ja Jesús y'ëtsooy: Jëtu'un yë Dios yë y'aaw y'ayuk myiny këxja'ay: ka'ap ja'ay yi'iyë tsajpkääky tukjuuky'atëty, näjyëtu'un ja'ay tukjuuky'atëty ko tmëmëtowëty yë Dios.

⁵ Ënet ja mëjku'u ojts yajnëjkxyë ma ja kënu'kxypyë Jerusalén kajpnën, tääts ojts yajpetyë jam mëjtsajptëjk këpajkm,

⁶ ets y'ënëmaayë: Pën Dios mijts mU'unk'ajtëp, kupujtnax yaa, jä'ä ko jëtu'un ja Dios ja y'aaw y'ayuk kyëxja'ayëty: Dios kyäxäämpy ja y'anklëstëjk ets mkëwent'atëtëty, yë'ë mwijts'itanëp këtiipë mkunäpëty tsaakëjxm.

⁷ Tääts ja Jesús y'ëtsooy: Näyjyëtu'un ja Dios ja y'aaw y'ayuk kyëxja'ayëty: ka'ap ja Wintsën xywyinma'any'ixëty pën oy ka'oy tii ntuna'any.

⁸ Ets ja mëjku'u ojts wyoownëjkxyë ma ja kopkën ets tyuk'ijxtaayë ja naax kajpn mëj'äämpyë ets kumeenypë y'itën naaxwiinyëtë apëtsëmy,

⁹ ets y'ënëmaayë: Nmooytya'ajëp ya'atë kajpn pën xywyinkuxtënääpyës ets xy'ëwtajtpës.

¹⁰ Ënet ja Jesús y'ëtsooy: Nëjkx mëjku'u, jëtu'un ja Dios y'aaw y'ayuk kyëxja'ayëty: wintsë'ëkë mWintsën Dios. Yë'ë tu'ukyë m'ëwtatëp ets xymyëmëtowëty.

¹¹ Ënet ja mëjku'u ojts y'ëxmatsyë ets ja anklëstëjk nyimiinë ets ojts pyutëkëty.

Ko ja Jesús tkajpxwa'kxtsoony ja Tios ja y'aaw y'ayuk

¹² Ko ja Jesús tnija'awëy ko ja Juan ënety të yajtsumy, ënät ojts nyijkxy jam Galilea y'itjotm.

¹³ Jam tsyo'ony Nazaret ets ojts nyijkxy ma ja Capernaúm kajpnën tsënääpyë nëë'akëyë pë'am ma ja Zabulón it ets Neftalí itën.

¹⁴ Jëtu'un tyuunë jyajtë ets y'atëwëty ja aaw ayuk mëti'ipë yë käjpxynyajxpë Jeséas jyääyën:

¹⁵ Ja Zabulón y'itjot ets ja Neftalí y'itjot, ma ja tu'u nyäxyën, Jordán mëj nëëpë'ampë, mejypyë'aaypyë: yë'ë jëtu'un yë Galilea y'itjot, ma ja ja'ay tsyëënëtën ka'apë jyutiis'atën,

¹⁶ ja ja'ayëty mëti'ipë ënety kupi'its kukoots yajpatëpën, tëë ja të'kxën t'ixtë; tëë ja të'kxën t'ixtë mëti'ipë ënety juuky'ajtëpën tä jeexyë të y'o'knëtën.

¹⁷ Tääts ja Jesús ojts ëka'any ja tyuunk tyajtso'ontä'äky, tkajpxwä'kxy ja Dios ja y'aaw y'ayuk ets y'ënäny: Wimpitë ma Tiosën, jä'ä ko wiinkoonp ja tsajpjotmëpë kuttujkën.

Ko ja Jesús tmëkäjpxy ja nimajktaxkpë ajkxmajtspë

¹⁸ Jam ënety ja Jesús nyäxy Galilea mejypyë'am ko t'ijxpaty ja ja'ay nimäjtsk tukä'äxëty, tu'uk txëëwaty Simón, mëti'ipë yajtijpën Pedro ets tu'uk txëëwaty Andrés. Ajkxmajtsk tyuunk'ajtëp, tsaay ënety nyëëkujëpijptëp mëti'ipë tyuk'ajkxmajtstëpën.

¹⁹ Ënet ja Jesús y'ënëmaayëtë: Pamiintëkës, ja'ay miits myajpëtsëmtëp pokyjoty ijxtëm miits nëë jëyujk xyajpëtsëmtën nëëjoty.

²⁰ Ënätyë ja tsyääy t'ëxmajtstë ets tpatso'ontë.

²¹ Tëë ënety wäänë ye'eytyë, jamts ja Jesús ojts t'ijxpaaty wiinkpë nimäjtsk, nän tu'kä'äxëty. Tu'uk txëëwaty Santiago ets tu'uk Juan, Zebedeo y'u'unk. Jam ënety ma ja kepy nëëwinye'epyën ja tsyääy t'ataakëtë mëët ja tyeety. Ënet ja Jesús ojts yaaxëtë.

²² Näy ënätyë t'ijxmajtstë ja tyeety jam ma ja kepy nëëwinye'epyën ets tpatso'ontë ja Jesús.

Ko ja Jesús tyaj'ijxpëky ja mayjyä'äy

²³ Tääts ja Jesús t'aye'ey ja kajpn Galilea y'itjotm ets yaj'ixpëky ma ja tsajptëjkën maajëty tu'uktu'uk ja kajpnën, tuk'ëwaanë ja ja'ay ja oy aaw oy ayuk ma ja kuttujkën tsajpjotmëpë yajnimëtyä'äkyën ets ni'ëmukë ja pa'amja'ay tyajtsoky.

²⁴ Ojts yajnimëtyä'äky ja Jesús ma Sirië y'itjotmën mëti'ipë tyuun kyajpxën ets ja ja'ay tyajmiintë ja pa'amja'ay, mëti'ipë mëk pëjkëpën, mëti'ipë ja ku'oypyë myëët'ajtëpën, mëti'ipë mo'tëp ets mëti'ipë kë'ëxujxp tekyxyujxtëpën. Ni'ëmukë ja Jesús ojts tyajtsokta'ay.

²⁵ May ja ja'ay ja Jesús ojts pyatsoonyë, mëti'ipë tsënaaytyëpën jam Galilea y'itjotm, jam ma Decápolis kajpnën, Jerusalén kajpnën ets Judea y'itjotm. Näy tam mëti'ipë tso'ontën nëë'awinmtsow ma Jordán nëëjën.