Marcos 6 - Biblia Dc en Mixe de Quetzaltepec

Ko Jesús jam Nazaret

¹ Tääts ja Jesús jam tsyo'ony ets ojts nyijkx kyajpnjotm mëët ja y'ijxpëjkpëtëjk.

² Ko tpaty ja po'kxënxëëw, ënät yaj'ijxpëjktso'ony tsajptëkotm ets ja mayjyä'äy mëti'ipë ënety myëtoow'ijtëpën mëjmëtoy tmëtoowtë ko jëtu'un yaj'ixpëky. Tääts nyäyajtëëwëtë: ¿Ma jëtu'unpë të t'ijxpëky? ¿Tii wijyajtën yë'ë të yajmo'oy? ¿Maa ja kuttujkën tpëky ets ja mëj'ajtën tyajnikëxë'ëkëty?.

³ ¿Këtii yë'ëjëty ja tsäjtspë, Maria yë y'u'unkë, Santiagë myëkä'äxë, mëët ja José ets ja Judas ets ja Simón? ¿Këtii yaajëty yë myëkä'äxtëjk to'oxy ëna'kpë tsyëënëtë? Ka'ap tmëpëjktë ja Jesús.

⁴ Tä ja Jesús y'ënëmaayëtë: Yajwintsë'këp ja Dios ja kyäjpxynyajxpë oy tyimmaajëty, jämyë ka'ap yajwintsë'ëkëtë ma nyaax kyajpnën, ma jyiiky myëku'ukën ets ma tyëjkën.

⁵ Ka'ap jam ojts tuuny yë mëj'ajtën, wäänë je'eyë tyajtsoky ja pa'amja'ay ko ojts tkë'ënixajy.

⁶ Mëk tja'awëy ko ja ja'ay ka'ap myëpëjkë. Ënet kajpn kajpn jyëtijty tyaj'ijxpëky ja ja'ay.

Ko Jesús tkexy ja y'ijxpëjkpëtëjk ets ja Tios ja y'aaw y'ayuk tkajpxwa'kxtëty

⁷ Ojts ja Jesús tyaxë ja y'ijxpëjkpëtëjk nimajkmäjtskpë, ënät tkejxy nimäjtskjaty, ets ja kuttujkën tmooy ets t'ixkäxtëty ja ku'oypyë.

⁸ Jëtu'un ojts tni'ënä'ämë: Nitii tkamënëjkxtëty mëti'ipë myëtu'uye'eytyëpën, tyajk je'eyë kyaptëp. Ka'ap tmënëjkxtëty tsajpkääky, xuumy ets meeny,

⁹ Kyë'ëk je'eyë tyukwa'akëtëp, tu'kni'kx wyit tmënëjkxtëty mëti'ipë pyëjkxta'aktëpën, ka'ap myäjtskëty.

¹⁰ Tääts jyaak timnyëmaayëtë: Ko muum tëkoty mtëkëtëty, jap mja'ajta'aktëty koonëm mtsoontëty.

¹¹ E ma mkayajkupëktën ets ka'ap tmëtowa'antë mëti'ipë mjanikajpxtëpën, mtsoontëp jam. Ënet ja pu'uxm xywyinxitëty mëti'ipë jamën ma mtekyëtyën ets jëtu'un xytyuk'ixtëty ko pokymyëët wyë'ëmtë.

¹² Tääts ja y'ijxpëjkpëtëjk ojts tsyoontë ets ojts nyëjkxtë Dios y'aaw y'ayuk kajpxwa'kxpë, ets ja ja'ay ja y'ëxëëk winma'any t'ëxmatstëty, wä'än tjootwinpitë ma Tiosën.

¹³ May ja ku'oypyë t'ixkäjxtë tyajtsoktë ja pa'amja'ay ko ja on olivë tukjaaxtë.

Ko Juan Yajnëëpäjtpë y'ooky

¹⁴ Tääts ja yajkutujkpë Herodes tmëtoopaty ko ja Jesús ni'ik yajnikäjpxy yajnimëtyä'äky ets ja myëj'ajtën tëë ënety ja naax kajpn tnija'awëtya'atë. Tam mëti'ipë ënaanpën: Jä'ä ja Juan Yajnëëpäjtpë të jyuukpyiky, paaty tmëëtëty ja mëk'ajtën ets tyaj'ixëtëty ja mëj'ajtën.

¹⁵ Tam ja wiinkëtypë mëti'ipë ënantëpën: Elías yë'ë, Dios kyäjpxynyajxpë. Ets mëti'ipë ënantëpën: Dios yë kyäjpxynyajxpë ijxtëm tëëyëp myiintën.

¹⁶ Ko Herodes jëtu'un tmëtooy, ënät y'ënäny: Juan yë'ë, jä'ä mëti'ipës ojts ja kyëpajk ni'ënä'ämën ets yajkatspuxëty. Jä'ä të jyuukpyiky jatëkok.

¹⁷ Paaty ja Herodes jëtu'un y'ënäny jä'ä ko yë'ë ënety të ni'ënä'ämë ets ja Juan yajmatsëty ets yajtsumëty kë'ëtsumy tekytsyumy. Herodías kyëjxm ojts jëtu'un y'ëti'itsy, mëti'ipë ijty ja y'uty Felipe tyo'oxytyëjk'ajtypyën, mëti'ipë ja Herodes ojts tpëkyën.

¹⁸ Tëë ënety ja Juan y'ënë'ëmxëty: Ka'ap y'oyëty ets mijts xytyo'oxytyëjk'atëty ja m'uty ja tyo'oxytyëjk.

¹⁹ Paaty ja Herodías tukjoot'anpëjky ja Juan, ets myäy tyäjy ko ja Juan tyaj'ooka'any. E kä'äp ënety oy tmëët'aty ja wa'kpäjn wi'ix ja Juan tyaj'ooktëty.

²⁰ Jä'ä ko nyija'ap ja Herodes ko mëtëy ja Juan kyäjpxy ets wa'ats ja y'aaw jyot, paaty ojts tkuwa'any. Oy ja y'aaw y'ayuk ojts tmëtoowë ets jotkujk nyäjyawëty ko ja Juan myëtyä'äky.

²¹ Tääts myëpaat'ajty ma ja Herodías tpatyën ja wa'kpäjn jää ma ja Herodes ojts twoowtsoyën mëkääpyë mëti'ipë tuuntëpën ma ja kyutujktaknën, tä ja mëjtsiptuunpë wintsënëty, näjyëtu'un ja ja'ayëty mëti'ipë wintsë'ëkë ijtëpën jam Galilea.

²² Ënet ja Herodías ja nyëëx tyëjkëy ma ja ja'ay ënety kyäytyë y'uuktën ets tyëjkëy äjtspë, ja yajkutujkpë Herodes ets ja ja'ayëty mëti'ipë jam a'ux'ajtëpën janty'oy t'ijxtë ko ja kiixy y'etsy. Paaty ja yajkutujkpë t'ënëmaay: Amëtoowkës tii mtsojkpy, tyam nmo'ojëty.

²³ Ojts ja Dios tyajkäjpxy ko tmo'oja'any pën tii ja to'oxy'ëna'k y'amëtoopy, yë'ëpaat ojts ja kuttujkën kujkwä'kxy tukwinwanë.

²⁴ Ko ja to'oxy'ëna'k jëtu'un tmëtooy, tääts pyëtsiimy ets ja tyaak tyajtëëy: ¿Tiijës n'amëtowëp? Tääts y'ënëmaayë ja tyaak. Juan yë kyëpajk m'amëtoowëp.

²⁵ Ënet ja to'oxy'ëna'k ënätyë tyëjkëy jap ma ënety ja Herodes ets t'ënëmaay: Yë'ë ntsojkpyës ets xymyo'ojëtyës tyämyë texyjoty yë Juan Yajnëëpäjtpë kyëpajk.

²⁶ Tä ja Herodes jyotmaytyëjkëy; e jä'ä ko tëë ënety ja Dios tyajkäjpxy ets tëë ënety tmëtowtë ja ja'ay mëti'ipë jam kaaytyëpën, paaty ojts tkupëky.

²⁷ Ënet ja tyuunpë tu'uk tkejxy ets tmëminëty ja Juan Yajnëëpäjtpë ja kyëpajk. Ënet ja tuunpë ojts nyijkxy ma pujxntëjkën ets tyo'kpujxtuty ja Juan,

²⁸ ets tyajmiiny ja këpajk texyjoty. Ënet ja to'oxy'ëna'k yajmooy ets tmooy ja tyaak.

²⁹ Ko ja Juan ja y'ijxpëjkpëtëjk nija'awëtyë, ënät tyajpëtë'ktë ja nyi'kx kyopk ets ojts tyajnaaxtëkëtë.

Ko ja Jesús tyajkay nimëkoxk mil naxy ja ja'ay

³⁰ Tääts ja ijxpëjkpëtëjk ye'eymyujktë mëët ja Jesús ets tukmëmëtyaktaaytyë tiijaty ënety të tuntën ets tii ënety të tuk'ijxpëktën ja ja'ay.

³¹ Jëtu'un ja Jesús y'ënëmaayëtë: Mintë, jam mpo'kxtë ma ka'ap nëkooyë nä'ämpën. Jä'ä ko janaam jatsojk ja ja'ay wyimpit y'atëjtë, jëna'ajëty ka'ap y'ëkkaaynyëtë.

³² Ënet ja kepy nëëwinye'epyë aak ayi'iyë tuktëjkëtyë ets nyëjkxtë të'ëts'itjotm.

³³ May ja ja'ay y'ijxëtë ko tsyo'ontë ets y'ijxkajpëtë ko jyä'ä'atë. Ënet kanaak kajpn tsyo'ontë pëyi'ikyë ets jëwyiin jam jyajtë ja ja'ayëty, ok ja Jesús mëët ja y'ijxpëjkpëtëjk.

³⁴ Ko ja Jesús mëët ja y'ijxpëjkpëtëjk jam jyajtë, tääts ja Jesús pyëtsiimy kepy nëëwinye'epyëjoty. Ënet t'ijxy ja mayjyä'äy ets ojts tpa'ëyoy ko jam tyänëtë ijxtëm ja kupixynyën mëti'ipë ka'ap tii nyikëwent'ajtpën. Ënet tyaj'ijxpëjktso'ony kanaakjëjp.

³⁵ Tsu'ujënëp ënätynyë ko ja y'ijxpëjkpëtëjk nyimiinëtë ets y'ënëmaayëtë: Tëë tsyu'ujënë ets apak ya'atë itjot.

³⁶ Wimpakäjxt'a yë ja'ayëty wä'än nëjkx yë kyääky tyojkx tjuytyë kajpnjoty ets oymyaajëty.

³⁷ Ënet ja Jesús y'ëtsooy: Mo'otë miits yë kyääkyëty. Tääts ja y'ijxpëjkpëtëjk y'ënantë: ¿Oyës nëjkx yë tsajpkääky njuytyë mäjtsk mëko'px nixëëwtunyën etsës yë ja'ay nyajkaytyëtyë?

³⁸ Ënet ja Jesús y'ënäny: ¿Jënaak ja tsajpkääky jap? Nëjkx ixtë. Tääts ko t'ijxtë, ënät y'ënantë: Mëkoxk ja tsajpkääky ets mäjtsk ja ajkx.

³⁹ Tääts ja Jesús ojts ni'ënä'ämë ets ja ja'ay nyaaxwäätstëty tu'kkëëyi'ikyëty, tsuxk ujts këjxm nyaaxwä'tstë.

⁴⁰ Tääts ja ja'ay y'ënyääytyaknpëjktë tu'kkëëyi'ikyëty; tam mëti'ipë wëxtyikxy majkën ets tam mëti'ipë nimëko'pxën.

⁴¹ Tääts ja Jesús mëkoxk ja tsajpkääky tkoonë'ky ets mäjtsk ja ajkx ets ojts pya'at'ixy tsajpwinm, jëtu'un ja Dios tkukajpxëy. Tääts ojts tujkwä'kxy ja tsajpkääky, ojts ja y'ijxpëjkpëtëjk tmo'oy ets tyajwa'kxtëty ma ja ja'ayëtyën. Näyjyëtu'un ojts tyajwa'kxta'atë ja ajkx ma ja ja'ayëtyën ni'ëmukë.

⁴² Ojts ni'ëmukë ja ja'ay kyäytyë ku'uxyë.

⁴³ Ko kyääytyääytyë ja ja'ayëty ënät tpëjkmujktë majkmäjtsk katsy ja tsajpkääky natëkë mëët ja ajkx natëkë.

⁴⁴ Nimëkoxk milën ja ja'ay ojts kyäytyë.

Ko Jesús ye'ey nëëwiinkëjxy

⁴⁵ Ënätyë ja Jesús ja y'ijxpëjkpëtëjk tkukäjxëy kepy nëëwinye'epyëjoty ets nyëjkxtëty jam Betsaida ets ja Jesús ojts wäänë jyaak wë'ëmy ets nyäjyëkäjpxyë ma ja mayjyä'äyën.

⁴⁶ Ko nyäjyëkäjpxyë, tääts pya'tëjkëy kopkëjxm Dios mëkajpxpë.

⁴⁷ Ko kyootsëy, tam ënety ja kepy nëëwinye'epyë mejy itkujkm. Yë Jesús tëë ënety nätyu'uk wyi'imy jam naaxwintë'ëtstum.

⁴⁸ Tääts ja Jesús ojts t'ixy ko ja y'ijxpëjkpëtëjk tsip tjantykyaaptë ja nëë, jä'äkyëjxm ko tëkatsy pyojy, pojwinpijtp ja kepy nëëwinye'epyë. Ko jyopyëp'ajty, ënät ja Jesús ojts tninëjkxy ja y'ijxpëjkpëtëjk ye'epy nëëwiinkëjxy nyijkxy ets tnajtspatëy jawäänë tkawinajxy ja y'ijxpëjkpëtëjk.

⁴⁹ Ko ja y'ijxpëjkpëtëjk y'ijxpatëtë ko nëëwiinkëjxy myiny yä'äp, jëtu'un t'ijxtë tiipoj yowë miimp. Ënet tyëjkëtyë yaxpë jojkpë,

⁵⁰ jä'ä ko tëë ënety ni'ëmukë t'ixtë, tsë'këtëp je'eyë. Ënätyë ja Jesús ojts myëkajpxëtë: Këtii mtsë'ëkëtë, ëjts yë'ë, amëk jotmëk itë.

⁵¹ Ojts ja Jesús tyëkë kepy nëëwinye'epyëjoty ma ënety japëtyën ets ja poj y'ëtëtsmoony. Yë'ëjëty jëtu'unyë ojts tyimwë'ëmtë,

⁵² jä'ä ko ka'ap ënety të tja'akyyukëtë ja mëj'ajtën ko ja tsajpkääky ënety të myäyë, jä'ä kujuun jyä'äy'atë.

Ko Jesús tyajtso'oky may ja pa'amja'ay jam Genesaret

⁵³ Ko tuknajxtaaytyë ja mejy jam ojts jya'të ma Genesaret nyaaxjotmën. Jam ja kepy nëëwinye'epyë tkutsuumtë nëëpë'am.

⁵⁴ Je'eyë nyapëtsëëmtë kepy nëëwinye'epyëjoty, tääts ja Jesús ja mayjyä'äy y'ijxpatë.

⁵⁵ Ojts pojën tmëtyaawa'kxtë maajëty ja kajpnën. Tääts ja ja'ay tkëëymyiintë ja pa'amja'ay ma ënety të tnijawëtën yajpaaty ja Jesús.

⁵⁶ Ko ja Jesús ijty nyijkxy oymyaajëty, kajpntum ëkë kamjotm, ënätyë ja ja'ay tpëjkta'aktë ja pa'amja'ay jam muum tu'ujotm. Jamts tmënu'kxta'aktë ja Jesús ets ja wyit pa'a tyo'onxëtëty oy jënu'unën ja pa'amja'aytyëjk; ets tu'kë'ëyë mëti'ipë tyoontëpën ja Jesús ja wyit, tsoktëp akëtaktëp poj'am.