Marcos 12 - Biblia Dc en Mixe de Quetzaltepec

Ja nyi''ijxpät ka'apë oy nyaaxtuntën

¹ Ënet ja Jesús yaj'ijxpëjktso'ony mëët ja ijxpäjtën ets y'ënäny: Tu'uk ja ye'etyëjk ojts tpëjktä'äky ja tsatsymkyam ets tnakeemy tnapëjky, ojts t'oytyuny tu'uk ja tsatym mä'tstakn ets ojts tkojy tu'uk ja potsy janty këjxm ma yajkëwent'atëtyën ja kam. Tääts ja tuunpëtëjk ojts tuknipëky ja kam ets ojts tsyoony nyijkxy jëkäm.

² Ko tpaty ja tsatym tujk, ënät ja kukam tkejxy tu'uk ja tyuunpë ets tuk'amëtowa'any ja tsatym mëti'ipë ja kukam patëpën.

³ E yë'ëjëty ojts tmatstë ets tsiiktë, jëtu'unyë tyajwinpijtë ka'ap nitii tmooytyë.

⁴ Ënet ja kukam wiinkpë tkejxy ja tyuunpë. Ko ja tuunpë jam jyä'äjty ënätyë tkuwojpë'ktë.

⁵ Ënet ja wiinkpë tkejxy ets tyaj'o'ktë. Ojts ok ja tyuunpë nimay tjaakkexy. Tam mëti'ipë wyojptën ets tam mëti'ipë yaj'o'ktën.

⁶ Jamts ja kukam tu'uk ja myaank, mëti'ipë ni'ik tsyojkpyën. Yë'ë ojts tkexy. Jëtu'un myäy tyäjy: Wyinkutsë'ëkëtëp ënät yë n'u'unkës.

⁷ E ko ja naax ënu'kxypë t'ijxtë ko ja kukam ja y'u'unk myiny, tääts nyäy'ënanëtë: Yë'ë ya'atë kam myëwë'ëmäämpy, oy ntimyaj'o'kmëty ets ëëtsajtëm nmëwë'ëmëty yë kam.

⁸ Tääts tmajtstë ets tyaj'o'ktë, ojts ja nyi'kx kyopk jap tjëtujtpëtsëëmëtë kamjotm.

⁹ Ënet ja Jesús tyajtëëy: ¿Tii jëtää ja kukam tyunäämpy? Nëjkxaanp jam kamjotm ets tyaj'o'kta'aja'any ja naax ënu'kxpëtëjk ets ja ja'ay wiinkpë tmo'oja'any ja tsatsymkyam.

¹⁰ Këtii xykyajpxtënëm ja Dios ja y'aaw y'ayuk këxja'aypyë mëti'ipë ënaanpën: Ja tsaa mëti'ipë ja pojtspë ojts tpäxtën, nikë jä'ä tyam të y'awinpity mëjtsaakopk ma potsy'ëjxën.

¹¹ Ja Wintsën jëtu'un winë të tuny, oy ëëtsajtëm mëjmëtoy nja'awëmë.

¹² Tääts ojts tjamatsa'antë ja Jesús jä'äkyëjxm ko tja'aykyujkëtë yë'ë yowë yajnimëtyaktëp mëët ja ijxpäjtën. Je'eyëp ko tsyë'këtyëp ja mayjyä'äy, paaty ka'ap tmajtstë. Tääts jam tsyo'ontë.

Ko ja Jesús tnimëtyä'äky ja këpäjtën

¹³ Tääts ja Jesús ojts yajktuknikexy ja fariseë ja'ayëty mëët ja Herodes ja jyä'äyëty, ets jeexyë ja Jesús muum kyajpxtëkoy mëti'ipë tyukni'ëënëtëpën.

¹⁴ Ënet ojts nyëjkxtë ets ja Jesús yajnëmaay: Wintsën, nija'awëtyëp ëëts ko mijts mëtëy mja'ay'äty, jä'ä ko ka'ap xymyëjpëjktä'äky oy pën wi'ixjaty m'ënë'ëmxëty, ka'ap yë'ëkyëjxmëty tii xynyikäjpxy ets ja'ay mtsokëtëty. Mijts yë'ë ja'ay mtuk'ëwa'anëp ja Dios ja nyë'ë'aaw tyu'u'aaw. ¿Oy ko yë yajkutujkpë César nmëkëpäjtmëtyë ëkë ka'apë? ¿Jyëkyejpy nmo'omyëty yë meenyë ëkë ka'apë?

¹⁵ Ja Jesús ojts nijawë ko ënety nëkoopë je'eyë myintë winma'any'ijxpë. ¿Tii ko xywyinma'any'ixa'antës? Yaktë tu'uk ja meeny, wä'änës n'ëk'ixy.

¹⁶ Tääts ojts tmo'otë ets tyajtëëy: ¿Pën ya'atë wyiin jyëjp yam këxkojy, pën tyë xyëëw këxja'ay miimp? Tääts y'ëtsoowtë: Yë'ë yajkutujkpë César.

¹⁷ Ënet ja Jesús y'ënëmaayëtë: Mo'otë ja César mëti'ipë César jyä'ä'ajtypyën ets mo'otë ja Dios mëti'ipë Dios jyä'ä'ajtypyën. Ko ja Jesús jëtu'un y'ënäny, mëjmëtoy ojts ja ja'ay tjawëtë.

Ko ja'ay tyajtëwtë pën juukpyëkantëp ja o'kpë

¹⁸ Tääts ja Jesús nimiintë ja satuceos ja'ayëty, mëti'ipë ënantëpën ko ka'ap ja o'kpë jatëkok jyuukpyëktë, ënät ja Jesús tyajtëëwtë:

¹⁹ Wintsën, jëtu'un ja Moisés ojts tjaaywyi'imy ko tu'uk ja ye'etyëjk y'ooky ets tyajwë'ëmy ja tyo'oxytyëjk ets ka'ap pën ja y'ëna'këty, jyëkyejpy ja y'uty mëët pyëkëty ja to'oxytyëjk ja ku'ookpyë ets jëtu'un ja y'u'unk tmëët'atëty këtiipë ja y'äjty u'unktuk wyë'ëmëty.

²⁰ E jëtu'unts yajnijawë'aty ko jääjëk ijty tëëyëp niwëxtujk ja yä'äy'ëna'këty, aak tu'kä'äxëty. Ja kä'äxkopk ojts pyiky ets tku'o'ky ja tyo'oxytyëjk, kä'äp ja y'u'unk tpatë.

²¹ Ënet ja mëmäjtskpë tpëjky ja to'oxytyëjk ku'ookpyë, näjyëtu'un tku'o'ky ja to'oxytyëjk, kä'äp tii tpatë ja y'u'unk. Näyjyëtu'un ja mëtëkëëkpë uty jyäjty.

²² Aakjëtu'un jyajtaaytyë niwëxtujk, ni pën ojts ja y'u'unk tkapaaty. Tääts ja to'oxytyëjk ojts näjyëtu'un y'o'knë.

²³ E ko ënety ja o'kpë jyuukpyëktë, ¿pën nëjkx ya'atë ja to'oxytyëjk to'oxytyëjk'aty? tëëxë ënety tpëjk'apëtsëmta'ay ja ye'etyëjk tu'kkä'äxpë.

²⁴ Tääts ja Jesús y'ëtsoowëtë: Mkajpxtëkooytyëp miitsëty, jä'äkyëjxm ko xykyanijawëtë ja Dios ja y'aaw y'ayuk ets ka'ap xynyijawëtë ja myëk'ajtën.

²⁵ Ko ja o'kpë jyuukpyëktëty, ni pën nëjkx jää kya'ëkpëjk kya'ëk'uknë. Jëtu'un nëjkx y'itë ja ja'ayëty ijxtëm yë Dios kukäjpxy jam tsajpjotm.

²⁶ E ko xymyëmay xymyëtajtë ja o'kpë pën juukpyëjkp kajuukpyëjktëp, ¿ka'anëm xykyajpxtënëm mëti'ipë ja Moisés ojts tkuja'ayën, ma tnimëtyä'äkyën wi'ix ja Dios ojts myëkäjpxyë ma ja kepy ënety wyintoyënë? Ma ja Dios y'ënëmaayë ja Moisés: Ëjts xyTios'ajt ja Abraham, Isaac ets Jacob.

²⁷ Yë Dios ka'ap o'kpë niTios'aty, juukpyë nyiTios'ajtyp. Miitsëty ka'ap oy maytyë mtajtë.

Ja ënä'ämën tëyajtën mëti'ipë ni'ik kopkpëkyën

²⁸ Tääts tu'uk myëjwä'ky ja tsajptëkotyëtë yaj'ijxpëjkpë mëti'ipë ënety të tmëtoyën ko ja Jesús mëët ja aaw ayuk tyajtsiptä'äky ets ko tnija'awëy ko ënety ja Jesús oy të y'ëtsoy, ënät tyajtëëy: ¿Mëti'ipë ënä'ämën ni'ik kopkpëky?

²⁹ Tääts ja Jesús y'ëtsooy: Ya'atë ënä'ämën ni'ik kopkpëky: Israel ja'ayëty, mëtowtë; yë Wintsën, nTios'ajtëmë tu'ukyë je'eyë.

³⁰ Tsok ja Wintsën mëët tu'kë'ëyë mja'awën, mëët tu'kë'ëyë mjot mwinma'any ets mëët tu'kë'ëyë ja mmëkajtën. Ya'atë ni'ik kopkpëky.

³¹ E ja mëmäjtskpë nän najëtu'un: Tsok ja mmëku'uk ijxtëm kë'ëm mnätsyokyën, ka'ap nimëti'ipë ënä'ämën kyopkpëkyëty ijxtëm ya'atën.

³² Tääts ja tsajptëkotyëtë yaj'ijxpëjkpë y'ënäny: Wintsën, oy jëtu'un m'ëna'any ko Dios tu'ukyë, ka'ap ma wiinkpë tä yë'ëjën.

³³ Ets ko ja Dios tu'ukyë ntsojkmëty mëët tu'kë'ëyë ja'awën ets mëët tu'kë'ëyë jot winma'any ets mëët tu'kë'ëyë mëk'ajtën; ets ko nmëku'uk'ajtëm ntsojkmëty ijxtëm kë'ëm nätsyojkëmën, nikë oy jëtu'un këtiinëm ko jëyujk ëkë tii ntukwintsë'këmëty ja Dios ets ko tii ntukwino'k ntukwinxa'amëty.

³⁴ Ko ja Jesús t'ijxy ko ënety oy tsuj të y'ëtsoy, tääts t'ënëmaay: Mijts ka'ap xymyëjëkäm'aty yë Wintsën yë kyutujktakn. Ka'ap ojts pën tii t'ëkyajtëëwnë.

Pën ja Kristë y'u'unk y'ok

³⁵ Jam ënety ja Jesús yaj'ixpëky ma ja mëjtsajptëjkën, ets y'ënäny: ¿Tii ko yë tsajptëkotyëtë yaj'ijxpëjkpëtëjk y'ëna'antë ko yë Kristë David yë y'u'unk y'ok?

³⁶ Kë'ëm ja David y'ënäny ko ja Kënu'kxymyëkajtën ojts yajkäjpxyë: Jëtu'un ja Wintsën t'ënëmaay ja nWintsënës: U'nyë yaatsow maajës yë n'a'oykyë'ëjën, koonëm yë mmëtsip nmëmëta'akëtyës.

³⁷ ¿Wi'ix yë Mesías teety'at t'ap'atëty yë David, pën yë David jëtu'un yë Mesías tijy Wintsën? Ja mayjyä'äy je'eyë tmëtoow'itë ja Jesús akujk jotkujk.

Ko ja Jesús tnikäjpxy wi'ix y'ëtë'ëtstën ja tsajptëkotyëtë yaj'ijxpëjkpëtëjk

³⁸ Jëtu'un ja Jesús y'ënäny ko ënety yaj'ixpëky: Näkyëwent'atëtë, ijxkëm yë tsajptëkotyëtë yaj'ijxpëjkpëtëjk mwin'ëënëtë. Jä'ä ko yë'ëjëty je'eyë nyäxyoxëtë yenyëty ets ja'ay kyajpxpo'kxëtëty ko muum nyaxtë;

³⁹ ets ko tsajptëkoty tyëkëtë, aakjä'ä u'unyääypyäjn tyuk'u'unyääytyëp mëti'ipë jëjp'amën. Ko muum kyäytyë nän jëjp'am tyimnaxtë,

⁴⁰ pyëjkëtëp ja ku'ookytyo'oxy ja jyëën tyëjk, je'eyë janty jeky kyajpxta'aktë ets tyu'utstë mëti'ipë tyuuntëkooytyëpën. Yë jëtu'unpë ja'ayëty ni'ik jeky yajtëytyuna'antë.

Ko ku'ookytyo'oxy ja myeeny tyoxy

⁴¹ Tu'k'ok ja Jesús nyaaxwe'tsy jam winkon ma ja ja'ay ja meeny t'apëkëtën, jam t'ijx'ity wi'ixëty ja ja'ay ja meeny tpëjkta'aktën. Nimay ja kumeenyjyä'äy mayëty ja meeny t'apëkëtë.

⁴² Tääts jyä'äjty tu'uk ja ëyoopëja'ay, to'oxytyëjk mëj ja'aynyë, tëë kyu'o'kënë mëti'ipë myëmiinpyën mäjtskpajk ja mutskëtypë ja pujxnmeeny ets jap t'ako'onëy apëjkënjoty.

⁴³ Ënet ja Jesús tmëkajpxmujky ja y'ijxpëjkpëtëjk, ets t'ënëmaay: Tëy miits n'ënëëmëtë ko yë ku'ookytyo'oxy ëyoopëja'ay, wäänëmay ja myeeny të t'akonë këtiinëm ni'ëmukë ja wiink ja'ay mëti'ipë jyä'ä të tpëjkta'aktën meeny apëjkënjoty.

⁴⁴ Jä'ä ko wiinkpë ja'ayëty yë'ë të t'akonëtë mëti'ipë ka'ap t'ëktsojknëtën; e yë ëyoopë ku'ookytyo'oxy yë'ë të t'akonë mëti'ipë myëët'ajtypyën ets nyätyukjëjp'ixyë ma jyuuky'ata'anyën.