Job 37 - Biblia Dc en Mixe de Quetzaltepec

¹ Koos n'ixy wi'ix tyuniky tyuupojyën, jëtu'unës yë njuukyjot jyänty pyuty pëtsëmaanp yowë jap nkatsyjyotyës.

² Mëtoow'itë wi'ix ja Dios ja mëto'owën tyäkyën, mëti'ipë kajpxpën jëtu'un tä ënääwën.

³ Yë'ë yaj'ëtëtsyp yë wëtsuk jam tsajpkëjxm ets yaj'ixëty ma naax jyëjpkëxyën.

⁴ Ets ënät ok yajmëtoy yë ënääw y'ënä'äny, ko tyajmëtoyë jëtu'un ja y'aaw y'ayuk mëj'äämpyë, e ko tyajmëtoyë ja y'aaw y'ayuk, yë wëtsuk ka'ap y'ëtëtsmontë.

⁵ Ko yë Dios tyajmëtoyë yë y'aaw y'ayuk, mëjwiin këjää winë tuny; mëj këjää winë tyunyë jyätyë mëti'ipë yajja'akyukëpën.

⁶ Y'ëne'empy yë tip ets kya'ajëty naaxkëjxy, yë'ë näjyëtu'un y'ëne'empy ja nëë tuu ets amëjaaw tyu'ujëty pyojëty.

⁷ Yë'ë yajkutujkpy ets ja'ay jap tyëkoty wyë'ëmta'atëty ets nijawëtëty ko yë'ë winë tyuunpy.

⁸ Yë aayjëyujk ujtsjëyujk jap tyëkëtë ma y'aankëtyën ets jap yu'utsy yajpaatë.

⁹ Ëpa'tkë'ëytsyow myiny yë tuupoj ets ënëkëjxmtsow myiny yë tëtykpyë.

¹⁰ Mëët ko yë Dios xyejy paatykyëjxm yë tsajp o'pky kyä'äy ets nëë jyu'unta'ay mëët yë tip.

¹¹ Yë'ë yaj'ujtsyp yë yoots mëët yë nëë, yë'ë näjyëtu'un y'ëne'empy yë wëtsuk ets y'ëtë'ëts y'ëna'anëty;

¹² ets yaj'ixy jam tsajpjotm, twinkäätsë, tpatuny jëtu'un ijxtëm ja Dios y'ënë'ëmxëtyën mapaat yë naaxwiinyëtë y'ëwtityën.

¹³ Tëkokyë mëti'ipë tuunëpën jajtëpën aakyë'ë Dios tyuunpy ets tëytyuna'any ja naaxwiinyëtë ëkë ets tsoka'any tjawëja'any.

¹⁴ Job, ëwxit mä'kxtuk ets mëtoow'it, yë'ë mëmay mëtaj wi'ix yë Dios winë tunyën.

¹⁵ ¿Mnija'ap wi'ix yë Dios tëkokyë tuknipëjktakëtyä'äyënë ets wi'ix tunyën ko yë wëtsuk tyaj'ëtë'ëtsy tyaj'ëna'anyë?

¹⁶ ¿Mnija'ap wi'ix pyojëtityën yoots jam tsajpkëjxmë? jää yaj'ixy ko yë'ë mëët tyuny yë wijyajtën.

¹⁷ Mijts je'eyë yaj'ixy mnanyipe'enyë ma mwitpa'tkën ko yë tuu poj y'ëtë'ëtstë y'ëna'antë mëti'ipë tso'onpën ëpa'tkë'ëmtsow.

¹⁸ ¿Mputëjkëp mijts yë Dios ko yë tsajp twijtstëyë ets ta'tspëky xyajwë'ëmëty tä jeexyë jam yë pujxn xykyëxwopyënë?

¹⁹ Tukni''ijxëtyëkës wi'ixës mëpaat ja Dios n'ënëëmëtën, jä'ä ko kupi'its kukoots ëëts nyajpaatë ets ka'ap ja ayuk nmëët'atës.

²⁰ Ëjts ka'apës ja Dios n'ënëëmëja'any ko mëtya'akaanpës mëët yë'ë, jä'ä ko jëtu'un ja tpaatëty tääjës jeexyë n'amëtoyën etsës xyajkutëkoyëty.

²¹ Tsip ets xëëw n'ijxmëty ko yë yoots wyinkupëkëty; je'eyëp tëy ko pyojy, jää jyëkyejpy jatëkok n'ijxmëty.

²² Jëtu'un jam anëkëjxmtsow yaj'ixy tyi'kxy jyäjy pu'ts pujxnën, ko yë Dios jam yë myëj'ajtën tyajkëxë'ëky.

²³ Tsip nwinja'awëmëty mëti'ipë maaytyääyëpën winë, jä'ä ko yë'ë nëkooyë tmëët'ajnë yë mëjaaw ets wa'ats yë'ë; tëy ets ka'ap pën tyaj'ëyoy.

²⁴ Paatykyëjxm yë naaxwiinyëtë ja'ay tsyë'ëkëty; oy ja'ay jënu'un y'ijxpëky'atëty yë'ë ka'ap tkumay.