Job 35 - Biblia Dc en Mixe de Quetzaltepec

Ma mëtëkëëk'ok yë Elihú kyë'ë'amëyën

^1-2 Job, ¿oy jëtää ko mijts m'ëna'any ko yë Dios yë'ë mëpaat tja'akyukë mëti'ipë mijts mkäjpxypyënë?

³ Mijts jëtu'un yë Dios të xy'ënëëmë: ¿Mijts Dios, tii xykyëwentëty yë npokyës? ¿Jam muum m'ëxëëk tuna'anyë?

⁴ Tyam mijts n'ëtsowinpitëty ets näjyëtu'un ja ja'ayëty mëti'ipë mëët oy mnämyäyën.

⁵ Ëkpa'at'ix jam tsajpjotm ets ëk'ix wi'ix kyëjxmëtyën yë tsajp.

⁶ Pën mijts mpokytyuunp ka'ap maa Dios xy'ëxëëk tuny; oy jënu'un mpokytyunëty ka'ap maa wi'ix xytyuny.

⁷ Ets oy tii oy xyjyatuunpë, ka'ap yë'ëjëty tuk'oy'äty; ka'ap yë'ëjëty xy'oytyuny.

⁸ Yë naaxwiinyëtë ja'ay yë'ë m'ëxëëk tuumpy mëët yë mpoky ets pën oy winë të xytyuny yë'ë tyuk'oy'ajtëp.

⁹ Ma ëxëëk yajtuntën jam jyë'ëtë ya'axtë yë naaxwiinyëtë ja'ay ets tja'ixta'atë pën putëkëtëpën ma ja kumeenyjyä'äytyëjk ëxëëk tyunëtën;

¹⁰ je'eyëp ko ka'ap yë'ëjëty yë Dios t'ixta'atë mëti'ipë të yajkojëtën, mëti'ipë mëjaawmooyëtëpën xëmë oy jënu'un kyootsëty,

¹¹ mëti'ipë xyaj'ijxpëjkëmën ets winë xytyukjajtëmë mëët yë aayjëyujk ujtsjëyujk ets joon jëyujk.

¹² Ja yaxtëp ja jojktëp, je'eyëp ko ka'ap yë Dios y'ëtsowëtë, ja'ay ëxëëk jyä'äy'atë ets mëj jaanty nyäyajnaxëtë.

¹³ Dios, mëti'ipë maaytyääyëpën winë, ka'ap tuny këwentë ja'ay mëti'ipë ka'ap mëtëy tii tuny tkäjpxyën.

¹⁴ Oy mja'ëna'any ko ka'ap yë Dios maa xy'ixy, yë'ë ëwxit, jä'ä ko yë mjotmay tëë tnanija'awënë.

¹⁵ Mijts jëtu'un m'ëna'any ko yë Dios ka'ap jyoot'anpëky, ko ka'ap tyiytyuny ets ko ka'ap nëkooyë tmëjpëjktä'äky oy pën pyokytyunëty.

¹⁶ Mijts Job, aakjä'ä yowë mkajpxnëp ka'apë jyääntyëtyën, je'eyë nëkoo mtyäty kyajpxnë ets ka'ap myëëtëty yë wijyajtën.