Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Job 11 - Biblia Dc en Mixe de Quetzaltepec


Ma Sofar kyäjpxyën

1-2 Tëkokyë tääpë aaw ayuk mëti'ipë të xykyäjpxyën, jyëkyejpy yë n'ëtsoowinpijtmëty, jä'ä ko ka'ap yë'ëkyëjxmëty tii oy nimëtyakmëty ko jeky nmëtyakmëty.

3 ¿Tii jä'ä mmay mtajy ko may mmëtyä'äky, tääts ënät ëëtsëty amonyë nwë'ëmtëtyë ets ka'ap tjëkyepy yaj'ëtsoowinpitëty mëti'ipë je'eyë të xynyëxi'iky të xytyukxi'ikyënë?

4 Mijts jëtu'un m'ëna'any ko yë m'ijxpëjkën mëtëy yë'ë ets ko wa'ats mnäyajnaxyë.

5 Jëtu'unpëk jeexyë yë Dios yë'ë kë'ëm kyäjpxy ets jeexyë m'ëtsoowinpityë.

6 Yë'ë, mëët jeexyë wijyajtën kujk'ajtën winë mtuk'ixpëkyë, mëti'ipë tsip yajwinja'apën. Ets jeexyë xy'ëk'ixy ko yë Dios ka'ap mëk mtëytyunyë tä mjapaatyën.

7 ¿Mijts m'ënaanp ko winë xywyinja'awëtya'aja'any mëti'ipë yë Dios tyuunpy kyäjpxypën ets xynyija'awëtya'aja'any tu'kë'ëyë mëti'ipë yë'ë nyija'apën?

8 ¿Tii mnatunäämpy? këjxm ni'ik yajpaaty këtiinëm yë tsajp. ¿Wi'ix xynyanijawëja'any? këk ni'ik yajpaaty këtiinëm yë tsajpkëk.

9 Mëjwiin ni'ik këtiinëm yë naaxwiinyëtë ets këjääpaat yë y'ëwtity këtiinëm yë mëjmejy.

10 Pën miimp yë Dios ets tsumy tmatsy yë ja'ay ets tukumëtowa'any ja tyëko'oyën, ¿pën y'ëkjëjpkuwa'akëp?

11 Yë'ë nyija'ap pën win'ë'ëmp, y'ijxyp yë tuuntëko'oy kajpxtëko'oyën.

12 Jä'ä xëëw ma ënety ja krukts ka'ap y'ëkkrukts'ajnën, jä'ä xëëw nëjkx ja tsuuja'ay wyinma'anytyëkë.

13 Pëjkta'ak yë mwinma'any ets winë oy xytyunëty ets yë'ë Dios mënu'kxta'ak.

14 Pën tëë mtuuntëkoy mkajpxtëkoy, tim kukä'äk; këtii xytyëjkmo'oy yë ëxëëkpë ma mjëën mtëjkën.

15 Jëtu'un wa'ats m'ijxë'ëk mkoowë'ëkëty ets jotkujk myajpaatëty ets nitii xykyatsë'ëkëty;

16 nëjkxëp xyjyä'äytyëkoy ja m'ëyo'on mjotmay; jëtu'un nëjkx xyjyä'äytyëkoy tä yë nëë pyëyi'ikyën,

17 jëtu'un nëjkx yë mjuukyajtën tyi'kxy jyäjy tä xëëwën ko kyujkyxyëëwënë, jëtu'un nëjkx mkutë'kxy mkujajy oy ënety api'its akoots të myajpaaty.

18 Nëjkxëp xymyëët'aty ëwxijt mä'kxtujkën ets jotkujk nëjkx mjuuky'äty; nëjkxëp mma'ay mpo'kxy oy tsuj, jä'ä ko Dios ënety mkëwent'ajtëp.

19 Nitii nëjkx mka'ëtsë'ëkëty, jotkujk nëjkx mpo'kxy mpëky. May nëjkx ja'ay mniminyë ets m'amëtowëtëty yë näypyutëkë.

20 Yë ëxëëkja'aytyëjk oy nëjkx tjatsoktë näypyutëkë, nëkoopë nëjkx t'ixta'atë, ka'ap tpaata'antë ijtakn maa nyäyu'utsëtëtyën, yë o'kën tëko'oyën yë'ë nëjkx tpaatë t'ixtë.

Biblia Dc en Mixe de Quetzaltepec, Oaxaca México © Sociedad Bíblica de México, A.C.

Bible Society of Mexico
ကြှနျုပျတို့နောကျလိုကျပါ:



ကြော်ငြာတွေ