Isaías 27 - Biblia Dc en Mixe de Quetzaltepec

Ma ja Israel kajpn tpaatyën ja ëwaatsëtuuy'ajtën

¹ Jä'ä xëëw nëjkx ja Wintsën tkupuxy mëët ja tyiypyujxn, mëjwiinpë këjääpë ets kutsë'ëkëpë ja mëj jëyujk mëti'ipë jap nëëjoty tsënääpyën, ja mëj tsa'any mëti'ipë näwyinxa'tsmujkëpën japë nëëjoty tsyëënën, mëti'ipë yajtijpën dragón ets Leviatán.

² Jä'ä xëëw nëjkx ja Wintsën y'ënä'äny: Kuuy'ëw kuuya'axtë tsatsymkyam.

³ Ëjts Wintsën, ëjts nkëwent'ajtyp ets ëjts xëmë nyajxo'kpy. Xëëny kootsës nkëwent'aty këtiipë tsyë'ëtsëty wyintëkoyëty.

⁴ Ka'apës n'ekyë mëët yë'ë. Ko jeexyë tmëët'aty yë äpny ëkë ëxëëk ujts, pojënës jeexyë nitsoony etsës jeexyë ënätyë nino'kta'ay.

⁵ Pën tsyojkpy etsës nkuwa'anëty, wä'än t'ëëw'oy tkajpx'oyë ja tsip äkë mëët ëjts.

⁶ Ko xëëw jëmëjt tpaatëty, nëjkxëp ja tyikts y'aats tpëktë yë Jacob y'u'unk y'okëty, nëjkxëp yë Israel ja'ayëty xye'enty tpëjkta'aktë ets nëjkxëp oy yaj'ixtë nyaax kyajpnëty tä pëjyën, nëjkxëp tyajtuktuktë ja it naaxwiinyëtë.

⁷ Yë Wintsën ka'ap jëtu'un të tëytyuny yë Israel ja'ay tä yë myëtsip të tëytyunyën, ka'ap jëtu'un të tyaj'ooky ijxtëm yë myëtsip të tyaj'ookyën.

⁸ Ko yë Dios yë nyaax kyajpn të yajjoot'anpëkyë, je'eyë wiink kajpn të tnajtskäxë, je'eyë ojts yë nyaax kyajpn tuk'ëxmatsy ijxtëm tu'uk yë pu'uxm pyojke'ekyën, ijxtëm tu'uk pu'uxm wyimpapojyën mëët jëënpoj mëti'ipë tso'onpën xëëwpëtsëmtsyow.

⁹ Je'eyëp ko ënät tpokymyä'kxa'any yë Jacob, pën pyatuumpy mëti'ipë yaj'amëtoopën: Ko naaxwayën tuunta'ajëty yë wyintsë'këntyakn ma t'ëwtatyën ka'apë Tyiosëtyën, jëtu'un tukpu'ujëtya'ajëty tä jeexyë ja'ay tsaa twaaytyä'äkyën mëti'ipë yajaamkojpyën ets ka'ap nimaa wyë'ëmëty tu'kpuxyën yë kepy mëti'ipë y'ëwtajtypyën, yajma'ta'ajëp yë wyintsë'këntyakn ma poom tukwinjokyën yë tyiosëty.

¹⁰ Ja naax kajpn mëti'ipë ënety ta'tspëkyën ets këwent'atyën, xit ko'ow të jyajta'ay, jëtu'un tä tu'uk yë tëjkën mëti'ipë ka'ap pën tuktsëënën, ijxtëm it naaxwiinyëtën mëti'ipë anë'ëk tëëtsë'ëkën ets ka'ap jam pën tsyëënë. Ma tääpë it naaxjotmën jëyujk tënaaytyakn nëjkx wyä'äny, jëyujk tsajpkaa nëjkx jam y'oktë.

¹¹ Jëtu'un nëjkx jyatë tä tu'uk kepy wyinwexy ko tyëtsnë; ets ja to'oxytyëjk t'apuxëtë tääts yë'ë tno'oktë. Paatykyëjxm yë Wintsën mëti'ipë të yajkojyën ka'ap pya'ëyowa'anëtë.

¹² Jä'ä xëëw ja Wintsën nëjkx ja myëj'ajtën tyaj'ixyë, tyimtso'ontä'äky jam Éufrates ets tyimja'ty jam Egiptë. Jëtu'un tuna'any tä ja'ay tsajpmok tyajpajk'atyën; je'eyëp ko miitsëty Israel ja'ayëty tu'ukjaty nëjkx myajwinwoptë.

¹³ Jä'ä xëëw nëjkx yajtukxu'uxy ja xuxn ets myiinta'atëty ja ja'ayëty mëti'ipë jam tsënaaytyëpën Asiria ets Egiptë, ets yaa myina'antë Wintsën ëwtajtpë, yaa Jerusalén ma yajpaatyën ja kopk wa'atspë ets kënu'kxypyë.