Hechos 19 - Biblia Dc en Mixe de Quetzaltepec

Wi'ix jyäty kyëpetyën ja Pablo jam Éfeso

¹ Naamtamnëm ënety ja Apolo y'itynyëm Corinto ko ja Pablo tuknajxy ja tunjot kopkjot ets jyä'äjty Éfeso ma tpatyën ja mëpëjkpëtëjk.

² Ets tyajtëëy ja mëpëjkpëtëjk: ¿Ojts miits ja Kënu'kxymyëkajtën xy'ëxajëtë ko ja Jesús xymyëpëjktë? Ets y'ëtsoowtë: Oy jeexyë ëëts je'eyë tmëtoowtë ko jyääjëty ja Dios yë Kyënu'kxymyëk'ajtën.

³ Tääts ja Pablo tyajtëëwkojnëpë: Pën jëtu'un, ¿wi'ixën mnëëpätë? Tääts y'ëtsoowtë: Jëtu'unës ojts nnëëpätës ijxtëm ja Juan Yajnëëpäjtpë ja ja'ay tyajnëëpejtyën.

⁴ Tääts ja Pablo y'ënäny: Juan, yë'ë yajnëëpäjt ja ja'ay mëti'ipë ënety të jyotwinpitën ets t'ënëmaay ko tmëpëktëty ja Jesús, mëti'ipë minaanpën ix'ok.

⁵ Ko tmëtoowtë ko ja Pablo jëtu'un nimëtyä'äky, ënät ojts nyëëpätë Wintsën Jesús xyëëwkyëjxm.

⁶ Ënet ja Pablo ja ja'ay ojts tkë'ënixajy ets ja Dios ja myëjaaw myëk'ajtën tyukëtakëtë. Ënet ojts tkajpxtë wiinkëtypë ja ayuk ka'apë yajwinmëtoyën ets ja Dios ja y'aaw y'ayuk tnimëtyakëtë.

⁷ Nimajkmäjtskën ënety ja ye'etyëjkëty.

⁸ Tëkëëk po'o ja Pablo jam y'ijty ets xëmë ijty nyijkxy ma ja tsajptëjkën jam Éfeso, tukmëmëtyä'äky ja ja'ay ja Dios ja y'aaw y'ayuk amëk jotmëk, ets ja ja'ay tjatukmëpëka'any wi'ix ja Dios ja kyutujkënën.

⁹ Je'eyëp ko jënaakën ja ja'ayëty, juunpë ja wyinma'anyëtyën ka'ap tkupëjktë mëti'ipë ja Pablo jyanimëtyäkpyën, ni'ikyënëm y'ëna'antë ja'aywyintum ko ja Oypyë ja Në'ë Tu'u, ëxëëk yë'ë. Paaty ja Pablo timy'ëxmajtsy tääpë ja'ayëty ets ojts twoownëjkxy ja mëpëjkpëtëjk ma ja Tirano ja y'ijxpëjktaknën. Jam ijty winjëpom kyajpxtë myëtya'aktë,

¹⁰ jëtu'un ojts jam tyuny mäjtsk jëmëjt, paaty ja ja'ay ojts tnija'awëtya'atë ja Wintsën ja y'aaw y'ayuk jam Asia, mëti'ipë jutiis ja'ayën ets mëti'ipë ka'ap jyutiisëty.

¹¹ Mëj ja Dios tyajtuuny ja Pablo ets ja mëj'ajtën tyaj'ijxë,

¹² jëna'ajëty ja Pablo ijty je'eyë yajtukniminy ja paayë ëkë ja wit ets tonëty, yë'ëts myënëjkxtëp ma ja pa'amja'ayën ets tsyo'oky. Näyjyëtu'un tuuntë mëti'ipë ja ku'oypyë myëët'ajtëpën, ets y'ëxmatsëtë.

¹³ Jam ënety jënaakën ja jutiis ja'ayëty jyëtitë kajpnjotm ets ja ku'oypyë tyajpëtsëmtë ma ja ja'ayëtyën. Näy jä'ä ja Jesús ja myëk'ajtën yajtuunëtëp, ets nëëmëtë ja ku'oypyë: Ëjts ënaanp Jesús xyëëwkyëjxm, mëti'ipë ja Pablo kyajpxwä'kxypyën, ëxmats yë ja'ay.

¹⁴ Niwëxtujk ijty ja jutiis ja'ay jëtu'un y'ëtë'ëtstë, yë'ë ja y'ëna'k ja Esceva, teety wintsën y'ity.

¹⁵ E tëkok ojts ja ku'oypyë y'ëtsoowëtë: N'ixy'äjtypyës ja Jesús ets nnija'apës pën Pablo'ajtp e miitsëty, ¿mpën miitsëty?

¹⁶ Ënet ja ja'ay mëti'ipë ja ku'oypyë myëët'ajtëpën ojts tyukpujtpätëtë ets yajkäkëtë wintsëtyut jëjptsëtyut, niwa'ats ëxwa'ats ets nine'pny kune'pny pyëtsëëmtë tëkoty.

¹⁷ Ni'ëmukë ja jutiis ja'ayëty ets ka'apë jyutiisëty, mëti'ipë jam tsënaaytyëpën Éfeso, tnija'awëtyääytyë ets ja tsyë'këtyë. Jëtu'un ja Wintsën Jesús ja xyëëw ni'ikyë myëjtëjkëy.

¹⁸ Tääts näjyëtu'un mëti'ipë ja Jesús myëpëjktëpën, ojts ja pyoky tmaaywyatstë mayjyä'äy wyintum ko ënety ëxëëk të jyuuky'atë.

¹⁹ Näyjyëtu'un mëti'ipë ijty patooy panajxtëpën, ojts ja nyoky tyajmintë ets tnino'ktë ma ja mayjyä'äyën. Ko ojts yajmaaypyëtsimy jënu'un ja noky tsyoowpaatyën, jä'ä wyimpëtsëëmy wëxtyikxy majk mil aakyë'ë poop pujxn.

²⁰ Jëtu'un ja Wintsën ojts ja y'aaw y'ayuk myëjtëkë ets myëjëy kyëjääjëy ja kyutujkën.

²¹ Ko jëtu'un ya'atë jyäjty kyëpejty, ënät ja Pablo ojts myäy tyäjy ko nyëjkxa'any jam Macedonia y'itjotm ets näjyëtu'un jam Acaya y'itjotm ets jya'ta'any jam Jerusalén. Näyjyëtu'un ënety myäy tyäjy ko y'ëknëjkxëty Jerusalén tääts ok nyëjkxa'any jam Roma.

²² Ënet tkejxy jam Macedonia nimäjtsk ja pyutëjkëpë, Timoteo ets Erasto, e yë'ë, ojts jyaak wë'ëmy jam Asia.

Ko ja ja'ay ëxëëk y'ëtëtstë jam Éfeso

²³ Näy jää tiempo ja ja'ay tyajtsiptaktë jam Éfeso ja Jempyë ja Në'ë Tu'u.

²⁴ Jam ijty tu'uk ja ye'etyëjk mëti'ipë xyëëwajtypyën Demetrio, yë'ë poop pujxn tyuunk'ajtyp. Ya'atë ja'ay yë'ë ijty y'oytyuunpy yë tsajptëjk u'unk, jëtu'unpë kyëxë'ëkyën i'kën, yë'ë nyitsajptëjk ja Artemisa mëti'ipë tyijtëpën tios, may ijty tukmeenypyaatë ja mëti'ipë tyuunk'ajtëpën.

²⁵ Tääts ja Demetrio twoowmujky mëti'ipë jëtu'unpë tyuunk'ajtëpën ets t'ënëmaay: Mëku'uktëjkëty, mnija'awëtëp ko ya'atë tuunk yë'ë ntukjuuky'ajtëm.

²⁶ Tëë xy'ixtë xynyijawëtë ko tää ja Pablo jyëtity ets y'ënä'äny ko ka'apëk tyiosëty mëti'ipë ja'ay y'oytyuunpyën. Tëë ja'ay may yajtukmëpëktë jëtu'unpë ja winma'any, ka'ap yääyëty Éfeso, näjyëtu'un jam Asia nyaaxjotm.

²⁷ Kutsë'ëkës ya'atë, jä'ä ko ja ntuunk'ajtëm tsojk ja kyutëkoyëty, näjyëtu'un, tsojk nëjkx pën tka'ëkmëjpëjktaknë yë nwintaj'ajtëmë Artemisa tsyajptëjk; ets ntaak'ajtëm nëjkx kyutëkooynyë yë myëj'ajtën jyääntyajtën, mëti'ipë Tyios'ajtëpën ja Asia ja'ayëty ets ma tu'kë'ëyë ja it naaxwiinyëtën.

²⁸ Ko ja ja'ay tmëtoowtë wi'ix ja Demetrio y'ënä'änyën, tääts ni'ëmukë jyoot'anpëjktë ets mëk yujk'ënantë: Mëj yë Artemisa, ja Éfeso ja'ay wyintajëty.

²⁹ Ënet ja mayjyä'äy jyoot'anpëjktë ets tmajtstë ja Gayo ets ja Aristarco, nimäjtsk Macedonia ja'ayëty mëti'ipë ënety mëët ja Pablo jyëtitën ets tpawijts tpapo'të, jëtu'un tyajja'ajtë jam ma tsajptëjkën.

³⁰ Ojts ja Pablo jyatëkëja'any mayjyä'äyjoty ets ja ja'ay tjamëkajpxany, ka'ap ja mëpëjkpëtëjk ojts y'ëxmatsyë.

³¹ Ma ja kutuunktëjkëtyën jampë Asia yajpaatën, tam ënety jënaakën ja ja'ayëty mëti'ipë ja Pablo mëët oy nyäjyawëtyën, mëti'ipë tyuknikäjxtën ja aaw ayuk ja Pablo këtiipë nëkoo tyëkëty mayjyä'äyjoty.

³² Ja ja'ayëty mëti'ipë ënety jam të ye'eymyuktën wi'ix kawi'ixëty jyänty ya'ax jyänty joktë, tam ja mëti'ipë nëkoopë je'eyë nyajtsyaaxën ka'ap tnijawë tii ko ja ja'ay jam të nyiye'eypyätë.

³³ E tam ja ja'ayëty mëti'ipë ojts tukmëmëtya'aktën ja Alejandro, mëti'ipë ja Jutiis ja'ayëty nyajtstijëtën jap mayjä'äyjoty ets kyajpxëty. Tääts ja Alejandro ja kyë'ë txajë'ky ko kyajpxa'any ets ja ja'ay y'amontëty, jä'ä ja jutiis ja'ayëty nyikajpxtu'utäämpy.

³⁴ Ko ja Alejandro yaj'ijxkäjpy ko jyutiisëty, ënät wäänë mëk ojts yaxpë jojkpë tyëkëtë mäjtsk horën: Mëj yë Artemisa, Éfeso ja'ay wyintaj.

³⁵ Ja jääpyë jampë kajpnjotmën, ojts tyaj'amony ja mayjyä'äy ets t'ënëmaay: Miits Éfeso ja'ayëty, mëtowtë. Nyija'awëtëp ni'ëmukë yë naaxwiinyëtë ja'ay ko ya'atë naax kajpn yë'ë kyëwent'ajtyp yë nwintaj'ajtëm Artemisa tsyajptëjk ets y'awinax yë'ë mëti'ipë tso'onpën tsajpjotm.

³⁶ Ka'ap tjëkyepy pën tkuyu'utsëty ko tyiyëty jyääntyëty. Paaty amonyë itë. Ka'ap y'oyëty ko nëkoo ajotkumonë tii ntu'unmëty ets ka'ap nmëma'ay nmëtajmëty yajxon.

³⁷ Ya'atë ja'ayëty mëti'ipë miits yaa të xyajmintën, ka'ap jam tii të tton të tmäätstë ma tsajptëjkën ets nän ka'ap jam të twinkajpxpätë nwintaj'ajtëmë Artemisa.

³⁸ Yë Demetrio mëët ja tyuunpëtëjk, pën jap pën tni'ëënëja'antë, paaty yë kutuunk jyääjëty. Jam tnikajpxtëty pën nyi''ëënëjantëp ets jam yajpaye'eyëty nitu'ukjaty ja jyotmayëty.

³⁹ Pën miitsëty jam tii xy'amëtowa'antë, jyëkyejpy jam xykyajpxtëty ma ja ye'eymyuk y'ityën.

⁴⁰ Mëti'ipë tyam të tyuny të jyätyën, tsojk ja'ay xypyokynyipëjkmëty ko ja'ay nëkoo ntsipwinkajpxëmë, ka'ap yajmëëtëty ja mëk'ajtën wi'ix n'ëtso'owmëty ko ënät ëëtsajtëm pën xyajtë'ëwmëty tii ko ja ja'ay të y'ëtë'ëtstë y'ëna'antë.

⁴¹ Ko kyajpxtaay ja jääpyë, tääts ja ja'ay t'ënëmaay ets nyëjkxtëty.