Ezequiel 36 - Biblia Dc en Mixe de Quetzaltepec

Ma ja Israel jatëkok y'oyëjä'änyën ja jyuukyajtën

¹ E mijts ye'etyëjk, mëmëtya'ak yë tun kopk ëjts nxëëwkyëjxmës, mëti'ipë jam ma Israel ja'ayëtyën ets xy'ënëëmëty ko wä'än tmëtoow'itë yë n'aaw n'ayukës.

² Ëjts Wintsën, jëtu'unës n'ëna'any: Yë Israel ja'ay yë myëtsip, jëtu'un nyäyjyawëtë yë'ë yowë nyiwintsën'ajtëp yë tun kopk xëmëkyëjxm.

³ E oy ko jyëtu'unëty, mëmëtya'ak ëjts nxëëwkyëjxmës: Jëtu'un yë Wintsën y'ënä'äny: Xiitsow yaatsow myajnipëtë'ëktë ets m'ooktëty; tëkokyë yë naax kajpn wiinktsowpë tsyoontën tëë tniwa'kta'atë yë mnaax mkajpn ets je'eyë mnëxi'ik mtukxi'ikëtë ets ëxëëk mtunëtë.

⁴ E miitsëty tun kopkëty mëti'ipë Israel yajpatëpën, mëtoow'itë wi'ix ja Wintsën t'ënëëmën ja tun kopk, nëë wok käätswok ets ja joyjyot; näjyëtu'un ja tukpotsykyopk ets ja naax kajpn aanë'ëk tëëtsë'ëkpë mëti'ipë jam Israel yajpatpën, mëti'ipë të myeetsyën ja myënaax myëtsëpa'an ets je'eyë të nyëxi'iky të tyukxi'ikyë.

⁵ Jëtu'un yë Wintsën y'ënä'äny: Yë n'aaw n'ayukës jëën mëëtpënës yam nkäjpxy mëët yë äkë ma ja wiinkpë ja naax kajpnën, ni'ik yë Edom kajpn, jä'ä ko yë'ëjëty mëët ja xoontakën ojts niwa'aktë ja nnaax nkajpnës ets mëët ja tsip äkë tyajpëtsëëmtaaytyë jap winë.

⁶ Nimëtya'ak ëjts nxëëwkyëjxmës wi'ix yë Israel kajpn ëxëëk jyata'anyën ets xy'ënëëmëty: Jëtu'un yë Wintsën t'ënëmaay yë tun kopk, yë nitun, mëjnëë ets joyjyot: Ëjts nmëët'ajtypyës ja mëk aaw mëk ayuk, mëti'ipës nkajpxpëtsëëmpyën mëët ja joot'an, mëët ko ja wiink naax wiink kajpn je'eyë të m'oj të mya'axëtë.

⁷ Paaty ëjts maas nWintsën'atyën, nxëëwës ntukajpxpejtyp etsës n'ëna'any ko tääpë naax kajpnëty nëjkxëp mëj këjää tsyëtyuntë jyääypyätë.

⁸ E miitsëty tun kopkëty, mëti'ipë yajpatëpën ma Israel ja'ayëtyën, ujts nëjkx myajpaatë mëët ja aay kepy mëjjëtypë mëti'ipë tëëmpäjtpën mëti'ipës yë nnaax nkajpn nëjkx tjë'kxtë, tëëpë timy pyäätyën wyimpitëty.

⁹ Ëjts nkëwent'atäämpyës ets oy yääktëty yontëty jyiitstëty ets yajkoj yajpäntëty.

¹⁰ Nyajnimayëjäämpyës yë Israel kajpn mëti'ipë jam yajpatpën. Yë naax kajpn nëjkxëp tyuktujkta'ay mëët yë ja'ay ets nëjkxëp yajkoj'o'oyëtyä'äy mëti'ipë xit ko'ow të jyatën.

¹¹ Nyajnimayëjäämpyës yë ja'ay ets jëyujk ma miitsëtyën ets may'äämpy y'awinpitëty. Nimay nëjkx ni'ik m'itë jëtu'un tä ijty tëëyëpën ets nëjkxëp mjotkujkëtë. Ënet nëjkx xynyijawëtë ko ëjts Wintsënajtp.

¹² Nëjkxëp yë nnaax nkajpnës nyäxy tyëkë ma miitsëtyën tun kopk, mëti'ipë yajpatëpën ma Israel kajpnën ets nëjkx yë'ë tjä'ä'atë ja it naaxwiinyëtë ma miits myajpaatën ets yë'ëjëty ka'ap nëjkx u'unktuk y'ëk'ijnëtë.

¹³ Ëjts Wintsën jëtu'unës n'ëna'any: Miitsëty tunëty kopkëty jëtu'un ja ja'ay mnikajpx mnimëtya'akëtë ko mja'aytyu'tstëp ets ko ka'ap xy'ëwa'atstë ets naax kajpn u'unk maay tmëët'atëty.

¹⁴ E kajts wyi'ixëty, miitsëty ka'ap m'ëk ja'aytsyu'utsanëtë ets ka'ap yë naax kajpn u'unktuk xy'ëkyajwë'ëmanëtë. Ëjts Wintsën, ëjts ënaanp.

¹⁵ Ka'apës n'ëkyajkutukanë ets wiinkpë naax kajpn m'ojëtëty mya'axëtëty; ka'ap tjëkyepy tääpë naax kajpn jatëkok je'eyë ëxaty m'ëk tijënëtëty jä'ä ko miitsëty ka'ap yë naax kajpn u'unktuk xy'ëkyajwë'ëmanëtë. Ëjts Wintsën, ëjts ënaanp.

¹⁶ Ënet ja Wintsën ojts xymyëkäjpxyës ets xy'ënëmaayës:

¹⁷ Ko yë Israel ja'ayëty jam tsyënaaytyë ma nyaax kyajpnëtyën, ojts tyaj'ëxëëkëtë mëët y'ëxëëktu'un y'ëxëëk kajpxënëty. Ëxëëk ja jyuukyajtën ojts n'ijxëtës ets ka'ap myëtënaaynyëty.

¹⁸ Ënet ojts ja ntsip n'äkë nyajnaxyës ma yë'ëjëtyën mëët ko ënety të yaja'ay ooktë ma ja naax kajpnën ets mëët ko të tyaj'ëxëëkëtë ja kajpn ko të t'ëwtatë ja wiink tios,

¹⁹ ets yë'ëjës ojts ntuktëytyuntë koos jëtu'unyë n'awojpwa'kxtaaytyë wiink naax wiink kajpn.

²⁰ E oymyaakajpnëty ma ojts jya'tën, je'eyëm tni'ojëtë ja nxëëwës, jëtu'un ja ja'ay y'ëna'antë: Ya'atë kajpn Wintsën ijty y'ëwtajtëp, e atsip ojts tsyoontë ma nyaax kyajpnëtyën.

²¹ Ënätës wiink nja'awëy, ko yë'ëkyëjxm ko ja Israel kajpn tkatukjaty wi'ix jyuuky'atëtyën, ja nxëëwës wa'atspë wiink ijty yajtijy ma ja kajpnën maajaty yë'ë jya'tën.

²² Paatyës t'ënëmaay ja Israel kajpn: Jëtu'un yë Wintsën y'ënä'äny: Mëti'ipës ntunäämpyën ka'ap yë'ëkyëjxmëty ko miitsëty mjää'atë, miitsëty Israel ja'ayëty, yë'ëkyëjxmës ntuna'any jä'ä ko nxëëwës wa'ats yë'ë, mëti'ipë miitsëty të xynyi'ojëtën ma ja naax kajpnën maajaty të mja'tën.

²³ Yë'ë yam ntuk'ixäämpyës yë naax kajpn wi'ixës yë nxëëw wya'atsëtyën, mëti'ipë miitsëty të xynyi'ojëtën ma tääpë naax kajpnëtyën; koos ënety ntuny ja nmëj'ajtënës ënät nëjkx tnijawëtë ko ëjts Wintsën. Ëjts Wintsën, ëjts ënaanp.

²⁴ Nyajtso'onta'ajantëp yam ma tääpë naax kajpnëtyën; nyajtu'uk mujkta'ajantëp ets jatëkok nyajwinpita'antë ma mkë'ëmnaax mkë'ëmkajpnëtyën.

²⁵ Mëët yë wa'ats nëë mpuja'an njä'ätsä'äntë ets nyajwatsta'aja'anyës ja ëxëëkajtën ets ntuknipëjktuta'aja'antë mëti'ipë të xypyaye'eyë'ëktën ko të xypyanëjkxtëkëtë wiink wintsën;

²⁶ etsës mpëjkta'aka'any ma miitsëtyën jemypyë jot ja'awën ets jemypyë jot winma'any. Njuutäämpyës ma miitsëtyën tääpë juunpë jot ja'awën, jëtu'unpë jyuunëtyën tä tsaajën etsës mpëjkta'aka'any yu'unkpë jot ja'awën.

²⁷ Mpëjkta'akäämpyës jap ma miitsëtyën ëjts yë njot nwinma'any ets xypyatuntëty ja n'ënä'ämënës ntëyajtënës ets ja mëti'ipës të nkäjpxyën;

²⁸ jam nëjkx mjuuky'atë ma ja kajpnën mëti'ipë ja m'aptëjk nmooytyënës, miits nëjkx nkajpn'atë, etsës nëjkx nTios'aty ma miitsëtyën.

²⁹ Nëjkxëp jap njuutë ma ënety ka'ap oy mjuuky'atën. Nëjkxëp nmo'otë nkäxtë may'äämpy yë tsajpmok ets ka'ap nëjkx nijëna'a yuu xëëw xy'ëkyajnajxnëtë.

³⁰ Nëjkxëpës näjyëtu'un aay kepy nyajtëëmpety ets nëjkxëpës nyajwintëy winë ma ja kam tu'ujën, këtiipë mtsëtyuntëty mjaaypyätëty nijëna'a mëët ja yuu xëëw ma wiinkëtypë naax kajpnën.

³¹ Ets ko xyjyä'ämyätstëty wi'ix ëxëëk të mjuuky'atën ets wi'ix winë ëxëëk të xytyuntën, kë'ëm nëjkx xytyëtyu'unjawëtë ja mnëëjëty mpokyëty ets ja ëxëëkpë ja mjuukyajtënëty.

³² Ëjts Wintsën, ëjts ënaanp: Miitsëty Israel ja'ayëty nijawëtë yajxon ko ya'atë ntuna'anyënës ka'ap yë'ëkyëjxmëty ko miitsëty oy winë xytyuntë; miitsëty ni'ikyëmës tsëtyuntë jaaypyätë ets ni'ikyë mëmay mëtajtë ja tëkatsypë xytyuntën.

³³ Ëjts Wintsën, jëtu'unës n'ëna'any: Ko ënety nmä'kxta'ayës miits ja mpokyëty, nëjkxëp jam nyajtsëënëtë ma mkë'ëmnaax mkë'ëmkajpnëtyën ets nëjkxëp jatëkok xykyoj'oyëtë ja naax kajpn mëti'ipë ënety të jyityën.

³⁴ Ja naax kam mëti'ipë ënety aanë'ëk tëëtsë'ëk të yajpaatyën, nëjkxëp jatëkok jam mpäntë mkojtë ets nëjkxëp t'ixtë ja ja'ayëty mëti'ipë ënety jam najxtëpën.

³⁵ Ets nëjkx y'ëna'antë: Ijxtëm ya'atë ja naax kam janty'oy kyëxë'knë tä yë Edén naaxjotmën; jä'äts të y'ity aanë'ëk tëëtsë'ëk; ja naax kajpn mëti'ipë ojts mya'ta'ayën ets mëti'ipë ojts ëxëëk jyätyën, tyam ijxtëm ja ta'tspëky yajpatnë ets tää ja ja'ay tsyënaaynyëtë.

³⁶ Ënet ja naax kajpn, ja juukpyë ënety jyaak yajpaatën mëti'ipë mëët mnämyëtsëpa'an'atyën nëjkx tnijawëtë, ko ëjts Wintsën ets nkoj'o'oyëpës mëti'ipë të jyityën ets nyajmujxyp nyajji'typyës jatëkok ja kam tu'u ma ënety të mya'ta'ayën. Ëjts Wintsën, ëjts ënaanp ets kopkpëky ko jëtu'un ntuna'anyës.

³⁷ Ëjts Wintsën, jëtu'unës n'ëna'any: Mëj këjääjës winë ntuna'any. Nmo'ojäämpyës yam yë Israel kajpn mëti'ipës xy'amëtoopën ntunëtyës ma yë'ëjëtyën; jëtu'unës yë jyä'äy nyajnimayëyä'äny tä nyimayën yë kupixyny.

³⁸ Ja naax kajpn mëti'ipë xit ko'ow të y'awinpityën nyaj'utsäämpyës mëët yë mayjyä'äy, jëtu'un yaj'ixa'any tä maykyupixynyën mëti'ipë yajmënëjkxtëpën jam Jerusalén ko xëëw tyunyë ets wyintsë'kën'ata'antë Dios wintum. Täänëm nëjkx tnijawëtë ko ëjts Wintsën.