Ezequiel 33 - Biblia Dc en Mixe de Quetzaltepec

Ti mëpaat tunyën ja'ay mëti'ipë këwent'ajtpën

¹ Ënet ja Wintsën ojts xymyëkäjpxyës ets xy'ënëmaayës:

² Mijts ye'etyëjk, mëmëtya'ak yë mjëëky mëku'uk, jëtu'un xy'ënëëmëty: Koos ëjts nyaj'ity yë jëën tsip ma naax kajpnën, yë naax kajpn tu'uk yë jyä'äy twin'ixy mëti'ipë këwent'atëpën.

³ Ets ko ja këwent'ajtpë t'ixy ko tam wyinkony ja mëtsip ma ja naax kajpnën, yë'ë tyukxuxyp ja xyuxn ets ja ja'ay tnijawëtë.

⁴ Ko pën tmëtoy ko tam ja xuxn yajtukxu'uxy ets ka'ap tmëjpëjktä'äky, ja ja'ay mëti'ipë jëtu'un ëtëtspën kë'ëm ënety nyätyunyë ko y'ookëty tyëkoyëty,

⁵ jä'ä ko tëë tjamëtoy ja xuxn ko të xyu'uxy ets ka'ap të tmëjpëjktä'äky; kë'ëm ënety të nyätyunyë, jä'ä ko jeexyë të tmëjpëjktä'äky ko ja xuxn të xyu'uxy tëëyëp ja jyuukyajtën tyajtso'oky.

⁶ E ko ja këwent'ajtpë t'ixëty ko tam ja mëtsip wyinkony ma ja naax kajpnën ets ka'ap tukxu'uxëty ja xyuxn ets ja ja'ay nijawëtëty ets ja mëtsip kyajpntëkëty tyaj'ookëty ja ja'ay, yë'ë kopkpëky ko yë pyoky tku'ookëty ets nëjkxëpës ja këwent'ajtpë ntukumëtoy ko ja ja'ay ënety të y'ooky.

⁷ Mijts ye'etyëjk, jëtu'un të mpëjktä'äky ma Israel kajpnën tä tu'uk këwent'ajtpën. Mijts m'ëxajëp yë n'aaw n'ayukës ets xytyuknijawëty yë naax kajpn.

⁸ Wä'änxyëp ëjts nikajpxëtyës ko tu'uk ja ja'ay ënety y'ooka'any mëët ko tmëët'aty ja nëë poky; e mijts pën ka'ap ja ja'ay xytyuk'ëwaanë ets tyajtëkatsëty ja jyuukyajtën ets yë'ë ka'ap ja jyuukyajtën tyajtëkatsy, tääpë pokyjyä'äy kyë'ëmpoky nëjkx tku'ookë, e mijts nëjkxëp ntukumëtoy ko ënety tääpë ja'ay të y'ooky.

⁹ E pën mijts mtuk'ëwa'anëp ja pokyjyä'äy ets tyajtëkatsëty ja jyuukyajtën ets yë'ë ka'ap tmëjpëjktä'äky mëti'ipë mjatuknëmääpyën, nëjkxëp tku'ookë ja nyëë pyoky, e mijts tëë ënety ja mjuukyajtën xyajtso'oky.

Mëti'ipë awintum yajwinkuwa'këpën

¹⁰ Mijts ye'etyëjk, ënëëmë yë Israel kajpn: Miitsëty jëtu'un m'ëna'antë: Ujts nyajpatëmë mëët yë nëë poky ets ëxëëktu'un ëxëëk kajpxën. Paaty jëtu'un njajtëmë tä jeexyë ajuuky mputsëmën. ¿Wi'ix n'ëk juuky'ajtmëty?

¹¹ E ëjts Wintsën, njuukyajtënës yam ntukkajpxpejtyp ko ëjts ka'apës ntsoky ets ëxëëk ja'ay y'ookëty, yë'ëjës ntsojkpy ets jyuukyajtën tyajtëkatstëty ets jyuuky'atëty. Miitsëty Israel ja'ayëty ëxmatstë tääpë ëxëëk juukyajtën. ¿Tii ko m'ooktëty?

¹² Mijts ye'etyëjk, ënëëmë yë mëku'uktëjk: Ko tu'uk yë ja'ay tyuuntëkoyëty mëti'ipë oy juukyajtpën, ka'ap yë'ëkyëjxm tsyo'okëty ko ënety jëwyiin oy të jyuuky'äty; e ko tu'uk yë ëxëëk ja'ay tyaj'oyëty yë jyuukyajtën, oy ënety ëxëëk të jyuuky'äty ka'ap nëjkx y'ooky. Ko tu'uk yë ja'ay tyuuntëkoyëty mëti'ipë ënety oy të jyuuky'ätyën ka'ap yë'ëjëty nëjkx yajtso'okyë ko ënety oy më''ëka'any të jyuuky'äty.

¹³ Ko tu'uk yë ja'ay ntukwinwanëtyës yë juukyajtën ets yë'ë y'ëna'anëty ko kopkpëky ja jyuukyajtën tmëët'ajnë ets tyuuntëkoyëty, ka'apës nëjkx yë'ë n'ixy oy ënety oy tii më''ëka'any të tuny, nëjkxëp ja tku'ookë ja tyuuntëko'oyën.

¹⁴ E koos tu'uk yë ëxëëk ja'ay nyajnitukëty ets y'ookëty ets yë'ë tyaj'oyëty ja jyuukyajtën ets tii winë oy tunëty,

¹⁵ ets tyajwinpijta'ajëty ja mëti'ipë ënety ja ja'ay të myo'oyën ko winë të tnipaye'ey ets mëti'ipë të tmeetsyën; tkuuytyunëty ja tëyajtën ma ka'ap ja ëxëëkpë t'ëktuunëty; tääpë ja'ay nëjkxëp jyuuky'äty ets ka'ap y'ooka'any.

¹⁶ E tyam, oy jyuuky'ajnë ets mëtëy winë tuunë, juuky'atëp yë'ë ets ka'apës nëjkx nja'amyetsy oy ënety winë ëxëëk të tuny ko të pya'tkë'p'aty.

¹⁷ Yë mja'ay ëna'anantëp yë'ëjëty ko ka'apës tii oy nipaye'ey; mëti'ipë jaantyën, yë'ëjën tëy ka'ap tii oy tuntë.

¹⁸ Ko tu'uk yë ja'ay mëti'ipë oy juukyajtpën t'ëxmatsëty ja mëtëypyë ja tu'unën kajpxën ets aakjä'ä tuunëty ja ëxëëkpë, nëjkxëp tku'ookë.

¹⁹ Ets pën yë ëxëëk ja'ay y'ëxmajtsyp yë y'ëxëëk juukyajtën ets tuny ja mëtëypyë ets oy jyuuky'äty, mëëtkyëjxm ko ënety ja jyuukyajtën të tyajtëkatsy nëjkxëp ja jyuuky'äty.

²⁰ Miitsëty je'eyëm m'ënaan'ëtë'ëtstë: Yë Wintsën ka'ap oy tuny ja nipaye'eyën. E ëjts nipaye'eyäämpyës nitu'ukjaty miits ja mpokyëty ets jëtu'unës ja tëytyu'unën nyajnaxa'any ma miitsëtyën jëtu'un tä ënety winë të xytyuntën.

Ma ja Jerusalén kajpn kyuka'anaxyën

²¹ Ma myëkoxk anyën ja mëmajkpo'opë, ma majkmäjtsk jëmëjt kyä'pxyën ma ënety tsumy matsy të nyajmënëjkxëmën wiink naax wiink kajpn, jääjës tu'uk yë ja'ay xynyimiiny jam tsyoony Jerusalén ets xytyukmëmëtyäkyës ko tëë ënety ja mëtsip tnitëkë ja naax kajpn.

²² Tëë ënety ëxë'ëy jopyëp ja wintsën ja kyë'ë tpëjktä'äky maas yë n'aawën; e komjëpom ko tääpë ja'ay myiiny mëti'ipë jam Jerusalén të kyäkpëtsëmyën, ënät ojts ja Wintsën jatëkok xyajkajpxë'ëkyës ets ka'apës ojts në'k'u'umnë.

Ja naax kajpn ja pyoky

²³ Ënet ja Wintsën ojts xymyëkäjpxyës ets xy'ënëmaayës:

²⁴ Yë ja'ayëty mëti'ipë jam tsënaaytyëpën ma Israel kajpnën, mëti'ipë xit ko'ow të jyajta'ayën, jëtu'un y'ëna'antë: Yë Abraham nätyu'uk ijty ets ix ojts yë'ë tjä'ä'aty ya'atë naax kajpn; ëëtsajtëm nimay ni'ik nyajpatëmë, paatykyëjxm ni'ik tmëët'ajtëmë ja mëk'ajtën ets ya'atë naax kajpn ëjts njä'ä'ajtmëty.

²⁵ Paaty mijts, jëtu'un xy'ënëëmëty: Jëtu'un yë Wintsën y'ënä'äny: Miitsëty mëët yë tsu'utsy yë nyine'pny xyjyë'kxëtë, wiink tios m'ëwtajtëp, myajja'ay o'ktëp, ¿m'ënantëp ënät miits xyjyä'ä'atëty yë naaxwiinyëtë mëti'ipë të myajtukwinwanëtën?

²⁶ Je'eyë mtsiptuna'antë, aakjä'ä mtuuntëp ka'apës n'oy ixyën, myajtëkooytyëp ja wyintsë'kën ja pëjkën ukën, ¿ets ënät maaytyëpë mtajtëpë ko xyjyä'ä'ata'antë ja naax kajpnë?

²⁷ M'ënëëmëp näjyëtu'un: Jëtu'un yë Wintsën y'ënä'äny: Njuukyajtënës yam ntukkajpxpejtyp etsës n'ëna'any: ko yë ja'ayëty mëti'ipë tsënaaytyëpën maajaty yë naax kajpnën, xit ko'ow të jyajta'atë, nëjkxëp ja'ay yaj'ookëtë, e mëti'ipë tsënaaytyëpën kamjoty nëjkxëp tsyu'tsta'ajëtë ja jëyujk ëwa'anëtypë, e mëti'ipë aankjoty ets tsaajoty tsënaaytyëpën yuu pa'am yaj'ookanëtëp.

²⁸ Aanë'ëk tëëtsë'ëk ets axit ako'owë yë naax kajpn nyajwë'ëma'anyës, mpëjkëjäämpyës ja naax kajpn ja myëk'ajtën mëti'ipë nätyukyajmëjnajxëpën. Ja Israel ja tyun kyopk nëjkxëp tyëëtsë'kta'ay; ka'ap nëjkx jam pën y'ëknajxnë.

²⁹ Ko ënety nyajwë'ëmyës aanë'ëk tëëtsë'ëk ets xit ko'ow ja naax kajpn mëët ko ënety ka'ap tii oy tuntë, ënätnëm nëjkx nijawëtë ko ëjts Wintsënajtp.

³⁰ Yë mja'ay jam potsywinm mnimëtyä'äkyë, ëkë ma tyëjk'aawëtyën ets nyäy'ëna'anëtë aak yë'ëjëty: Mintë, tsojk nmëto'ow'ijtëmë wi'ix ja Wintsën ja aaw ayuk të xytyuknikäjxëmën.

³¹ Ets jëtu'un ja nnaax nkajpnës mniminyë ets nyaaxwäätstë mijts mwintuuy, jëtu'un tä xëmë tuunk'atën ets tmëtoow'ita'antë ja n'aaw n'ayukës. Je'eyëp ko ka'ap tpatuntë. Jëtu'un t'akajpxëtë janaam jatsojk tä ja'ay tkuuy'iyën yë nätsyok näjyawë, e ma jyot wyinma'anyëtyën, yi'iyë myëmaay myëtajtëp wi'ix wit meeny tpaatëty t'ixtëty.

³² Yë'ëjëty jëtu'un mtijëtë ko mijts jëtu'un mëtyä'äky tä jeexyë xykyuuy'iyën yë nätsyok näjyawë, ko oy yë aaw yo'kn xymyëëtëty ets oy mkoy. Je'eyë ko nëkoopë je'eyë tmëtoow'itë ets ka'ap tkuuytyuntë.

³³ Ja aaw ayuk mëti'ipë mnikäjpxypën atëëwta'ajaanp jä'ä; ko ënety jëtu'un tyunyë jyätyë, jäänëm nëjkx tja'akyukëtë ko täätëm të jyayajpaaty tu'uk yë käjpxynyajxpë.