Ezequiel 28 - Biblia Dc en Mixe de Quetzaltepec

Wi'ix ja Tirë yajkutujkpë jyata'anyën

¹ Ënet ja Wintsën ojts xymyëkäjpxyës ets xy'ënëmaayës:

² Mijts ye'etyëjk, ënëëmë yë Tirë yajkutujkpë: Jëtu'un yë Wintsën y'ënä'äny: Tëë mjot mwinma'any y'uty mëët yë amëj'ajt akëjxmajtën, tä tiosën të mnäjyawëty, jam m'u'unyë ma y'u'unyëtën ja tiostëjkëty ets mejy'akujk të myajpaaty. Je'eyëp ko mijts ka'ap mtiosëty, mijts mnaaxwinyëtë ja'ay mëti'ipë jëtu'un määpy tajpën tä tiosën.

³ ¿Wä'än jëtää ni'ik m'ixpëkyëtyë këtiinëm yë Danielë? ¿Wä'än jëtää xynyija'awëtyä'äy winë mëti'ipë yu'utsy ijtpënë?

⁴ Mëët ja mwijyajtën ets ko winë xyjäty xynyijawë paaty të mkumeenytyä'äky, tëë xyaj'ujtsta'ay yë m'apëjkën mëët yë pu'ts pujxn ets poop pujxn.

⁵ Mëët ko xynyijawë wi'ix m'ajuy m'atookëtyën tëë xyajmëj xyajkëjääjë yë mwit mmeeny ets mëët ko të mkumeenytyä'äky amëj akëjxm tyam mnäjya'awënë.

⁶ Paaty yë Wintsën jëtu'un y'ënä'äny: Mijts ko m'ëna'any ko jëtu'un mwijyëty tä tiosën,

⁷ nyajminäämpyës yë jaaypyaat jaaypyo'kxy ma mijtsën ets ëxëëk mtunëtëty, ja'ay mëti'ipë mëkëtyën, mëti'ipë jyuutäämpyën yë tyiypyujxn ets myaj'ooka'anyë, mijts oypyë tsujpë ets wijypyë ets yajnaaxkujitëja'any yë m'oyajtën mëj'ajtën.

⁸ Jap jutjoty myajkëta'aka'anyë, jap nëëpa'tkë'p myajkuka'anaxa'anyë.

⁹ ¿Jëtu'un je'eyëm m'ëna'ana'any ko mijts mjëtu'unëty tä tu'uk tiosën ko ënety jam ma mëtsipën myajpatnë?. Ko ënety myajpatnë ma ja'ayëtyën mëti'ipë myaj'ookanëpën mijts nitii mëk'ajtën xykyamëët'ata'any ma mnaaxwinyëtë ja'ay'ätyën.

¹⁰ Jaaypyo'kxy nëjkx myaj'ookyë, jëtu'un tä y'ooktën ja'ay mëti'ipë ka'ap Wintsën t'ëwtatën. Ëjts Wintsën, ëjts ënaanp; jëtu'unës yë n'aaw n'ayuk të n'ëxmatsy.

Ma yajkuuy'iyën yë Tirë yajkutujkpë ko tëë y'o'knë

¹¹ Ënet yë Wintsën ojts xymyëkäjpxyës etsës xy'ënëmaay:

¹² Mijts ye'etyëjk, yaj'oyë tu'uk yë ëy, ma yajkuuy'iyën yë Tirë yajkutujkpë, jëtu'un xyaj'ëna'anëty: Jëtu'un yë Wintsën y'ënä'äny: Mijts ënety ijxpäjtën m'ijtp ma ja wa'atsajtënën, ujts mëët ja ixpëkyajtën ets ja oy'ijxën.

¹³ Jam ënety Edén myajpaaty ma ja Dios tmëëtëtyën yë y'ujts tsa'am kam, mëti'ipë myëët'ajtypyën oyëtypë tsaa, tsapts tsaa, të'kxy tsyaa; yëktsuxk tsaa, pu'ts tsaa, uky tsyapts tsaa; tsu'unk tsaa, tsuxk uky tsyaa, uky tsyaa ets tsuxktsaa; yë mnantsëm ets mtatsktëy aakyë'ë pu'ts pujxn, mëti'ipë myajtuknikojëyën ma ënety ka'anëm mkojynyëmën.

¹⁴ Ojts ntukmëwë'ëmy tu'uk yë tsajpjotmëtë kukäjpxy ets mkëwent'atëtëty, jam ënety myajpaaty ma Wintsën yë kyopkën wa'atspë ets mëtsa'a itkujky mnaxy mtëkë.

¹⁵ Mijts nitii poky ënety xykyamëëtëty ko ojts mkojy, oknëm yë pokytyu'unën xyäjty ma mjot mwinma'anyën.

¹⁶ Ënet yë nëë poky ojts mpaatyë ko ojts mkumeenytyä'äky ets may ja juy tooky xymyëët'ajnë. Ënet ojts n'ixkexy ets mjëwa'akëty nwintuuyës; ojts jam njëkexy ma ja Dios ja kyopkën, ja tsajpjotmëtë kukäjpxy mëti'ipë ënety mkëwent'ajtëpën yë'ë ojts myajpëtsëëmënë mëtsa'a itkujky.

¹⁷ Mëët ko ënety m'oyëty mtsujëty yë'ë ojts amëj akëjxm myaj'awinpityë ets ko ënety mëj jaanty mnäjyawëty ënät ojts tyëkooytyä'äy ja m'ixpëkyajtën. Ojts njaamteeny nnaaxteeny ets nëxi'iky tukxi'iky ojts nyajwë'ëmy ma wiinkëtypë yajkutujkpëtëjkën.

¹⁸ May ojts ja nëë poky xytyuuntëkooynyë ets ja mjot mwinma'any mëj xyajtëkooynyë mëët ja mjuy mtooky, yë'ëpaat ojts xyaj'ëxëëktëjkënyë yë mtsajptëjk. Ënet ojts nyajmëjës yë jëën ma mjuuky'ätyën ets myajtooytyëkooyë. Tyam aak m'ijxëp yë ja'ay ko o'ktëy mjajnë mkëpäjnë ets kuyjyaamën të m'awinpijnë.

¹⁹ Tëkokyë yë naax kajpn mëti'ipë m'ijxy'ajtëpën tsë'këp ko m'ixyë. Ëxëëkëm të mja'ajnë; xëmëkyëjxm të m'atëkoy.

Ma yaj'akäjpxyën wi'ix ëxëëk jyata'anyën yë Sidón kajpn

²⁰ Ënet ojts yë Wintsën xymyëkäjpxyës ets xy'ënëmaayës:

²¹ Mijts ye'etyëjk, winpit jam Sidón ets xy'ënëëmëtëty yë ja'ay ëjts nxëëwkyëjxmës.

²² Jëtu'un xy'ënëëmëty: Ya'atë yë Wintsën të tkäjpxy: Ëjts mmëtsipës yam n'awinpity ma mijtsën Sidón kajpn; ëjts mëj'äämpyës naxa'any ma mijtsën. Ko ënety mijts myajnitëkë maas nyaj'ixa'anyën ja nmëj'ajtënës ets nwa'ats'ajtënës, ënät nëjkx yajnijawë ko ëjts Wintsën.

²³ Ntuknikäxäämpy yë pa'am ëyo'on ets jot ne'pny pyëyë'ëka'any ma mnaax mkajpnën; mayjyä'äy ookantëp kupuxy ma mnaax mkajpnën xiitsow yaatsow. Ënet nëjkx yajnijawë ko ëjts Wintsën.

²⁴ Yë Israel kajpn ka'ap nëjkx y'ëkyaj'ëyoowënë wiinkëtypë naax kajpn na'ëwtitypë yajpaatën ma yë'ëjën. Ënet nëjkx yajnijawë ko ëjts Wintsën.

²⁵ Ëjts Wintsën, jëtu'unës n'ëna'any: Nyajmujjkta'ajäämpyës yë Israel ja'ayëty jënu'un yajpaatën axit ako'owë wiink naax wiink kajpn ets jëtu'un nyaj'ixa'anyës ja nwa'ats'ajtënës ma ja naax kajpnën. Yë Israel kajpn nëjkxëp jatëkok yë nyaax kyajpn tniwä'äky ma ja naax kajpnën mëti'ipë ojts yë ntuunpës Jacob ntukumayën.

²⁶ Jam nëjkx jotkujk y'itë tsyëënëtë ets nëjkx tkojtë jyëën tyëjkëty; nëjkxëp jam tpëjkta'aktë kyam tyu'ujëty. Ja naax kajpn mëti'ipë ënety ëxëëk të tunyën yë Israel kajpn nëjkxëpës ntukumëtoy. Jëtu'un nijawëtëty ko ëjts wintsën, mëti'ipë jam Israel Tios'ajtpën.