Ezequiel 19 - Biblia Dc en Mixe de Quetzaltepec

Ma yajniya'axtën ja Israel yajkutujkpë

¹ Ets mijts, ye'etyëjk, yajkoj ya'atë ëy, ma yajkuuy'iyën yë yajkutujkpëtëjk jampë yajpaatën Israel:

² Yë mtaak jëtu'un ijty tä kaajën, kaa itkujkpyë tsyëënën. Jap yë y'ijtakn t'oytyuuny ets jap y'u'unk'ijxy.

³ Tu'uk mëti'ipë yajxon yajyä'äk'apäjtën. Ojts tjaty wi'ix jyëyujk matsëtyën ets yë'ëpaat tjajty wi'ix jyä'äy myatsëtyën ets jyä'äytsyu'utsëtyën.

⁴ Ojts yë naax kajpn tnijawë ko tääpë kaa jyääjëty; ënät tmajtstë mëët tu'uk yë majtstakn yu'utsypë ets ojts tjëtujnëjkxtë jap Egiptë mëët yë jo'kn.

⁵ Ko ja kaataak t'ijxy ko o'ktëy jyäty ja y'u'unk mëti'ipë ënety tyukjotkujk'ajtypyën, ënät wiinkpë kaa u'unk tyajyä'ktso'ony ets tyajyä'kpejty.

⁶ Ko y'apejty, kaa itkujky ja nyäxy tyëkë. Ojts tjaty wi'ix jyëyujk matsëtyën ets yë'ëpaat tjajty wi'ix jyä'äy myatsëtyën ets jyä'äytsyu'utsëtyën.

⁷ Yajxon ijty yaja'ay ooky ma këmoontëjkën ets may ja ja'ay tyaj'ooky naaxjoty kajpnjoty; ko nyiitsy aak tsë'këyëp ja ja'ay oymyaajëty.

⁸ Ënet ojts ja naax kajpn mutskëtypë nyäkyajpxëtë ets tnipëtë'ëktëty tääpë kaa; ojts tpëjkta'aktë o'ktakn yu'utsypë ets jap kyuka'ajëy o'ktaknjoty, jëtu'un tä nëë jëyujk yajkujëpipën.

⁹ Pujxnjo'kn ojts mëët tmatstë ets tyajku'ëtujktë ma pujxntëjkën ets ojts tmënëjkxtë ma ja Babilonyë yajkutujkpën; jam tsuumtë, këtiipë pën t'ëk mëtoownëty ko nyiitsëty jam kopkjotm ma Israel ja'ay tnitänëtën.

¹⁰ Jëtu'un ijty yë mtaak tä tu'uk yë tsatym kyepyën mëti'ipë nëë ëkë'ëy tënääpyën, tëëm'ajtp ets nëkooyë ojts yoonë mëët ko ja nëë xëmë tmëëtëty.

¹¹ Mëjatyëty ojts xye'enty tpëjktä'äky, ojts yë yajkutujkpëtëjk tajk'atë, këjxm yajxon yoony, jampaat kyu'ujty yootsjotm.

¹² Je'eyëp ko ojts atsip tnujkë'ëktë ets tnajtsjëpijpëtyë. Jam xëëwpëtsëmtsyow ojts ja jëënpoj tsyoony ets yajtëtsë tääts tyëëmka'ataay; ja xye'enty ojts tsyëtsta'ay ets yajjëënkupëjky.

¹³ E tyam jam kyojyëty të'ëts'itjotm, ma ja naaxwiinyëtën anë'ëk tëëtsë'ëkpë.

¹⁴ Ma xye'entyën jëën jam pëtsëëmp mëti'ipë yajtoopyën ja jyi'tsk. Ka'ap tii xye'entynyë juunpë mëti'ipë ja yajkutujkpë tyajk'atëpën. Ya'atë ëy o'kpë ëy yë'ë, jää yaj'ëwëty ko pën y'ookëty.