Éxodo 4 - Biblia Dc en Mixe de Quetzaltepec

¹ Yë'ëjëty ka'apës yë xymyëpëktëty ets nän ka'apës yë xytyuntëty kyëwentë, jëtu'un y'ëtsooy ja Moisés. Yë'ëjëty tsojk nëjkx ni'ikyë y'ëna'antë, ko yë wintsën ka'ap maa të npaatyës.

² Tääts ja Dios yajtëëwë: ¿Ti tampë xymyëëtëtyën mkë'ëjotm? Tajk yë'ë, jëtu'un y'ëtsooy yë Moisés.

³ Tä ojts yë Dios y'ënë'ëmxëty: Najtsjëpipë naaxkëjxy. Ënet ojts yë Moisés tjantynyajtsjëpipë yë tyajk ets ojts y'awinpity ja tyajk tsa'anyën. Yë Moisés ko jëtu'un t'ijxy ënätyë ojts pyëyë'ktsoony ets ojts jyakä'äka'any.

⁴ Tä ja Dios ojts ënätyë myëkäjpxyë ets y'ënëmaayë: Nastijë yë mkë'ë ets xymyatsëty yë tsa'any ma pyi'ixyën. Yë Moisés ojts ja tsa'any jam tmatsy ma ja pyi'ixyën ets jatëkok y'awinpijty tajk.

⁵ Ya'atë yë'ë jëtu'un ets tmëpëktëty, ko yë Dios yë'ë jëtu'un të nyänyikëxë'ëkyë ma mijtsën, mëti'ipë ja m'ap m'ok y'ëwtajtën, yë Tyios yë Abraham, Isaac ets Jacob.

⁶ Ënet ja Dios ojts näjyëtu'un y'ënë'ëmxëty, tyam këtiijë ënät jap yë mkë'ë ma mxëkätën. Ënet ja Moisés ojts ja kyë'ë tkutijë ma xyëkätën, ko ojts tjuuty ënät t'ijxy ko tëëtëm ja kyë'ë y'ujtsta'ay mëët yë pu'uts pa'am, je'eyë janty poop kyëxë'knë jëtu'un tä kyëxë'ëkyën yë tsajp'o'pyky.

⁷ Ënet ja Dios ojts y'ënë'ëmxëty: Këtiijë jatëkok yë mkë'ë ma mxëkätën. Moisés jëtu'un ojts tjantytyuny, ojts ja kyë'ë tkutijë ma xyëkätën, e ko ojts tjuuty, tëë ja kyë'ë tsyo'oky.

⁸ Ënet ja Dios y'ënëmaayë: Pën yë'ëjëty ka'ap tmëpëktë ja mëj'ajtën, ko më''ëka'any xyaj'ixëtëty ets nijënu'un mkatunëtëty këwentë, ja mëmäjtskpë jä'ä myëpëktëp.

⁹ E pën kajtsën ninu'un mtimmyëpëjkëtëpën ets ka'ap mtunëtë këwentë, oy jëtu'un ya'atë ja mëj'ajtën xyjyayaj'ixyë, ja mëtu'ukpë ets ja mëmäjtskpë, tyaa xytyunëty, nëë wäänë mjääpëp jap nëë'ëkë'p ets xynyaxkutämëty e ko ja nëë tyäämkëta'akëty naaxkëjxy, ne'pny y'awinpitëty.

¹⁰ Ay Wintsën. Jëtu'un y'ëtsooy ja Moisés. Ëjts nijënu'unës nkatukjaty nkajpxëty ets ko jyëtu'unëty ka'ap tyamnëmëty maas yam mijts jëtu'un xymyëkäjpxyën, ëjts jëtu'unyëmës ka'ap oy n'ëy nkäjpxy, koos ënät ëjts njaakajpxpë, je'eyës nëkoo ntyäty y'awë'ëmë.

¹¹ E yë Dios tyaa ojts y'ëtsoyë: ¿Pën yë ja'ay të myo'oyë yë y'aaw? ¿Tii këtii y'ëjtsëty yë ja'ay të nyajkojyësë, oy yë'ëjëty mëti'ipë uumën, mëti'ipë natën, mëti'ipë wiintsën ets mëti'ipë ijxpënë?

¹² Paaty nëjkx tyam, ëjts mijts njämyëët'atäämpy, ko ënety mkajpxa'any mëtya'aka'any, ëjts mijts ntukni''ixëp tii mkajpxëp mëtya'akëpën.

¹³ Yë Moisés ni'ikyë y'ënaan'ëtë'ëtsy: Ay Wintsën, yë'ëjës yam n'amëtoopy yë mëyajtën ets wiinkpë xykyäxëty.

¹⁴ Yë Dios wiink ojts tjawë ko jëtu'un ja Moisés y'ënä'äny, ënät y'ënëmaayë: Yë'ë ënëëmë yë m'ajty Aarón, yë Leví ja'ay, nnija'apës ko yë'ë oy yë y'iy kyäjpxy, tää mniminyë ets jotkujk ënät nyäjyawëtëty, ko m'ixëtëty.

¹⁵ Kajpx mëtya'ak mëët ets tuk'ëwa'anëtya'a tii kyajpxëpën, ëjts yajpataanpës xëmë mëët yë'ë ets näjyëtu'un mëët mijts, yë'ë mtukni''ixëjanëp tii mëpaat xytyuntën.

¹⁶ Mijts mëëtmëtya'akëp yë Aarón, jëtu'un tääjës jeexyë ëjts nmëmëtyä'äkyën, e yë Aarón yë'ëts ja naax kajpn tyukmëmëtyakta'ajëp, jëtu'un tä ënety mijts të xy'ënëëmën.

¹⁷ Mkapëp ya'atë mtajk, jä'ä ko yë'ë jëtu'un mëët winë mëj këjää xytyuna'any.

Jëtu'un yë Moisés jatëkok wyimpijty jap Egiptë

¹⁸ Ënet ja Moisés wyimpijty ma ja myë't ja tyëjkën ets t'ënëmaay: Tyam kopkpëky ko nëjkxëtyës jap Egiptë, ma jap tsyëënëtën ja njëëky nmëku'ukës. Yë'ëjës nëjkx n'ixa'antë etsës nijawëja'any, pën jap jyaak juuky'atë. Oy, ka'ap tääpë wyi'ixëty, tyam nkexy oy tsuj, jëtu'un ojts y'ëtsoyë ja Jetro.

¹⁹ Jam ënety Madián tsyëënënëm ja Moisés, ko Dios y'ënëmaayë: Wimpit jap Egiptë, jä'ä ko ja ja'ayëty mëti'ipë ënety myaj'ookanëpën tëë ja y'o'ktaaynyëtë.

²⁰ Ënet ja Moisés ja y'u'unk y'ëna'k ojts tyajpäjta'ay jëyujkkëjxm, näjyëtu'un ja tyo'oxytyëjk ets tsyo'ontë, nyëjkxnëtë jap Egiptë. Ojts tpakäpy ja tyajk mëti'ipë ënety ja Dios të tyuk'ëne'emyën tpakapëty.

²¹ Tä ja Dios t'ënëmaay ja Moisés: Ko mja'tëty jap Egiptë, wa'ats xjyä'ämyäjtsta'ajëty ja mëj'ajtën mëti'ipë mtunëpën ma yajkutujkpën, jëtu'un ijxtëm xynyijawën, ko tëë mijts nmo'oy yë kuttujkën ets mëj'ajtën xyaj'ixëtëty. Ëjts mëti'ipës xypyatpën, yë yajkutujkpë ni'ikyës kujuun mpëjkta'aka'any ets ka'ap tsyojkja'akyukëty, jëtu'un'äämpy ka'ap ja Israel ja'ayëty tsojk'ëxmatsëty.

²² Ënet xy'ënëëmëty yë yajkutujkpë: Jëtu'un yë Wintsën y'ënä'äny: Yë Israel yë'ëjës jëtu'un nja'ap tääjës jeexyë nkä'äxkopkëtyën.

²³ Tëë n'ënëëmë etsës yë n'u'unk nmaay xy'ëxmajtsëty, wä'änës min xy'ëwtatë, e jä'ä ko ka'ap niwi'ixtsow xy'ëxmatsa'any, tyam nyaj'ookëpës ënät yë mkä'äxkopk.

²⁴ Jam ma ja Moisés ënety tyajnaxa'anyën ja tsuu mëët yë y'u'unk y'ëna'k, ënät yë Dios nyipëtsëëmë ets ojts jyayaj'oka'anyë.

²⁵ Ënet yë Séfora ojts tu'uk yë tsaa jëjpë t'ixta'ay, jëtu'unpë tä tsujknën, tä ojts tsuky ja y'u'unk ja ye'etyëjkajtën na'ëwtityë ets ojts jä'ä tuk'ony ja Moisés ja tyeky tä t'ënëmaay: Tëyajtën mijts yam n'ënëëmëty ko mijts paaty nmë''ëtsowaty jä'ä ko ne'pynyës je'eyë xytyuktoonp xytyukmajtsp.

²⁶ Ënet ojts ja Dios t'ëxmatsy ja Moisés. Paatykyëjxm yë Séfora y'ënäny jëtu'un, ko ja Moisés ënety tniye'etyëjk'aty ets ko tu'knax ënety ja nye'pynyëty, jä'ä ko ja myaank të tnatsujk'ëwtijtë ja ye'etyëjkajtën.

²⁷ E yë Dios tëë ënety t'ënëëmë yë Aarón: Nëjkx jam të'ëts'itum mnäpyäätyë mëët yë Moisés. Tä ja Aarón ojts tsyoony ets mëët ja Moisés nyäpyatë jam ma ja Dios ja tyun kyopkën. Jam ojts tkajpxpo'kxy ets tsu'kxy.

²⁸ Ënet yë Moisés tukmëmëtyaktaay yë Aarón tëkokyë mëti'ipë ënety yë Dios të tyuk'ëne'emyën tnimëtya'akëty ets ko ënety të y'ëne'emyë ja Dios ets kanaak ja mëj'ajtën tyaj'ixëtëty.

²⁹ Tä nimäjtsk tsyo'ontë ets tyajtu'ukmujktaaytyë ja mëjja'aytyëjkëty,

³⁰ ja Aarón ojts tnimëtyakta'ay ja aaw ayuk jëtu'un tä ënety ja Moisés ja Dios të y'ënë'ëmxëtyën, ojts tyaj'ixëtë ja mëj'ajtën mëti'ipë ënety ja Dios të tyuk'ënä'ämëtën tuntëty.

³¹ Ja ja'ayëty ojts jëtu'un tmëpëktë ja käjpxy mëtyä'äky ets tnija'awëtyë ko ënety ja Dios myëmay myëtajëtë ets ko ënety tëë t'ixy tnijawë wi'ix y'ëyowtë jyotëkoytyën, tä tyaj'ijxëtë ja näywyinkutsë'kën ko nyaaxkoowtë jëtu'un tä jeexyë yë Dios t'ëwtatën.