Éxodo 37 - Biblia Dc en Mixe de Quetzaltepec

Jëtu'un yaj'oytyuuny ja kaaxë mëti'ipë ja käjpxytyu'unën myë'ijtypyën

¹ Yë Besalel ojts t'oytyuny ja kaaxë, mëti'ipë ja käjpxytyu'unën myë'ijtypyën, yë acacië kepy ojts tyajtuny, jä'ä y'ayenyëty mäjtsk kë'ënux ja kujkm ets myëjwiinëty tu'kkë'ënux ja kujkm ets kyëjxm'atëty tu'kkë'ënux ja kujkm.

² Ojts tukniwitsy yë pu'ts pujxn, jëtu'un nëkëjxytsyow ets jootjotytsyow, ojts näjyëtu'un yajxon t'awitsy yë pya'a mëët yë pu'ts pujxn.

³ Ojts t'oytyuny yë nyitëyë'ëky taxk aak pu'ts pujxnpë, tu'ukjaty ojts tpëjktä'äky ma ja nyitekyën, mäjtskjaty pa'a pa'ajëty.

⁴ Ojts t'oytyuny ja witsë, jä'ä ja acacië kepy mëti'ipë yajtukëëyë'ëkëpën ets tukniwijtsy yë pu'ts pujxn.

⁵ Tääts jap tjë'pnajxy ma ja nyitëëyë'ëkën ets jëtu'un yajkëëyë'ëkëty.

⁶ Tä ojts tyajkojy näjyëtu'un ja nyi'akë'ë, aak pu'ts pujxn mëët t'oytyuuny, jä'ä y'ayenyëty mäjtsk kë'ënux ja kujkm ets myëjwiinëty tu'kkë'ënux ja kujkm.

⁷ Mäjtsk ja tsajpjotmëtë kukäjpxy ojts jam tyajkëxkojy aak pu'ts pujxn jëjp'am pa'apa'a. Yajxon tka'tstëëy tpëjktëëy mëët yë pujxnkuwojpën.

⁸ Ja nyi'akë'ë mëët mäjtsk ja tsajpjotmëtë kukäjpxy mëti'ipë ojts jam kyëxkojyën, tu'ukyë mëët y'akojmujky, tu'uk jam jëjp'am ojts wyi'imy ets näjyëtu'un ja tu'uk.

⁹ Tääts yajxon nyäy'a'ijxmukyë, nimäjtskëty aak winta'ak tyiiynyëtë, aakjam kyëx'ixtë ma ja kaaxë ja y'akë'ëjën ets ja kyäkn txajwa'kxtë jëtu'unts tni'äpkëtë.

Yaj'oytyuny ja tsajpkääky ja nyikaaypyäjn mëti'ipë ja Tios yajmoopyën

¹⁰ Besalel ojts tu'uk yë kaaypyäjn t'oytyuny yë'ë ojts tyajtuny yë acacië kepy, jä'ä tyaj'ayeny'äjty mäjtsk kë'ënux ets tyajmëjwiin'ajty tu'kkë'ënux ets kyëjxmëty tu'kkë'ënux ja kujkm.

¹¹ Ojts tukniwijtsta'ay yë pu'ts pujxn ets ojts yë pya'a näjyëtu'un tkooyë nän mëët yë pu'ts pujxn.

¹² Ojts yë pya'a tpëjktakë jä'ä myëjwiinëty wëxtujk kë'ë'u'unk ets ojts näjyëtu'un tpa'akooytyä'äy mëët yë pu'ts pujxn.

¹³ Tääts ojts t'oytyuny näjyëtu'un yë nyitëëyë'ëky, taxk tyaj'o'oyëy, aakyë'ë pu'ts pujxn yajtuun ets ojts tu'ukjaty jam tkëxpëjkta'ay ma ja tyäkën ma ja nyiteky mëët nyämyajts'ityën,

¹⁴ jam winkon tkëxpëjky ma nyäjyëjpkëyën ets jam yajjë'pnaxëty ja kepy mëti'ipë mëët yajkëëyë'ëkëtyën.

¹⁵ Ja nyikepy mëti'ipë mëët yajkëëyi'ikyën ja kaaypyäjn yë'ë ojts yajtuk'oytyuny yë acacië kepy ets ojts tukniwijtsta'ay yë pu'ts pujxn.

¹⁶ Ojts näjyëtu'un yë apëjk atu'unën tyaj'oyë, mëti'ipë ënety jam itaanpën ma ja kaaypyäjnën, aak pu'ts pujxn ojts tuk'oytyuny, ja texy, ja mëj jä'pn, ja nyitu'ts ets ja a'ukën; ma yajpëjkta'akëtyën ja ayajk ako'onën mëti'ipë nëëjëtyën.

Yaj'oytyuny ja mëj jëëntooytyakn aak pu'ts pujxnpë

¹⁷ Besalel ojts näjyëtu'un tyaj'oyë yë jëëntooytyakn aak pu'ts pujxn, yë'ë ojts tuk'oytyuny yë pujxnkuwojpën ets twojptëëy tka'tstëëy mëët; tu'ukyë ojts tyaj'akojmuky yë y'ëjx mëët yë myox, mëët yë tyo'k, yë y'a'ukën ets mëët y'ääy.

¹⁸ Jam myoxkëjxy tëtujk ja kyë'ë jam xyajpëtsëmy, tëkëëkjaty pa'apa'a.

¹⁹ Ja tëtujkpë ja kyë'ë pyëtsimyën myoxkëjxy, ja tu'ukpë tëkëëk ja tyo'k tmëëtëty mëët tu'uk ja nyi'ëjx ets ja nyi'aay, jëtu'un kyëxë'ëky tä tu'uk yë ujtsën mëti'ipë xyëëwajtypyën almendrë.

²⁰ E ja nyiteky taxk tmëëtëty ja tyo'k, jëtu'un kyëxë'ëky tä yë almendrë pëjyën, mëët ja nyi'ëjx ets ja nyi'aay.

²¹ Ja tëkëëk pëkpyë ja kyë'ë ma mäjtsk nyämyukyën mëti'ipë pëtsëëmpën ma jëëntooytyaknën, tu'ukjaty ja nyi'ëjx tmëëtëty jëtu'unpë kyëxë'ëkyën të a'ukënën.

²² Ja nyi'ëjx ets ja nyikë'ë tu'ukyë mëët nyämyätsyë ja mëj jëëntooytyakn, aak pu'ts pujxn mëët y'oytyunyëty ets yë'ë pujxnkuwojpën yajtuk'oytyuun.

²³ Pu'tspujxn ojts tuk'oytyuny ja nyikutë'kxn, aakjëtu'un wëxtujkëty, näjyëtu'un ja mëti'ipë yajtijtëpën pujxnmä'tn ets ayä'äptexy.

²⁴ Ko ya'atë mëj jëëntooytyakn yaj'oytyuuny ets tëkokyë jënu'un ënety mëët tyuna'anyën, jä'ä ojts yë pu'ts pujxn tyuny i'px majktëkëëk tsim.

Yaj'oytyuny ja poom ja nyiwintsë'këntyakn

²⁵ Besalel ojts tyajkojy yë poom yë wyintsë'këntyakn, yë'ë yajtuun yë acacië kepy, taxktatsk y'ixëty, tu'kkë'ënux myëjwiinëty ets jä'ä kyëjxmëty tu'kkë'ënux, tu'knax kyijpxyëty yë pya'a, ja nyiwaj tu'ukyë mëët nyämyätsyë ja wintsë'këntyakn.

²⁶ Ojts ja nyini'kx tukniwijtsta'ay yë pu'ts pujxn, näjyëtu'un ja pya'a majktaxkëty ets ja nyiwaj ets ojts tpa'atwitsy näjyëtu'un mëët yë pu'ts pujxn.

²⁷ Ojts tpëjktä'äky yë nyitëëyë'ëk aak pu'ts pujxnpë ma ja y'awits ja pya'tkën, mäjtsk tpëjktäky ma ja tyatskën, mëti'ipë yajpatpën ma ja mëjjatypë ja pya'ajën, näjyëtu'un ja tu'k'it, jap yajtijnaxëty ja nyikepy mëti'ipë yajtukëëyë'ëkëpën ja wintsë'këntyakn ko muum yajmënëjkxa'anëty.

²⁸ Yë witsë yë'ë mëët t'oytyuuny yë acacië kepy ets ojts tukniwitsy yë pu'ts pujxn.

Yaj'oytyuny yë on mëti'ipë yajtukkënu'kxpën

²⁹ Yë Besalel ojts näjyëtu'un tyaj'oyë ja kënu'kxy on, mëti'ipë winë yajtukkënu'kxpën ets ja poom mëti'ipë janty'oy pa'akxu'kpën, jëtu'un tuunk'ajty tä yë pa'akxu'kpë oytyuunpë tyaj'oyën yë tsooy.