Ester 6 - Biblia Dc en Mixe de Quetzaltepec

Ma ja Mardoqueo myëtä'äkyën

¹ Jä'ä tsu'um, ja yajkutujkpë ka'ap myääy, paaty tni'ënä'ämëy ja noky ets tyajmintëty ma jap myinyën këxja'ay tëkokyë winë mëti'ipëjaty tuunëp jajtëpën ma ja naax kajpnën ets yajtukwinkukajpxëty.

² Jap t'ijxpatë wi'ix ojts tëkok ja Mardoqueo tnijawën, ko nimäjtsk ja ja'ayëty, mëti'ipë nyiwintsën'ajtëpën yë tsiptuunpëtëjk, mëti'ipë këmoontëjk kyëwent'ajtëpën, Bigtán ets Teres xyëëwajtëp; ojts tjatuknipëjktaakëtë ets tyaj'ooka'antë ja yajkutujkpë Asuero.

³ Ënet ja yajkutujkpë tyajtëëy: ¿Wi'ixën ojts yajkukajpxë tääpë ja'ay ets tii ojts yajmo'oy yë Mardoqueo ko tyajtsoky ja yajkutujkpë Asuero? Nitii kyayajmooy, jëtu'un y'ëtsoowtë ja tyuunpëtëjk.

⁴ Ënet myiiny ja Amán, jää mëtëy ma ënety jap jëtu'un tyajtëyën ets tyëjkëy tëkoty jäätsow ma ja yajkutujkpë myä'äy pyo'kxyën, yë'ë ënety y'amëtowäämpy ja yajkutujkpë ets ja Mardoqueo yajyo'ktëyëty ma ja o'kpäjnën mëti'ipë ja Amán ënety të tuknipëjktaakën. Tä ja yajkutujkpë tyajtëëy: ¿Pën jap jëtijtp tëjkwiin?

⁵ Tä y'ëtsoowë ja tyuunpëtëjk: Yë'ë Amán. Ets y'ënäny: Yajnaxtë.

⁶ Ënet ja Amán nyäjxy tëkoty ets ja yajkutujkpë yajtëëwë: ¿Wi'ix jëtää mëpaat yajkukajpxë ja ja'ay mëti'ipë ja yajkutujkpë y'oyjya'apën? Tä ja Amán kë'ëm nyäjya'awëy'ijtë ets myäy tyäjy: ¿Pën jëtää jëtu'un yë yajkutujkpë y'ëk'oyjya'ap tä ëjtsën, tyaapë ëjtsën xy'antijp?

⁷ Paaty ënätyë y'ëtsooy: Tääpë ja'ay

⁸ jä'ä yajkukajpxëty, yë'ë yajtukxoxëp yë wit mëti'ipë yajkutujkpë wyit'ajtypyën ets tu'uk tukwä'tspätëty yë kwaay nän yë'ë mëti'ipë yajkutujkpë tyuk'u'unyääpyën ets kyëpajkëjxy yajpëjkta'akëty tu'uk yë kujän mëti'ipë yajkutujkpë jyä'ä'ajtypyën.

⁹ Ja wit ets ja kwaay, yë'ë yajtukë'ëtëkëp tu'uk yë yajkutujkpë wyintsën ets yë'ë txoxëty ja ja'ay mëti'ipë yajkukajpxëpën ets nëjkx twijtsjëtity tu'kkajpn jot, tääts ya'axëty jyokëty mëk: Jëtu'un mëpaat yajkukajpxë ja ja'ay mëti'ipë ja yajkutujkpë y'oyjya'apën.

¹⁰ Ënet ja yajkutujkpë t'ënëmaay ja Amán: Oy jëtu'un të m'ëna'any. Tyam ënät mijts n'ënëëmë ets tim poj'am nëjkx xyjyuuty jap yë wit mëti'ipës njä'ä'ajtypyën ets nëjkx xyajtsoony ja kwaay, xox yë Mardoqueo, ja Jutiiyë ja'ayën mëti'ipë jap tëjk ëkë'p ënyääpyën ets jëtu'un xytyunëty tä të m'ëna'anyën. Nitu'uk mëpaat xykyayajninaxy.

¹¹ Ënet ja Amán ojts jap tjuuty ja yajkutujkpë ja wyit ma jap pëjkë'ëky y'ityën, ets tmëkäjëy ja kwaay. Tääts txojxy ja Mardoqueo ets tyajtso'ony kwaaykyijxy ets mëk yyä'äxy jyoky ma jam twinwitsyën ja kwaay mëti'ipë ja Mardoqueo tyuk'u'unyääpyën: Jëtu'un ja ja'ay yajkukajpxë mëti'ipë ja yajkutujkpë y'oyjya'apën.

¹² Ko jëtu'un tukjëtitëtyääy ja naax kajpn, ja Mardoqueo jam ojts jatëkok nyijkxy tëjk'ëkë'ëm ma ja kutujktaknën. E ja Amán, ko jam tsyo'ony, pëyi'ikyë ojts nyijkxy ma tyëjkën, mon tuk, jëëpy yaxp ets ka'ap y'ëk'ijxë'k y'ëkkoowë'knë.

¹³ Jamts tukmëmëtyaktaay ja jyiiky myëku'uk ets ja tyo'oxytyëjk wi'ix ënety të jyäty të kyëpetyën. E yë'ëjëty jëtu'un t'ëtsoowtë ja Amán: Pën mijts tëë mtsuu'ixyë tääpë Mardoqueo mëti'ipë Jutiiyë ja'ayën, tsip ets ënät xymyëmëta'akëty ets ëxëëk xytyunëty. Tyam yajxon mtimyaj'ënëëmë ko ka'ap mmayä'änyë.

¹⁴ Tam ënety kyakajpxta'aynyëm, ko ja yajkutujkpë ja tyuunpëtëjk myiintë ets yajwowa'any ma ja Ester të wyow të wyitsëtën kääpyë ukpë.