Deuteronomio 33 - Biblia Dc en Mixe de Quetzaltepec

Moisés tkënu'kxta'ay yë Israel ja'ayëty

¹ Ka'anëm ënety ja Moisés y'ookynyëm, mëti'ipë ja Dios myëtuunën, ko ja Israel ja'ayëty ojts t'ëkjaakënu'kxnë,

² ets y'ënäny: Jam Sinaí yë Wintsën të tsyoony; mëti'ipë të xykyutë'kx të xykyujajëmën maju'unëm ntso'onëmën jam Seir, jampaat të tyi'kxy ma Parán kopkën ets të nyäxy Meribá-cadés; ma y'a'oykyë'ëjën xytyuknimi'inëm ja ënä'ämën tëyajtën.

³ Jä'ä ko Wintsën tsyojkpy jya'ap yë nyaax kyajpn, xëmë tkëwent'aty mëti'ipë nakyuwanëpën jam ma yë'ëjën tu'ukyë. Mëti'ipë jëjp'ijxp tim ijtëpën, oy tii yajtuk'ënä'ämtë.

⁴ Yë Moisés tëë xymyo'oyëmë yë ënä'ämën tëyajtën, jëtu'un të xymyo'oyëmë, tä tu'uk yë mëjnäkyumayën ma Jacob yë nyaax kyajpnën,

⁵ ets jam'ajt ja yajkutujkpën Jesurún, ko ye'eymyujktaaytyë ja mëti'ipë nyikopk'ajtëpën ja kyajpn, ko ye'eymyujktaaytyë ja Israel ja'ayëty.

⁶ Ënet ojts tkënu'kxy ja Rubén mëët ya'atë aaw ayuk: Yë Rubén xëmë yajpaata'any. Ka'ap nëjkx yë xyëëw nijëna'a y'atëkoy, oy jyaniwäänë'atë yë ye'eytyëjtëjkëty.

⁷ Ënet ojts tkënu'kxy yë Judá mëët ya'atë aaw ayuk: Wintsën mëëtoow'ijtë yë Judá ja'ayëty yë y'aaw y'ayuk, mijts m'a'ixëp jatëkok ets tyu'ukmuktëty mëët ja myëjnaax myëjkajpn. Mniwaantu'utëp mëët yë mëk'ajtën, mijts mputëkëp oy ma muum yë myëtsip nyäpyaatëtëty.

⁸ Ënet ojts tkënu'kxy ja Leví mëët ya'atë aaw ayuk: Wintsën mijts mjä'ä'ajtyp yë tsaa'u'unk mëti'ipë mëët winë yajnijawën. Näyjyëtu'un ja ja'ay mëti'ipë oy mëtuunëpën, mijts mjä'ä'ajtyp, ja ja'ayëty mëti'ipë mwinma'any'ijxën jam Masá, ets ojts jam Meribá mëët mnäyajjoot'anpëkyë,

⁹ Mëti'ipë y'ënëmaayën ja tyeety tyaak miitsëty ka'ap n'ixy'atë, t'ënëmaay ja myëkä'äxtëjk miitsëty ka'ap nijawëtë mpënmës jëtu'unëty, ets t'ënëmaay ja y'u'unk y'ëna'këty: Nkatimnyija'awëtëp miitsëty mpënmës jëtu'unëty. E tii ko jëtu'un y'ëtëtstë, yë'ëkyëjxm ko ënety jä'ä xëmë tmaytyë tajtë ja m'aaw m'ayuk, ets ko ënety yi'iyë xëmë timtyuunk'atë ja käjpxytyu'unën mëti'ipë yë'ëjëty mëët të xytyunyën.

¹⁰ Yaj'ijxpëjktëp yë Israel ja'ayëty ets tyukni''ijxëtyëp yë m'ënä'ämën mtëyajtën ets ja m'aaw m'ayuk. Pyëjkta'aktëp ma wintsë'këntyaknën yë poom ets wintsë'kën mëti'ipë jëyujk ookyën mijts mwintuuy.

¹¹ Wintsën mijts mkënu'kxëp tääpë ja'ayëty, ma jyot myëjaaw tyajtuntën, mijts m'ëxaj mkupëkëp mëti'ipë mtuknimiinëtëpën ets mëti'ipë yajnimëjaawtaktëpën. Pën mëtsip'ajtëtëp ëxëëk xytyunëty, m'atëj mtuktëjëyëp ja jyëwiitsëty, këtiipë jëna'a y'ëknipëtë'kënëtëty.

¹² Ënet ojts tkënu'kxy yë Rubén mëët ya'atë aaw ayuk: Mëët yë'ë ko Wintsën tsyoky jyawë jotkujk mjuuky'atëty. Mëti'ipë myëët'ajtypyën mëk'ajtën, yë'ë xëmë mkëwent'atanëp. Yë'ë mkuwa'anëtëp xëmë mapaat mjuuky'ätyën.

¹³ Ënet ojts tkënu'kxy yë José mëët ya'atë aaw ayuk: Yë Wintsën yë'ë kyënu'kxëp yë mkam mtu'u, ets tyajkëta'akëty yë nëë tuu, mëti'ipë jok yoots jam myëtso'ompyën nëëjoty wokjoty.

¹⁴ Jëtu'un nëjkx xyajpëtë'ëky yë mpëjktä'äky mëjwiin këjää mëti'ipë winjëmëjt mjë'kxëp mpëkëpën, ets winpo'o mni''itëpën,

¹⁵ ja jë'kxy pëky mëti'ipë mëj'äämpy yajëkyäjpën jam tunkëjxm kopkkëjxm, ja oyëtypë ja pëjktä'äky jampë yajpaatyën këjxm,

¹⁶ ujts nëjkx yajpaaty ja nyaax kyam mëët oyëtypë jë'kxy pëky. Yë Dios mëti'ipë ojts nyänyikëxë'ëkyën ma zarsa aatsën mëj nëjkx nyi''ijxkëtä'äkyë. Tëkokyë ya'atë të yajnikäjpxyën, yë'ë jam'ataanp ma Joséjën, mëti'ipë ojts yajwin'ixyën ma jyiiky myëku'ukën.

¹⁷ Ko yë José y'ëna'k'ajty oy mëk ojts jyä'äy'äty, jëtu'un mëk jyä'äy'äjty tä yë tsajpkaa u'unkën, mëk yajpaty, tä tu'uk yë tsajpkaani'kxën tunkëjxmëpë. E yë'ëts ënät tyam miimp ets tjä'ä'ata'any ja naax kam mapaat ja naaxwiinyëtë y'ëwtityën. Yë'ë yaj'antijtëp yë Efraín yë jyä'äy, yë Manasés yë jyä'äyëty.

¹⁸ Ënet ojts tkënu'kxy yë Zabulón ets Isacar, mëët ya'atë aaw ayuk: Mijts Zabulón janty jotkujk mnäjyawëtëty, ko mtsoon mja'tëty, näjyëtu'un mijts Isacar janty jotkujk mnäjyawëtëty ma oypyë ja mtsënaaytyakn kyëxë'ëkyën ma mwit tëjkën.

¹⁹ Nëjkxëp twowtë twitstë ja ja'ayëty mëti'ipë wiink kajpn tso'ontëpën, ets jam tu'ukmukyë xyoonta'aktëty, ma ënety tyaktën ja Dios ja wyintsë'kën mëti'ipë yë'ë y'oyjya'apën. Ja nëëjot nëjkxëp twinkay twin'uuktë, ja jyi'kxy pyiky näjyëtu'un tyajpëtsëmtëty tä ja nëë jëyujkën, ets jënu'un jam winë yajpaatyën nëëpë'am, mëti'ipë ka'ap nëkooyë pën t'ixyën.

²⁰ Ënet ojts tkënu'kxy yë Gad, mëët ya'atë aaw ayuk: kënu'kxy nëjkx y'ity yë ja'ay mëti'ipë ënety yajmoopyën yë nyaax kyam mëjwiin këjää. Gad jëtu'un nëjkx jëjp'ixy y'ity, tä tu'uk yë kaato'oxyën, ko yë myëtsip jyaniminëtëty, mëti'ipë ënety ëxëëk ja tunanëpën, jëtu'unyë nëjkx ja myëk'ajtën ets ja kyutujkën tjaamtä'än naaxtä'änë.

²¹ Gad tëë tpëky yë nyaax kyam ma nyitëkëtyën ma tsyëënëtëty yë tsiptuunpë wintsën. Ojts jëjp'am nyäxy ko yë naax kajpn tsyippaty, tëë tjantytyuny tä ja Wintsën y'ënëmaayën, tëy tëtä'äky winë të tuny ma ja Israel kajpnën.

²² Ënet ojts tkënu'kxy ja Dan mëët ya'atë ja aaw ayuk: Dan jëtu'un yë'ë tä tu'uk yë kaa u'unkën, mëti'ipë pe'tymyën ets të tsyoony jam Basán, ma oypyë naax kajpnën, mëti'ipë yë Samaria ja'ay nyitënääpyën.

²³ Jëtu'un ojts tnikäjpxy ja Neftalí: Yë Neftalí tukjotkëtakëp yë Wintsën ets mëj këjää kyënu'kxa'anyë, yë'ë nëjkx tjä'ä'aty yë nëëjot jampaat ëpa'tkë'ëmtsow.

²⁴ Ënet ojts tkënu'kxy yë Aser, mëët ya'atë aaw ayuk: Yë Aser kënu'kxy nëjkx xëmë yajpaaty ma Jacob yë y'u'unk y'ëna'kën, ets aak tsok aak jawëtëp yë jyiiky myëku'uk. Nëjkxëp may'äämpy tmëët'aty yë olivë tëëm ja nyi'on.

²⁵ Yë tyëjk'aaw ta'tspëky nëjkx xëmë y'ity, yë'ë mëët y'ëtukëty yë juunpujxn ets tsuxkpujxn, jëtu'un akujk jotkujk jyuuky'atëty jap kyajpnjoty.

²⁶ Ni pën tkamëpaatëty yë Dios jampë yajpaatyën Jesurún, mëti'ipë jokjoty yootsjoty yajpatpën tsajpkëjxm, poj'am mnimina'anyë ets mputëkëtëty.

²⁷ Yë Tiosën xëmëpë y'ityën yë'ë mtsoktakn'ajtyp, yë myëk'ajtën yë'ë mnätyukputëkëtëp. Jä'ä ko yë'ë ojts tyajke'eky tyajputy yë mmëtsip, ets mnëmaayë ets xytyimyajkutëkooytya'ajëty.

²⁸ Yë Israel nitii tkamëmayä'äny tkamëtajja'any, xëmë nëjkx jotkujk jyuuky'äty, yë'ë ets y'u'unk y'ok. Ma kyam tyu'ujën, ma tsyajpmokamën ets tsatym kyamën tyajyony tyajjiitsyën, yajxon nëjkx wyintë'ëwxëty, ja nëë tuu mëti'ipë tso'onpën jam tsajpjotm, ka'ap y'ëmaaytya'aka'any.

²⁹ Janty jotkujk ets xoontä'äky myajpaatëty mijts Israel ja'ay. ¿Pën nëjkx m'ëk mëëpaatyë tä ënety myajpaatyën? Yë Wintsën yë'ë kë'ëm të myajtso'okyë, ets yë'ë të mkuwa'anyë, yë'ë xëmë të mputëkëty oy jëna'a ja putëjkën të xyajmëyäty. Yë Wintsën yë'ë mëët'ajtyp tä tu'uk yë yenypyujxnën mëti'ipë myajmëtakëpën xëmë. Ko xëëw po'o tpaatëty, yë ja'ayëty mëti'ipë mëtsip'ajtëtëpën nëjkxëp kyoxtänëtë mijts mwintuuy ets nëjkx xyaj'atëkoy ma ënety amëj akëjxm jyä'äy'atën.