Deuteronomio 28 - Biblia Dc en Mixe de Quetzaltepec

Ja kënu'kxën ma ja mëti'ipë mëtoowtëpën.

¹ Pën mjantymyëmëtoopyën yë mWintsën ets mpatuunëp ja y'ënä'ämën tyiyajtën, mëti'ipë tyam të ntuk'ëne'emyën, yë Dios mëj myajnaxa'anyë ets akäjpxy nëjkx muum m'ity wiink naax wiink kajpn.

² Tëkokyë ya'atë näkyënu'kxën nëjkxëp xypyääty, ko xymyëmëtowëty yë mWintsën

³ kënu'kxy nëjkx myajpaaty ma ja mnaax mkajpnën ets ma ja mjëën mtëjkën.

⁴ Kënu'kxy y'itëty yë m'u'unk m'ëna'k, yë mkam mtu'u ets mjëyujk mtsajpkaa, mtsajppax mkupixyny.

⁵ Kënu'kxy y'itëty näjyëtu'un yë m'apëjk m'atu'unën, mpaan mtu'ts ets mtsim mpok ma mjëtsy xyaj'ookyën.

⁶ Yë Wintsën nëjkxëp mkënu'kxyë oy tii xytyimtunëty.

⁷ Yë'ë nëjkx myajmëtä'äkyë, ko ënety ja mmëtsip mëët mnäpyäätyë, ëkë ko ënety ëxëëk mjatuna'anëtë. Yë'ëjëty nëjkx janty nimay jyatsoontë ets waatswitsy jyamintëty, tääts nyätyijyë myajkutëkoya'anëtë, ko ënety miitsëty mnäkyuwa'anëtë, yë'ëjëty jëtu'unyë nëjkx kyäkta'atë.

⁸ Yë Wintsën yajkëta'akäämpy jam yë kyënu'kxën, ma ënety xypyëjkë'ëkyën ja mjë'kxy mpëky ets ma winë xytyunyën, jëtu'un nëjkx jotkujk mmëët'atyë ma ja it naaxwiinyëtën mëti'ipë të mmo'oyën.

⁹ Pën mtuumpy ijxtëm ja y'ënä'ämën tyiyajtën y'ënä'änyën ets mye'epy mnajxp ma ja nyëë tyu'ujën, yë mWintsën yë'ë tu'ukyë mjä'äpëkanëp jëtu'un tä të tnikäjpxyën.

¹⁰ Ënet nëjkx ja ja'ayëty tnijawëtë, mëti'ipë wiink naax wiink kajpn yajpatëpën, ko ma miitsëtyën yajmëjja'ap yë Wintsën yë xyëëw ets ko jëtu'un tnijawë'atëty ka'ap nëjkx nëkoo mëmayëtë jä'ä ko myëët'atëp ja tsë'ëkë ma miitsëtyën.

¹¹ Yë Wintsën nëjkxëp mtuk'ixyë yë y'oyjyot y'oywyinma'any ets m'u'unk m'ëna'k nëjkxëp tyajnimayë, nëjkxëp tyajnimayë näjyëtu'un yë mjëyujk mtsajpkaa ets ja kyënu'kxën yajkëta'akäämpy jam ma ja mkam mtu'ujën, tëkokyë ya'atë kënu'kxën jam tyaka'any ma ja it naaxwiinyëtën mëti'ipë ja m'aptëjk tyukwinwa'anëyën, ko miits mo'oja'anëtë.

¹² Kyäxäämpy yë nëë tuu ma mkam mtu'ujën, tä yë naaxwiinyëtë tyajmëyätyën ets ja mpëjktä'äky wyintëwëty, jëtu'un ka'ap nyatëkë'atëty ja mjot mëjaaw. Nëjkxëp xy'ëkyajnu'kxnë wiinkëtypë naax kajpn, e mijts ka'ap nëjkx tii xynyu'kxy.

¹³ Nëjkxëp yë Wintsën myajjëwyiin'atyë, nitëkok nëjkx jëna'a ix'am mkayajpaaty, mëj'äämpy myaj'ita'anyë ma wiinkëtypë naax kajpnën, mijts nijëna'a ijxtijy mkanaxëty, e ënät jëtu'un pën mjanty kyuuytyuunpy yë mWintsën ja y'ënä'ämën tyiyajtën mëti'ipë yam ntuk'ëne'empyën xytyunëty.

¹⁴ Ets ko yë'ë xëmë xy'aaw'at xyjyot'atëty, ijxkëm jëna'a m'ënaanpë ja wiink wintsën xypyanëjkxa'any.

Tii tuunëp jajtëp ko ja Tios kyayajmëmëtoy

¹⁵ E pën ka'ap xymyëmëtoy ja mWintsën, jëtu'unyë nëkoo xynyakumëtoownaxy ja y'aaw y'ayuk ets ja y'ënä'ämën tyiyajtën, mëti'ipë yam njatuk'ëne'empyën xytyunëty, ka'ap xyjyawëty wi'ix ja ëyo'on jotmay mtukëta'akëtëty ets wi'ix ja pojkën jam kyëtakta'ajëty ma mjuukyajtënën, mëti'ipë yam yajnikajpxpën.

¹⁶ Poky m'itëty ma ja mkam mtu'ujën ets ma ja mnaax mkajpnën.

¹⁷ Poky y'itëty ja m'apëjk m'atu'unën ets ja mpaan mtu'ts, mtsim mpok ma ja mjëtsy xytyij'ookyën.

¹⁸ Poky y'itëty yë m'u'unk m'ëna'k ets mpëjktä'äky, näjyëtu'un yë mjëyujk mtsajpkaa ets mtsajppax mkupixyny.

¹⁹ Poky näjyëtu'un m'itëty oy tii xyjyatuunk'atëty.

²⁰ Jëtu'un tä ënety ja Wintsën të mpokyën jëtu'un nëjkx mtukëtakpäjta'ayë ets jëtu'unyë nëjkx mkumo'on mkutukë, oy tii xyjyatuna'anëty, wäänë y'itëty tä nëjkx mijts kë'ëm mtimy'atëkoy, mëët ko ënety të xy'ëxmatsy ja Wintsën ja nyë'ë'aaw tyu'u'aaw mëët ja m'ëxëëktu'un m'ëxëëk kajpxën.

²¹ Yë Wintsën yaj'itäämpy jam yë pa'am ëyo'on ma ja m'it mnaaxwiinyëtën, mëti'ipë ënety të xynyiwä'äkyën ets yë'ë nëjkx mëët myajkëxyë.

²² Nëjkxëp jam tyaj'ity ma mijtsën mëkëtypë pa'am ëyo'on: tä yë mëkjëënpa'amën, ki'ix pa'amën, kuxäjëpa'amën ets yajkëta'akäämpy jam näjyëtu'un yë xëëw'an, mëti'ipë winë yajtëtsta'ajëpën, jëtu'un'äämpy nëjkx kyutëkoy ja mtsajpmokam, mjë'kxykyam ets ja ëyo'on jotmay jëtu'un nëjkx xëmë mpajëtijtënë tii yowënë.

²³ Jam tsajpkëjxm kamaa kyakëxë'ëkëty yë yoots nëma'a ets jeexyë tyu'uy pyojy, e yaa naaxwiiny wi'ix winë y'ëk'it y'ëkwintëwëty mëti'ipë mjë'kxëp mpëkëpën.

²⁴ Yë Wintsën naaxway nëjkx tyaj'awinpijta'ay yë it naaxwiinyëtë ma mkam mtu'ujën, naaxjok yajwinpa'ixëp, jëtu'un tä jeexyë të tyu'uy të pyojyën, jëtu'un y'itëty jeky koonëm mkëxëty mtukëty,

²⁵ ets mnakëty. Ko ja mëtsip xyanitsoonëty, je'eyë xywyinku'ixëty ko nimay mniminyë, tääts poj'am mkä'äkëty, mijts ko ënety ëxëëk'o'ktëy mjajnë mkëpäjnë, yë'ë nëjkx ja wiink naax wiink kajpn xytyuk'atsë'ëk xytyuk'ajawë.

²⁶ Lutëty ets witsnëty yë'ë tsyu'utstëp wyëtstëp ja mjot mnini'kx ets oyxyëp jeexyë pën jyam'aty pën y'ëtsë'këpën.

²⁷ Yë Wintsën nëjkxëp mëët myaj'ëyoyë yë pu'uts pa'am, jëtu'un tä jap Egiptë ja'ay jyajtë kyëpäjtën, nëjkxëp mpëkyë yë tsaamaxn, xi'ipyë pa'am ets tsajpnitooy; oy nëjkx mjanäyajtsooypyetyë ka'ap mtso'okëty.

²⁸ Tsuu poj nëjkx ya'atë pa'am myaj'awinpityë, nëjkxëp myajwiintsëty ets ka'ap tii oy xy'ëkmëmaay xy'ëkmët'ajnë,

²⁹ jëtu'unyë mjaakton mjaakmatsëty tä tu'uk yë wiintsën ko muum mnëjkxëty. Oy tii xyjyajjaaktuna'anëty, ka'ap m'ëk oypyëtsë'ëmxënëty. Je'eyë ja'ay nëjkx mëk myajtunyë ets ka'ap tsow mëjuyëtëty, nëjkxëp yë ja'ay o'ktëy mtunyë ets oy ja näypyutëkë xyjyatsokëty ni pën mkaputëkëja'anëtëty.

³⁰ Nëjkxëp xyjyanijämyëët'aty yë to'oxytyëjk, e wiink ja'ay nëjkx myëët'atyë. Nëjkxëp ja mjëën mtëjk xyjyakojy, e yë'ë ka'ap nëjkx xytyuktsëënë, mjanipëjktaakëp ja mtsatym kyam, ka'ap nëjkx xyjyi'kxy. Jä'ä ko wiink ja'ay nëjkx tjë'kxta'ay.

³¹ Mwintuuy yë ja'ay tyaj'ookëty yë mtsajpkaa, e yë nyitsu'utsy nitu'k'aaw xykyajawëty. Jëtu'un xyjya'ixëty ko yë ja'ay tmëtso'onëty yë mkrukts ets mjajëjp'ixëp jatëkok mooywyimpitëtëty; yë mtsajppax mkupixyny yë mëtsip nëjkx tjä'ä'ajta'ay, oy jënu'un xyjyanitsiptunëty nitii nëjkx xykyatuny.

³² Nëjkxëp xyjya'ixy, ko ënety yë mnëëx ets maank yajmënëjkxnëtë ets mja'ëna'anëty jatëkok xya'ixa'anëty, mijts nitii nëjkx mkamayë.

³³ Ja pëjktä'äky ets ja aaytyëëm ujtstëëm mëti'ipë ënety të xynyitunën, wiink ja'ay nëjkx tjë'kxy tpëky, mëti'ipë nikajëna'a të xy'ixyën. Ëxëëk nëjkx yë ja'ay xëmë mtunyë ets nijëna'a pën mkawinkutsë'ëkëtëty.

³⁴ Ko je'eyë xëmë xy'ijxnëty yë ëyo'on jotmay, tsuu poj nëjkx mjajnë.

³⁵ Yë Wintsën nëjkxëp yë pu'uts pa'am mtukpaatyë ma mtekykyoxën, ma mpuuyën ets ma tëkokyë mjot mnini'kxën. Oy nëjkx mja'ëna'any ets jeexyë mtsooypyety, kamaa tsooy xykyapaatëty ets mtso'okëty.

³⁶ Yë Wintsën yë'ë nëjkx t'ëwa'atsy ets mijts tu'ukyë mëët myajkutujkpë myajmënëjkxnëtëty wiink naax wiink kajpn, ma ënety ka'ap nijëna'a të xy'ixy'ätyën ets ni m'ap m'ok ënety të tka'ixy'atë. Jam wiinkë'ëy wiink kajpn kwanë ko nëjkx ja wiink wintsën xy'ëwtajnë ets jä'ä xymyëmëtoownëty, mëti'ipë mëët y'oytyunyëtyën yë tsaa ets kepy.

³⁷ Je'eyë nëjkx nëkoo ja'ay xy'ëtsë'ëkë, wiinkjaty mnimëtya'akëtëty ets mtukxi'ikëtëty maajaty yë Wintsën myajnëjkxyë.

³⁸ Janty may yë mtëëmpt xyjyani'ipëty, ja mpëjktä'äky wäänë nëjkx xyajwinmujknë. Jä'äkyëjxm ko maymyu'u nëjkx tyajpa'amtëjkëtyä'äy.

³⁹ May yë mtsatsym xyjyapänëty ets mëk xyjyakëwent'atëty, ko ja xëëw po'o tpaatëty ni tu'ktsuny yë tsatym nyëë xykyajawëty. Jä'ä ko ja tënë'k yë'ë ënety të tyajwintëkooytyä'äy.

⁴⁰ May xyjyapänëty yë olivë kepy mnaaxjoty; e ko xëëw po'o tpaatëty, ka'ap yë pa'akxu'kpë nëë nëjkx mnätyukjaaxyë, jä'ä ko yë olivë tëëm kë'ëm ënety të nyëka'ata'ay.

⁴¹ Mjamëët'atëp yë mmaank ets mnëëx; wäänë y'itëty, tääts yë mmëtsip mtukja'tëtëty ets tyajnëjkxta'ajëty. Tääts nëjkx mijts mwë'ëmnë u'unktuk ëna'ktuk.

⁴² Tëkokyë yë aay ujts, aay kepy, mëti'ipë yajpatpën ma mijtsën, nëjkxëp tyëëtsë'kta'ay ets mëti'ipë ënety jaakwë'ëmpën tsuxk mu'u nëjkx tjaakyajkëjxta'ay.

⁴³ Yë jaaypyaat jaaypyo'kxyëty nëjkxëp myëkta'aktë ma mnaax mkajpnën, e mijts ni'ikyë ja mkutujkën kyujënakëty.

⁴⁴ Yë'ëjëty nëjkxëp myajnu'kxëtë, e miitsëty ka'ap tii xymyëët'atëty tii myaktëpën nu'kxy. Yë'ëjëty nëjkxëp muum jyëwiin'atë, e miitsëty ix'am nëjkx mwë'ëmtë.

⁴⁵ Tëkokyë ya'atë pojkën yë'ë nëjkx xymyënaxy xyajnaxy, oy maa mtimnyëjkxëty, koonëm m'ookëty mtëkoyëty. Mëët yë'ë ko ënety yë mWintsën të xykyamëmëtoy ets të xykyapatuny ja y'ënä'ämën tyiyajtën ets ja y'aaw y'ayuk, mëti'ipë të mtuk'ëne'emyën.

⁴⁶ Ya'atë pojkën nëjkxëp tyunyë jyätyë ma mijtsën ets ma m'u'unk m'ëna'kën.

⁴⁷ Mëët ko ënety ja mWintsën të xykya'ëwtaty akujk jotkujk ets winë aaw winëjot ets mëj këjää tii winë të mjamo'oyë.

⁴⁸ Yë mmëtsiptëjk yë'ë nëjkx xymyëtuny mëti'ipë ja Wintsën të mtuknikexyën ets ëxëëk mtunëtëty. Nëjkxëp m'ayuu'aty m'axëëw'aty, nëjkxëp ja nëëtëëtsë xymyënaxy xyajnaxy, ni mwit ni mtujkxy nëjkx kyaka'ty, o'ktëy mjat mkëpätëty. Yë Wintsën nëjkx jëtu'un myaj'ëyoyë, koonëm m'ookëty mtëkoyëty.

⁴⁹ Jëkäm yë Dios tyajtsoona'any yë naax kajpn, mëti'ipë poj'am mtukja'tëtëpën tä tu'uk yë witsnën; ja aaw ayuk mëti'ipë kyajpxtëpën, ka'ap nëjkx xywyinjawë;

⁵⁰ tääpë ja'ayëty ëwa'anëty nëjkx xy'ixy ets janty ëxëëkëty, ni pën nëjkx tkawinkutsë'ëkëtë ni yë'ë yë mëjja'aytyëjk ets ni pi'k'ëna'k; ka'ap yë pa'ëyo'ow najts'ëyo'owën tmëët'ata'antë.

⁵¹ Nëjkxëp tkutsu'tsta'atë ja mjëyujk mtsajpkaajëty ets tjë'kxta'atëty ja m'aaytyëëm m'ujts tëëm; jëtu'unyë nëjkx mnajtswitsëty, nitu'knuukyën yë tsajpmok, nitu'knu'unën yë on ets ni tu'ktsunyën yë tsatym nyëë, näjyëtu'un ja mjëyujkëty mtsajpkaajëty mtsajppaxëty mkupixynyëty mëti'ipë mëët'ajtypyën wa'ats nëjkx tyajnëjkxta'atë ets nëjkx mijts myuu'o'knë.

⁵² Ja mnaax mkajpn wa'ats nëjkx tyajnatujkta'atë, koonëm ja nyipotsy tjijtë'kta'atëty; ja potsy oy ënety jënu'un jyata'tspëkyëty ets jyakëjxmëty, mijts ka'ap tjëkyepy xytyukjotkujk'atëty. E jëtu'un jyata'any kyëpäta'any ja naax kajpn mëti'ipë ënety ja mWintsën të mjamo'oyën, ja mmëtsip nëjkx tjä'ä'ajnë.

⁵³ Ma ënety ja mëtsip mpajëtityën, yë yuu xëëw yë'ë nëjkx ka'ap myajmëtä'äkyë, nëjkxëp kë'ëm ja m'u'unk m'ëna'k xytsyu'tsnë, wä'än yë'ëjëty ja yä'äy'ëna'kpë to'oxy'ëna'kpë mëti'ipë ja mWintsën të mjamo'oyën.

⁵⁴ Oy ënety tu'uk ja ja'ay janty tëtä'äky jyä'äy'äty ets janty oyjyä'äy, ko ja yuu xëëw y'itëty ëxëëk nëjkx ja myëkä'äx t'ijxnë ets ja y'u'unk tyo'oxytyëjk, y'u'unk y'ëna'k mëti'ipë ënety mëk të tsokyën.

⁵⁵ Mëët ko tkayaka'any ja tsu'utsy mëti'ipë jam tsyu'tsypyën, ja tsu'utsy mëti'ipë ja y'u'unk y'ëna'k xyixy'äjtypyën. Nimaa yë jë'kxy pëky xykyapaatëty ko ënety ja mëtsip m'ixjëtity mpajëtityë, ja ëyo'on jotmay yajxon nëjkx myajtuk'ëyoowtu'utyë ets jëtu'un yajpaatëty oy myatsowëty maajaty ja naax kajpn xynyitänën.

⁵⁶ Ja to'oxytyëjk mëti'ipë janty'oy të kyëxë'ëkyën ets mëk kë'ëm të nyäkyëwent'atyë janty ijxkëm nyaaxpawä'äky. Ëxëëk nëjkx t'ijxnë ja nyiye'etyëjk mëti'ipë mëk të t'oyjyawën ets näjyëtu'un ja y'u'unk y'ëna'k.

⁵⁷ Mëët ko ënety tkayaka'any ja mëxu'unk mëti'ipë yajminäämpyën naaxwiiny ets ja ne'pyny mëti'ipë pëtsëëmpën ma ja u'unk tyajmëxu'unk'atyën ets ayu'utsyë tsu'utsa'any, mëët ko ënety ka'ap t'ëkmëët'ajnë tii jyë'kxëpën, mëët ko ja mëtsip ka'ap yajjotkujk'atyë ma ja naax kajpnën.

⁵⁸ Ënet jëtu'un pën ka'ap xykyuuytyuny ja mëti'ipë të mjayajtukni''ixën ets ko ka'ap xywyintsë'ëkëty yë mWintsën.

⁵⁹ Yë'ë nëjkx mtuknikexyë pa'am ëyo'on mëkëtypë, mëti'ipë ka'ap tsyooypyäätyën, jëtu'un ma mijtsën ets ma m'u'unk m'ëna'kën.

⁶⁰ Nëjkxëp t'ëwa'atsy ets timjëtu'un ja ëyo'on jotmay jam kyëta'akëty ma mijtsën tä jap Egiptë yaj'ijxyën, mijts wa'ats xynyijawë, ko ja jëtu'unpë ja ëyo'on jotmay atsë'ëk ajawëpë y'ijty, ja jëtu'unpë ja jotmay jä'ä nëjkx xymyënaxy xyajnaxy.

⁶¹ Ëpëky nëjkx wiinkpë ja pa'am ëyo'on tnajtskäxë, mëti'ipë tyam ka'ap yajnikäjpxyën, ma ya'atë nokyën ma ja ijxpëjkën myinyën ets nëjkx jä'ä myajkëxy myajtukyë.

⁶² E mijts Israel kajpn oy ënety janty nimay të mjayajpaatë, yiin wään nëjkx mjaakwinkëta'aktë, e mëët yë'ëkyëjxm ko ënety ja mWintsën Dios të xykyamëmëtowtë.

⁶³ Jëtu'un tä ënety ja Wintsën janty'oy të nyäjyawëtyën ko të mayëtë, nëjkxëp oy nyäjyawëty ko ënety o'ktëy mjajnëtë mkëpäjnëtë ets ni'ikyë mkukëjx mkutujkënëtë, ma ja it naaxwiinyëtën mëti'ipë të mjayajmo'otën, atsip nëjkx jam mtso'ontaaynyëtë.

⁶⁴ Yë Wintsën jëtu'unyë nëjkx mwojpwa'kxëtë naaxwiinyëtë apëtsëmy. Jam wiink naax wiink kajpn wiink tios nëjkx xy'ëwtajnëtë. Jä'ä ja awinax mëti'ipë tsaa ets kepy mëët y'oytyunyëtyën; mëti'ipë ja m'ap m'ok ka'ap nijëna'a t'ixyajtën.

⁶⁵ Ko ënety jam myajpatnë wiink naax wiink kajpn, ninu'un nëjkx mkajotkujk'aty ets ninu'un nëjkx jam mkapo'kxy. Jä'ä ko yë Wintsën yë'ë nëjkx t'ëwa'atsy ets je'eyë xëmë mtsë'ëkëty mjawëty, ja mwiin mjëjp nëjkxëp kyiixë'knë, mjatsokëp jam ja jotkujk'ajtën.

⁶⁶ Yë mjuukyajtën atsë'ëkëtuuy nëjkx xëmë yajpaaty, xëëny koots xy'ixëty atsë'ëk ajawëpë ets ja mjuukyajtën nijëna'a jotkujk kyayajpaatëty.

⁶⁷ Je'eyë xëmë ja näy'atsë'ëk näy'ajawë xyajnaxëty, ko jyopyëp'atëty mja'ëna'anëp: Jääpëk jeexyë poj'am tsyu'ujë. E ko kyoots'atëty mja'ëna'anëp: Jääpëk jeexyë poj'am xyiinyë.

⁶⁸ Oy ënety ja Wintsën të jya'ëna'any, ko mijts ka'ap jap nijëna'a m'ëk winpijnëty Egiptë, nëjkxëp jatëkok jap mwinpity. E mijts jä'ä nëjkx mwinpijnë kepy nëëwinye'epyëjoty ets ja mmëtsip nëjkx jap myajnëjkxyë ets mtookëtëty. E oy ënety pën mjatooka'anyë, ka'ap nëjkx myajjuy. Oy xyajtsojkën'atëty jeexyë jap mwë'ëmy.