Cantares 1 - Biblia Dc en Mixe de Quetzaltepec

Yë to'oxytyëjk

¹ Yë ni'ikpë y'oyëty tsyujëtyën yë ëy, mëti'ipë Salomón ya'j'o'oyëyën.

Mëtu'uk ëy

² Tsu'kxkës maas n'aawën. Koos yë mwiin mjëjp ntsu'kxy, jëtu'unës njawë pya'akëty tä yë tsatym nyëëjën mëti'ipë tëë nyimaanaxyën,

³ janty'oy janty tsuj mxuuky, jëtu'un jeexyë myajtijy ko janty'oy mxuuky. Paaty yë to'oxytyëjktëjk mtsokyë.

⁴ Yajjaamkojkës pojën. Japës yajnëjkxk mijts yajkutujkpë ma m'ityën mtsëënën. Mëët mijts jotkujkës nyajpaata'antë, yë'ëjës ni'ik n'oyjya'awëtyëp yë mwiin mjëjp këtiinëm yë tsatym nyëë. Paatyëmën to'oxytyëjk mtsokëtë.

Ma nimay y'ëëw'ëtsowtën Yë to'oxytyëjk

⁵ Miitsëty to'oxytyëjktëjkëty mëti'ipë jam Jerusalén kukajpnajtëpën, ëjts yëkës, oy tsujës nja'ay'äty; yëkës nkëxë'ëky, tä yë wyittëjkëtyën yë Quedar ja'ayëty, oy tsujës ëjts tä yë Salomón yë wyit'atëëytyukën.

⁶ Këtii yë'ë xy'ixtëty pën ëjts yëkës ets ko tëë yë xëëw'an xytsyä'äyës. Ëjts tëëjës yë nmëkä'äxtëjk xytyukjoot'anpëktë etsës të xytyuknipëktë ets tsatsymkyam nkëwen'atëtyës, yë'ëpaat yë nkam ntu'ujës ka'apës oy të n'ëkkëwent'ajnë.

⁷ Nëmaaykyës, mëti'ipë tsyojkpyën yë njuukyajtënës, ¿ma mkupixyny xyajtänë? ¿Maa xyajpo'kxy ko kyujkyxyëëwënë? ¿wi'ix koos jëtu'un njëtijnë tä to'oxytyëjkën ka'apë tsyënaaytyaknën ets tu'ujoty muum myaanë pyo'kxnë, ma mmëku'uktëjk tkëwent'atën yë kyupixynyëty?

Ma nimay y'ëëw'ëtsowtën

⁸ Pën ka'ap xynyijawë, mijts janty'oy janty tsuj myaj'ixy ma to'oxytyëjktëjkëtyën oyëtypë, yë'ë paye'ey yë kupixyny yë kyë'ë tyeky ets jam këwent'at yë mtsajppax ma jëyujkëwent'ajtpë tyëjkëtyën.

Yë ye'etyëjk

⁹ Mijts mëti'ipë ntsojkpyën nja'apën, jëtu'un mijts maas ëjtsën tä yë kwaayën mëti'ipë faraón yë kyepy wintëkäämpë tyukyajye'epyën.

¹⁰ Janty oy yë m'apënuuky xymyëëtëty mëti'ipë tatsktëy itkujky yajpatpën. Janty oy yë myo'kn xymyëëtëty mëti'ipë nantsëmjoty ijtpën.

¹¹ Tyam ëëts n'oytyuntëty yë mnantsëmëty mtatsktëyëty pu'ts pujxnëmpë mëët y'oytyunyëtyën ets mëti'ipë myëët'ajtypyën yë poop pujxn.

Yë to'oxytyëjk

¹² Ko yë yajkutujkpë nyaaxweetsy winkon ma kyääypyäjnën, yë'ë jap xu'kp jojkp janty pa'akwijtsnë yë on mëti'ipës nätyukja'axëpën.

¹³ Yë ja'ay mëti'ipës ntsojkpyën jëtu'un yë'ë maas ëjtsën tä yë on xuumy u'unkën mëti'ipës ntsi'tsk akujky nmëjëtijtypyën xëmë.

¹⁴ Yë ja'ay mëti'ipës ntsojkpyën jëtu'un yë'ë tä yë poxpëjyën mëti'ipë jam yajpatpën ma tsatym kyamën En-gadi itjotm.

Yë ye'etyëjk

¹⁵ Janty oy mkëxë'ëky mijts, mëti'ipë ntsojkpy nja'apën, janty'oy mkëxë'ëky. Jëtu'un yë mwiin yaj'ixy tä mäjtsk yë pakën.

Yë to'oxytyëjk

¹⁶ Janty oy mkëxë'ëky mijts, mëti'ipës ntsojkpy nja'apën, janty'oy mkëxë'ëky. Yë'ë tsuxk ujts yë'ë ntukma'ajëm.

Yë Ye'eytyëjk

¹⁷ Yë ajë kepy yë'ë tëjkwitsë'ajtp ets ciprés kepy yë'ë yajnitujkpy yë tëjk.