2 Tesalonicenses 1 - Biblia Dc en Mixe de Quetzaltepec

¹ Yë Pablo, Silvano ets ja Timoteo, tkajpxpo'kxtë ja mëpëjkpëtëjkëty mëti'ipë jam Tesalónica yajpatëpën, ko tu'ukyë y'itë mëët ja Dios ets Wintsën Jesukristë.

² Wä'än ja nTeety'ajtëm Dios ets Wintsën Jesukristë mmo'ojëtë ja kënu'kxën ets jotkujk'ajtën.

Yajtuknijawëtë ja ja'ay ko ja Kristë myina'any

³ Mëku'uktëjkëty, xëmës ja Dios nkukajpxëtë mëët miitskyëjxmëty, ijxtëm xypyaatës ntuntëty; jä'ä ko winpäjt'ëtëtsp ja mmëpëjkën ets nitsokën mëti'ipë mmëët'ajtëpën nixim niyam.

⁴ Paatykyëjxm miits jotkujk nimëtya'aktë maajëty ja Dios ja jyä'äy ye'eymyuktën, tääts jëtu'un mëj'äämpy mnaxtë mëët ja mëpëjkën, oy ja ja'ay ëxëëk mja'ixëtë ets mjapajëtitëtë.

⁵ Ya'atë yajknikëxë'kpy ko Dios pyaye'ey ijxtëm pyaat'atyën ets kopkpëky ko mtëkëtëty ma ja kyutujktaknën, jä'ä ko yë'ë tyam mku'ëyo'owëtëp.

⁶ Paat'ajtëp ets ja Dios tukumëtowëty mëti'ipë miits myaj'ëyoowëtëpën,

⁷ ets miits myajpo'kxëtëty ma tyam m'ëyowtën, näjyëtu'un tä ëëtsëtyën. Jää nëjkx jëtu'un jyäty kyëpety ko ënety ja Jesús myiny mëët ja y'anklëstëjk kutujkënmëëtpë jam tsajpjotm.

⁸ Yë'ë nyiminäämpy ets tukumëtowa'any mëti'ipë ja Dios ka'ap tmëmëtowtën ets ka'ap tpatuntën ja oy aaw oy ayuk ma ja Wintsën Jesukristë yajnimëtyä'äkyën.

⁹ Yajtëytyunantëp xëmëkyëjxm ets jëkäm yajpëjkta'aka'antë ma ja Wintsën ka'ap y'ixëtëty, ma ka'ap tpaatëtyën ja Wintsën ja myëj'ajtën jyääntyajtën ets myëk'ajtën.

¹⁰ Jëtu'un jyata'any jä'ä xëëw ko ënety ja Wintsën myiny, ko jyä'äy myëjjaw jyääntyjawëtëty ets tyukxoonta'akëtëty ni'ëmukë. Jam miits näjyëtu'un myajpaatëty, jä'ä ko tëë xymyëpëktë mëti'ipës të nkäjpxy të nmëtya'aktën.

¹¹ Jä'ä ko jyëtu'unëty, paaty ja Dios xëmë ntuknija'amyätsëtë, n'amëtow nmpëjktsowtës ets xytyuntëty xykyajpxtëty oypyë ijxtëm pyaat'atyën mëti'ipë Dios të wyinwitsëtën. Wä'än yë myëk'ajtën tyajkëxë'ëky oy ma miitsëtyën mëti'ipë mtsojkën'ajtëpën ets ma mtuunkëtyën ko mëpëktë.

¹² Jëtu'un'äämpy ja nWintsën'ajtëm Jesús yajmëjjaw yajjaantyjyawëty mëët miitskyëjxmëty, ets ja Dios mëët ja Wintsën Jesukristë myajmëjnaxa'anëtë ko tmëët'aty ja y'oyjyot y'oywyinma'any.