2 Macabeos 2 - Biblia Dc en Mixe de Quetzaltepec

¹ Ja noky jëtu'un y'ënä'äny: Ko ja käjpxynyajxpë Jeremías ojts tuk'ëne'emy ja judío ja'ayëty mëti'ipë naswop naskäppë yapattëpën jam Persia ko tkëwent'attëty ja jëën tä ënety të yajnikäjpxyën

² Ojts tyuk'ënä'ämëttë ets ka'ap tja'atyëkoytëty ja Dios ja y'ënä'ämën tyiy'ajtën ets ka'ap yajwin'ëëntëty ko t'ixtëty ja awinax ka'appë Diosëtyën, mëti'ipë oytyunyën mëët yë pu'tspujxn, poop pujxn ets ja wit tujkxy mëti'ipë mëët xyoxyëtyen.

³ Ets kanaak'ok y'ënëmaayëtë ets tyu'uye'etyëty oy tsuj, wi'ix mëpaat xëmë tjä'ämyätstën ja Dios ja y'ënä'äm kyuttujkën.

⁴ Ma ja nokkyën jëtu'un jap y'ënä'äny: ko yë Jeremías ojts tpatuny tu'uk ja ënä'ämën mëti'ipë ja Dios tuknippëjkën, pyëjkmujk ja tëjknikkäm ets ja kaaxë mëti'ipë myë'ijtypën ja käjpxytyu'unën, ojts jam kopk këjxm tmënëjkxy ma ja Moisés t'ixyën ja it naaxinyëtë mëti'ipë ja Dios ënety të twinwanën.

⁵ Ko ja Jeremías jam jyä'äjty ënet t'ijxpaty tu'uk ja tsaa''aank ets jap tyëjkëy, jap ojts tpëjktä'äky ja tëjknikkäm, ja kaaxë ets ja nyipëjkpäjn ja tsooy mëti'ipë pa'ak xu'kpën ets jattëkok pyëtsiimy, je'eyë ojts yajxon tyaj'ëtuky mëët tsaa.

⁶ Tam mëti'ipë winpijtën ets tjapëjkta'akantë tu'u'aay mëti'ipë jeexyë yajtuk'ijxwë'ënpën, je'eyëp ko ka'ap ojts t'ëkpatnëtë ja tsaa''aank.

⁷ Ko ja Jeremías tnija'awëy mëti'ipë ënety të tuntën, ojts t'ojy ets t'ënëmaay: Nipën mëpaat tkanijawë tääpë itjot, koonëm yë Dios xypokymyä'kxmëty ets xyajtu'ukmujkmëty jattëkok.

⁸ Jäänëm ja Dios kë'ëm tnikajpxëty maa ënety yajpaatyën ets ja myëj'ajt y'oy'ajtën yaj'ixëty jam yootsjotm, jëtu'un tä ojts yaj'ixyën ko jyuuky'äjty ja Moisés ets ko ojts ja Salomón tnixëëwtuny ja Dios ja tsyajptëjk ko ojts yajkunu'kxy.

⁹ Ya'atë noky tap nentu'un tnikäjpxy wi'ix ja Salomón, wijypë kejypë ojts kyäjpxyën mëët tu'uk ja winma'any, ko ja Dios tmooy ja wintsë'kën ets tukkë'ëtëjkëy ja tsajptëjk.

¹⁰ Ko Salomón ojts ja Dios tmëkäjpxy ënet ja jëën jam tsyo'ony tsajpjotm ets nyaaxkëtäky, wa'ats no'ktëkooytyääy ja jëyujk ooky mëti'ipë ënety ja Dios yajtukwintsë'këpën. Nentu'un jyäjty kyëpejty ko ja Moisés ojts ja wintsë'kën tyäky ma Diosën.

¹¹ Jëtu'un y'atëëy ko ja Moisés y'ënäny: Jëtu'un tä ja jëyujkën mëti'ipë yajtukwintsë'këpën ja Dios ma pokymyä'kxën yaj'amëtoyën, ka'ap yajtsu'utsy, nittooytyääpy wa'ats.

¹² Ëpëky ojts ja Salomón tuktujk xëëw xyëëwtuny.

¹³ Tëkokyë ya'atë mëti'ipë yam yajnimëtyakpën jap myiinta'ay ma Nehemías nyokyën. Tap nentu'un myiny ma yajnimëtya'aktën ja yajkuttujkpëttëjkëty, ja käjpxynyajxpëttëjkëty ja nyokyëty, mëti'ipë jyääytyën, ja mëj yajkuttujkpë David ja y'iynyoky ets tëkokkyë ja noky mëti'ipë jyääytyën ja wintsëntëjkëty ma tnimëtya'aktën wi'ix ijty ja wintsë'kën tyaktën.

¹⁴ Yë Judas Macabeo ojts nentu'un may ja noky tpaaty ets tpëjkmujktaay mëti'ipë ënety yajpatpën xiitsow yaatsow ko ja tsip y'ijty. Tyam, tääpë noky ëëts nmëët'ajta'ayëm.

¹⁵ Pen miitsëty mnijawëjantëp tääpë noky, käxtë oy pyënëty ets t'ixtëty ets tmënëjkxtëty.

¹⁶ Tyam yajnipëjktaakë ja xëëw mëti'ipë miinp winkoonpën ma yajpujy yajje'tsyën ja tsajptëjk, jëtu'un yam miits n'ënëëmëtë ets nentu'un xynyixëëwtuntëty.

¹⁷ Tëë Dios xyputëjkëmë ko të ntuknajxëmë ja amay jotmay, tëë xykuma'ayëmë, tëë nentu'un xymo'oyëm ja kuttujkën, ja teety'ajtk ets jattëkok të xyajwattsëmë ets yë'ë xykajpn'ajtmëty,

¹⁸ jëtu'un ijxtëm jap myinyën këxja'ay ma ënä'ämën kuttujkën. Nentu'un tyam yajjëjp'ixy ets xypa'ëyo'owmëty ets xyajmujkmëty jattëkok oy ënety maa të nyajpat të nyaj'ijxëm xii yaa, ets tu'kmukyë jattëkok n'ijtmëty ma ya'atë it naaxinyëtën kunu'kxypë. Jä'ä ko yë'ë të xyajtsokkëmë ma ja ëyo'on jotmay të nmëët'ajtëmën ets të tyajwa'atsy ya'atë tsajptëjk.

Ma yajnikäjpxyën ja jääpyë

¹⁹ Jasón, Cirene ja'ay, yë'ë ojts tja'ay ya'atë noky ma yajnimëtyä'äkyën ja Judas Macabeo mëët ja myëkä'äxtëjk, ma tsajptëjk wyä'ätsyën ets ma ja wintsë'këntyakn yajkënu'kxyën.

²⁰ Yë'ë ojts nentu'un tkujaaytyä'äy ko ja tsip tyuunë mëët ja yajkuttujkpë Antíoco Epífanes ets ja myaank Eupátor.

²¹ Ojts nentu'un tkuja'ay wi'ix ja Dios mëjwiin këjää tuktëjkëyën ja amay jotmay ma tputëjkëyën ja ja'ayëty mëti'ipë ënety jam tsiptuuntëpën ko tkuwantë ja mëpëjkën mëti'ipë ja judío ja'ay tyukjuuky'ajtëpën. Mëët yë'ëkyëjxm ko ja Dios ojts pyutëkkë ojts ja judío ja'ayëty myëta'aktë oy ënety nyiwäänë'attë ets tjä'ä'ajtaaytyë ja wit meeny mëti'ipë ja myëtsip tyukyajni'o'ktuttën.

²² Ojts jattëkok tpaattë ja tsyajptëjkëty, mëti'ipë mëj'äämpy ijtpën oy myaajëty. Ojts tyukpaatëttë jattëkok ja nyaax kyajpnëty, ja Jerusalén kajpn ets jattëkok tyajtuuntso'ontë ja ënä'ämën kuttujkën mëti'ipë ënety ja mëtsip të tyaj'atëkoyën. Mëët yë'ëkyëjxm ko ja Dios mëk tsyokkëttë jyawëttë.

²³ Tu'ukyë nyaj'akojmukka'antës ja mëkoxkpë noky mëti'ipë Jasón jyääyën.

²⁴ Jä'ä ko may myiny ja nyi''ijxpëjkën, ja nyijot nyiwinma'any ets tsippëty yajmëmay yajmëtajy.

²⁵ Jä'ä ëëts ntuknipëjktaakëtë nyaj'oyëja'antë ko pën tkajpxëty tyukxoonta'akëp, ka'ap tsip kyuwë'ëmëty ets tunëp ma jyuuky'ajtën mëti'ipë ënety kyäjpxypën.

²⁶ Tsip ojts ëka'any njawëtës koos ntuknipëjktakkëtë nyajwäänëja'antë ja noky, ka'ap ojts nmëkay nmë'uuktës ets ka'ap ojts nmëma'a nmëpo'kxtës.

²⁷ Jëtu'un ojts njawëtës tä ja'ay kääky tojkx tuknipëjktaakën mëti'ipë mayjä'äy xyu'kxjawëpën. Akujk jotkujkës të ntuunk'attë, ka'apës të nmëtsipkä'äxtë, jä'ä ko nija'awëtëpës ko may ja ja'ay tukxoonta'aka'antë.

²⁸ Ya'atë noky akonyë të yaj'oytyuny, paaty wä'än jam pën y'ëna'ana'any ko këjääpaat kya'oyëty ets jeexyë yajnimëtyä'äky.

²⁹ Jëtu'un ya'atë tuunk të yaj'oytyuny tä tu'uk tëjk kojpë t'oytyunyën jemy ja tyëjk, wiink ja'ay kyoopy ets oy tjaakyaj'ijxëntëkkë, jëtu'un ëëts të nmëmay të nmëtajtë ja ntuunkëty.

³⁰ Ko ja Jasón ojts ëka'any tja'ay ya'atë noky këjääpaat ojts tnimëtyä'äky, në'paaty ojts tmëmay tmëtajy.

³¹ Yaa, winkony akonyë të yajnimëtyakojy, jä'ä ko ka'ap tjëkyepy tyim yajnimëtyakta'ajëty tëëpë tyunyë jyätyën.

³² Oy tsyo'onta'akëty ya'atë käjpxy mëtyä'äky, ka'ap mëpaat ni'ikyë n'ëëwyo'on nkajpxyo'onëmë. Paaty, yaapaat yajnimëtyakojy wi'ix kyajpxtsoonyën, e tyam yë'ë tso'onta'akaamp wi'ix winë të tyuny të jyätyën.