2 Macabeos 15 - Biblia Dc en Mixe de Quetzaltepec

Ma kyamëtä'äkyën ets y'ookyën ja Nicanor

¹ Ko ja Nicanor tnija'awëy ko ja Judas Macabeo mëët ja jyä'äy jam yajpaattë Samaria y'itjotm, ënet tnitso'ony ets mëët tsyiptuna'any, po'kxën xëëw ënety.

² Ja judío ja'ayëty mëti'ipë atsip pyanëjkxtëpën ja Nicanor, ojts t'ënëëmëtë: —Mëjwintsën, yë po'kxën xëëw mëj'äämpy ëëts nyäjnaxtë, ka'ap y'oyëty ko jää tsip xytyuknipëjktaakë, mëët'at ja winkutsë'kën ma Diosën, mëti'ipë winë y'ijxyp nyija'apën.

³ E ja ja'aykupoj Nicanor, je'eyë y'ëtsooy: —Ka'apës maa nnijawë'aty tu'uk Dios y'ënä'äny ets ja po'kxën xëëw yajmëjjawëty.

⁴ Tä ja judío ja'ay y'ëtsoowtë: —Dios, juukypë, mëti'ipë yajkuttujkpën jam tsajpjotm, yë'ës të xytyuk'ënä'ämtë ets ëëts nmëjjawëtëty ja po'kxën xëëw.

⁵ E ja Nicanor jëtu'un y'ëtsooy: —Oy, ëjts nmëët'ajtypës kuttujkën yaa naaxwiiny naaxkëjxy, tyam ntuk'ënä'ämtë ets xypëjkë'ëktëty yë mpujxn mkepyëty mëti'ipë yajmëtsiptuunpën ets mëmëtoowtëkës maas yam nkutujpë'attyën. Je'eyëp ko ja Nicanor ja wyinma'any ka'ap ojts tyu'uwitsy.

⁶ Yë Nicanor, mëët ko nyemyëjjaw nyejyääntyjawëty ets ko myäy tyäjy ko myëta'aka'any, ojts tuknipëjktaakë tkojja'any tu'uk ja mëjpotsy, mëët ja wit meeny, mëti'ipë ënety myääpy tyäjpyën tukyajni'o'ktu'uta'any ja Judas Macabeo.

⁷ E ja Judas Macabeo yi'iyë ojts tuk'ijxpety ja Dios, nyija'ap ënety ko yë'ë pyutëkkëja'anyë.

⁸ Paaty ja myëku'uktëjk tjotmëkwinkajpxëy ets t'ënëmaay ko amëk jotmëk y'ittëty, këtii tsyë'ëkëtëty oy ja myëtsip jyanipëtë'ëkëttëty mëti'ipë ka'ap ja Dios tmëpëktën. Yë'ë jyä'ämyätstëp ko Dios yë'ë xëmë nepyutëkkë yäjkpy, jëtu'un ojts yaj'ixy ko ja tsip ojts y'ëktuunëpë.

⁹ Ojts tjotmëkwinkajpxë mëët ko tukmëmëtyäky ja ënä'ämën tëy'ajtën mëti'ipë jyääytyën ja Dios kyäjpxnyajxpëttëjkëty, tyukjä'ämyäjts wi'ix ja Dios tputëjkëyën ja nyaax kyajpn ko tsyiptuuny, jëtu'un ojts akujk jotkujk tyajwë'ëmy.

¹⁰ Ko kyajxpta'ajanë yë'ë ojts tjaaknikäjpxy wi'ix tyëkoytyën ja ja'ayëty mëti'ipë ka'ap ja Dios tmëpëktën ets tsip yajmëpëkkëty mëti'ipë jyanikajpxtëpën, jä'ä ko yë'ëjëty tëkatsy tii tnimëtya'aktë ets tëkatsy winë ttuntë.

¹¹ Ja tsyiptuunpëttëjk akujk jotkujk ojts nyejyawëttë, ka'ap yë'ëkyëjxmëty ko tmëët'attë ja tsaa kepy mëti'ipë myëtsiptuuntëpën, yë'ëkyëjxm ko tmëtowtë ja aaw ayuk oypë, mëti'ipë yajjotkujktakpën. Ëpëky ja Judas Macabeo ojts tyukmëmëtya'akëttë tu'uk ja tsuu kuma'ay mëti'ipë ënety të twin'ixyën ets jëtu'un jotkujk nyejya'awëtë.

¹² Jam kuma'ayjyoty t'ijxy, ko ja Onías mëti'ipë ijty teety'ajtpën, mëtëypë jyuuky'äjtyën, jëtu'un myëxu'unk'ajty ets jëtu'un myëjja'ayëy, oy winë ttuuny, aak wyinkutsë'këy oy pyënëty ets yu'unk naxym jyä'äy'äjty. Jëtu'un ojts twin'ixy kootëm ja kyë'ë txajë'ëky ets ja Dios t'amëtoy tpëjktsoy ets ja judío ja'ayëty myëta'aktëty ma ja nyaax kyajpn tkuwa'antën.

¹³ Ënet nentu'un t'ijxy tu'uk ja ja'ay jam wya'këxë'ëky, poop ja wyääy, yaj'ijxp ko myëët'ajtyp ja kuttujkën ets mëj'ajtën.

¹⁴ Ënet ja Onías ojts kyäjpxy ets y'ënäny: Ya'atë ja'ay Jeremías yë'ë, Dios yë kyäjpxynyäjxpë, tam ja Dios t'amëtoy tpëjktsoy ets ja Kunu'kxypë ja Naax Kajpn tkuwa'an tnixajëty.

¹⁵ Ok ja Jeremías ojts ja y'a'oykë'ë tnasxajë jam ma Judas tyänën ets tkë'ëmooy tu'uk ja tëypujxn mëti'ipë aak pu'ts pujxn mëët y'oytyunyëtyën ets t'ënëmaay.

¹⁶ Ëxajë ya'atë tëypujxn jëtu'un tä tu'uk nenyamo'ojën mëti'ipë Dios mmooyëpën. Yë'ë mtukyajkuttëkoyëp ja mëtsip.

¹⁷ Mëët ya'atë oy'aaw oy'ayuk, mëti'ipë Judas nyimëtyakkën, akujk jotkujk ojts ja ëna'ktëjk nyejyawëttë. Ja judío ja'ayëty ojts jyotmëkta'aktë ets ënettyë ojts tuknipëjktaakëtë nyëjkxa'antë tsiptuunpë ma ja myëtsippëtyën. Jëtu'un ojts myäytyë tyajtë ko ni'ik oy ko tim yajwintu'upëktëty ja jotmay jä'ä ko nëkoopë ja naax kajpn, ja mëpëjkën ets ja tsajptëjk xëmë y'ittëty amayjoty jotmayjyoty.

¹⁸ Yë'ë ënety ni'ik myëmaay myëtajtëp ja tsajptëjk naamnëmpë wyatsta'ayën këtiinëm ja y'u'unk y'ëna'këty ets ja kyujëën kyutëjkëty.

¹⁹ E ja mëti'ipë jam kajpnjotm wë'ëmtën je'eyë kyumon kyutukkëtë, yë'ë myëmaay myëtajtëp wi'ix jëtää ja tsip wyinpëtsëma'any jyëjpëtsëma'anyën.

²⁰ Aak yë'ë ja ja'ay y'awxijtëp wi'ix wyinpëtsëm jyëjppëtsëmëtyën ja amay jotmay. Ja mëtsip jëjp'ixy ënety jam yajpaattë, may elefantë ojts tpëjkta'aktë ma t'ixtën kutsë'ëkë, tëë ënety nyewyaatswijtsta'ajëttë mäjtskpëky, pa'apa'a.

²¹ Ko ja Macabeo t'ijxy nimay ja myëtsip mëti'ipë nimiinëpën mëët ja pujxn kepy mëti'ipë myëtsiptuuntëpen ets ëpëky nimay ja elefantë ëwa'anëtypë. Ënet ja kyë'ë ojts txajwä'kxy ets ja Dios ojts tmëkäjpxy: ka'ap yë'ëjëty ja ja'ay tukmëtä'äky ko oyëty pujxn, kepy tmëëtëty mëti'ipë tyuktsiptuunpyën. Dios yë'ë yäjkpy nepyutëkkë ets ja ja'ay myëtä'äky mëti'ipë tuk'ijxpäjtëpën.

²² Ets ja Dios t'ënëmaay: Mijts Wintsën, këjxmëpë yajpaatyën, mëjpë jaantypë, mijts ojts ja Ezequías, Judá yajkuttujkpë xytyuknikexy ja mtsajpjotmëtë kukexy ets tyaj'o'ky mëko'px ja majkta'px mëkoxk ja Senaquerib tsyiptuunpëttëjk.

²³ Nentu'un tyam, Wintsën, tsajpjotmëpë myajpaatyën, tuknikäjxtëkës ëëts ja mtsajpjotmëtë kukäjpxy ets t'ëtsë'ëkëty t'ajawëty ja mëtsip.

²⁴ Mijts yajtsëtyut yajwintëkoy mëët yë mkë'ë mteky tääpë ëxëëkja'atyëjk mëti'ipë wiinkjaty mtijëpën ets mëti'ipë nyipëtë'ktëpën yë mnaax mkajpn kënu'kxypë. Jëtu'un tyajjëjpkëjxy ja nyu'kxtakkën.

²⁵ E ja Nicanor ja tsyiptuunpëttëjk ni'ikyë myiin'ëtë'ëtstë ets jyäntyxyu'ux jyäntywyoptë, y'ëwtë yya'axtë amëjaaw,

²⁶ ja Judas Macabeo tsyiptuunpëttëjk ojts twinkuwa'akëtë amëk jotmëk ja myëtsip, tyam ja Dios tjantymyëkajpxtë.

²⁷ Kyë'ë tyeky mëët tsyiptuntë ets jyot wyinma'any mëët ja Dios tmëkajpxtë winë'aaw winëjot. Jä'ä myëtsip tyaj'o'ktë i'pxmajk mil. Akujk jotkujk ojts nyejyawëttë ko ja Dios pyutëjkëyëtë.

²⁸ Ko ja tsip tyuuntaayë, tääts ojts jam tsyo'onëtë akujk jotkujk, jam ja Nicanor tukye'epyäjtë o'kpë akujky mëët ja kyepy ets ja pyujxn, tëë ënety y'o'knë jam tsipjotm.

²⁹ Tääts ja Dios ojts tmëkajpxtë akujk jotkujk mëët ja kyë'ëm'aaw kyë'ëm'ayukkëty.

³⁰ Ja Judas Macabeo, yë'ë ënety mëk ja tsip të twinkuwa'akë, jä'ä ko yë'ë tyu'uwinwoopy ja myëkunaax myëkukajpn ma tkuwanyën ja nyaax kyajpn, mutsknëm ojts jëtu'unpë tmëtso'ontaakë. Ojts tni'ënä'ämë ets ja Nicanor tkuppujxtu'utëty ets ja y'a'oykë'ë tnëpujxëtëty ets jam Jerusalén tmënëjkxtëty.

³¹ Ko jam jyä'äjty ënet ja ja'ay tyajtu'ukmujky ets ojts tkexy ja aaw ayuk ma ja wiinkëtypë ja naax kajpnën mëti'ipë winkon yajpattëpën. Ja teettyëjk jam tyajnaaxwä'ky ma ja wintsë'këntyaknën.

³² Ojts tuk'ixy ja naax kajpn ja Nicanor ja kyëpajk ets ja y'a'oykë'ë, mëti'ipë ënety wiinkjaty të tijyën ja Dios jyëën tyëjk mëti'ipë maaytyääyëpën winë.

³³ Ok ojts nentu'un tni'ënä'ämë ets ja Nicanor yajtsujkpëtsëmëty ja yyä'än ets ja witsn ttuk'apippëtëty. Ojts nentu'un tni'ënä'ämë ets jap tsajptëjk'ëkë'p tkutëytyëty ja Nicanor ja kyë'ë ets tkumëtowëty jëtu'un ja nyëë pyoky.

³⁴ Ni'ëmukkë ja ja'ay jam pya'at'ixtë tsajpjkëjxm ets ojts twin'ëw twinya'axtë ja Dios mëët ko ënety të pyutëkkë, jëtu'un y'ënantë: Kënu'kxy mëjjawë ja Dios mëti'ipë ja tsyajpjëën tsyajptëjk wa'ats ets oy të tyaj'ittyën.

³⁵ Yë Judas Macabeo jam ojts tkutëy ja Nicanor ja kyëpajk ma ja naax kajpnën napotsypë ets yë'ë yajtuk'ixëty ko Dios të tputëkkë ja nyaax kyajpn.

³⁶ Ni'ëmukkë ojts ja ja'ay y'ëna'antë ko tääpë xëëw jä'ämyetsy xëmë nyaxëty, jä'ä yajmëjjawëty ma myajktëkëëk'anyën mëmajkmäjtsk po'opë. Mëti'ipë arameo ayuk tyijtëpën Adar, ma kyutsu'ujën ja Purim xëëw.

Ma jyëjpkëxyën ya'atë mëtyä'äky

³⁷ Jëtu'un ojts tyunyë jyätyë winë ma ja Nicanor yajnimëtyä'äkyën. Yë hebreo ja'ayëty ojts jyotkujkëtë jä'ä ko jam yajpatnëtë ma ja kyë'ëm naax kyë'ëm kajpnëtyën. Yaas nyajjëjpkëxy ya'atë nmëtyä'äkyës.

³⁸ Jotkujkës nnejyawëja'anyë pen ya'atë mëtyä'äky oy ets mä'kxy wyi'imy. Pen kajts, nyijawëtëp oy pyënëty ko ka'ap nëkooyë tsyowpaaty ets jëtu'unës të nyaj'oyë ijxtëmës të nwinma'anypäätyën.

³⁹ Jëtu'un ijxtëm yajnijawën ko ka'ap oy y'atëkkë ko aak yë'ë yaj'uuky tsatym nyëëxun ëkë nëë. Jää ni'ik oy xyu'kxjawë yë tsatym nyëë xun ko yajtukpa'uuky ëpëky yë nëë. Nen tää tu'uk mëtyä'äky mëti'ipë yajkajpxpatpën ko ënety tii në'ëwitsy tu'uwitsy të yajjaaypety: Ko yajtukjaty wi'ix oy yajxëpinyën ja aaw ayuk, oy tmëtoy ja'ay mëti'ipë noky kyäjpxypën. Jëtu'unës nyajjëjpkëxy ya'atë nmëtyä'äky.