2 Crónicas 9 - Biblia Dc en Mixe de Quetzaltepec

Ma ja to'oxytyëjk yajkutujkpë, jampë Sabá tsyoonyën, tniminyën ja Salomón

¹ Ja to'oxytyëjk mëti'ipë yajkutujkpën jam Sabá ojts tnijawë ko ja Salomón mëj'äämpy ja ja'ay jyëkyepyë oymyaakajpnëty; paatykyëjxm ojts tninëjkxy jam Jerusalén ets t'ixmatsa'any mëët ja yajtë'ëwën tsipëtypë. Ko jyä'äjty jam, may ja ja'ay pyamiinë mëti'ipë jämyëët'ajtëpën ets may tyajmiiny jëyujk jëku'ux, tsooy mëti'ipë pa'akxu'kpën, pu'ts pujxn ets ja tsaa oyëtypë. Ko jam jyä'äjty ma ja Salomón yajpaatyën, tëkokyë tyajtëëwta'ay mëti'ipë ënety të tnimay të tnitajën,

² e yë Salomón wa'ats ni'ëtsoowtaay ja yajtë'ëwën, nitu'uk ojts jëtu'unyë ja yajtë'ëwën kyawë'ëmy.

³ Ko ja to'oxytyëjk t'ijxy, ja Sabá yajkutujkpë; ko ja Salomón wijy yajxon ets t'ijxy ja jëën tëjk,

⁴ ko oyëty, ja jë'kxy pëky, ka'ayën ukën jampë yajpaatyën ma kyääytyaknën, ja tëjk ma ja tyuunpëtëjk y'itën, ja wyit tyujkxy mëti'ipë yajtuuntëpën ja tyuunpëtëjkëty, ja uukytyäämpëty, ja tojkx'apëjkëpëty ets ma jap pya'tëkën ja tsajptëjk, janty mëj ixy ojts timjyawë;

⁵ tä kë'ëm t'ënëmaay ja yajkutujkpë: Mëti'ipës të tmëtoy'ätyën maas yë nkajpnën, mëti'ipë të xytyuny të xykyäjpxyën ets ja mwijyajtën, mëtëy yë'ë ets njantymyëpëjkpyës ënät tyam;

⁶ je'eyëp ko ënätnëmës të nmëpëky koos kë'ëm yaa të nminy etsës të n'ixy mëti'ipë nyimëtyaktëpën. Ëjts ka'apës ënety jyëtu'unëty të nyajtukmëmëtyä'äky wintu'upëky ko mëj këjää ja mwijyajtën ijxtëmës tyam të n'ixyën, jä'ä ko mijts ni'ik mwijyëty, tëë xywyinnajxnë ja mëti'ipës të njayajtukmëmëtyä'äkyën.

⁷ Wi'ixpëm jëtää yë nkujëën mkutëjk janty jotkujk nyäyjyawëtë ets wi'ixpëm jëtää yë mtuunpëtëjk tsuj xoontä'äky yajpaatë ma mijtsën, ko xëmë tmëtoow'itë ja m'aaw m'ayuk mëti'ipë mëët ja wijyajtën mkajpxpëtsëëmpyën.

⁸ Kënu'kxy ets mëjjawë yë mWintsën y'ity mëti'ipë mTios'ajtypyën; ko të mni''ijxkëtä'äkyë ets mijts m'ënä'ämëty ma ya'atë kutujktaknën. Mëët yë'ë ko oy ja mTios tsoky tjawë ja Israel ja'ayëty, paaty të mpëjktä'äkyë ets mijts myajkutukëty ma yë'ëjëtyën mëët ja tëyajtën ets ja oyajtën ma tu'ukyë y'itëtyën winë xëëw winë jëmëjt.

⁹ Tä ojts tkë'ëmo'oy ja yajkutujkpë tëkëëk mil ja taxtujk mëko'px kilë aakyë'ë pu'ts pujxn ets may ja tsooy mëti'ipë pa'akxu'kpën ets ja tsaa oyjyätyëtypë. Nijëna'a ënety jëtu'un kyayaj'ixynyëm jam Israel ja maytsyooy mëti'ipë pa'akxu'kpën tä ja to'oxytyëjk jampë yajkutukyën Sabá tyuknimiinën ja Salomón.

¹⁰ Ëpëky ja pu'ts pujxn ets oyjyätyëtypë ja tsaa mëti'ipë ënety të tmëmintën ja Hiram ja jyä'äy ets ja Salomón ja jyä'äy, jampë tyajtso'ontën Ofir, ma näjyëtu'un tyajtso'ontë ja oyëtypë kepy ets tsaa.

¹¹ Yë'ë ya'atë kepy yajtuun yë Salomón ko t'oytyuuny ja wa'kpäjn ko yajnipa'tëkë ja tëjk mëmäjtsk nikë'ëpë, näjyëtu'un ja kutujkëntëjk ja y'akäämtuk, nän yë'ë yajtuun ya'atë kepy ko t'oytyuuny ja kow, ka'tsnëty, xijtnëty. Ja jëtu'unpë, jemy ojts yaj'ixy jam Judá.

¹² Ja yajkutujkpë Salomón ojts tmo'oy ja to'oxytyëjk, Sabá yajkutujkpë tëkokyë mëti'ipë amëtoowën, ëpëky mëti'ipë ënety të tmo'oyën ko winë näjyëtu'un myooyë. Ok ja to'oxytyëjk, Sabá yajkutujkpë ojts wyimpijnë ma nyaax kyajpnën, mëët ja jyä'äy mëti'ipë jämyëët'ajtëpën.

Wi'ix ja Salomón may ja wit meeny tmëëtëty ets wi'ix akäjpxy y'ityën

¹³ Ja pu'ts pujxn mëti'ipë ja Salomón ijty y'ëxajëpën winjëmëjt jä'ä wyinë'aty i'px mäjtsk mil tsim,

¹⁴ ëpëky mëti'ipë ja ato'kpëtëjk ets ja tu'uye'epyëtëjk kyëpäjtëpën. Näy ëpëky mëti'ipë ja Arabië yajkutujkpë ets ja wiinkëtypë ja yajkutujkpëtëjk myëmiintën, näjyëtu'un ja pu'ts pujxn ets ja poop pujxn ets tmo'otë ja Salomón.

¹⁵ Mëët ya'atë pu'ts pujxn ojts yë Salomón mäjtsk mëko'px tyajkojy yë akëëytyuk mëti'ipë yë tsiptuunja'aytyëjk yajtuuntëpën, tëtujk tsipjaty tuk'oytyuuny tu'ukjatypë akëëytyuk.

¹⁶ Ojts näjyëtu'un ëpëky tni'ënä'ämë yaj'oytyunëty tëkëëk mëko'px akëëytyuk mutskjatyëtypë, jä'ä tuk'oytyuuny tu'ukjatypë akëëytyuk naxy tëkëëk kilë pu'ts pujxn ets jap tkupëjkëtyääy ma ja kutujkëntëjkën mëti'ipë tyijtëpën Kepy yukjot.

¹⁷ Ojts ni'ënä'ämë tu'uk ënyääypyäjn ma ja yajkutujkpë pyo'kxëtyën, aakyë'ë yajtuun oytsyaa ets ojts ni'ënä'ämë ets pu'ts pujxn tuknikoytyëty.

¹⁸ Ja ënyääypyäjn tëtujk niyujkwä'äky pyotsyëty ets tu'uk wya'kpäjn aak pu'ts pujxn mëët y'oytyunyëty, tam tmëëtëty pa'apa'a nyimajtstakn ets yajtukpa'akojëy potsy jëtu'unpë kyëxë'ëkyën kaajën.

¹⁹ Ëpëky ojts tkojtë majkmäjtsk yë potsy jëtu'unpë kyëxë'ëkyën kaajën, pa'apa'a t'oytyuuntë ma ja tëtujk niyujkwä'äkpyë ja potsyën. Nimaa ënety jëtu'unpë potsy maa kyayaj'ixynyëm tä tyaapën.

²⁰ Tu'kë'ëyë ja yajkutujkpë y'a'ukën aak pu'ts pujxn ijty mëët y'oytyunyëty ets tëkokyë ja apëjk atu'unën mëti'ipë tuunpën ma ja kaaypyäjnën, japë y'ityën ma ja mëti'ipë tyijtëpën Kepy yukjot. Ka'ap jap maa tyajtuuntë ja poop pujxn, jä'ä ko ma ojts y'ëne'emyën yë Salomón ka'ap ënety ya'atë pujxn nëkooyë tsyowëty,

²¹ jä'ä ko ja yajkutujkpë jyä'äyëty xëmë ënety jam nyëjkxtë Tarsis mëët ja Hiram ja tyuunpëtëjk ets jam tyajtsoontë pu'ts pujxn, poop pujxn, oy tyaa, joonëty jëyujkëty, mikëty ets patutkëty.

²² Yë yajkutujkpë Salomón ni'ik ojts kumeeny y'ity ets ni'ik ojts wijjyä'äy'äty këtiinëm jyëtu'unëty ja wiinkëtypë ja yajkutujkpë.

²³ Tëkokyë ja yajkutujkpëtëjk aak myëtoowta'ajantëp ënety ja wyijajtën ja Salomón mëti'ipë ja Wyintsën të myo'oyën,

²⁴ Oynyapënëty ijty winjëmëjt tyukninëjkxyë ja näynyamo'ojë: Tä yë poop pujxnën, pu'ts pujxnën, wit tujkxy, nijän ets tujn pujxn, tsooyën, jëyujkën ets tsajpkaajën.

Ma ja Salomón y'ajuy y'atookyën mëët yë pujxnwintëkäämpë ets kwaay

²⁵ Salomón jä'ä ijty tmëët'aty taxk mil yë ijtakn ma tyajtänën yë kwaay ets pyujxnwintëkäämpë, majkmäjtsk mil ijty tmëëtëty yë kwaay. Jam tyajktaay ma y'itën mëti'ipë ja tsiptuunpëjk myëtsiptuuntëpën ets jam Jerusalén ma yajkutujkpë ja tsyiptuunpëtëjkëtyën.

²⁶ Ja Salomón jä'ä ijty nyikopk'ajtyp tëkokyë ja yajkutujkpëtëjk mëti'ipë yajpatëpën Éufrates, ma ja filistejë ja'ayëtyën ets mapaat ja Egiptë ja'ayëty ja tsyëpa'anëty y'ëwtitën.

²⁷ Yë yajkutujkpë may yaxon tnipëjkpejty yë pu'ts pujxn jëtu'un tä tsaajën; may ja ajë kepy jëtu'un tä tsajp pëët kepy jam joyjotm myäytyänëtën.

²⁸ Ja Salomón ja jyëyujk aakjam yajmëtso'ony Musri ets ma wiinkëtypë kajpnën.

Ma ja Salomón y'o'knë tyëkooynyën

²⁹ Ma yajnimëtyä'äkyën yë Salomón, wi'ix tsyo'ontäkyën ets wi'ix jyëjpkëxyën, jap myiinta'ay këxja'ay ma ja nokyën mëti'ipë Natán jyääyën ets ma myinyën ja Ahías ja y'aaw y'ayuk jampë kyukajpnëtyën Siló, mëti'ipë Wintsën myëtuunën ets ma myinyën këxja'ay mëti'ipë ja Iddo ja Wintsën tuk'ijx tukmëtoowën wi'ix ënety ja Jeroboam jyata'any kyëpäta'anyën, ja Nabat ja myaank.

³⁰ Salomón jä'ä ojts jam Jerusalén y'ëne'emy, wëxtyikxy jëmëjt,

³¹ ko y'o'knëy jam nyaaxtëjkëy ma David kyajpnën, mëti'ipë tyeety'ajtën. Yë'ë kutëjkëyë ma yajkutujktaknën ja myaank Roboam.